རྒྱ་གཞུང་གིས་བརྟན་བརླིང་སྲུང་སྐྱོབ་ཀྱི་འགྲོ་གྲོན་འཕར་ཆ་བྱས་པ་གླེང་སློང་བྱས་མེད།

ཧྲང་ཧེ་ཀྲུང་ཆི་གཙུག་ལག་སློབ་ཆེན་གྱི་ཆབ་སྲིད་ཚན་རིག་ཆེད་མཁས་པ་ཞོ་ཡུ་ལགས་ཀྱི་གཙོས་དོན་གཉེར་ཅན་མང་པོས་འདས་པའི་ལོ་ངོ་གཅིག་ཙམ་རིང་། རྒྱ་གཞུང་གིས་ས་གནས་སྲིད་གཞུང་གི་འཛུགས་སྐྲུན་ཡར་རྒྱས་ཐད་སྔོན་རྩིས་འགྲོ་སོང་ཅི་འདྲ་གཏོང་མིན་ཐད་རྟོག་ཞིབ་གནང་ཡོད་འདུག གང་ཡིན་ཞེ་ན། དེ་ནི་རྒྱ་ནག་གི་དཔལ་འབྱོར་འཕེལ་རྒྱས་དང་སྤྱི་དམངས། དམར་ཤོག་ཚོགས་པ་གསུམ་གྱིས་མཐུན་སྒྲིལ་རྡོག་རྩ་གཅིག་སྒྲིལ་ཡོང་མིན་ལ་རག་ལུས་སྟབས་དོ་སྣང་བྱས་པ་ཞིག་ཡིན་འདུག

འདས་པའི་རྒྱ་ནག་གི་ལོ་རྒྱུས་ལ་ཕྱིར་བལྟ་ཞིག་བྱས་ཚེ་ས་གནས་སྲིད་གཞུང་གི་འགྲོ་གྲོན་དང་དཔྱ་ཁྲལ་བསྡུ་ལེན་བྱེད་ཕྱོགས་སོགས་ནི། རྒྱལ་ཁབ་དར་རྒུད་ཇི་བྱུང་ཐད་གལ་ཆེའི་ནུས་པ་འདོན་སྤེལ་བྱེད་མཁན་ཞིག་ཆགས་ཡོད་སྟབས། ཉེ་ལམ་རྒྱ་གཞུང་རྩིས་ཞིབ་ལས་ཁུངས་ཀྱིས་ཕྱིར་བསྒྲགས་བྱས་པའི་སྙན་ཐོ་ཞིག་གི་ཐོག རྒྱ་ནག་ས་གནས་སྲིད་གཞུང་གིས་དབུས་གཞུང་ལ་ཨ་སྒོར་ཁྲག་ཁྲིག་ཆེན་མོ་ ༢།༩༥ ཡི་བུ་ལོན་སྒྲུབ་འཇལ་མ་ཐུབ་པར་ལྷག་བསྡད་ཡོད་པ་གསལ་སྟོན་བྱས་ཡོད་སྟབས། རྒྱ་ནག་དཔལ་འབྱོར་རིག་གནས་ཆེད་མཁས་པ་ཚོས་བུ་ལོན་སྒྲུབ་འཇལ་མ་ཐུབ་པ་དེ་ཡུན་རིང་མ་འགོར་བར་ཐག་གཅོད་ཐུབ་རྒྱུ་ཡིན་སྐོར་འུར་སྒྲོག་བྱས་ཡོད་ཀྱང་། རྒྱ་ནག་གི་ས་གནས་སྲིད་གཞུང་ཁག་ཏུ་དཔལ་འབྱོར་གནས་སྟངས་དབྱར་མཚོ་ལྟར་འཕེལ་རྒྱས་ཕྱིན་མེད་པ་མ་ཟད་དཀའ་ངལ་ནང་ལྷུང་ཡོད་པ་ཟུར་བལྟས་ལེབ་མཐོང་ཞིག་ཡིན་ལ། འདས་ལོའི་ཟླ་ ༡༢ ནང་མཛུབ་སྟོན་ཕྱིར་བསྒྲགས་བྱས་པའི་ས་གནས་སྲིད་གཞུང་གི་བུ་ལོན་དེ་ ༢༠༡༢ དང་བསྡུར་ན་བརྒྱ་ཆ་ ༡༢།༧ འཕར་སྣོན་བྱུང་ཡོད་འདུག

