ཧིན་སྒོར་འབུམ་ ༡༠ གསོལ་རས།

ཁ་སང་༧གོང་ས་མཆོག་ལྡི་ལིའི་མཛེ་ནད་ལྟ་སྐྱོང་ཁང་དུ་ཆིབས་བསྒྱུར་འཚམས་གཟིཊ་གནང་ཡོད་པ་མ་ཟད། ལྟ་སྐྱོང་ཁང་དེར་ཧིན་སྒོར་འབུམ་བཅུ་གསོལ་རས་གནང་རྒྱུའི་ཞལ་བཞེས་གནང་འདུག

ཟླ་འདིའི་ཚེས་ ༢༠ ཉིན་གྱི་སྔ་དྲོ་༸གོང་ས་མཆོག་གིས་སིམ་ལ་ཁུལ་གྱི་མཛད་འཕྲིན་ལེགས་པར་གྲུབ་ཏེ། རྒྱལ་ས་ལྡི་ལིའི་ཊེ་ཧ་པུར་མཛེ་ནད་ལྟ་སྐྱོང་ཁང་ (Kasturba Gram Kusht Ashram, Tahirpur Leprosy Complex) དུ་ཆིབས་བསྒྱུར་གྱིས་མཛེ་ནད་ཕོག་མཁན་རྣམས་ལ་འཚམས་གཟིགས་གནང་བ་དང་འབྲེལ། མཛེ་ནད་ཕོག་མཁན་ཚོའི་དཀའ་ངལ་དེ་སྤྱིར་བཏང་སྤྱི་ཚོགས་ནང་འཕྲད་བཞིན་པའི་ལུས་ནད་ཀྱི་དཀའ་ངལ་ཞིག་ལ་ངོས་འཛིན་བྱེད་དགོས་པ་ལས། ཁོང་ཚོར་དབྱེ་འབྱེད་དང་ཁྱད་གསོད་བྱེད་མི་རུང་བ་དང་། རིགས་རུས་དང་ཆོས་ལུགས་སོཊ་ལ་གཞི་བཅོལ་ཏེ་མི་ཕན་ཚུན་དབར་དབྱེ་འབྱེད་དང་མཐོང་ཆུང་ཁྱད་གསོད་བྱས་པ་ནི་སྡིག་པའི་རྒྱུ་ཡིན་ཚུལ་གསུངས་ཡོད་པ་མ་ཟད། ཕྱུག་བདག་ཚོས་འཚོ་བ་རྒྱས་སྤྲོས་བྱས་ཏེ་དངུལ་འཕང་མེད་གཏོང་བ་ལས། ཉམ་ཐག་མི་མང་ལ་རོགས་རམ་བྱེད་རྒྱུ་ཧ་ཅང་གལ་ཆེན་ཡིན་པའིབཀའ་སློབ་གནང་ཡོད་པ་མ་ཟད། ༧གོང་ས་མཆོག་གིས་མཛེ་ནད་ལྟ་སྐྱོང་ཁང་ལ་ཧིན་སྒོར་འབུམ་བཅུ་དང་། མ་འོངས་ལོ་ལྔའི་རིང་ཁོང་གིས་ལྗགས་རྩོམ་མཛད་པའི་ཕྱག་དེབ་ཀྱི་ཡོན་འབབ་ (royalties) རྣམས་གསོལ་རས་གནང་རྒྱུའི་ཞལ་བཞེས་གནང་ཡོད་འདུག

ཉིན་རྒྱབ་བུད་མེད་མཐོ་སློབ་ལེ་ཌི་ཤི་རམ་ (Lady Shri Ram) དུ་ཆིབས་བསྒྱུར་གྱིས་མཐོ་སློབ་དེའི་ནང་གསར་དུ་བཞེངས་པའི་ཨང་སན་སུ་ཀེ་ཞི་བདེ་བསྟི་གནས་ཁང་ (Aung San Su Kyi Center for Peace ) ཞེས་པ་དང་། ཌོག་ཊར་བྷ་ར་ཐི་རམ་ (Bharat Ram Academic Complex) ཤེས་ཡོན་སྡེ་ཚན་ཞེས་པ་གཉིས་དབུ་འབྱེད་གནང་ཡོད་པ་མ་ཟད། མཐོ་སློབ་ཚོགས་ཁང་དུ་དགེ་ལས་སློབ་ཕྲུག་གཙོས་པའི་མི་ ༡༠༠༠ བརྒལ་བར་ཡ་རབས་བཟང་སྤྱོད་དང་བདེ་སྐྱིད་ཀྱི་སྐོར་ནས་བཀའ་སློབ་གནང་ཡོད་འདུག

