༢༠༡༤ ལོ་འདི། ༧གོང་ས་བཅུ་བཞི་པ་ཆེན་པོར་བཀའ་དྲིན་རྗེས་དྲན་ཞུ་བའི་ལོ་ཡིན།

བོད་མིའི་རང་དབང་སྒེར་ལངས་དུས་དྲན་ཐེངས་ ༥༥ བའི་ཐོག་སྲིད་སྐྱོང་མཆོག་གིས། གཉིས་སྨན་དབུ་མའི་ལམ་གྱི་སྲིད་བྱུས་འདི་བོད་དོན་དཀའ་རྙོག་སེལ་ཐབས་ཀྱི་ཐབས་ལམ་བཟང་ཤོས་ཡིན་སྟབས། མུ་མཐུད་དམ་འཛིན་བྱ་རྒྱུའི་ཆོད་སེམས་བརྟན་པོ་ཡོད་པ་དང་། སྲིད་འཛིན་ཞི་ཅིན་ཕིན་གྱིས་མགོ་ཁྲིད་པའི་རྒྱ་ནག་གི་མགོ་ཁྲིད་གསར་པ་ཚོས་ཀྱང་སྲིད་བྱུས་འདིའི་གལ་འགངས་ཤེས་རྟོགས་ཐུབ་པའི་ཡིད་ཆེས་བྱེད་ཀྱི་ཡོད་སྐོར་གསུངས་སོང་།

དེ་རིང་ཕྱི་ཚེས་ ༡༠ ཉིན་ཞོགས་པའི་ཆུ་ཚོད་ ༩།༠༠ ཐོག བཞུགས་སྒར་ངྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་ཞི་བའི་སྒེར་ལངས་ཀྱི་དུས་དྲན་ཐེངས་ ༥༥ སྲུང་གཙི་གནང་ཡོད་ཅིང་། དུས་དྲན་མཛད་སྒོར་བོད་མིའི་སྒྲིག་འཛུཊ་ཀྱི་ཁྲིམས་ཞིབ་པ་ཆེ་ངག་དབང་འཕེལ་རྒྱལ་མཆོག་དང་ཁྲིམས་ཞིབ་པ་གཞན་གཉིས། བོད་མིའི་སྒྲིག་འཛུཊ་ཀྱི་སྲིད་སྐྱོང་བློ་བཟང་སེང་གེ་མཆོག སྤྱི་འཐུས་ཚོགས་གཙོ་སྤེན་པ་ཚེ་རིང་དང་ཚོགས་གཞོན་མཁན་པོ་བསོད་ནམས་བསྟན་འཕེལ་བཅས་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྤྱི་འཐུས་རྒྱུན་ལས་རྣམ་པ་དང་གཞུང་ཞབས་ལས་བྱེད། ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ཚན་ཁག་གི་ཚོགས་གཙོ་སྐུ་ཞབས་ཧེ་རེ་མཱ་ལོ་སེལ་ (Heuri Malosse) ལགས། ཨ་རི་དང་ཨོ་སི་ཊོ་ལི་ཡ་བཅས་ནས་ཕེབས་པའི་རྒྱ་རིགས་དམངས་གཙོ་དོན་གཉེར་བ་དང་བོད་དོན་རྒྱབ་སྐྱོར་བ། བཞུགས་སྒར་ཁུལ་གྱི་སེར་སྐྱ་མི་མང་བཅས་མི་མང་ཆིག་སྟོང་ལྷག་འཛོམས་སོང་།

མཛད་སྒོའི་ཐོག་མར་བོད་ཁྱིམ་སློབ་མའི་རྔ་རོལ་དང་བཅས་སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་རྒྱལ་དར་བསྒྲེངས་འཛུཊ་དང་བོད་རྒྱལ་ཁབ་ཆེན་མོའི་རྒྱལ་གླུ་གྱེར་འདོན། ཚང་མ་སྐུ་བཞེངས་ཐོག་བོད་བསྟན་སྲིད་མི་རིགས་ཆེད་སྐུ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་དག་ལ་མྱ་ངན་བཅས་གནང་བཅས་གནང་སོང་ལ། ཡུ་རོབ་མཐུན་ཚོགས་ཀྱི་སྐུ་མགྲོན་སྐུ་ཞབས་ཧ་རེ་མཱ་ལོ་སེལ་ལགས་ཀྱིས། རང་དབང་དང་བྲལ་བའི་བོད་མི་ཚོ་ནི་ཁོང་གི་མིག་དཔེ་ལྟ་བུ་ཡིན་པ་དང་། བོད་མི་ཚོར་འཛམ་གླིང་ནང་རང་དབང་དང་འགྲོ་བ་མིའི་ཐོབ་ཐང་སོགས་ལ་རྒྱབ་སྐྱོར་གནང་མཁན་གྱི་རྒྱལ་ཁབ་དང་སྒྲིག་འཛུགས། མི་སྒེར་ཚང་མས་གུས་བརྩི་རྒྱབ་སྐྱོར་ཞུ་བཞིན་ཡོད་པ་ལྟར། ཁོ་རང་གིས་ཀྱང་འདས་པའི་ལོ་ ༥༠ ལྷག་གི་རིང་བོད་ནང་སྡུག་མྱོང་བཞིན་པའི་བོད་མི་ཚོར་གདུང་སེམས་མཉམ་སྐྱེད་ཞུ་བཞིན་ཡོད་པ་དང་། བོད་ཀྱི་གནད་དོན་ནི་རྒྱལ་སྤྱིའི་གནད་དོན་ཞིག་ཆགས་ཡོད་སྟབས། ཡུ་རོབ་མཐུན་ཚོགས་གཙོས་རྒྱལ་སྤྱིའི་སྒྲིག་འཛུགས་ཁག་གིས་རྒྱབ་སྐྱོར་ཞུ་དགོས་པ་ཆགས་ཀྱི་ཡོད་པ། ད་ལྟའི་བར་ཁོང་ཚོས་བོད་མིའི་སྒྲིག་འཛུཊ་ཀྱི་སྲིད་སྐྱོང་དང་གྲོས་ཚོགས་ཀྱིས་གཏན་ལ་ཕབ་པའི་སྲིད་བྱུས་གཞིར་བཟུང་རྒྱ་གཞུང་གིས་བོད་དོན་དཀའ་རྙོག་སེལ་རྒྱུར་རྒྱབ་སྐྱོར་མཐའ་གཅིག་ཏུ་ཞུས་ཞུ་བཞིན་ཡོད་སྐོར་སོགས་བརྗོད་སོང་།

སྤྱི་འཐུས་ཚོགས་གཙོ་མཆོག་གིས་གསུང་འཕྲིན་སྒྲོགས་སྦྱོང་གནང་བའི་ནང་། རྒྱ་གཞུང་གིས་བོད་ནང་ཆེས་གདུག་རྩུབ་དང་གཡོ་སྒྱུ་ཅན་གྱི་མི་སེར་སྤེལ་བའི་རིང་ལུཊ་ཀྱི་སྲིད་བྱུས་ངན་པ་ལག་བསྟར་བྱས་དང་བྱེད་བཞིན་པའི་དབང་གིས་བོད་མི་རྣམས་བཟོད་ཐབས་བྲལ་ཏེ། ལོ་རབས་བརྒྱད་ཅུ་པ་ནས་ ༢༠༠༨ ལོའི་ས་བྱི་ཞི་རྒོལ་ཆེན་མོ་སོཊ་སྔ་ཕྱིར་ཞི་རྒོལ་རབས་དང་རིམ་པར་བྱས་ཡོད་པ་དེ་དག་ལ་རྒྱ་གཞུང་གིས་མི་སྤྱོད་ལས་འདས་པའི་དྲག་གནོན་བྱས་སྟབས། བོད་མི་རྣམས་བཟོད་ཐབས་ཡེ་ནས་བྲལ་ཏེ་བློས་གཏོང་ཆེན་པོས་༸གོང་ས་མཆོག་བོད་ལ་གདན་འདྲེན་ཞུ་དགོས་པ་དང་བོད་མིར་རང་དབང་དགོས་པ་སོགས་ཀྱི་དགོས་འདུན་གསལ་སྟོན་དང་བཅས་རང་ལུས་མེར་བསྲེགས་ཀྱི་ཞི་རྒོལ་གནང་སྟེ། ༢༠༠༩ ཟླ་ ༢ ཚེས་ ༢༧ ཉིན། བོད་མདོ་སྨད་རྔ་པ་རུ་གྲྭ་བཀྲ་བྷེ་ལགས་ཀྱིས་རང་ལུས་མེར་བསྲེཊ་གནང་བ་ནས་བཟུང་སྟེ་ ༢༠༡༤ ཟླ་ ༢ ཚེས་ ༡༣ ཉིན་རྔ་པར་བློ་བཟང་རྡོ་རྗེ་ལགས་ཀྱིས་རང་ལུས་མེར་བསྲེཊ་གནང་བའི་བར་བོད་མི་ ༡༢༦ གིས་རང་ལུས་མེར་བསྲེཊ་གནང་སྟེ། འདས་གྲོངས་སུ་ཕྱིན་པ་ ༡༠༨ དང་། བཙན་བྱོལ་ནང་ ༡༩༩༨ ཟླ ༤ ཚེས་ ༢༧ ཉིན་རྒྱལ་ས་ལྡི་ལིར་ཐུབ་བསྟན་དངོས་གྲུབ་ལགས་ཀྱིས་རང་ལུས་མེར་བསྲེགས་གནང་བ་ནས་ ༢༠༡༣ ཟླ ༨ ཚེས་ ༦ ཉིན་ཀརྨ་ངེས་དོན་རྒྱ་མཚོ་ལགས་ཀྱིས་བལ་ཡུལ་དུ་རང་ལུས་མེར་བསྲེགས་གནང་བའི་བར་ཁྱོན་བོད་མི་ ༧ གྱིས་རང་ལུས་མེར་བསྲེགས་གནང་སྟེ་མི་ ༤ འདས་གྲོངས་སུ་ཕྱིན་ཡོད་པ་དང་། བོད་ནང་དུ་རང་ལུས་མེར་བསྲེགས་གཙོས་བོད་མིས་རྒྱ་ནག་གཞུང་ལ་ངོ་རྒོལ་བསྟུད་མར་འབྱུང་རྐྱེན་གཙོ་བོ། རྒྱ་གཞུང་གིས་བོད་དུ་ཆབ་སྲིད་ཀྱི་དྲག་གནོན་དང་རིག་གཞུང་མཉམ་བསྲེས། དཔལ་འབྱོར་ཟུར་ཕུད། མི་རིགས་དབྱེ་འབྱེད། འབྲོག་ས་གནས་སྤོ། ཁོར་ཡུག་རྩ་གཏོར་སོགས་མཁྲེགས་འཛིན་གྱི་སྲིད་བྱུས་ངན་པ་ལག་བསྟར་བྱས་དང་བྱེད་བཞིན་པའི་དབང་གིས་བྱུང་བ་ཀུན་གསལ་ཡིན་ཞེས་འཁོད་འདུག

སྤྱི་འཐུས་ཀྱི་གསུང་བཤད་ནང་། བོད་མིའི་འཐབ་རྩོད་ཀྱི་ངོ་བོ་ནི་མཐའ་གཅིག་ཏུ་འཚེ་མེད་ཞི་བ་དང་དབུ་མའི་ལམ་གྱི་སྲིད་བྱུས་ལ་འགྱུར་བ་མེད་པར་རྒྱ་ནག་གཞུང་དང་ཞི་མོལ་བརྒྱུད་བོད་རྒྱའི་དཀའ་ངལ་སེལ་ཐབས་ལ་༸གོང་ས་མཆོག་གི་དགོངས་གཞི་ལྟར་བོད་མིའི་སྒྲིག་འཛུཊ་ཀྱིས་འབད་བརྩོན་གནང་བཞིན་པ་ནི་རང་དབང་དང་དམངས་གཙོར་ལོངས་སུ་སྤྱོད་བཞིན་པའི་སྐྱེ་བོ་ཀུན་གྱིས་གཟིཊ་གསལ་ཡིན་པ་དང་། འདི་ལོའི་ཕྱི་ཟླ་ ༢ ཚེས་ ༢༡ ཉིན་༸གོང་ས་མཆོག་དང་ཨ་རིའི་སྲིད་འཛིན་སྐུ་ཞབས་བྷ་རག་ཨོ་བྷ་མ་མཆོག་རྣམ་གཉིས་ཨ་རིའི་ཕོ་བྲང་དཀར་པོའི་ནང་ཆུ་ཚོད་གཅིག་ཙམ་རིང་མཇལ་འཕྲད་མཛད་སྐབས། སྲིད་འཛིན་ཨོ་བྷ་མ་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་བོད་རྒྱའི་དཀའ་རྙོག་སེལ་ཐབས་དབུ་མའི་ལམ་གྱི་སྲིད་བྱུས་ལ་ཨ་རིའི་གཞུང་ནས་རྒྱབ་སྐྱོར་ཡོད་པ་མ་ཟད། ཨ་རིའི་སྲིད་གཞུང་ལ་བོད་ནང་འགྲོ་བ་མིའི་ཐོབ་ཐང་གི་གནས་སྟངས་དང་། ཆོས་དད་རང་དབང་ཇེ་སྡུག་ཏུ་འགྲོ་བཞིན་པ་དེར་ཧ་ཅང་ཐུགས་འཚབ་ཆེན་པོ་ཡོད་སྐོར་གསུངས་པ་དང་སྦྲགས། རྒྱ་ནག་གཞུང་གིས་༸གོང་ས་མཆོག་གམ་ཁོང་གི་སྐུ་ཚབ་དང་ལྷན་དུ་དོན་ཕན་ལྡན་པའི་གྲོས་མོལ་གནང་དགོས་སོགས་ནན་གསུངས་གནང་ཡོད། འོན་ཀྱང་། རྒྱ་ནག་གཞུང་ཕྱོགས་ཀྱིས་ད་ཕན་བོད་ཐོག་འཛིན་པའི་སྲིད་བྱུས་ནི་སྔར་ལས་ཇེ་མཁྲེགས་ཇེ་སྡུག་ལས་གུ་ཡངས་ཀྱི་རྣམ་འགྱུར་གང་ཡང་མཐོང་ཐོས་མེད་པའི་གནས་སུ་ཡོད་པ་འདི་ནི་ཧ་ཅང་བློ་ཕམ་གྱི་གཞི་རུ་གྱུར་ཡོད། ཅེས་དང་།

ཕྱི་ལོ་ ༢༠༡༣ ཟླ་བ་ ༡༡ པའི་ནང་རྒྱ་ནག་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱུན་ལས་སུ་བདམས་ཐོན་བྱུང་ཡོད་མོད། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་གསལ་བསྒྲགས་འགྲོ་བ་མིའི་ཐོབ་ཐང་དང་རང་དབང་གི་རྩ་དོན་རྣམས་ཁ་དན་ཚིག་གནས་ཀྱིས་ལག་བསྟར་ཇི་བཞིན་བྱེད་ཐུབ་མིན་ཐད་དོགས་གནས་ཆེན་པོར་གྱུར་ཡོད་སྟབས། རྒྱལ་སྤྱིའི་གཞུང་མང་ཡོངས་དང་ཁྱད་པར་རྒྱ་ཆེའི་རྒྱ་ནག་མི་མང་རྣམས་ནས་ཅིས་ ཀྱང་གཟུར་གནས་བདེན་འཚོལ་ཡོང་བའི་ཡིད་ཆེས་དང་རེ་སྐུལ་ཤུགས་དྲག་ཞུ་བཞིན་ཡོད། ཅེས་དང་། ༸གོང་ས་མཆོག་གིས་དུས་གསུམ་གསལ་གཟིགས་ངང་བོད་བསྟན་སྲིད་མི་རིགས་དང་བཅས་པའི་འཕྲལ་ཕུགས་རྒྱང་གསུམ་བདེ་ཐབས་སླད་ཆབ་སྲིད་དང་། འཛིན་སྐྱོང་གི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་མགོ་ཁྲིད་ལ་རྩིས་སྤྲོད་མཛད་རྗེས་བོད་མིའི་སྒྲིག་འཛུགས་མ་ལག་དང་བཅས་པས་ཞུ་སྒོ་མཐའ་དག་ལ་འབད་བརྩོན་ལྷོད་མེད་ཞུ་བཞིན་ཡོད་པར་གཞིས་བྱེས་རྒྱ་ཆེའི་མི་མང་རྣམས་ནས་གདེང་འཇོག་ཆེན་པོས་རྒྱབ་སྐྱོར་གནང་བཞིན་ཡོད་པ་དང་། སླད་ཀྱང་བོད་མི་རྣམས་དམ་ཚིག་འོ་ཆུ་གཅིག་འདྲེས་ངང་རང་འགན་འཁུར་ལེན་གྱིས་ཤེས་འཇོན་ལྷག་བསམ་མཉམ་འདེགས་ཀྱི་ནུས་ཤུགས་ཡོད་ཚད་མཉམ་སྤུངས་ཀྱིས་སྔར་ལྷག་ཕྱར་གྲུ་མཉམ་འདེགས་ཀྱི་གོང་བུའི་ནུས་པ་ཇེ་ཆེར་གཏོང་རྒྱུ་ནི་འཕྲལ་ཕུགས་གཉིས་ཀའི་ཕན་བདེའི་རྩ་བར་གྱུར་ཡོད་པས་ཚང་མས་རྟག་ཏུ་ཡིད་གཟབ་ངང་སྒོ་ཀུན་ནས་འབད་འབུངས་ཆེ་སྐྱེད་བྱ་གལ་ཆེ་བ་ལྟར་དེ་རིང་བསྐྱར་དུ་འབོད་སྐུལ་ནན་ཏན་ཞུ་རྒྱུ་ཡིན། ཞེས་འཁོད་འདུག

མཇུག་ཏུ་ཚོགས་གཙོ་མཆོག་གིས། “ རྒྱ་གར་དབུས་ས་གཉིས་དང་བོད་མིའི་སྒྲིག་འཛུཊ་བདེ་སྲུང་ལས་ཁུངས་འབྲེལ་ཡོད་ཡོངས་ཀྱིས་ཐུཊ་འགན་རྐང་བཞེས་ཀྱིས་༸གོང་ས་མཆོག་གི་སྐུ་ཕྱྭར་གང་ཅིའི་ཤུགས་སྣོན་རྒྱག་མུས་ཀྱང་། མི་ལོ་ ༥༥ སྔ་རོལ་དུ་རྒྱ་གཞུང་གིས་མངོན་སུམ་འཛེམས་མེད་ཀྱིས་༸གོང་ས་མཆོག་གི་སྐུ་ཕྱྭར་བསྡོ་བའི་གྲབས་གཤོམ་བྱས་ཡོད་པ་ལྟར་རྒྱ་གཞུང་གིས་ཆབ་སྲིད་ཀྱི་དགོས་མཁོའི་གཡོ་བྱུས་འོག་ལས་འབྲས་རྩིས་མེད་དང་ལོ་རྒྱུས་ཀྱི་ནག་ཉེས་ཅན་བསམ་མེད་དོལ་རྒྱལ་རྗེས་འབྲང་གི་མིང་ཁུར་བ་ཁག་གཅིག་ནས་རྟག་ཏུ་དངུལ་དངོས་ཀྱི་ཁེ་ཕན་ཁོ་ནའི་དབང་གིས་ནུས་ཤུགས་ཆེ་རུ་བཏང་སྟེ་བོད་ནང་དུ་དཀྲུག་ཤིང་དང་། ༸གོང་ས་མཆོག་ལ་མཚན་སྨད་དང་སྐུར་འདེབས་ཞུ་བཞིན་ཡོད་པ་མ་ཟད། ཨ་རི་དང་རྒྱ་གར་གསང་ལས་ཁང་ནས་༸གོང་ས་མཆོག་གི་སྐུ་ཕྱྭར་སྔར་ལྷག་གཟབ་ནན་བྱ་གལ་ཆེ་བའི་སྐོར་སྙན་གསེང་བྱུང་ཡོད་ན། བོད་མིའི་སྒྲིག་འཛུགས་དང་བོད་མི་སྤྱི་བོ་གནམ་བསྟན་ཡོངས་ཀྱིས་རྫི་གསང་རྣོན་པོས་ཕྱར་གྲུ་མཉམ་འདེགས་གནང་དགོས་རྒྱུ་ཧ་ཅང་གལ་ཆེ་ཆགས་ཡོད། ” ཅེས་གསུངས་སོང་།

མཇུག་ཏུ་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་གསུང་འཕྲིན་སྒྲོགས་སྦྱོང་གནང་བར། ༢༠༠༩ ལོ་ནས་ད་བར་བོད་ཆོལ་ཁ་གསུམ་ནང་རང་ལུས་མེར་བསྲེཊ་གནང་མཁན་ ༡༢༦ བྱུང་ཡོད་པ་དང་། བཀའ་ཤག་གི་ངོས་ནས་ཚབས་ཆེའི་ལས་འགུལ་འདི་རིགས་མ་སྤེལ་རོགས་ཞེས་འབོད་སྐུལ་རིམ་པ་ཞུས་ཀྱང་རང་ལུས་མེར་བསྲེགས་མུ་མཐུད་འབྱུང་བཞིན་པ་དང་། རང་ལུས་མེར་བསྲེགས་གནང་རྒྱུར་ང་ཚོས་མོས་མཐུན་བྱེད་ཀྱི་མེད་ཀྱང་། ཁོང་ཚོའི་མངོན་འདོད་ལ་རྒྱབ་སྐྱོར་བྱེད་ཀྱིན་ཡོད་ཅེས་སོགས་འཁོད་འདུག

