ཁ་སང་གཟའ་ལྷག་པའི་ཉིན་ཨ་རིའི་ཤར་ཕྱོཊ་ཀྱི་མཐོ་འབྲིང་ཞིག་ཏུ་གྲིས་བརྒྱབ་པའི་དོན་རྐྱེན་བྱུང་སྟེ་སློབ་མ་དང་བདེ་འཇཊ་མི་སྣ་བཅས་མི་ ༢༡ ལ་རྨས་སྐྱོན་བཟོས་ཡོད་འདུག
ཁ་སང་ཕྱི་ཚེས་ ༩ ཉིན་གྱི་ཨ་རིའི་ཞོགས་པའི་ཆུ་ཚོད་ ༨།༠༠ ཡས་མས་སུ། ཨ་རིའི་ཤར་ཕྱོཊ་ཀྱི་ཕེན་སི་ལེ་ཝེ་ནི་ཡ་ (Pennsylvannia) མངའ་སྡེའི་ཕེ་ཊེ་སི་བྷོག་ (Pittsburgh) ས་གནས་ཉེ་འཁྲིས་ཀྱི་ཧྥི་རན་ཁི་ལེན་མཐོ་འབྲིང་གི་སློབ་མ་ཨེ་ལེ་ཁི་སི་ཧ་རེ་བྷལ་ (Alex Hribal) ཞུ་བ་ཞིག་གིས། གྲི་གཉིས་ལག་ཏུ་འཕྱར་ཏེ་སྐར་མ་ ༣༠ རིང་གང་བྱུང་མིར་བརྒྱབ་མཐར། ཁོང་དང་འཛིན་གྲྭ་གཅིག་པའི་སློབ་གྲོགས་དང་བདེ་འཇགས་སྲུང་སྐྱོབ་མི་སྣ་བཅས་མི་ ༢༡ ལ་རྨས་སྐྱོན་བཟོས་ཡོད་འདུག
ཁ་སང་གནས་ཚུལ་བྱུང་རྗེས་སྨན་ཁང་གི་མགྲིན་ཚབ་པས། ཐེངས་འདིའི་དོན་རྐྱེན་ཁྲོད་ཀྱི་མི་ ༤ ལ་སྲོག་ཉེན་ཡོད་པའི་རྨས་སྐྱོན་བཟོས་ཡོད་ཀྱང་། ཁོང་ཚོ་སྲོག་ཉེན་ལས་མཐར་ཐུབ་པའི་ཚོད་དཔག་བྱེད་ཀྱི་ཡོད་པ་དང་། རྨས་སྐྱོན་ལྗིད་མོ་ཕོག་པའི་མི་ ༧ ཡོད་པའི་ཁྲོད་ཀྱི་མང་ཆེ་བས་དཔུང་བ་དང་བྲང་གཞུང་། སྒ་བ་བཅས་སུ་གྲིས་བཙུཊ་པ་དང་། དེའི་ཁྲོད་ཀྱི་སློབ་མ་གཅིག་གི་མཆིན་པར་ཁེལ་ཏེ་སྙིང་ལ་ཕོག་ཉེན་བྱུང་ཡོད་སྐོར་བརྗོད་འདུག
ས་གནས་ཉེན་རྟོག་པས། ཁ་སང་དོན་རྐྱེན་བྱུང་རྗེས་སློབ་གྲྭའི་སློབ་གཙོས་འགན་འཁུར་སྟབས། སྐར་མ་ཁ་ཤས་རྗེས་གནས་ཚུལ་ཞི་འཇགས་བྱུང་ཡོད་སྐོར་བརྗོད་འདུག ཁ་སང་གནས་ཚུལ་བྱུང་རྗེས་རང་ལོ་ ༡༦ ཡིན་པའི་ཨེ་ལེ་ཁི་སི་ཧ་རེ་བྷལ་མི་གསོད་ལག་དམར་དང་། མི་ ༢༡ ལ་རྨས་སྐྱོན་བཟོས་པའི་ནག་ཉེས་འོག་ཁྲིམས་ཁང་དུ་འདྲི་གཅོད་བྱས་ཡོད་འདུག
ཐེངས་འདིའི་དོན་རྐྱེན་བྱུང་སའི་ཧྥི་རན་ཁེ་ལེན་མཐོ་འབྲིང་དེར་ཁྱོན་སློབ་མ་ ༡༢༠༠ ཡོད་ཅིང་། ཁ་སང་གི་དོན་རྐྱེན་དེ་སློབ་གྲྭའི་སློབ་ཁྲིད་མགོ་འཛུཊ་མ་བྱས་གོང་གི་སྐར་མ་ཁ་ཤས་ནང་བྱུང་ཡོད་འདུག དོན་རྐྱེན་དེར་བརྩད་གཅོད་ཆེད་ཉིན་ཤས་རིང་སློབ་གྲྭ་སྒོ་རྒྱག་རྒྱུ་ཡིན་འདུག
གསར་འགོད་པ། དོན་གོ