རྒྱ་ནག་དཔལ་འབྱོར་བློན་ཆེན་གྱིས་ཉེ་ཆར་སྐོང་ཚོགས་བྱས་པའི་རྒྱ་ནག་རྒྱལ་ཡོངས་འཐུས་མི་ཚོགས་ཆེན་གྱི་ཉིན་དང་པོར་ ༢༠༡༤ ལོའི་སྔོན་རྩིས་སྒྲོགས་སྦྱང་བྱས་ཀྱང་། དུས་རྒྱུན་ས་གནས་སྲིད་གཞུང་འཕེལ་རྒྱས་གཏོང་ཐབས་ཐད་སྔོན་རྩིས་ཕྱིར་བསྒྲགས་བྱེད་སྲོལ་ཡོད་པ་དག་ལ་གླེང་སློང་ཙམ་ཡང་བྱས་མེད་སྟབས། སྐུ་ཞབས་ཞོ་ཡུ་ལགས་ཀྱིས་རྒྱུན་ལྡན་མིན་པའི་དཔལ་འབྱོར་བློན་ཆེན་གྱི་གནང་སྟངས་ལ་ཡ་མཚན་དང་དོགས་པ་ཆེན་པོ་ཞིག་སྐྱེས་འདུག གང་ཡིན་ཞེ་ན། ཉེ་ཆར་བསྡུ་སྐོང་བྱས་པའི་རྒྱ་ནག་མི་དམངས་འཐུས་མི་ཚོགས་ཆེན་ཀྱི་ཉིན་དང་པོའི་སྐབས་དཔལ་འབྱོར་བློན་ཆེན་གྱིས་རྒྱལ་སྲུང་སྐོར་གྱི་སྔོན་རྩིས་གསལ་སྟོན་བྱས་ཡོད་སྟབས། སྐུ་ཞབས་ཞོ་ཡུ་ལགས་རྒྱ་ནག་དཔལ་འབྱོར་བློན་ཆེན་གྱི་ཐབས་བརྒྱ་ཇུས་སྟོང་གི་བྱ་སྤྱོད་དེར་ཡ་མཚན་དང་དོགས་པ་རྣམ་རྟོག་ཤུགས་ཆེར་སྐྱེས་ཡོད་འདུག

སྐུ་ཞབས་ཞོ་ཡུ་ལགས་ཀྱིས་བརྗོད་པར་དུས་རྒྱུན་རྒྱ་ནག་དཔལ་འབྱོར་བློན་ཆེན་གྱིས་ས་གནས་སྲིད་གཞུང་གི་སྔོན་རྩིས་ཕྱིར་བསྒྲགས་བྱེད་སྲོལ་ཡོད་ཀྱང་། ད་ལོ་དཔལ་འབྱོར་བློན་ཆེན་གྱིས་གསལ་སྟོན་གང་ཡང་བྱས་མེད་པ་དེ་ནི་རྒྱུན་ལྡན་མིན་པའི་བྱ་ཐབས་ཤིག་རེད་ཅེས་དང་། ཁོང་གིས་ད་དུང་རྒྱ་གཞུང་དཔལ་འབྱོར་ལྷན་ཁང་གི་སྙན་ཐོའི་ནང་ས་གནས་སྲིད་གཞུང་དང་འབྲེལ་བའི་སྔོན་རྩིས་ཁག་ཕྱོགས་བསྡུས་ཁ་སྐོང་བྱེད་བཞིན་ཡོད་སྐོར་འཁོད་ཡོད་ཀྱང་། ད་ལོའི་རྒྱ་ནག་དབུས་གཞུང་གི་སྔོན་རྩིས་སྙན་ཐོ་དེ་ཟླ་ ༡ པོའི་ཚེས་ ༡ ཉིན་མགོ་འཛུཊ་བྱས་ཡོད་ཀྱང་། རྒྱ་ནག་དབུས་དང་ས་གནས་སྲིད་གཞུང་གཉིས་ཀྱི་དཔྱ་ཁྲལ་བསྡུ་ལེན་དང་འགྲོ་གྲོན་ཅི་འདྲ་གཏོང་མིན་ཐད་མང་ཚོགས་ཚོར་ལམ་སྟོན་གཙོ་སྐྱོང་དང་ཡིད་ཆེས་འཕེར་ངེས་ཀྱི་ཁ་གསལ་འགྲེལ་བརྗོད་བྱེད་སྲོལ་མེད་པའི་ལམ་ལུགས་དེ་རྒྱུན་ལྡན་ཞིག་ཡིན་སྟབས། ཁོང་གིས་རྒྱ་གཞུང་གིས་འདས་ལོའི་ཡིག་ཆ་དག་ཉར་ཚགས་བྱེད་བཞིན་པ་དེ་ནི། ཛ་དྲག་ཅན་གྱི་ཆབ་སྲིད་གནས་སྟངས་ཁག་ལས་ཉེན་ཡོལ་བྱ་ཆེད་རྒྱ་གཞུང་གིས་སྲིད་ཇུས་དེ་ལག་བསྟར་རྒྱུན་འཁྱོངས་བྱེད་བཞིན་ཡོད་སྐོར་བརྗོད་འདུག