བཀའ་ཤག་གི་གསུང་འཕྲིན་ནང་། ཕྱི་ལོ་ ༢༠༢༠ ཟིན་སྐབས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ལ་བཙན་འཛུལ་བྱས་ཏེ་ལོ་བདུན་ཅུ་འགྲོ་རྒྱུ་ཡིན་པ་དང་། དེ་དུས་དེ་སྔའི་རང་དབང་གི་བོད་མཐོང་མྱོང་མཁན་གྱི་མི་རབས་ཧ་ཅང་ཉུང་དུ་འགྲོ་རྒྱུ་ཡིན། ༧གོང་ས་མཆོག་ཀྱང་དགུང་གྲངས་བརྒྱད་ཅུ་གྱ་ལྔར་ཕེབས་རྒྱུ་དང་། བོད་མི་རིགས་ཀྱི་གཉན་འཕྲང་ཆེ་ཤོས་ཀྱི་དུས་སྐབས་སུ་བླ་ན་མེད་པའི་དབུ་འཁྲིད་ལམ་སྟོན་མཛད་ནས་ལོ་ངོ་བདུན་ཅུ་ཧྲིལ་པོ་འཁོར་གྱི་ཡོད་སྟབས། གཞིས་བྱེས་གཉིས་ཀའི་ནང་མི་རབས་གཞོན་པ་ཚོས་གདོང་ལེན་བྱ་དགོས་པའི་གནས་སྟངས་མང་པོ་ཡོང་གི་ཡོད། བོད་ནང་ལ་ཆ་མཚོན་ན་དེ་སྔའི་རང་དབང་གི་བོད་རྒྱུས་མངའ་མེད་པའི་མི་རབས་འབའ་ཞིག་ཆགས་རྒྱུ་དང་། ཕྱོགས་མཚུངས་བཙན་བྱོལ་སྤྱི་ཚོགས་ནང་ཡང་དེ་ལྟར་ཆགས་རྒྱུ་ཡིན། ཁྱད་པར་བཙན་བྱོལ་བོད་མིའི་མི་འབོར་ནི་བོད་མི་ས་ཡ་དྲུག་གི་བརྒྱ་ཆ་ ༢།༥ ལས་ཟིན་གྱི་མེད་པ་དེ་དག་ཀྱང་རྒྱ་གར་ཁུལ་དང་ནུབ་ཕྱོགས་རྒྱལ་ཁབ་ཁག་ནང་མང་ཉུང་འདྲ་མཉམ་ལྟ་བུ་ཆགས་ངེས་ཡིན། བཙན་བྱོལ་གྱི་གནས་སྟངས་ནི་ངེས་པ་མེད་པའི་རང་བཞིན་དང་། བཙན་བཟུང་ནི་མི་རིགས་ཀྱི་ངོས་འཛིན་རྩ་མེད་འགྲོ་ཉེན་ཆེ་བའི་ཛ་དྲག་གི་གནས་སྟངས་ཤིག་ཡིན་པར་བརྟེན། གཞིས་དང་བྱེས་ཀྱི་གནས་བབ་མི་འདྲ་བའི་འོག་འཚར་ལོངས་བྱུང་བའི་མི་རབས་གསར་པ་ཚོར་བོད་དོན་འཐབ་རྩོད་མུ་མཐུད་རྒྱུན་སྐྱོང་བྱ་དགོས་པའི་འགན་འཁྲི་བབས་ཡོད། ཅེས་བཀོད་འདུག

བཀའ་ཤག་གི་གཏམ་བཤད་ནང་། དེ་ཡང་ཕུགས་རྒྱང་རིང་པོའི་ཐབས་བྱུས་ཀྱི་ཚུལ་དུ་བོད་མིའི་སྤྱི་ཚོགས་ཀྱི་བསམ་བློའི་འཁྱེར་ཕྱོགས་དང་ལག་ལེན་གཉིས་ཀའི་ཐོག་ནས་རང་རྐྱ་འཕེར་བའི་རང་ཁ་རང་གསོ་ཡོང་ཐབས་བྱ་དགོས། ལོ་ལྔ་བཅུ་ལྷག་ཕྱིན་པའི་འཐབ་རྩོད་ལམ་ལྷོང་ཡོང་བར་མི་གཞན་གྱི་རོགས་སྐྱོར་ཁོ་ནར་བརྟེན་ན་འགྲིག་ཐབས་མེད་ཅིང་། ད་ཆ་ང་ཚོས་གདེང་སྤོབས་ལྡན་པའི་སྒོ་ནས་མགོ་ཁྲིད་ཀྱི་ལས་འགན་ཁུར་ཐུབ་པ་བྱ་དགོས། དེ་ལྟར་ཡོང་བར་ཤེས་ཡོན་ནི་རྨང་གཞི་ཡིན། གནའ་དེང་གི་ཤེས་ཡོན་ཟུང་དུ་འབྲེལ་ཏེ་བོད་མི་རིགས་ཀྱི་ཐུན་མོང་མ་ཡིན་པའི་ཡ་རབས་བཟང་པོའི་གཞུང་བསྲངས་ཏེ་བོད་མིའི་བདེན་དོན་འཐབ་རྩོད་རྒྱུན་སྐྱོང་བྱ་དགོས། སྤྱི་ཚོགས་ཤེས་ཡོན་ལྡན་པ་ཞིག་བྱུང་ན་རང་ཁ་རང་གསོ་ཡོང་ཐུབ་པ་དང་། ནུས་འཇོན་ལྡན་ཞིང་འཛིན་སྐྱོང་ཚགས་ཚུད་པ། དེ་བཞིན་བོད་མིའི་བདེན་དོན་འཐབ་རྩོད་ལའང་རྒྱལ་སྤྱིའི་ནང་རྒྱབ་སྐྱོར་སྔར་ལྷག་ཐོབ་རྒྱུ་ངེས། བོད་མིའི་སྒྲིག་འཛུགས་ནི་གཞིས་བྱེས་བོད་མི་ཡོངས་ཀྱི་བློ་གཏད་བཅོལ་ཡུལ་གྱི་སྲོག་ཤིང་ལྟ་བུ་ཡིན་སྟབས། ༧གོང་ས་མཆོག་དང་སྒྲིག་འཛུགས་དེ་ལས་ལྷག་པ་ཞིག་མེད་སྟབས་ཆིག་སྒྲིལ་གྱི་ནུས་པ་མ་ཉམས་པ་བྱེད་རྒྱུ་ནི་དོན་གྱི་སྙིང་པོ་ཡིན། མི་རབས་གཞོན་པ་ཚོས་འགན་ཁུར་མང་ཙམ་བླང་རྒྱུར་གཞེན་སྐུལ་ཞུ་རྒྱུ་དང་། གསར་གཏོད་རང་བཞིན་ཅན་གྱི་ལས་འཆར་དང་སྲིད་བྱུས་ཁག་མུ་མཐུད་སྤེལ་རྒྱུ་ཡིན།

དགའ་སེམས་འཁོལ་བའི་ངང་བོད་མི་དང་བོད་དོན་རྒྱབ་སྐྱོར་བ་ཡོངས་ལ་ཞུ་རྒྱུར། བོད་མིའི་སྒྲིག་འཛུགས་ཀྱི་ངོས་ནས་ཕྱི་ལོ་ ༢༠༡༤ འདི་༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་དང་ཆབས་ཅིག འདི་ལོ་༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ཉེར་ལྔ་འཁོར་བའི་དུས་ཚིགས་ཀྱང་འཁེལ་གྱི་ཡོད་པ་སྲུང་བརྩི་ཟབ་རྒྱས་ཞུ་རྒྱུ་ཡིན། དེ་མཚུངས་འདི་ལོ་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་ཉེར་ལྔར་ཕེབས་པའི་འཁྲུངས་སྐར་ཡང་སྲུང་བརྩི་ཞུ་རྒྱུ་ཡིན། ད་ལྟའི་ཆར་ཆོལ་གསུམ་བོད་རིགས་ཡོངས་རྫོགས་དམ་ཚིག་རྡོག་རྩ་གཅིག་སྒྲིལ་གྱི་གནས་ཚད་མཐོ་ཤོས་སུ་སླེབས་ཡོད་པ་དང་། གཞིས་བྱེས་གཉིས་བསམ་འདུན་གཅིག་གྱུར་ཡིན་པ་མ་ཟད། ང་ཚོས་མུ་མཐུད་ཆོད་སེམས་བརྟན་པོའི་སྒོ་ནས་འབད་བརྩོན་བྱས་ན་ནམ་ཞིག་བོད་དོན་བདེན་མཐའ་གསལ་རྒྱུ་ངེས་