སྐབས་དེར་༧གོང་ས་མཆོག་གིས། དུས་རབས་འདིའི་ནང་འཛམ་གླིང་ཞི་བདེ་ཡོང་ཐབས་སུ་སྔར་ལྷག་འབད་བརྩོན་ བྱེད་རྒྱུའི་འགན་གཙོ་བོ་གཞོན་སྐྱེས་ཚོར་ཡོད། འཛམ་གླིང་ཞི་བདེ་དང་མི་ཚེ་བདེ་སྐྱིད་ལྡན་པ་དེ་ཕྱིའི་དངོས་པོ་དང་ཚན་རིག་གིས་བསྐྲུན་མི་ཐུབ། གཙོ་བོ་ཀུན་སྤྱོད་བཟང་པོའི་ཐོག་ནང་སེམས་ལ་ཞི་བདེ་ཡོང་ཐབས་བྱེད་རྒྱུ་ཧ་ཅང་གལ་ཆེན་ཆགས་ཡོད་སྟབས། བུད་མེད་ཀྱི་མཐོ་རིམ་སློབ་གཉེར་ཁང་འདིས་སྤྱི་ཚོགས་ནང་བྱམས་བརྩེ་དང་ཡ་རབས་བཟང་སྤྱོད་གོང་སྤེལ་གཏོང་རྒྱུར་བསམ་བློ་གཏོང་དགོས། ལྷག་པར་དུ་འགྲོ་བ་མིའི་སྤྱི་ཚོགས་ནང་གི་བྱིས་པའི་བྱམས་བརྩེའི་ས་བོན་འཇོག་པའི་དགེ་རྒན་ཐོག་མ་རང་ཉིད་ཀྱི་ཨ་མ་ཡིན་པ་ལྟར། བུད་མེད་ཤེས་ཡོན་ཅན་ཚོས་གནའ་བོའི་རྒྱ་གར་གྱི་རིག་གཞུང་དང་དེང་རབས་ཀྱི་ཤེས་ཡོན་ཟུང་འབྲེལ་ཐོག་ཡ་རབས་སྤྱོད་བཟང་ལྡན་པའི་སྤྱི་ཚོགས་ཤིག་བསྐྲུན་རྒྱུར་ འགན་ཁུར་ཤུགས་ཆེ་ཙམ་ལེན་དགོས། ཞེས་བཀའ་སློབ་གནང་ཡོད་པར་མ་ཟད། མཐོ་སློབ་དེར་ཡོད་བོད་རིགས་སློབ་མ་ཚོར་དེང་དུས་ཀྱི་ཤེས་ཡོན་དང་ལྷན་དུ་བོད་རང་ལ་གནའ་རབས་ནས་ཡོད་པའི་སོ་སོའི་ཤེས་ཡོན་ལ་སློབ་སྦྱོང་དང་། བོད་མིའི་བླ་སྲོག་དེ་རྒྱུན་འཛིན་བྱེད་ཐུབ་པ་དགོས་རྒྱུ་ཧ་ཅང་གལ་ཆེན་ཡིན་པའི་བཀའ་སློབ་གནང་འདུག

དེ་རིང་ཚེས་ ༢༡ ནས་བཟུང་ཉིན་ཤས་རིང་༧གོང་ས་མཆོག་གིས་ལྡི་ལིར་རྒྱ་གར་ཡུལ་མི་གཙོས་པའི་ཕྱི་ནང་གི་དད་ལྡན་ཆོས་ཞུ་བ་ཁག་ཅིག་ལ་རྒྱལ་སྲས་ལག་ལེན་སོ་བདུན་མ་དང་བློ་སྦྱོང་ཚིགས་བརྒྱད་མའི་ཞལ་ལུང་དང་། ལྡི་ལི་མཐོ་སློབ་ཏུ་བཀའ་སློབ་བཅས་མཛད་འཕྲིན་ཁག་བསྐྱང་རྒྱུ་ཡིན་འདུག

གསར་འགོད་པ། དོན་གོ