ས་སྐྱ་གོང་མ་རིན་པོ་ཆེ་མཆོག་གིས་ཧྥ་རན་སིར་བོད་པ་ཚོར་འཆི་མེད་ཚེ་དབང་གནང་བ་དང་འབྲེལ་ཆོས་བརྒྱུད་ཁག་འཆམ་མཐུན་དང་ཆོལ་ཁ་གསུམ་ཆིག་སྒྲིལ་ཡོང་བཞིན་པའི་ཐད་ཚང་མས་མཉམ་རུབ་གནང་གལ་ཆེ་སྐོར་གསུངས་འདུག
ཉིན་འདི་འགར་དཔལ་ས་སྐྱ་གོང་མ་རིན་པོ་ཆེ་མཆོག་གིས་ཡུ་རོབ་རྒྱལ་ཁབ་ཁག་ཅིག་ཏུ་ཆོས་ཕྱོགས་ཀྱི་མཛད་འཕྲིན་སྐྱོང་བཞིན་པ་ལྟར། ཧྥ་རན་སིའི་བརྩེ་ཆེན་ཚོགས་པས་ཇི་ལྟར་གདན་ཞུས་གནང་བ་བཞིན། ཁ་སང་ཚེས་ ༢༩ ཉིན་གྱི་ཕྱི་དྲོའི་ཆུ་ཚོད་ ༢ ནས་ ༦ བར་དཔལ་ས་སྐྱ་གོང་མ་རིན་པོ་ཆེ་མཆོག་གིས། རྒྱལ་ས་ཕ་རི་སིའི་(Robespierre) ཝོ་བྷེ་སེ་པད་ཝེ་ས་གནས་ཚོགས་ཁང་དུ། བོད་པ་དང་ས་གནས་ཡུལ་མི་ ༡༠༠༠ བརྒལ་བར་འཆི་མེད་ཚེ་ཡི་བཀའ་དབང་དང་འབྲེལ་བཟང་སྤྱོད་ཐོག་བཀའ་སློབ་བསྩལ་ཡོད།
ཐོག་མར་བརྩེ་ཆེན་ཚོགས་པའི་ཚོགས་གཙོ་ངག་དབང་དཔལ་འབྱོར་ལགས་ཀྱིས། ཚོགས་པའི་དམིགས་ཡུལ་དང་བྱེད་སྒོ་ཁག་སྙན་སྒྲོན་ཞུས་རྗེས། ཚོགས་པའི་ཚོགས་མི་རྣམ་པ་དང་དང་ཕ་རི་བོད་གཞུང་དོན་གཅོད། བོད་རིགས་ཚོགས་པའི་སྐུ་ཚབ་སོགས་ཀྱིས་མནྡལ་རྟེན་གསུམ་འདེགས་འབུལ་ཞུས་མཚམས། རིན་པོ་ཆེ་མཆོག་གིས་འཆི་མེད་ཚེ་ཡི་བཀའ་དབང་བསྩལ་ཏེ་མང་ཚོགས་ལ་མཇལ་ཁ་ཡང་གནང་ཡོད་པ་དང་། བཀའ་དབང་དངོས་སུ་མགོ་འཛུགས་མ་གནང་གོང་རིན་པོ་ཆེ་མཆོག་གིས་མང་ཚོགས་ལ་ནང་ཆོས་ངོ་སྤྲོད་མདོར་བསྡུས་ཤིག་གནང་རྗེས། དེང་སྐབས་ཚན་རིག་ཡར་རྒྱས་ཕྱིན་ཏེ་སྔོན་མ་ན་ཚ་བཅོས་མི་ཐུབ་པ་རྣམས་ཐུབ་པ་དང་། མི་འགྲོ་མི་ཐུབ་སར་འགྲོ་ཐུབ་པ་བྱུང་སྟེའགྱུར་བ་ཆེན་པོ་ཕྱིན་ཡོད་རུང་། ད་དུང་ཡང་ཚན་རིག་དང་དངོས་པོ་ཡར་རྒྱས་ཁོ་ནས་མིའི་སེམས་ཀྱི་འདོད་བློ་ཆ་ཚང་བསྐངས་ཐུབ་མེད་པར། བདེ་སྐྱིད་ངོ་མ་ཞིག་དགོས་ན་རང་གི་ཉོན་མོངས་ཀྱི་བློ་ཆུང་དུ་གཏོང་བ་དང་། གཞན་ཕན་སྙིང་རྗེའི་བློ་འཕེལ་ཐབས་ལ་འབད་དགོས་པ། སྔོན་མ་ཆོས་དུག་ཏུ་བལྟ་མཁན་ཚོས་ཀྱང་དེང་སྐབས་ནང་ཆོས་ལ་དོ་སྣང་ཆེན་པོ་བྱས་ཏེ། ནང་ཆོས་ཀྱི་རིན་ཐང་དང་ནུས་པ་ཇེ་ཆེར་འགྲོ་བཞིན་ཡོད་སྐོར་སོགས་གསུངས་ཡོད་འདུག
