དེ་རིང་དཔེ་སྟོན་སློབ་གྲྭའི་འཛིན་རིམ་བཅུ་པའི་སློབ་ཐོན་མཛད་སྒོའི་ཐོག་སྲིད་སྐྱོང་མཆོག་གིས། མ་འོངས་ལོ་གཉིས་ཀྱི་ནང་དཔེ་སྟོན་སློབ་གྲྭའི་སློབ་མའི་ཤེས་ཡོན་གྱི་གནས་ཚད་འདི་འདྲ་རེད་ཅེས་རང་བཞིན་གྱིས་ཁ་གྲག་ཡོང་གི་རེད་ཅེས་གསུངས་སོང་།
དེ་རིང་ཕྱི་ཚེས་ ༡༨ ཉིན་སྔ་དྲོ་གངས་སྐྱིད་སཾ་བྷོ་ཊ་ཉིན་སློབ་ཏུ་མེས་དབོན་གཙུག་ལག་དཔེ་སྟོན་སློབ་གྲྭའི་འཛིན་རིམ་བཅུ་པའི་སློབ་ཐོན་མཛད་སྒོ་དང་པོ་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་སྲིད་སྐྱོང་བློ་བཟང་སེང་གེ་མཆོག་དང་། ཤེས་རིག་དྲུང་ཆེ་དངོས་གྲུབ་ཚེ་རིང་ལཊ། སཾ་བྷོ་ཊ་བོད་སློབ་སྤྱི་ཁྱབ་འགན་འཛིན་ཀརྨ་ཆུང་བདག་ལཊ། དེ་བཞིན། ཤེས་རབ་དགའ་ཚལ་སློབ་གླིང་གི་འགན་འཛིན་དང་སློབ་སྦྱི། མེས་དབོན་གཙུག་ལག་སློབ་གྲྭའི་སློབ་སྤྱི་གཙོས་པའི་དགེ་ལས་སློབ་ཕྲུག་དང་ཕ་མ་བཅས་འཛོམས་འདུག་ལ། མཛད་སྒོའི་ཐོག་སྐུ་མགྲོན་རྣམ་པ་དང་དགེ་ལས་སློབ་ཕྲུག་གི་སྐུ་ཚབ་བཅས་ཀྱིས་མཐར་ཕྱིན་སློབ་མར་མཇལ་དར་བསྒྲོན་འབུལ་དང་། མཐར་ཕྱིན་སློབ་མ་གཉིས་ཀྱིས་བོད་དབྱིན་གཉིས་ཀྱི་ཐོག་བཀའ་དྲིན་རྗེས་དྲན་གྱི་གཏམ་བཤད་བྱས་སོང་།
དཔེ་སྟོན་སློབ་གྲྭའི་སློབ་སྤྱི་བསྟན་འཛིན་རྡོ་རྗེ་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་སྐབས། ད་ལོའི་འཛིན་རིམ་བཅུ་པའི་སློབ་ཐོན་པའི་ནང་བུ་མོ་ ༡༠ དང་བུ་ ༡༤ ཡོད་ཀྱང་། སློབ་མ་གཅིག་གིས་རྩ་དགོངས་ཞུས་ཏེ་ཁེ་ན་ཌར་ཕྱིན་སྟབས། རྒྱ་གར་རྒྱལ་ཡོངས་འཛིན་རིམ་བཅུ་པའི་ཡིག་རྒྱུགས་ནང་ཁྱོན་སློབ་མ་ ༢༣ མཉམ་ཞུགས་བྱས་ཡོད་ཚུལ་དང་། ད་ལོའི་སློབ་དུས་གསར་པའི་ནང་སློབ་མ་ ༨༤ ཙམ་གྱིས་སྙན་ཞུ་ཕུལ་ཡོད་ཀྱང་། སྔོན་འགྲོ་དང་པོའི་འཛིན་ཁང་གི་གྲངས་ཚད་ལ་གཞིགས་ཏེ་སློབ་མ་གསར་པ་ ༦༥ བསྡུས་བ་དང་། གཞུང་འབྲེལ་ལས་བྱེད་གནས་སྤོར་གྱི་ཕྲུ་གུ་ ༩ བཅས་ཁྱོན་སློབ་མ་ ༧༤ གསར་ཏུ་སློབ་འཇུག་བྱས་ཡོད་སྐོར། དཔེ་སྟོན་སྟེང་ཤོད་གཉིས་ཟླ་སྒྲིལ་བཏང་རྗེས་༢༠༡༡ ལོར་སློབ་མ་ ༣༨ དང་། ༢༠༡༢ ལོར་ ༤༣། ༢༠༡༣ ལོར་ ༧༣ བཅས་སློབ་འཇུག་གི་བརྒྱུད་རིམ་མུ་མཐུད་རྒྱུན་འཁྱོངས་བྱས་པ་ཡིན་ན། ལོ་གཅིག་གཉིས་ཀྱི་ནང་སློབ་ཕྲུག་མ་ཤོང་བའི་དཀའ་ངལ་འཕྲད་སྲིད་པས། འཛིན་སྐྱོང་ནས་དགོངས་པ་ཆེར་བཞེས་ཀྱིས་དཀའ་ངལ་སེལ་ཐབས་གནང་རྒྱུའི་རེ་སྐུལ་ཞུས་སོང་།
དེའི་རྗེས་སཾ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ཀྱིས། “ རྣམ་པ་ཚོར་མགོ་ཁྲིད་ཀྱི་ཟབ་སྦྱོང་རིམ་པར་གནང་བའི་དགོས་དམིགས་རབ་བྱུང་ན་སྤྱི་ཚོགས་ཧྲིལ་བོར་གོ་སྒྲིག་བྱེད་ཐུབ་མཁན་ཞིག་དང་། དེ་མ་བྱུང་བ་ཡིན་ནའང་སོ་སོའི་མི་རིགས་ཀྱི་འཐབ་རྩོད་ལ་མགོ་ཁྲིད་ཐུབ་མཁན་ཞིག་ཡོང་དགོས་པ་རེད། མི་མང་བྱེད་རྒྱུ་ལས་སླ་བོ་ཡིན་ནའང་། མགོ་ཁྲིད་བྱེད་རྒྱུ་དཀའ་ལས་ཁག་པོ་ཡོད་སྟབས། ཁྱེད་རང་ཚོ་འཛིན་གྲྭ་བཅུ་གཅིག་བཅུ་གཉིས་ཙམ་མིན་པར། སློབ་གྲྭ་ཆེན་མོ་དང་གཙུག་ལག་སློབ་གཉེར་ཁང་། ལྷག་པར་དུ་སྤྱི་ཚོགས་ཐོག་སོ་སོའི་མི་ཚེ་སྐྱེལ་སྐབས་ཀྱང་ཤེས་ཡོན་སྲིད་བྱུས་ཀྱི་དགོས་དམིགས་བཞི་དེ། ག་དུས་ཡིན་ནའང་སོ་སོ་དང་མཉམ་དུ་སྦྱར་ཡོད་པ་དགོས་རྒྱུ་ཧ་ཅང་གལ་ཆེན་པོ་རེད། ངས་དེ་རིང་གི་ཉིན་མོ་འདི་ཧ་ཅང་གལ་ཆེན་ཞིག་ཏུ་བརྩི་བཞིན་ཡོད། གང་ཡིན་ཟེར་ན། ང་ཚོར་རྒྱལ་ཁབ་མེད་ཀྱང་། ང་ཚོར་ཤེས་ཡོན་སྲིད་བྱུས་ཆ་ཚང་པོ་ཞིག་ཡོད་པ་དང་། ཤེས་ཡོན་སྲིད་བྱུས་དེའི་འོག་མཐར་ཕྱིན་པའི་སློབ་མ་ ༢༣ དེ། བཙན་བྱོལ་བོད་མིའི་ཤེས་ཡོན་སྲིད་བྱུས་ཀྱི་ཕོ་ཉ་དང་པོ་ཆགས་ཡོད་སྟབས། ཚང་མས་ལྷོད་གཡེང་མེད་པའི་ཐོག་ནས་ཧུར་བརྩོན་གནང་རོགས། ”ཞེས་བརྗོད་སོང་།
