བོད་པའི་མི་རབས་གསར་པ་ཚོས་བོད་ཡིག་ལ་དོ་སྣང་བྱ་དགོས།

༧གོང་ས་མཆོག་གིས་ཧོ་ལན་ཌིའི་ནང་བོད་མི་ཚོར་བཀའ་སློབ་གནང་སྟེ། མ་འོངས་བོད་མི་རིགས་ཀྱི་རིག་གཞུང་དང་བཅས་པ་ཡར་རྒྱས་གཏོང་རྒྱུའི་ཆ་རྐྱེན་གཙོ་བོ་ནང་ཆོས་ཀྱི་ཤེས་ཚད་དང་འབྲེལ་བའི་མི་རིགས་ཀྱི་རིག་གཞུང་སློབ་སྦྱོང་ཆགས་ཡོད་སྟབས། མི་རབས་གསར་པ་ཚོས་བོད་ཡིག་གལ་ཆེར་བརྩིས་ཏེ་དོ་སྣང་བྱ་དགོས་སྐོར་གསུངས་འདུག

ཁ་སང་ཚེས་ ༡༣ ཉིན་༸གོང་ས་མཆོག་གིས་ཧོ་ལན་ཌིའི་མཛད་འཕྲིན་ལེགས་པར་གྲུབ་ཏེ་འཇར་མན་གྲོང་ཁྱེར་ཧྥི་རན་ཁི་ཧྥོར་ཌིར་ (Frankfurt) ཡོད་པའི་བོད་ཁང་དུ་ཆིབས་བསྒྱུར་གནང་ཡོད་པ་དང་། སྐབས་དེར་ཧེ་སེན་མངའ་སྡེའི་སྲིད་སྐྱོང་སྐུ་ཞབས་ཝོལ་ཀེར་བྷོ་ཧྥིར་ (Mr. Volker Bouffier) མཆོག་གིས་གཙོས་འཇར་མན་གྱི་སྲིད་དོན་མགོ་ཁྲིད་ཁག་གིས་ཕེབས་བསུ་ཞུས་ཡོད་འདུག དེ་རིང་སྔ་དྲོ་༧གོང་ས་མཆོག་གསར་འགོད་ལྷན་ཚོགས་ཐོག་ཆིབས་བསྒྱུར་གནང་སྟེ་གསར་འགོད་པའི་དྲི་བར་ལན་འདེབས་གནང་ཡོད་པར་མ་ཟད།  ཉིན་རྒྱབ་ཧྥི་ར་ཕོར་ཊི་ (Fraport Arena) ཞེས་པའི་རྩེད་ཐང་དུ་མང་ཚོགས་ལ་དྲན་ཤེས་དང་བྱམས་བརྩེ་ཞེས་པའི་བརྗོད་གཞིའི་ཐོག་བཀའ་སློབ་གནང་གི་ཡོད་འདུག་ལ། སང་ཉིན་ཕྱི་ཚེས་ ༡༥ ཉིན་འཇར་མན་གནས་སྡོད་བོད་མི་ཚོར་མཇལ་ཁ་གནང་རྒྱུ་དང་། ཚེས་ ༡༦ ཉིན་འཇར་མན་གྱི་ཚོགས་པ་ (German Speakers Association) ཞེས་པས་༧གོང་ས་མཆོག་ལ་འདི་ལོའི་ལོ་འཁོར་གཟེངས་རྟགས་འབུལ་རྒྱུ་ཡིན་འདུག

