ཁ་སང་ཧྥ་རན་སི་ཁྲིམས་ཁང་གིས་དེ་སྔའི་སྲིད་འཛིན་ཟུར་པ་ནེ་ཁཱོ་ལཱ་སར་ཁཱོ་ཛི་ཡིས་ལྐོག་ཟ་ལྐོག་རྔན་བླངས་པ་བཅས་ཀྱི་དོགས་གཞིའི་འོག་ཁྲིམས་བཤེར་བྱས་ཡོད་འདུག
ཁ་སང་ཧྥ་རན་སི་རྒྱལ་སའི་ནཱན་ཌེ་རར་ (Nanterre) ཁྲིམས་ཁང་གིས་སྲིད་འཛིན་ཟུར་པ་ནེ་ཁཱོ་ལཱ་སེ་སར་ཁཱོ་ཛི་ (Nicolas Sarkozy)ཡིས་དེ་སྔོན་དབང་ཆ་བེད་སྤྱོད་ལོག་པར་བཏང་སྟེ་ ༢༠༠༧ ལོའི་སྲིད་འཛིན་གྱི་འོས་བསྡུའི་འགྲོ་གྲོན་གྱི་ཡོང་ཁུངས་རྩད་ཞིབ་བྱེད་མ་བཅུག་པ་དང་། ལྐོག་ཟ་དང་ལྐོག་རྔན་བླངས་པ། ལྐོག་ཚོང་བརྒྱབ་པ། རྒྱལ་ཁབ་ཀྱི་གསང་བ་ཕྱི་གྱར་བྱས་པ་བཅས་ཀྱི་དོགས་གཞིའི་འོག དུས་ཡུན་ཆུ་ཚོད་ ༡༥ ཙམ་བཀག་ཉར་དང་འབྲེལ་འདྲི་གཅོད་བྱས་ཡོད་འདུག འདི་ནི་ཧྥ་རན་སི་ཁྲིམས་ཁང་གིས་སྲིད་འཛིན་ཟུར་པ་ཞིག་ལ་ཁྲིམས་བཤེར་བྱས་པ་ཐོག་མ་དེ་ཆགས་ཡོད་འདུག
འདིའི་ཐད་ཧྥ་རན་སི་གཞུང་གི་མགྲིན་ཚབ་པ་ལཱེ་ཧྥོལ་ (Stephane Le Foll) ལགས་ཀྱིས། “ ཁྲིམས་ཀྱི་མདུན་སར་མི་ཚང་མ་འདྲ་མཉམ་ཡིན་སྟབས། ནེ་ཁཱོ་ལཱ་སེ་སར་ཁཱོ་ཛི་ཡི་བྱ་སྤྱོད་རིགས་ལ་ཁྲིམས་ཐོག་ནས་ཞིབ་འཇུག་མཐིལ་ཕྱིན་བྱས་ཏེ་ནག་ཉེས་གཞིར་བཟུང་ཐག་གཅོད་བྱ་རྒྱུ་ཡིན།” ཞེས་བརྗོད་འདུག ཧྥ་རན་སིའི་གྲོས་ཚོགས་འཐུས་མི་ཨེ་སེ་ཌོར་སི་ (Christian Estrosi) ལགས་ཀྱིས། “ ཧྥ་རན་སིའི་ལོ་རྒྱུས་ནང་སྲིད་འཛིན་ཟུར་པ་ཞིག་ལ་ཁྲིམས་བཤེར་བྱས་པ་ཐོག་མ་ཡིན་སྟབས། ཁོང་ལ་ཁྲིམས་ཁང་གིས་མ་ཉེས་ཁག་གཡོགས་མ་བྱས་པར་དྲང་ཚུགས་བརྟན་པོས་ཁྲིམས་ཐག་གཅོད་ཐུབ་པ་བྱ་དགོས།” ཞེས་བརྗོད་འདུག
༢༠༠༧ ལོའི་ཧྥ་རན་སི་རྒྱལ་ཡོངས་སྲིད་འཛིན་འོས་བསྡུའི་སྐབས་ནེ་ཁཱོ་ལཱ་སར་ཁཱོ་ཛིས་ལེ་བྷེ་ཡའི་དབང་འཛིན་གྷ་ཌ་ཧྥི་ (Muammar Gaddafi) ཡི་ལག་ནས་ཨ་སྒོར་ས་ཡ་ ༧༠ དང་། ཧྥ་རན་སི་ཕྱུག་བདག་ལཱི་ལཱན་ནེ་ (Liliane