མཇུག་ཏུ་སྲིད་སྐྱོང་བློ་བཟང་སེང་གེ་མཆོག་གིས་སློབ་མ་ཚོར་ལམ་སྟོན་གསུང་བཤད་གནང་དོན། “ ༢༠༠༥ ལོའི་ཕྱི་ཟླ་ ༡༠ ཚེས་ ༡༠ ཉིན་བཙན་བྱོལ་བོད་མིའི་ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་དཔེ་སྟོན་སློབ་གྲྭ་དབུ་འཛུགས་གནང་ཡོད་པ་དང་། དེ་དུས་སློབ་ཕྲུག་ ༢༤ སློབ་འཇུག་བྱས་པའི་ནང་ནས་སློབ་མ་གཅིག་མ་གཏོགས་སློབ་སྦྱོང་མཐར་ཕྱིན་པ་དེ་མིག་དཔེ་ཡག་པོ་རེད་བསམ་གྱི་འདུག དེའི་ཕྱིར་དགེ་རྒན་དང་ཕ་མ། སློབ་ཕྲུག་བཅས་ཀྱིས་འགན་ཁུར་བའི་ཐོག་ནས་འཛིན་རིམ་བཅུ་བ་བར་སློབ་སྦྱོང་མཐའ་འཁྱོལ་བ་དེར་ངས་བསྔགས་བརྗོད་ཞུས་པ་དང་སྦྲགས། དེ་རིང་གི་མཐར་ཕྱིན་སློབ་མ་ཚོས་སོ་སོའི་སློབ་གྲྭ་བཞག་ནས་སློབ་གྲྭ་གཞན་དུ་འགྲོ་དགོས་པས་སེམས་འཚབ་ཡོང་སྲིད་པ་རེད། ཡིན་ནའང་། སློབ་མ་ཚོ་མ་འོངས་པར་ཀ་ལོན་སྦུག་དང་མོན་གྷོ་ཊི། མ་སུ་རི། བྷོན་ཌ་བཅས་སློབ་གྲྭ་བཞི་ཡི་ནང་འགྲོ་འཆར་ཡོད་སྟབས། ཁྱེད་རང་ཚོ་གང་དུ་ཕྱིན་པ་ཡིན་ནའང་ད་ལྟ་སློབ་སྦྱོང་ཧུར་ཐག་གནང་བཞིན་པ་ལྟར། མ་འོངས་པར་མུ་མཐུད་དུ་ཧུར་ཐག་གནང་བའི་རེ་སྐུལ་ཞུ་ཡི་ཡོད། གང་ཡིན་ཟེར་ན། ཤེས་ཡོན་སྲིད་བྱུས་ལག་བསྟར་གནང་ནས་ལོ་ ༡༠ འཁོར་ཡོང་གི་ཡོད་ལ། དཔེ་སྟོན་སློབ་གྲྭ་ནས་ཐོན་པའི་སློབ་ཕྲུག་ ༢༣ དེ་གང་དུ་ཕྱིན་པ་ཡིན་ནའང་། ང་ཚོས་དོ་སྣང་བྱེད་ཐུབ་དང་མ་ཐུབ་ལ་མ་ལྟོས་པར་སློབ་གྲྭ་དེའི་དགེ་སློབ་ཚོས་དོ་སྣང་གནང་གི་རེད། མ་འོངས་ལོ་ ༢ ཀྱི་ནང་ནས་དཔེ་སྟོན་སློབ་གྲྭའི་སློབ་མ་ཚོའི་ཤེས་ཡོན་དེ་འདྲ་ཞིག་རེད་ཟེར་བ་དང་། ཡང་ན་ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་སློབ་ཁྲིད་གནང་བ་ལྟར། བོད་ཀྱི་སྲོལ་རྒྱུན་རིག་གནས་དང་དེང་དུས་ཀྱི་ཤེས་ཡོན་གཉིས་ཀ་ཚད་དང་ལྡན་པ་ཆགས་པའི་སློབ་ཕྲུག་རེད་ཅེས་རང་བཞིན་གྱིས་ཁ་གྲག་ཡོང་སྟབས། ཚང་མས་དཔེ་སྟོན་སློབ་གྲྭ་ནས་ཐོན་ཚར་དུས་དོ་སྣང་བྱེད་མཁན་མེད་བསམ་སྟེ་རྣམ་གཡེང་མི་བྱེད་པར། དུས་རྒྱུན་ཤེས་ཡོན་སྲིད་བྱུས་ཀྱི་དགོས་དམིགས་མ་བརྗེད་པ་བྱས་ནས་སློབ་སྦྱོང་ལ་འབད་བརྩོན་བྱེད་དགོས། མ་འོངས་པར་དཔེ་སྟོན་སློབ་གྲྭའི་སློབ་མའི་ནང་བརྒྱ་ཆ་ ༩༥ ལེན་མཁན་ཡོང་བར་ང་ཚོས་རེ་བ་རྒྱག་བཞིན་ཡོད།” ཅེས་སོགས་གསུངས་སོང་།