ཟླ་འདིའི་ཚེས་ ༡༠ ཉིན་ནས་བཟུང་༧གོང་ས་མཆོག་གིས་ཧོ་ལན་ཌིའི་ནང་གནད་ཡོད་མི་སྣར་ཐུག་འཕྲད་དང་ལམ་གཙོ་རྣམ་གསུམ་གྱི་བཀའ་ཆོས་སོཊ་ཆོས་ཕྱོཊ་ཀྱི་མཛད་འཕྲིན་ཁག་བསྐྱངས་ཡོད་འདུག་ལ། ཧོ་ལན་ཌིའི་ནང་གི་གསར་འགོད་ལྷན་ཚོགས་ཤིག་གི་ཐོག་གསར་འགོད་པའི་བཏོན་པའི་དོལ་རྒྱལ་བསྟེན་གསོལ་གྱི་དགེ་སྐྱོན་སྐོར་གྱི་དྲི་བར་ལན་འདེབས་གནང་སྐབས་༧གོང་ས་མཆོག་གིས། ང་ཚོ་ནང་པ་སངས་རྒྱས་པ་ཡིན། སྟོན་པ་བཅོམ་ལྡན་འདས་ཀྱིས་འཇིག་རྟེན་པའི་ལྷ་དང་དྲེགས་པ་སོགས་སྐྱབས་གནས་ལ་བརྩི་མི་རུང་བ་བཀའ་གནང་ཡོད། དོལ་རྒྱལ་གྱི་གནས་ཚུལ་དེ་དུས་རབས་ ༡༧ ནང་༸གོང་ས་ལྔ་པ་ཆེན་པོའི་སྐུ་དུས་སུ་བྱུང་ཡོད། སྤྱིར་བཏང་དོལ་རྒྱལ་བསྟེན་པ་དེས་བཀྲ་མི་ཤིས་པ་ཡོང་བཞིན་ཡོད་པ་མ་ཟད། ཆོས་ལུགས་འཐེན་འཁྱེར་གྱི་གཞི་རྩར་གྱུར་བཞིན་ཡོད་པར་བརྟེན་ངོས་ཀྱིས་ཆོས་ ལུགས་རིས་མེད་ལ་དག་སྣང་བྱེད་དགོས་པ་བརྗོད་བཞིན་ཡོད། དོལ་རྒྱལ་རྗེས་འབྲང་པ་ཚོས་ཆོས་ལུགས་གཞན་གྱི་དཔེ་ཆ་དང་སྐུ་འདྲ་སོགས་གཏོར་ ཤིག་བཏང་བ་མ་ཟད། ལྷག་པར་དུ་རྙིང་མའི་ཆོས་ལ་ཧ་ཅང་སྡང་ཟུགས་ཆེན་པོ་བྱེད་བཞིན་ཡོད། ངོས་རང་ནས་ཀྱང་མ་ཤེས་པར་ཐོག་མར་ཕྱི་ལོ་ ༡༩༥༡ ལོར་འགོ་བཙུགས་ནས་ཕྱི་ལོ་ ༡༩༧༠ ལོ་བར་བསྟེན་པ་ཡིན། ཕྱིས་སུ་དོལ་རྒྱལ་སྐོར་དེ་ཧ་ཅང་རྙོག་ཕྲ་ཚ་པོ་ཞིག་ཡིན་པ་ཤེས་རྟོགས་བྱུང་ རྗེས་གཞི་ནས་རྟགས་དཔྱད་རིམ་པ་བྱས་པ་ཡིན། ངོས་ཀྱིས་ཆོས་ལུགས་རིས་མེད་ཀྱི་བླ་མ་གྲངས་ ༢༠ བསྟེན་པ་ཡིན། དེ་ཁོངས་ནས་བླ་མ་གཅིག་མ་གཏོགས་གཞན་ཚང་མས་དོལ་རྒྱལ་ལ་མཐའ་གཅིག་ཏུ་འགག་པ་སྐྱོན་མཁན་ཡིན། ངོས་ཀྱི་ཕྱི་ལོ་ ༡༩༧༠ ལོ་མགོ་ཙམ་ནས་དོལ་རྒྱལ་བསྟེན་གསོལ་བྱེད་རྒྱུ་མཚམས་འཇོག་བྱས་རྗེས་མང་ཚོགས་ཀྱིས་ཤེས་རྟོགས་དགོས་པར་བརྟེན་གནད་དོན་རྣམས་གཞི་ནས་འགྲེལ་བཤད་རྒྱག་མགོ་བཙུགས་པ་ཡིན། སྤྱིར་བཏང་ལྷས་མི་སྲུང་དགོས་ཀྱང་དོལ་རྒྱལ་ལ་མིས་སྲུང་དགོས་པའི་གནས་སྟངས་ཆགས་ཡོད། ཁོ་པ་ཚོས་ངོས་ལ་ཏཱ་ལའི་བླ་མ་རྫུན་ཤོད་རྒྱུ་མཚམས་འཇོག་དགོས། ཅེས་སྐད་འབོད་བྱེད་བཞིན་ཡོད། ཁོ་ཚོས་དེ་ལྟར་བརྗོད་དགོས་པའི་རྒྱུ་མཚན་གང་ཡིན་མི་ཤེས། དངོས་ཡོད་གནས་ཚུལ་ཤེས་ནས་གསལ་བཤད་བྱ་རྒྱུ་ངོས་ཀྱི་ལས་འགན་རེད། ཁོ་པ་ཚོས་ངོས་ཀྱི་དོལ་རྒྱལ་བསྟེན་གསོལ་དམ་བསྒྲགས་བྱས་སྐོར་རྗོད་བཞིན་ཡོད་པ་དེ་ལྟར་རྩ་བ་ནས་མིན་པ་ནི། རྒྱ་གར་ལྷོ་ཕྱོགས་སུ་དོལ་རྒྱལ་བསྟེན་གསོལ་བྱེད་མཁན་དགོན་པ་ཚོར་ལྟོས་དང་ཤེས་རྟོགས་ཐུབ་རྒྱུ་རེད། ཅེས་གསུངས་འདུག

ཧོ་ལན་ཌིའི་ནང་རོ་ཊར་ཌེམ་གྲོང་ཁྱེར་གྱི་ཡི་ཤུ་ལྷ་ཁང་ནང་ཧོ་ལན་ཌི་དང་བྷེལ་ཇམ། ཧྥ་རན་སི་བཅས་ནས་ཡོང་བའི་བོད་མི་ ༢༠༠༠ བརྒལ་བར་བཀའ་སློབ་གནང་སྐབས། ངོས་ལ་ཆ་བཞག་ན་རང་ལོ་ ༢༥ ནས་ལོ་རྒན་ ༧༩ བར་བཙན་བྱོལ་བ་བྱས་ནས་བསྡད་པ་རེད། ང་ཚོར་དཀའ་ངལ་མང་དག་ཅིག་འཕྲད་ཡོད་ཀྱང་། བོད་མི་རིགས་ཞེས་པ་དེ་ལས་སླ་པོ་ཞིག་མེད། ཇི་ཙམ་གྱི་དཀའ་ངལ་འཕྲད་པ་དེ་ཙམ་གྱིས་སྙིང་སྟོབས་དང་ལྷག་བསམ་རི་བོ་བཙུགས་པ་ལྟར་གནས་ཡོད། ང་ཚོ་བོད་པ་སྐྱོ་བོ་ཁྱོན་ནས་མིན། གཙོ་ཆེ་ཤོས་གཞིས་ལུས་རྒྱ་ཆེའི་མི་མང་གིས་མི་ལོ་ ༦༠ ལྷག་རིང་འཇིགས་སྣང་དང་དཀའ་སྡུག་ཚད་མེད་མྱངས་དང་མྱོང་བཞིན་ཡོད་ཀྱང་། མི་རིགས་ཀྱི་ཞེན་ཁོག་དང་མི་རིགས་ཀྱི་བདེན་དོན་རྩོད་རྒྱུར་ཧ་ལས་པའི་སྙིང་སྟོབས་ཡོད་ལ། མཐའ་གཅིག་ཏུ་འཚེ་བ་མེད་པའི་ལམ་ལ་བརྟེན་ནས་འགྲོ་བཞིན་ཡོད་སྟབས། ང་ཚོ་བོད་རིགས་སྤྱི་དང་ལྷག་པར་གཞིས་ལུས་རྒྱ་ཆེའི་མི་མང་རྣམས་ཀྱིས་དཀའ་ངལ་གདོང་ལེན་བྱེད་སྟངས་དེ་ཧ་ལས་པ་རེད། ང་ཚོ་བཙན་བྱོལ་དུ་ལོ་ ༥༥ ཙམ་འགྲོ་བཞིན་ཡོད། ས་གནས་གང་དུ་ཡིན་རུང་སོ་སོའི་མི་རིགས་ལ་ཞེན་ཁོག་དང་ལར་ཞེན། སོ་སོའི་ཆོས་དང་རིག་གཞུང་ཐོག་ཚང་མས་དོ་སྣང་དང་སེམས་ཁུར་བྱེད་བཞིན་ཡོད། བོད་ཀྱི་ལོ་རྒྱུས་ཀྱི་ནང་དཀའ་ངལ་ཆེ་ཤོས་དང་གཉན་འཕྲང་གི་དུས་ཚོད་འདིར་སོ་སོའི་ལས་དང་སྨོན་ལམ་གྱི་སྐྱེས་པའི་ང་ཚོའི་མི་རབས་འདི་དག་གིས་བོད་མི་རིགས་ཀྱི་ཞབས་འདྲེན་ཞུས་མེད། བོད་ཀྱི་གནས་ཚུལ་འདི་ནག་སུབ་ཏུ་ཕྱིན་མེད། ད་བར་ལོ་ ༦༠ བརྒལ་བ་ཕྱིན་ཡོད་ཀྱང་། ད་ལྟ་ཡང་འཛམ་གླིང་འདིའི་སྟེང་བོད་ཀྱི་གནས་ཚུལ་གནས་ཡོད། གཞིས་ལུས་རྒྱ་ཆེའི་མི་མང་དང་ང་ཚོ་བཙན་བྱོལ་ཏུ་ཡོད་པའི་རྒྱ་ཆེའི་མི་མང་ཚང་མས་བོད་མི་རིགས་ཀྱི་མི་གོ་ཆོད་པ་ཞིག་ཆགས་ཡོད། འདི་ནི་ཁྱེད་རང་ཚོའི་སེམས་ལ་སྤོབས་པ་དང་སྤྲོ་བ་སྐྱེས་དགོས་རྒྱུ་ཞིག་ཆགས་ཡོད། ཅེས་གསུངས་ཡོད།

ཡང་༧གོང་ས་མཆོག་གིས། ཁྱེད་རང་ཚོ་ཚང་མ་བོད་པ་ཞིག་ཡིན་པའི་ཆ་ནས་སྤོབས་པ་སྐྱེས་དགོས། ང་ཚོའི་ལུང་པ་ཤོར་སོང་། ལུང་པའི་ནང་དཀའ་ངལ་མང་པོ་ཞིག་འཕྲད་བཞིན་འདུག ད་ང་ཚོ་བྱུང་མ་སོང་བསམས་ནས་སེམས་ཀྱི་ངར་ཤུགས་ཤི་བ་ལྟ་བུ་བྱེད་རྒྱུ་མེད། བྱེད་དགོས་དོན་ཡང་མེད། ང་ཚོས་མ་འོངས་པར་བོད་མི་རིགས་ཀྱི་རིག་གཞུང་དང་བཅས་པ་ཡར་རྒྱས་གཏོང་རྒྱུའི་ཆ་རྐྱེན་གཙོ་བོ་དེ་ནང་ཆོས་ཀྱི་ཤེས་ཚད་དང་། དེ་དང་འབྲེལ་བའི་མི་རིགས་ཀྱི་རིག་གཞུང་སློབ་སྦྱོང་ཡོད་དགོས། དེའི་གཞི་རྩ་བོད་ཡིག་ཤེས་དགོས་ཀྱི་ཡོད། ཁྱེད་རང་ཚོ་མི་རབས་གསར་པ་ཚོས་བོད་ཡིག་གལ་ཆེར་བརྩིས་ཏེ་དོ་སྣང་བྱེད་དགོས་ཚུལ་སོཊ་གསུངས་ཡོད་པར་མ་ཟད། འདས་པའི་ལོ་ངོ་དེ་དག་ནང་འགྱུར་མང་པོ་ཞིག་ཕྱིན་ཡོད་པ་ལྟར། མ་འོངས་པར་བོད་མི་ཚོས་སོ་སོའི་ལས་ཀ་བྱེད་ས་དེར་བོད་སྤྱི་པའི་དོན་དག་འདི་ཡིན་ཞེས་སྟོན་རྒྱུ་མེད་ནའང་། ལས་ཀ་བྱེད་ས་དེར་དྲང་པོ་དང་སེམས་པ་རྣམ་དག ཡ་རབས། སེམས་པ་བཟང་པོ་བྱ་རྒྱུ་དང་། བོད་པ་ནང་ཁུལ་ལ་རོགས་རམ་དང་འཆམ་མཐུན། མི་རིགས་གཞན་ལ་གུས་ཞབས་སོགས་བྱ་རྒྱུ་ཧ་ཅང་གལ་ཆེན་ཡིན་སྐོར་གསུངས་ཡོད་འདུག

དོལ་རྒྱལ་གྱི་སྐོར་ལ་བཀའ་སློབ་གནང་སྐབས་༧གོང་ས་མཆོག་གིས། ཁ་སང་ནོར་ཝེར་དོལ་རྒྱལ་རྗེས་འབྲང་པ་ཚོ་ཧ་ཅང་ངར་པོ་བྱས་ཏེ་བསླེབ་འདུག ངར་སྐྱག་རྫུན་མ་ཤོད། ཅེས་ཟེར་གྱི་འདུག ངོས་ནས་སྐྱག་རྫུན་ཤོད་ཀྱི་མེད། དངོས་གནས་བྱས་ན་ཁོ་ཚོས་སྐྱག་རྫུན་བཤད་པ་མ་གཏོགས་ངོས་ཀྱི་སྐྱག་རྫུན་བཤད་མེད། གང་ལྟར་ལོ་རྒྱུས་རིང་པོ་ཡོད་པའི་རྙོག་གྲ་ཞིག་རེད། དང་པོ་དེར་དོལ་རྒྱལ་བསྟེན་ན་སྐྱོན་ཡོད་པ་དེ་ངོས་རང་གི་ལོ་རྒྱུས་དང་འབྲེལ་ནས་ཤོད་རྒྱུ་འདི་ངོས་ཀྱི་ལས་འགན་རེད། བཤད་ནས་ཉན་མ་ཉན་སོ་སོའི་བསམ་བློ་གཏོང་རྒྱུ་རེད་མ་གཏོགས་ངོས་ཀྱིས་བཤད་པ་དེ་ ཉན་དགོས་རེད་ཅེས་བརྗོད་ཀྱི་མེད་སྟབས། དོལ་རྒྱལ་སྐོར་གྱི་རྒྱབ་ལྗོངས་འདི་ལྟར་རེད། དོལ་རྒྱལ་བསྟེན་ན་སྐྱོན་འདུག་མ་གཏོགས་དོལ་རྒྱལ་བསྟེན་ཆོག་གི་མ་རེད་ཅེས་བརྗོད་ཐུབ་ཀྱི་མ་རེད། བར་སྐབས་ནས་དགེ་ལྡན་གྱི་ལྷན་ཚོགས་ཀྱི་ཐོག་ནས་དོལ་རྒྱལ་སྐོར་ཉམས་ཞིབ་ཞིབ་ཕྲ་བྱས་རྗེས་དཔེ་དེབ་གཅིག་བཏོན་ཡོད། རིམ་པས་དེབ་འདི་དབྱིན་ཡིག་ཐོག་བསྒྱུར་ཐུབ་ན་གསལ་པོ་ཆགས་ཀྱི་རེད། ཅེས་སོགས་གསུངས་ཡོད་འདུག

གསར་འགོད་པ། དོན་གོ