ཉེ་ལམ་ཨ་རིའི་སྲིད་འཛིན་ཨོ་བྷ་མ་ཨེ་ཤ་ཡའི་རྒྱལ་ཁབ་བཞིའིའ་ནང་སྐོར་སྐྱོད་གྲུབ་མ་ཐག ད་ལྟ་རྒྱ་ནག་གི་སྲིད་བློན་ལི་ཁེ་ཆང་ཨ་ཧྥི་རི་ཀའི་རྒྱལ་ཁབ་བཞིའི་ནང་སྐོར་སྐྱོད་མགོ་འཛུགས་བྱས་སོང་།
ཁ་སང་ནས་བཟུང་བདུན་ཕྲག་གཅིག་རིང་རྒྱ་ནག་གི་སྲིད་བློན་ལི་ཁེ་ཆང་གིས་མགོ་ཁྲིད་པའི་ཚོང་དོན་ལྷན་ཚོགས་ཤིག ཨི་ཐོ་པི་ཡ་དང་ནེ་ཇི་རེ་ཡ། ཨན་གྷོ་ལ། ཁེན་ཡ་བཅས་ཨ་ཧྥི་རི་ཀའི་རྒྱལ་ཁབ་བཞིའི་ནང་སྐོར་སྐྱོད་བྱེད་མགོ་ཚུགས་ཡོད་པ་དང་། ཁ་སང་ཚེས་ ༤ ཉིན་ཨི་ཐོ་པི་ཡའི་སྲིད་འཛིན་མུ་ལཱ་ཌུ་ (MulatuTeshome)དང་སྲིད་བློན་དྷེ་སཱ་ལིན་(HailemariamDesalegn)རྣམ་གཉིས་དང་ཐུག་འཕྲད་བྱས་ཏེ། ལྕགས་ལམ་དང་གཞུང་ལམ་འཛུགས་སྐྲུན་དང་། བརྡ་འཕྲིན་ཚན་རྩལ་འཕེལ་རྒྱས་གཏོང་ཕྱོགས། གཏེར་ཁ་སྔོག་འདོན་གྱི་ལས་གྲྭ་རྒྱ་སྐྱེད། རྒྱ་གཞུང་གིས་ཨི་ཐོ་པི་པར་མུ་མཐུད་སྐྱེད་མེད་བུ་ལོན་ཨ་སྒོར་ཐེར་འབུམ་ ༢༠ སྤྲོད་ཕྱོགས། བཟོ་གྲྭ་ཁག་གི་ཐོན་སྐྱེད་གོང་འཕེལ་གཏོང་ཐབས། ཚན་རིག་དང་རིག་གཞུང་བརྗེ་ལེན་གྱི་རྣམ་གྲངས་མང་དུ་གཏོང་རྒྱུ་སོགས་ཚོང་དོན་གྲོས་མཐུན་ཁག་ ༡༦ ལ་མིང་རྟགས་བཀོད་ཡོད་འདུག
འདིའི་ཐད་ལི་ཁེ་ཆང་གིས། “ རྒྱ་ནག་དང་ཨ་ཧྥི་རི་ཀའི་ཕུགས་བསམ་ནི་གཅིག་ལ་གཅིག་བརྟེན་ཆགས་ཡོད་སྟབས། རྒྱལ་ཁབ་གཉིས་པོས་གཅིག་མཚུངས་འདུ་ཤེས་བཟུང་སྟེ་གཅིག་ལ་གཅིག་ཕན་གྱི་རོགས་སྐྱོར་བྱས་ཏེ། རྒྱལ་ཁབ་འཕེལ་རྒྱས་དང་རིག་གཞུང་བརྗེ་ལེན། དཔལ་ཡོན་ཁྱབ་བརྡལ་གཏོང་དགོས་པ་མ་ཟད། ཁ་བཤད་དོན་འཁྱོལ་བྱས་ཏེ་ཐུན་མོང་གི་དམིགས་ཡུལ་བསྒྲུབ་ཐུབ་པ་བྱ་དགོས།” ཞེས་དང་། ཨ་རི་གཙོས་ནུབ་ཕྱོགས་ཡར་ཐོན་རྒྱལ་ཁབ་ཁག་གིས་ཨ་ཧྥི་རི་ཀའི་ནང་བཙན་རྒྱལ་རིང་ལུགས་ཀྱི་བྱ་སྤྱོད་སྤེལ་ཟིན་པ་དང་། ད་ལྟ་སྤེལ་བཞིན་ཡོད་པའི་སྲིད་ཇུས་དག་རྒྱ་གཞུང་གིས་ནམ་ཡང་ལག་བསྟར་བྱ་མི་སྲིད་ཅེས་སོགས་བརྗོད་འདུག
ཨི་ཐོ་པི་ཡའི་སྲིད་འཛིན་མུ་ལཱ་ཌུ་ཡིས་ཀྱང་། “ རྒྱ་ནག་ནི་ཨི་ཐོ་པི་ཡའི་མཐུན་གྲོགས་རྒྱལ་ཁབ་བློ་ཉེ་ཤོས་ཤིག་ཆགས་ཡོད་སྟབས། རྒྱལ་ཁབ་གཞན་གྱི་ཐེ་ཇུས་དང་སྐྱོན་འཛུགས་བྱེད་མིན་ལ་མ་ལྟོས་པར། རྒྱ་ནག་དང་མཉམ་དུ་གཅིག་ཕན་གཅིག་གྲོགས་ཀྱི་མཉམ་ལས་བྱས་ཏེ་རྒྱལ་ཁབ་འཕེལ་རྒྱས་གཏོང་རྒྱུ་ཡིན།”ཞེས་བརྗོད་འདུག
ཨ་རིའི་རྒྱལ་དོན་དྲུང་ཆེ་ཟུར་པ་ཧི་ལེ་རེ་ཡེ་ཁེ་ལོན་ཌོན་(Hillary Clinton)ལགས་ཀྱིས།“ ཨ་ཧྥི་རི་ཀའི་རྒྱལ་ཁབ་ནང་བཙན་རྒྱལ་རིང་ལུགས་གསར་པ་བསླེབས་ཏེ། རྒྱལ་ཁབ་ཀྱི་མགོ་ཁྲིད་ཚོར་དངུལ་སྤྲད་དེ་བསླུ་བཞིན་ཡོད་པ་མ་ཟད། གཏེར་ཁ་སྔོག་འདོན་གྱིས་ནང་འདྲེན་བྱེད་བཞིན་ཡོད་སྟབས། རྒྱལ་ཁབ་ཁག་གི་མགོ་ཁྲིད་ཚོས་བཙན་རྒྱལ་རིང་ལུགས་ཀྱི་གཡོ་བྱུས་ལ་དོ་སྣང་མང་ཙམ་སྤྲོད་དགོས།” ཞེས་སོགས་བརྗོད་འདུག
ལྷོ་ཨ་ཧྥི་རི་ཀའི་སྲིད་འཛིན་ཇཱ་ཁོབ་ཛོ་མན་(Jacob Zuma)ཀྱིས། ད་ལྟ་རྒྱ་ནག་དང་འབྲེལ་བ་དམ་ཟབ་ཡོད་པའི་ཨ་ཧྥི་རི་ཀའི་རྒྱལ་ཁབ་ཀྱི་ཚོང་དོན་གྲོས་མཐུན་ནི་བཏང་སྙོམས་མེད་པའི་གྲོས་མཐུན་ཞིག་ཡིན་སྟབས། ཨ་ཧྥི་རི་ཀས་རྒྱ་ནག་ལ་རྒྱུ་ཆ་མཁོ་སྒྲུབ་བྱས་ཏེ། རྒྱ་ནག་གི་རིན་གོང་ཆུང་བའི་ཐོན་རྫས་ཉོ་བ་ལས་རྒྱལ་ཁབ་རང་གི་ཐོན་ལས་ལག་རྩལ་ལ་ཤུགས་སྣོན་རྒྱག་རྒྱུ་གལ་ཆེན་ཆགས་ཡོད་སྐོར་བརྗོད་འདུག
རྒྱ་ནག་གིས་ཨ་ཧྥི་རི་ཀར་ཁ་ཕྱོགས་བསྒྱུར་བའི་སྲིད་ཇུས་རྒྱུན་འཁྱོངས་བྱས་པ་ནས་བཟུང་། ༢༠༡༠ ལོར་ཨ་སྒོར་ཐེར་འབུམ་ ༡༠།༥ ཡི་ཚོང་འབྲེལ་དང་། ༢༠༠༥ ལོར་ཨ་སྒོར་ཐེར་འབུམ་ ༤༠། ༢༠༡༡ ལོར་ཨ་སྒོར་ཐེར་འབུམ་ ༡༦༦། ༢༠༡༣ ལོར་རྒྱ་ནག་གི་ཁེ་ལས་ ༢༥༠༠ ཡིས་ཨ་ཧྥི་རི་ཀའི་མཐུན་གྲོགས་རྒྱལ་ཁབ་ཁག་ནང་ཨ་སྒོར་ཐེར་འབུམ་ ༢༡༠ ཡི་ཚོང་འབྲེལ་བྱས་ཡོད་ཀྱང་། རྒྱ་ནག་གི་ཁེ་ལས་ཁག་གིས་ཡུལ་ཁྲིམས་ལ་བརྩི་སྲུང་བྱས་མེད་པ་མ་ཟད། འཛུགས་སྐྲུན་ཞན་པ་དང་ལས་མིའི་ཐོབ་ཐང་ལ་རྡོག་རོལ་བཏང་སྟེ། མི་ཆོས་ལས་འདས་པའི་ལས་ཀ་བྱེད་བཅུག་ཡོད་སྟབས། རྒྱལ་སྤྱིའི་སྒྲིག་འཛུགས་ཁག་གི་སྐྱོན་བརྗོད་དང་། ཨ་ཧྥི་རི་ཀ་དང་རྒྱ་ནག་གི་འབྲེལ་ལམ་ལ་དོ་ཕོག་ཤུགས་ཆེན་བྱུང་ཡོད་འདུག
༢༠༡༠ ལོར་ཨ་ཧྥི་རི་ཀའི་རྒྱ་ནག་གི་གཏེར་ཁ་སྔོག་འདོན་མགོ་བ་ཚོས་ལས་མི་འགར་མེ་མདའ་བརྒྱབ་སྟེ་བསད་སྟབས། གཏེར་ཁ་སྔོག་འདོན་ལས་མི་དང་རྒྱ་རིགས་ལས་མིའི་བར་འཁྲུག་འཛིང་ཤོར་ཏེ། རྒྱ་རིགས་གཅིག་བསད་པ་དང་གཞན་གཉིས་ལ་རྨས་སྐྱོན་ཚབས་ཆེན་བཏང་ཡོད་འདུག ༢༠༡༣ ལོར་ཛམ་བྷི་ཡ་གཞུང་གིས་རྡོ་སོལ་སྔོག་འདོན་རུ་ཁག་གི་རྒྱ་རིགས་དོ་དམ་པས་ལས་མིའི་བདེ་འཇགས་དང་འཕྲོད་བསྟེན། ཁོར་ཡུག་ལ་རྡོག་རོལ་གཏོང་བཞིན་པ་དག་སྔོན་འགོག་བྱ་ཆེད་གཏེར་ཁ་སྔོག་འདོན་རུ་ཁག་དེ་བཀག་སྡོམ་གཞུང་བཞེས་བཏང་ཡོད་པ་སོགས་འབྲེལ་ལམ་ཇེ་སྡུག་ཏུ་ཕྱིན་ཡོད་ཀྱང་། ཉེ་ལམ་རྒྱ་གཞུང་གིས་ཨ་ཧྥི་རི་ཀར་ཕྱོགས་པ་ཞེས་པའི་སྲིད་ཇུས་ལག་བསྟར་བྱས་ཏེ། མ་དངུལ་ཕོན་ཆེན་སྤྲད་དེ་འབྲེལ་ལམ་བསྐྱར་མཐུད་ཀྱིས་སྔར་ལྷག་ཚོང་འབྲེལ་བྱེད་མགོ་བཙུགས་ཡོད་འདུག