ད་དུང་སྐུ་ཞབས་ཞོ་ཡུ་ལགས་ཀྱིས་རྒྱ་ནག་དཔལ་འབྱོར་བློན་ཆེན་གྱི་སྲུང་སྐྱོབ་སྔོན་རྩིས་དེ་ནི། རྒྱ་ནག་རྒྱལ་ནང་གི་རྙོག་གླེང་ཁག་ཞི་འཇགས་ཡོང་ཐབས་ལ་དམིགས་ནས་བཟོས་པ་ཞིག་ཡིན་པར་ཡིད་ཆེས་བྱེད་བཞིན་འདུག རྒྱ་གཞུང་གི་ཉེན་རྟོག་དཔུང་ཁག་དང་རྒྱལ་ནང་གི་སྲུང་དམག་རུ་ཁག་ཚོའི་འགྲོ་གྲོན་མང་ཆེ་བ་ས་གནས་སྲིད་གཞུང་ནས་ཡོང་གི་ཡོད། ༢༠༡༡ ལོར་ཐེངས་དང་པོར་རྒྱ་ནག་དམར་ཤོག་ཚོགས་པའི་ལོ་རྒྱུས་ཀྱི་དེབ་ཐེར་ཁྲོད། རྒྱ་ནག་གི་དམག་དོན་ལས་རྒྱལ་ནང་གི་སྲུང་སྐྱོབ་འགྲོ་གྲོན་མང་བ་གཏོང་རྒྱུ་ཡིན་པ་ཕྱིར་བསྒྲགས་བྱས་ཡོད། རྒྱ་ནག་དབུས་དང་ས་གནས་སྲིད་གཞུང་གི་ལོ་དེའི་སྔོན་རྩིས་ཐད་ཞིབ་འཇུག་བྱས་པ་བརྒྱུད། རྒྱ་གཞུང་གིས་རྒྱ་ནག་རྒྱལ་ནང་གི་བརྟན་བརླིང་སྲུང་སྐྱོབ་ཆེད་རྒྱ་སྒོར་ཐེར་འབུམ་ ༦༢༤།༤ དང་རྒྱ་ནག་ཁྱོན་ཡོངས་ཀྱི་སྲུང་སྐྱོབ་ཆེད་འགྲོ་གྲོན་རྒྱ་སྒོར་ཐེར་འབུམ་ ༦༠༡ བཏང་ཡོད་འདུག རྒྱ་ནག་གི་མགོ་ཁྲིད་དང་ས་གནས་སྲིད་གཞུང་གི་ལས་བྱེད་ཚོས་སྲུང་སྐྱོབ་སྐོར་གྱི་འགྲོ་གྲོན་དེ། རྒྱ་ནག་རྒྱལ་ནང་གི་བརྟན་བརླིང་སྲུང་སྐྱོབ་ཆེད་ཁ་ལོ་སྒྱུར་བ་ཞིག་ཡིན་པར་དག་སྐྱེལ་བྱེད་བཞིན་ཡོད།

སྐུ་ཞབས་ཞོ་ཡུ་ལགས་ཀྱིས། “རྒྱ་ནག་རྒྱལ་ཡོངས་ཀྱི་སྲུང་སྐྱོབ་འགྲོ་གྲོན་ལས་རྒྱལ་ནང་བརྟན་བརླིང་སྲུང་སྐྱོབ་ཀྱི་འགྲོ་གྲོན་ཕོན་ཆེ་བ་ཡོད་སྟབས། རྒྱལ་ནང་དང་རྒྱལ་སྤྱིའི་སྤྱི་ཚོགས་ཚོས་གནད་དོན་དེར་སེམས་འཚབ་ཡོད་པའི་གླེང་སློང་བྱེད་བཞིན་ཡོད་སྐོར་བརྗོད་འདུག ཁོང་གིས་རྒྱ་གཞུང་ལ་སྐྱོན་བརྗོད་བྱེད་མཁན་ཚོ་མགོ་རྨོངས་ཏེ། རྒྱལ་ནང་དང་རྒྱལ་སྤྱིའི་དོན་གཉེར་ཅན་ཚོར་ཆེད་མངགས་གནད་དོན་དེའི་སྐོར་ལ་གླེང་སློང་ཙམ་ཡང་མ་བྱས་པ་དེ་ནི། ཤེས་བཞིན་དུ་ཕྱིར་འཐེན་བྱས་པ་ཞིག་ལ་ངོས་འཛིན་ཞུ་བཞིན་ཡོད་”ཅེས་བརྗོད་འདུག

དེ་བཞིན་སྐུ་ཞབས་ཞོ་ཡུ་ལགས་ཀྱིས་བརྟན་བརླིང་སྲུང་སྐྱོབ་ཞེས་པ་འདི་ ༢༠༠༧ ནས་ ༢༠༡༢ ལོའི་བར་རྒྱ་ནག་ཆབ་སྲིད་རྒྱུན་ལས་ཚོགས་ཆུང་གི་རྒྱལ་སྲུང་ཚོགས་གཙོ་ཀྲུའུ་ཡཱོང་ཁང་ (Zhou Yongkang) གི་གཙོས་རྒྱུན་ལས་ཚོས་རྒྱ་ནག་རྒྱལ་ནང་གི་སྲུང་སྐྱོབ་དང་ཁྲིམས་ལུགས་ལྟ་སྲུང་གལ་ཆེར་བཟུང་སྟེ་བསྒྲགས་པའི་ཉེར་ལེན་ལ་བརྟེན་ནས་བྱུང་བ་ཞིག་ཡིན་པ་མ་ཟད། ཀྲུའུ་ཡཱོང་ཁང་གིས་རྒྱལ་ནང་གི་བརྟན་བརླིང་སྲུང་སྐྱོབ་ལ་དམིགས་ནས་མཁྲེགས་བཟུང་ཅན་གྱི་ཆབ་སྲིད་ལངས་ཕྱོགས་འདྲ་མིན་བཟུང་སྟེ། ལོ་རྒྱུས་ཁྲོད་རྒྱ་ནག་ནང་གུ་ཡངས་རིང་ལུགས་འཐབ་རྩོད་དོན་གཉེར་གནང་མཁན་དང་། ད་ལྟ་བཙོན་འོག་འགྲིམ་བཞིན་པའི་ ༢༠༡༠ ལོའི་ནོ་སྤེལ་ཞི་བདེའི་གཟེངས་རྟགས་བཞེས་མཁན་ལེའུ་ཞོ་པོ་ལགས་སུ་ལོ་ ༡༡ གི་བཙོན་འཇུག་ཁྲིམས་ཐག་དང་འབྲེལ། ཤེས་ཡོན་ཅན་མང་པོ་འཇུ་བཟུང་བཀག་ཉར་གྱིས་བཅར་རྡུང་གཏོང་མུས་ཡིན་པ་དང་། བོད་དང་ཤིན་ཅང་ནང་རྒྱ་གཞུང་གིས་སྲིད་ཇུས་ལ་ངོ་རྒོལ་བྱེད་བཞིན་པ་དག་ལ་དམ་དྲག་ཤུགས་ཆེར་བྱེད་བཞིན་ཡོད་པ་སོགས་ལ་བརྟེན། ནུབ་ཕྱོགས་པའི་ཞིབ་འཇུག་མཁན་ཚོས་རྒྱ་གཞུང་གིས་བོད་དང་ཤིན་ཅང་ནང་རྡུག་རྩུབ་ཅན་གྱི་དམ་དྲག་སྲིད་ཇུས་བཟུང་སྟབས། རྒྱ་ནག་གི་ས་མཚམས་ས་ཁུལ་ཁག་ཏུ་བསྟུད་མར་ངོ་རྒོལ་བྱེད་བཞིན་ཡོད་པ་གསལ་སྟོན་གནང་ཡོད་སྐོར་བརྗོད་འདུག

རྒྱ་ནག་ཆབ་སྲིད་རྒྱུན་ལས་ཀྱི་སྲུང་སྐྱོབ་དཔོན་རིཊ་ཀྲུའུ་ཡཱོ་ཁང་ ༢༠༡༢ ལོའི་ལོ་མཇུག་ཏུ་རྒྱ་ནག་དབུས་ཆབ་སྲིད་རྒྱུན་ལས་ཀྱི་ཚོགས་མི་ ༩ ལས་གྲུབ་པའི་འཐུས་ཚོགས་ལས་རྒན་ཡོལ་ཞུས་རྗེས། སྲིད་འཛིན་ཞི་ཅིན་ཕིན་གྱིས་སྣེ་ཁྲིད་པའི་རྒྱ་ནག་དབུས་ཆབ་སྲིད་རྒྱུན་ལས་ཀྱི་ཚོགས་མི་ ༧ ལས་གྲུབ་པའི་རྒྱུན་ལས་ཚོགས་ཆུང་ནང་སྲུང་སྐྱོབ་མགོ་དཔོན་བསྐོ་བཞག་བྱས་མེད། ད་ལྟ་རྒྱ་ནག་གཞུང་གིས་ཀྲུའུ་ཡཱོ་ཁང་དང་ནང་མི་གཉེན་ཉེ་ཚོར་ལྐོག་ཟ་རུལ་སུངས་ཀྱི་དོགས་གཞིའི་འོག་འདྲི་གཅོད་བྱེད་བཞིན་ཡོད་པ་མ་ཟད། རྒྱ་ནག་གནད་དོན་སྐོར་གྱི་ཆབ་སྲིད་དབྱེ་ཞིབ་པ་ཁ་ཤས་ཀྱིས་རྒྱ་ནག་རྒྱལ་ཡོངས་འཐུས་མི་ཚོགས་ཆེན་ཐོག་རྒྱ་ནག་གི་མི་རབས་གསར་པའི་མགོ་ཁྲིད་ཚོས་ཀྲུའུ་ཡཱོ་ཁང་གི་ལས་སྐལ་ཐད་ཐག་གཅོད་ཇི་འདྲ་གཅོད་མིན་བརྡ་ལན་སྤྲོད་སྲིད་སྐོར་བརྗོད་འདུག

ད་ལྟའི་རྒྱ་ནག་གི་བརྟན་བརླིང་སྲུང་སྐྱོབ་དོ་དམ་པ་མེན་ཅང་ཀྲོ་ (Meng Jianzhu) ནི་རྒྱ་ནག་ཆབ་སྲིད་གྲོས་ཚོགས་འཐུས་མི་ ༢༥ ཡི་ཡ་གྱལ་རྒྱུན་ལས་ཚོགས་མི་ཞིག་ཡིན་སྟབས། རྒྱ་ནག་དབུས་ཆབ་སྲིད་གྲོས་ཚོགས་ཀྱི་འཐུས་མི་ ༧ པོ་དེ་ལས་གནས་རིམ་གཅིག་གི་དམའ་བ་ཡོད། ད་ལྟ་ཁོང་ནི་དེ་སྔོན་ཀྲུའུ་ཡཱོ་ཁང་གི་བདག་བཟུང་བྱེད་བཞིན་པའི་རྒྱ་ནག་རྒྱལ་ཡོངས་དབུས་དམར་ཤོག་ཚོགས་པའི་རྒྱལ་ནང་ཆབ་སྲིད་དང་ཁྲིམས་ལུགས་སྟངས་འཛིན་བྱེད་མཁན་གྱི་མི་སྣ་དེ་ཆགས་ཡོད་ཀྱང་། མེན་ཆང་ཀྲོ་དང་རྒྱ་ནག་གི་མི་རབས་གསར་པའི་མགོ་ཁྲིད་ཚོས་ ༢༠༡༣ ལོར་རྒྱ་ནག་རྒྱལ་ནང་བརྟན་བརླིང་སྲུང་སྐྱོབ་གྱི་སྔོན་རྩིས་དེ་དམག་དོན་འགྲོ་གྲོན་ལས་མང་བ་མནར་གཏོང་བྱས་ཡོད། རྒྱ་ནག་གི་མི་རབས་གསར་པའི་མགོ་ཁྲིད་ཚོས་ ༢༠༡༣ ལོར་རྒྱལ་ནང་བརྟན་བརླིང་སྲུང་སྐྱོབ་ཆེད་འགྲོ་གྲོན་རྒྱ་སྒོར་ཐེར་འབུམ་ ༧༦༩ དང་། བཅིངས་གྲོལ་དམག་མིའི་འགྲོ་གྲོན་སླད་རྒྱ་སྒོར་ཐེར་འབུམ་ ༧༦༡ ཙམ་བཏང་ཡོད་པ་དེས། རྒྱ་གཞུང་གིས་རྒྱལ་ནང་བརྟན་བརླིང་སྲུང་སྐྱོབ་དེ་དམག་དོན་ལས་གལ་ཆེ་བ་འཛིན་གྱི་ཡོད་པ་གསལ་པོ་རེད།

ཟླ་འདིའི་ཚེས་ ༥ ཉིན་རྒྱ་ནག་དཔལ་འབྱོར་བློན་ཆེན་གྱིས་ཕྱིར་བསྒྲགས་བྱས་པའི་སྙན་ཐོའི་ནང་། ༢༠༡༤ ལོར་རྒྱ་ནག་དམག་དོན་སྔོན་རྩིས་དེ་རྒྱ་སྒོར་ཐེར་འབུམ་ ༨༠༨ དང་། ཆབ་འབངས་བདེ་འཇགས་སྲུང་སྐྱོབ་ཆེད་རྒྱ་སྒོར་ཐེར་འབུམ་ ༢༠༥ གཏོང་རྒྱུ་ཡིན་པ་ཕྱིར་བསྒྲགས་བྱས་ཡོད་ཀྱང་། རྒྱ་ནག་ས་གནས་སྲིད་གཞུང་གི་སྔོན་རྩིས་ཐད་ཁ་གསལ་འགྲེལ་བརྗོད་གང་ཡང་བྱས་མེད་སྟབས། རྒྱ་གཞུང་གིས་རྒྱལ་ནང་བརྟན་བརླིང་སྲུང་སྐྱོབ་དང་དམག་དོན་འགྲོ་གྲོན་གཉིས་གང་མང་བ་གཏོང་རྒྱུ་ཡིན་མིན་ཞིབ་བསྡུར་བྱེད་དཀའ་བ་ཆགས་ཡོད།

སྐུ་ཞབས་ཞོ་ཡུ་ལགས་ཀྱིས་ “ གོང་འཁོད་རྒྱུ་མཚན་དག་ལ་བརྟེན་རྒྱ་ནག་ནང་དཔལ་འབྱོར་དཀའ་ངལ་མེད་པར་མ་ཟད། རྒྱ་ནག་གི་ཆབ་འབངས་བདེ་འཇགས་སྲུང་སྐྱོབ་སྐོར་གྱི་ཆབ་སྲིད་ལམ་ལུགས་ཐད་ཤུགས་ཆེའི་འགྱུར་བ་གང་ཡང་ཐེབས་མེད་སྟབས། རྒྱ་ནག་གི་རྒྱལ་ནང་བརྟན་བརླིང་སྲུང་སྐྱོབ་དང་དམག་དོན་འགྲོ་གྲོན་དེ་མུ་མཐུད་འཕར་རྒྱུ་རེད” ཅེས་བརྗོད་འདུག

