དེ་རིང་པེ་ཅིན་གནམ་བདེ་སྒོ་མོ་ཆེའི་མདུན་ཐང་དུ་བུད་མེད་ཅིག་གིས་རང་ལུས་མེར་བསྲེཊ་ཀྱིས་སྲིད་གཞུང་ལ་ངོ་རྒོལ་བྱས་ཡོད་འདུག
དྲུག་བཞི་ཐེན་ཝང་དྲྭ་བའི་སྟེང་གནས་ཚུལ་སྤེལ་བ་ལྟར་ན། དེ་རིང་ཕྱི་ཚེས་ ༥ ཉིན་སྟེ། སྐབས་བཅུ་གཉིས་པའི་རྒྱལ་ནག་རྒྱལ་ཡོངས་དམངས་འཐུས་ཚོགས་ཆེན་ཐེངས་གཉིས་པའི་ཚོགས་འདུ་མགོ་འཛུགས་ཀྱི་ཉིན་དང་པོའི་པེ་ཅིན་གྱི་ཆུ་ཚོད་ ༡༠།༤༤ ཡས་མས་སུ། གནམ་བདེ་སྒོ་མོ་ཆེའི་ཐང་ཆེན་དུ་རང་ལོ་ ༤༠ ཡས་མས་ཡིན་པའི་བུད་མེད་ཅིག་གིས་རང་ལུས་མེར་བསྲེཊ་ཀྱིས་ངོ་རྒོལ་གནང་ཡོད་པ་དང་། ཅང་མ་འགོར་བར་དྲག་ཆས་ཉེན་རྟོག་པ་དང་དམག་མི། སྐོར་སྲུང་མི་སྣ་བཅས་འབྱོར་ཏེ་མེ་གསོད་འཕྲུལ་ཆས་ཀྱིས་ཁོ་མོའི་ལུས་སྟེང་གི་མེ་བསད་རྗེས་བཙན་འཁྲིད་བྱས་ཡོད་པ་མ་ཟད། སྔ་དྲོ་གནམ་བདེ་སྒོ་མོ་ཆེ་ཐང་ཆེན་དུ་ཡིག་ཆ་འགྲེམས་སྤེལ་བྱས་པའི་བུད་མེད་ཅིག་ཀྱང་འཛིན་བཟུང་བཙན་འཁྲིད་ཀྱིས་གར་ཡོད་མ་ཤེས་པར་ལྷག་ཡོད་འདུག
དེ་རིང་པེ་ཅིན་མི་མང་ཚོགས་ཁང་ཆེན་མོའི་ནང་ཚོགས་བཞིན་པའི་ཚོགས་འདུའི་དེར། རྒྱ་ནག་གི་སྲིད་འཛིན་ཞི་ཅིན་ཕིན་དང་སྲིད་བློན་ལིས་ཁེ་ཆང་གཙོས། ཡུས་ཀྲིན་ཧྲིན་དང་ལིག་ཡུན་ཧྲན། ཝང་ཆི་ཧྲན། ཀྲང་ཀའོ་ལིས་བཅས་གཙོས་པའི་ཆེས་མཐོའི་དཔོན་རིགས་དང་འཐུས་མི་ ༣༠༠༠ ལྷག་མཉམ་ཞུགས་གནང་ཡོད་འདུག་ལ། ཚོགས་འདུའི་ཐོག་རྒྱལ་སྲིད་སྤྱི་ཁྱབ་ཁང་གི་ ༢༠༡༣ ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་གཞི་ལག་བསྟར་བྱས་པའི་གནས་ཚུལ་དང་། ༢༠༡༤ ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་གཞིའི་འཆར་ཟིན་གྱི་སྙན་ཞུ། ༢༠༡༣ ལོའི་ཀྲུང་དབྱང་དང་ས་གནས་ཀྱི་སྔོན་རྩིས་ལག་བསྟར་བྱས་པའི་གནས་ཚུལ་དང་འདི་ལོའི་སྔོན་རྩིས་འཆར་ཟིན་སྒྲོགས་སྦྱང་གནང་གི་ཡོད་འདུག
ཚོགས་འདུ་དེར་རྒྱ་ནག་གི་ས་གནས་དང་གྲོང་ཁྱེར་ཁང་མང་པོའི་འཐུས་མི་ཕེབས་ཀྱི་ཡོད་སྟབས། ཚོགས་འདུ་མ་ཚོགས་ཡར་སྔོན་ནས་བཟུང་རྒྱ་ནག་ནང་གི་མང་གཙོ་དོན་གཉེར་བ་དང་ཁྲིམས་རྩོད་པ་སོགས་ཀྱིས་བརྒྱུད་ལམ་ཁག་འདྲ་མིན་བརྒྱུད་དེ་གྲོས་ཚོགས་འཐུས་མིར་གཞུང་གི་སྲིད་བྱུས་དང་འབྲེལ་བའི་བསམ་ཚུལ་རབས་དང་རིམ་པ་བཏོན་ཡོད་མ་ཟད། དེ་རིང་ཚོགས་འདུའི་ཉིན་དང་པོར་པེ་ཅིན་གནམ་བདེ་སྒོ་མོ་ཆེའི་མདུན་ཐང་དུ་བུད་མེད་གཉིས་ཀྱིས་རང་ལུས་མེར་བསྲེཊ་དང་ཡིག་ཆ་འགྲེམས་སྤེལ་གྱི་ལམ་ནས་གཞུང་ལ་ངོ་རྒོལ་བཅས་བྱས་ཡོད་འདུག དེ་བཞིན། དེ་རིང་གི་ཧྲང་ཧེ་དང་ཧྲན་ཏུང་། ཀོས་ཀྲིག ཅི་ལིན། ཧོང་ཀོང་བཅས་ས་ཁུལ་གཞན་དུའང་མི་མང་གི་འཕྲེད་དར་སོགས་འཕྱར་ཏེ་སྲིད་གཞུང་ལ་རེ་སྐུལ་དང་དགོས་འདུན་འདོན་ཀྱི་ཡོད་ཀྱང་། རྒྱ་ནག་གཞུང་གིས་མི་མང་གི་བསམ་ཚུལ་ལ་ཡ་ལན་མེད་པར་མ་ཟད། གནམ་བདེ་སྒོ་མོ་ཆེའི་མདུན་ཐང་དུ་དྲག་ཆས་དམག་མི་དང་ཉེན་རྟོག་པ། སྐོར་སྲུང་མི་སྣ་བཅས་འགྲེམས་འཇོག་གིས་དམ་དྲག་བྱེད་ཀྱི་ཡོད་པ་དང་། ས་གནས་དང་གྲོང་ཁྱེར་ཁག་གཞན་དུའང་མི་མང་གི་འགྲོད་བསྐྱོད་དང་བརྒྱུད་ལམ་བཅས་ལ་སྟངས་འཛིན་དང་ལྟ་རྟོག་བཅས་བྱས་ཏེ་དམ་དྲག་བྱེད་ཀྱི་ཡོད་འདུག
གསར་འགོད་པ། དོན་གོ