Bettencourt) ཡི་ས་ནས་ཨ་སྒོར་ཆིག་འབུམ་ལྔ་ཁྲི་བཅས་ཀྱི་ཁྲིམས་མཐུན་མིན་པའི་ལྐོག་དངུལ་བླངས་ཏེ། འོས་བསྡུའི་ཁྱབ་བསྒྲགས་བྱས་ཡོད་པ་ཟད། སྲིད་འཛིན་མ་ཆགས་སྔོན་པ་ཀི་སི་ཐན་གཞུང་གི་ལྐོག་རྔན་བླངས་ཏེ། ཧྥ་རན་སི་དང་པ་ཀི་སི་ཐན་བར་གོ་མཚོན་ཉོ་ཚོང་གི་གྲོས་མཐུན་འཇོག་རྒྱུའི་ཐག་གཅོད་སོགས་བྱས་ཡོད།
༢༠༡༢ ལོའི་སྲིད་འཛིན་འོས་བསྡུའི་སྐབས་འོས་བསྡུའི་འགྲོ་གྲོན་གྱི་ཡོང་ཁུངས་ཁ་གསལ་བཟོས་མེད་པ་མ་ཟད། འཇར་མན་གྱི་རྒྱལ་སྲུང་བདེ་འཇགས་ལྷན་ཁང་ (Stasi ) ཞེས་པ་དང་ལག་འབྲེལ་གྱིས་ལྐོག་ཚོང་བརྒྱབ་ཡོད་པ་དང་། དེ་བཞིན་ཧྥ་རན་སི་ཞིབ་དཔྱོད་ཁང་གི་ཁྲིམས་དཔོན་གྷེལ་བྷར་ཌི་ (Gilbert Azibert ) ལགས་བསླུས་ཏེ། འོས་བསྡུའི་གྱོད་དོན་འགེབ་ཐབས་ཀྱིས་ཁོ་ལ་མོ་ན་ཀོ་ (Monaco) ནང་གནད་ཡོད་གོ་གནས་ཤིག་བཀོད་སྒྲིག་བྱ་རྒྱུ་བྱས་པ་སོགས་ཀྱི་གནས་ཚུལ་རིམ་པ་བཞིན་ཐོན་ཏེ་ཐེངས་འདིར་ཁྲིམས་བཤེར་བྱས་པ་ཞིག་ཡིན་འདུག
༢༠༡༢ ལོར་ཧྥ་རན་སིའི་ཆེས་མཐོའི་ཁྲིམས་ཁང་གིས་ནེ་ཁཱོ་ལཱ་སར་ཁཱོ་ཛི་ཡིས་སྲིད་འཛིན་འོས་བསྡུའི་སྐབས་ལྐོག་རྔན་བླངས་ཡོད་པའི་དོགས་གཞིའི་འོག་འདྲི་གཅོད་བྱས་ཡོད་ཀྱང་། ༢༠༡༣ ལོར་ཁ་མཆུ་དེ་ཕྱིར་ལེན་བྱས་ཡོད་འདུག ཁྲིམས་ཁང་གིས་ད་ལྟ་སླར་ཡང་གྱོད་དོན་དེ་སྔོག་འདོན་བྱས་ཏེ། ཁོང་དང་ཁྲིམས་རྩོད་པ་ཧར་ཛོག་ (Thierry Herzog)དང་ཁྲིམས་དཔོན་གྷེལ་བྷར་ཌི་ (Gilbert Azibert ) སོགས་ལ་ཁྲིམས་བཤེར་བྱེད་བཞིན་ཡོད་འདུག དཔྱད་བརྗོད་པ་ཚོས། ཐེངས་འདིར་ཧྥ་རན་སི་ཁྲིམས་ཁང་གིས་སྲིད་འཛིན་ཟུར་པ་ནེ་ཁཱོ་ལཱ་སར་ཁཱོ་ཛི་ཡིས་ནག་ཉེས་བསགས་ཡོད་པ་ཁྲིམས་ཐོག་ནས་ར་སྤྲོད་བྱུང་ཚེ། ཁོང་ལ་ཨ་སྒོར་ ༦༨༢༠༠༠ ལྷག་གི་ཉེས་ཆད་དང་། ལོ་ ༥ ནས་ ༡༠ བར་གྱི་དུས་བཀག་བཙོན་འཇུག་བཅས་ཀྱི་ཉེས་པ་འཕོག་རྒྱུ་མ་ཟད། ཁོ་མ་འོངས་པར་སྲིད་འཛིན་དུ་ལངས་རྒྱུའི་ལམ་ཁ་རྦད་དེ་འགག་ཚར་ཡོད་སྐོར་སོགས་བརྗོད་འདུག
གསར་འགོད་པ། དོན་གྲུབ།