ལི་ཁེ་ཆང་ཨ་ཧྥི་རི་ཀའི་རྒྱལ་ཁབ་ཁག་ནང་སྐོར་སྐྱོད་མ་བྱས་གོང་། ཨ་ཧྥི་རི་ཀའི་ནང་མ་འཇོག་བྱེད་མཁན་རྒྱ་ནག་ཁེ་ལས་ཚོས་ཡུལ་ཁྲིམས་ལ་བརྩི་སྲུང་བྱས་ཏེ། ལས་གྲྭའི་ཐོན་སྐྱེད་དང་ཐོན་རྫས་ཀྱི་སྤུས་ཚད་གོང་འཕེལ། ཁོར་ཡུག་སྲུང་སྐྱོབ་དང་ལས་མིའི་བདེ་འཇགས་ལ་བརྩི་སྲུང་གིས་འབྲེལ་ལམ་གོང་འཕེལ་གཏོང་ཐབས་སུ་ནུས་པ་འདོན་སྤེལ་བྱ་དགོས་སྐོར་བརྗོད་ཡོད་འདུག
ཨ་ཧྥི་རི་ཀའི་གནད་དོན་ཆེད་མཁས་པ་ཌ་ཝུ་ཌི་ལོན་ཌི་རེ་ཡ་ལགས་ཀྱིས། “ ལི་ཁེ་ཆང་གི་ཨ་ཧྥི་རི་ཀའི་སྐོར་སྐྱོད་འདི་ནི་རྒྱལ་ཁབ་ཁག་གི་འབྲེལ་ལམ་གོང་མཐོར་གཏོང་རྒྱུ་ཙམ་མིན་པར། ཨ་རིའི་ཁ་གཏད་ནས་ལངས་ཏེ་འཛམ་གླིང་ལ་ཁ་ལོ་བསྒྱུར་ཐབས་ཀྱི་སྲིད་ཇུས་ཤིག་རྒྱུན་འཁྱོངས་བྱེད་ཀྱི་ཡོད་པ་རེད།” ཅེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། རྒྱ་ནག་གི་སྲིད་བློན་ལི་ཁེ་ཆང་གིས་སྲིད་འཛིན་ཨོ་བྷ་མས་རྒྱ་ནག་དང་ཞི་བདེ་རྒྱ་མཚོའི་མངའ་ཁུལ། ཤར་ལྷོ་རྒྱ་ནག་རྒྱ་མཚོའི་བདག་དབང་ཐད་རྩོད་ཉོག་བྱུང་བཞིན་ཡོད་པའི་ཉི་ཧོང་དང་ལྷོ་ཀོ་རི་ཡ། མཱ་ལེ་ཤི་ཡ། ཧྥི་ལེ་ཕིན་བཅས་རྒྱལ་ཁབ་བཞིའི་ནང་སྐོར་སྐྱོད་བྱས་ཏེ། ཨ་རིའི་ལངས་ཕྱོགས་གསལ་སྟོན་བྱས་པ་དེར་ཁ་གཏད་གཅོག་ཆེད་ཡིན་སྐོར་བརྗོད་འདུག
སང་ཉིན་ལི་ཁེ་ཆང་ནེ་ཇི་རི་ཡ་དང་། དེ་རྗེས་ཨན་གྷོ་ལ་དང་ཁེན་ཡ་ནང་སྐོར་སྐྱོད་དང་འབྲེལ། ནེ་ཇི་རི་ཡ་ནང་ཚོགས་གཏན་འཁེལ་བའི་ཨ་ཧྥི་རི་ཀའི་རྒྱལ་སྤྱིའི་དཔལ་འབྱོར་གླེང་སྟེགས་ཚོགས་འདུར་མཉམ་ཞུགས་བྱ་འཆར་ཡོད་འདུག འདི་ནི་ལི་ཁེ་ཆང་སྲིད་བློན་ཆགས་རྗེས་ཨ་ཧྥི་རི་ཀར་སྐོར་སྐྱོད་བྱས་པ་ཐོག་མ་དེ་ཆགས་ཡོད་འདུག