རྒྱ་ནག་དམར་ཤོག་ཚོགས་པའི་ཚོགས་གཙོ་དང་སྲིད་འཛིན་ཞི་ཅིན་ཕིན་གྱིས་ཀྱང་། རྒྱ་གཞུང་ལ་ཁ་གཏད་གཅོག་མཁན་གུ་ཡངས་རིང་ལུགས་ཀྱི་བསམ་པ་རྒྱ་ཆེར་ཡོད་མཁན་ཤེས་ཡོན་པ་དག་དང་། གཞུང་ལ་ངོ་རྒོལ་སྐྱོན་བརྗོད་བྱེད་མཁན་ཚོར་ཉེན་རྟོག་པས་ལྟ་སྲུང་ནན་པོ་བྱེད་བཅུག་པ་མ་ཟད། མི་སྣ་དེ་དག་འཇུ་བཟུང་བཀག་ཉར་བྱེད་བཞིན་ཡོད་པ་ནི་ཟུར་བལྟས་ལེབ་མཐོང་ཞིག་ཡིན། བདུན་ཕྲག་སྔོན་མའི་རེས་གཟའ་སྤེན་པ་ཉིན་རྒྱ་ནག་ཁུན་མེན་མེ་འཁོར་འབབ་ཚུགས་ནང་། ཡུ་གུར་ཡུལ་མི་ཁ་ཤས་ཤིག་གིས་རྒྱ་ནག་གི་ཉེས་མེད་མི་སེར་ ༢༩ བསད་པ་དང་གཞན་མི་ ༡༥༠ ལྷག་ལ་ཚབས་ཆེན་རྨས་སྐྱོན་བཏང་ཡོད་སྟབས། རྒྱ་ནག་གཞུང་གིས་རྒྱལ་ནང་བརྟན་བརླིང་སྲུང་སྐྱོབ་ཐད་སྔར་ལས་ལྷག་པ་འགྲོ་གྲོན་ཤུགས་ཆེར་གཏོང་བཞིན་ཡོད། ཁོང་གིས་རྒྱ་ནག་ནང་གྲི་འཕྱར་ཏེ་མི་གསོད་དོན་རྐྱེན་གྱི་ལས་འགུལ་སྤེལ་བཞིན་པ་དག་ནི། ཉེ་ལམ་རྒྱ་གཞུང་གིས་ཤིན་ཅང་ཡུལ་གྲུ་ནང་ཧན་དང་ཡུ་གུར་མི་རིགས་གཉིས་བར་མི་རིགས་གནད་དོན་གྱི་རྙོག་གླེང་ཤུགས་ཆེ་འཕྲད་བཞིན་པར་བརྟེན་ནས་བྱུང་བ་ཞིག་ཡིན་སྐོར་བརྗོད་འདུག

སྐུ་ཞབས་ཞོ་ཡུ་ལགས་ཀྱིས། “རྒྱ་ནག་ནང་གི་འཇིགས་སྐུལ་རིང་ལུགས་པའི་བྱ་སྤྱོད་དེ་དག་ཤིན་ཅང་ས་ཁུལ་གཅིག་པུར་བྱུང་གི་ཡོད་ཀྱང་། ད་ལྟ་རྒྱ་ནག་ས་ཁུལ་གཞན་དག་ནང་བྱུང་བཞིན་ཡོད་སྟབས། གལ་ཏེ། འཇིགས་སྐུལ་རིང་ལུགས་པའི་བྱ་སྤྱོད་དེ་དག་རྒྱ་ནག་རྒྱལ་ཡོངས་ནང་ཁྱབ་བརྡལ་ཕྱིན་ན་རྒྱ་གཞུང་ལ་སེམས་འཚབ་བྱུང་མི་སྲིད་དམ། གནས་ཚུལ་དེ་འདྲ་ཐོན་པ་ཡིན་ན་རྒྱ་གཞུང་ལ་མགོ་རྙོག་ཆེན་པོ་ཞིག་བྱུང་སྲིད་པ་ཡིན། འཇིགས་སྐུལ་རིང་ལུགས་པའི་བྱ་སྤྱོད་དེས་རྒྱ་གཞུང་གི་སྙིང་སྟོབས་ལ་རྡུང་རྡེག་ཤུགས་ཆེན་བཏང་ཡོད་སྟབས། འཇིགས་སྐུལ་རིང་ལུགས་པའི་བྱ་སྤྱོད་དག་རྒྱ་གཞུང་གིས་གོ་སྐབས་ཤིག་ཏུ་བརྩིས་ཏེ་སྔོན་འགོག་རྒོལ་རྡུང་གཏོང་ཆེད་ཐབས་ལམ་གསར་གཏོད་ཀྱིས་འགྲོ་གྲོན་ཤུགས་ཆེ་རུ་གཏོང་རྒྱུ་ཡིན་པ་ནི་སྨོས་མེད་ཅིག་ཡིན་པ་དང་། ཁོང་གིས་རྒྱ་གཞུང་གིས་རྒྱལ་ནང་གི་བརྟན་བརླིང་སྲུང་སྐྱོབ་གཙོས་འཇིགས་སྐུལ་རིང་ལུགས་པར་ཁ་གཏད་རྒོལ་རྡུང་གཅོག་ཐབས་ཀྱི་གཞི་རྩ་དེ་དངུལ་ལ་ཐུག་ཡོད ” ཅེས་བརྗོད་འདུག

མ་རྩོམ་ལ་གཟིགས་ན། http://sinosphere.blogs.nytimes.com/2014/03/06/beijing-goes-quiet-on-rise-of-local-security-budgets/?_php=true&_type=blogs&_r=0