རིན་པོ་ཆེས་མུ་མཐུད་དུ་ཕྱི་རྒྱལ་དུ་གནས་སྡོད་བོད་པ་ཚོས་འཕྲལ་སེལ་འཚོ་བ་ཙམ་ལ་མགོ་མ་འཁོར་བར། བོད་པའི་ཆོས་དང་རིག་གཞུང་། སྐད་ཡིག་བཅས་ལ་དོ་སྣང་གིས་སོ་སོའི་བྱིས་པར་བོད་པའི་བཟང་པོའི་གོམས་གཤིས་འཇགས་ཐབས་ལ་ཤུགས་སྣོན་དང་། ལྷག་པར་དུ་གཞོན་སྐྱེས་ཚོས་ནུབ་ཕྱོགས་པའི་བཟང་ཕྱོགས་ཀྱི་ཡོན་ཏན་ལ་ཁ་མིག་ཡར་བལྟ་དགོས་རྒྱུ་ལས། ཁོང་ཚོས་ཆང་རག་དང་བཟི་སྨན་འདྲེས་མའི་ཐ་མག་འཐེན་པར་དཔེ་བལྟས་ཏེ་ཞབས་འདྲེན་ཞུས་ན་བོད་པ་སྤྱི་ཡོངས་ཀྱི་མཚན་སྙན་ལ་གནོད་ཚབས་ཆེ་བས་ཡིད་གཟབ་དགོས་པ། དེང་སྐབས་༧གོང་ས་མཆོག་གི་བཀའ་དྲིན་འོག བོད་པའི་ཆོས་ལུགས་ཁག་འཆམ་མཐུན་དང་བོད་ཆོལ་ཁ་གསུམ་མཐུན་སྒྲིལ་རྡོག་རྩ་གཅིག་ཡོད་སྟབས། ད་དུང་མུ་མཐུད་གང་ཉིད་ཀྱི་དགོངས་གཞིའི་འོག་ཤར་བསྐྱོད་དགོས་རྒྱུ་ཧ་ཅང་གལ་ཆེན་ཡིན་པ་དང་། ཕྱི་རྒྱལ་དུ་སྡོད་མཁན་བོད་པ་ཚོས་༧གོང་ས་མཆོག་གི་ཞལ་རས་ཡང་ཡང་མཇལ་རྒྱུའི་དུས་ཚོད་རག་གི་མེད་ཀྱང་། སྐབས་དང་དུས་སོ་སོར་བརྙན་འཕྲིན་དང་དྲ་རྒྱ་བརྒྱུད་༧གོང་ས་མཆོག་གི་བཀའ་སློབ་གསལ་པོར་གསན་རྒྱུར་དོ་སྣང་དགོས་པའི་བཀའ་སློབ་ཀྱང་གནང་སོང་།
ཧྥ་རན་སིའི་མཛད་འཕྲིན་ཁག་འགྲུབ་རྗེས། དཔལ་ས་སྐྱ་གོང་མ་རིན་པོ་ཆེ་མཆོག་གིས་མུ་མཐུད་དུ་སུད་སི་དང་སྦེལ་ཇེམ་དུ་མཛད་འཕྲིན་བསྐྱང་རྒྱུ་ཡིན་འདུག ཅེས་ས་གནས་ནས་རིག་བཟང་ལགས་ཀྱིས་གནས་ཚུལ་བཏང་འབྱོར་བྱུང་།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དཔལ་༧གོང་མ་ས་སྐྱ་རིན་པོ་ཆེ་མཆོག་སྐུ་ཚེ་སྐལ་བརྒྱར་བརྟན་པར་ཤོག ཁྱེད་ཀྱིས་ཆོས་བཤད་རྐྱང་པ་དང་ཚེ་ཕྱི་མ་སོགས་ཤོད་ནས་སྡོད་རྒྱུ་མ་ཡིན་པར་བོད་སྤྱི་བའི་རྩ་དོན་དང་འབྲེལ་བའི་ཐོག་བཀའ་སློབ་གནང་བར་ཐུགས་རྗེ་ཆེ། (དེང་སྐབས་༧གོང་ས་མཆོག་གི་བཀའ་དྲིན་འོག བོད་པའི་ཆོས་ལུགས་ཁག་འཆམ་མཐུན་དང་བོད་ཆོལ་ཁ་གསུམ་མཐུན་སྒྲིལ་རྡོག་རྩ་གཅིག་ཡོད་སྟབས། ད་དུང་མུ་མཐུད་གང་ཉིད་ཀྱི་དགོངས་གཞིའི་འོག་ཤར་བསྐྱོད་དགོས་རྒྱུ་ཧ་ཅང་གལ་ཆེན་ཡིན)