གསར་འགོད་པ། པདྨ་མཚོ།
སྲིད་སྐྱོང་བློ་བཟང་སེང་གེ་ཁ་སང་གྲོས་ཚོགས་སུ་མཐོང་རྒྱུ་མེད་པ་བྱིས་པ་ཚོར་ལབ་རྒྱག་གི་བུད་སོང་ཡོད་འདུག་ག
གནད་དོན་གཅིག་ཆད་འདུག དཀོན་མཆོག་མཁྱེན། དཔེ་སྟོན་སློབ་མའི་ནང་བརྒྱ་ཆ་༩༥ ལེན་མཁན་མ་ཡོང་བ་དང་། བརྒྱ་ཆ་༩༥ དགོས་ཡོད་ཟེར་མཁན་ཡང་མ་བྱུང་བར་ཤོག
བརྒྱ་ཆ་༩༥ ཟེར་བ་དེ་སྲིད་སྐྱོང་གི་རེ་བ་ཞིག་རེད་མ་གཏོགས། དེ་ཤེས་ཡོན་སྲིད་བྱུས་ཀྱི་རེ་བ་ཞིག་མ་རེད། ཤེས་ཡོན་སྲིད་བྱུས་ནང་ཡིག་རྒྱུགས་ཀྱི་སྐར་གྲངས་ལ་གཙིགས་ཆེན་འཛིན་རྒྱུ་ལྟ་ཞོག་ཐ་ན་ད་ལྟའི་རྒྱུགས་ལེན་གྱི་ལམ་སྲོལ་ལ་དགག་པ་གནང་ཡོད།
ལོ་ངོ་བཅུའི་རིང་སློབ་མ་འདི་དག་ལ་ཡིག་རྒྱུགས་ཀྱི་སྐར་གྲངས་གལ་ཆེན་པོ་མ་རེད་ཅེས་གསོ་སྐྱོང་མཛད་ནས། དེ་རིང་སློབ་ཐོན་མཛད་སྒོའི་སྐབས་ཡིག་རྒྱུགས་སྐར་གྲངས་༩༥ ལོན་པ་བྱ་དགོས་ཅེས་གསུངས་པ་ནི། སྲིད་བྱུས་ལ་རྒྱུས་མངའ་མེད་པ་དང་། དེ་བས་དཔེ་སྟོན་སློབ་གྲྭར་རྒྱུས་མངའ་གཏན་ནས་མེད་པའི་རྟགས་ཚན་རང་རེད།
དཔེ་སྟོན་སློབ་གྲྭའི་སློབ་མའི་གྲུབ་འབྲས་ནི་ཁོང་ཚོ་དངོས་སུ་སྤྱི་ཚོགས་ཀྱི་ལས་དོན་ནང་ཞུགས་པ་དང་། མི་སྡེའི་སྤྱི་ཚོགས་ལ་དངོས་ཞུགས་བྱ་སྐབས་ཀྱི་ཕྱི་ནང་གསང་གསུམ་ཀྱི་བྱ་སྤྱོད་ལ་གཞིར་འཛིན་ཏེ་ཚལ་འཇལ་བ་ལས། ཡིག་རྒྱུགས་ཀྱི་སྐར་གྲངས་ཙམ་གྱིས་གྲུབ་འབྲས་གཞལ་ཐབས་བྱེད་པ་ནི་ཐབས་བཟང་ཞིག་ག་ལ་ཡིན།
ལོ་ངོ་བཅུའི་རིང་དཀར་པོ་མར་བཞིན་གསོ་སྐྱོང་བྱས་པའི་སློབ་མ་འདི་དག་དུས་ཐུང་རིང་ནག་པོའི་སོལ་བ་ལྟ་བུའི་ནུབ་ཕྱོགས་པའི་ལྟ་གྲུབ་ཀྱི་ལྷད་ཀྱིས་མ་འདྲེས་པར་སྨོན།