པ་ཡིན། གཞིས་བཞུགས་བོད་རིགས་སྤུན་ཟླ་རྣམས་ལ་ཞུ་རྒྱུར། ང་ཚོའི་མདུན་དུ་ལྷག་པའི་དཀའ་ངལ་དང་འཐབ་རྩོད་ཀྱི་འགྲུལ་བཞུད་ཇི་ལྟར་རིང་ཡང་རྒྱལ་ཁ་འཐོབ་རྒྱུ་ངེས་པ་ཡིན། ཉེ་སྔོན་རྟ་དབང་ཁུལ་དུ་༧གོང་ས་མཆོག་དང་། ང་ཚོའི་ཕ་མེས་རྣམས་བཙན་བྱོལ་དུ་འབྱོར་སའི་ཕེབས་ལམ་མཇལ་རྒྱུ་བྱུང་བ་དང་། ཕར་ཕྱོགས་ཀྱི་བོད་ཀྱི་བརྗིད་ཆགས་རི་བོ་དེ་དག་ཀྱང་མཐོང་བྱུང་ལ། བོད་ལ་ཕྱིར་ལོག་འགྲོ་སའི་ལམ་ཤུལ་ཡང་མཐོང་ཐུབ་པ་ནི་རྟེན་འབྲེལ་དུ་སེམས། ཞེས་སོགས་འཁོད་འདུག

མཇུག་ཏུ་སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་དང་འབྲེལ་ཏེ་རྒྱ་ནག་གཞུང་ལ་གསུངས་དོན། “ ང་ཚོས་དབུ་མའི་ལམ་གྱི་སྲིད་བྱུས་གཞིར་བཟུང་མིང་དོན་མཚུངས་བའི་རང་སྐྱོང་གི་ལམ་ནས་བོད་ནང་ཆབ་སྲིད་དྲག་གནོན་གྱི་ཚབ་ཏུ་མང་ཚོགས་ཀྱི་གཞི་རིམ་རང་དབང་དང་། དཔལ་འབྱོར་དབྱེ་འབྱེད་ཀྱི་ཚབ་ཏུ་དཔལ་འབྱོར་ཡར་རྒྱས། སྤྱི་ཚོགས་དབྱེ་འབྱེད་ཀྱི་ཚབ་ཏུ་སྤྱི་ཚོགས་འདྲ་མཉམ། རིག་གཞུང་རྩ་གཏོར་གྱི་ཚབ་ཏུ་རིག་གནས་སྲུང་སྐྱོབ། ཁོར་ཡུག་གཏོར་གཤིག་གི་ཚབ་ཏུ་ཁོར་ཡུག་སྲུང་སྐྱོབ་བཅས་ཡོང་ཐབས་བྱེད་བཞིན་ཡོད། གཉིས་སྨན་དབུ་མའི་ལམ་གྱི་སྲིད་བྱུས་འདི་བོད་དོན་དཀའ་རྙོག་སེལ་ཐབས་ཀྱི་ཐབས་ལམ་བཟང་ཤོས་ཡིན་སྟབས་མུ་མཐུད་དམ་འཛིན་བྱ་རྒྱུའི་ཆོད་སེམས་བརྟན་པོ་ཡོད། སྲིད་འཛིན་ཞི་ཅིན་ཕིན་གྱིས་མགོ་ཁྲིད་པའི་རྒྱ་ནག་གི་མགོ་ཁྲིད་གསར་པ་ཚོས་དངོས་ཡོད་གནས་སྟངས་དང་འཚམ་པའི་སྲིད་བྱུས་འདིའི་གལ་འགངས་ཤེས་རྟོགས་ཐུབ་པའི་ཡིད་ཆེས་བྱེད་ཀྱི་ཡོད། ” ཅེས་གསུངས་བྱུང་།

གཙུག་ལག་ཁང་གི་གཞུང་འབྲེལ་མཛད་སྒོ་གྲོལ་རྗེས། བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས། དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཀྱིས་མི་མང་གི་སྣེ་ཁྲིད་དེ་ངྷ་ཤོད་ཀ་ཅཱ་རི་ཁྲིམས་ཁང་བར་སྐད་འབོད་གོམ་བགྲོད་ཀྱི་ལས་འགུལ་སྤེལ་སོང་།

གསར་འགོད་པ། དོན་གོ