༧གོང་ས་མཆོག་གིས་ལ་དྭགས་ཁུལ་གྱི་མཛད་འཕྲིན་ལེགས་པར་གྲུབ་ཏེ། དེ་རིང་ཉིན་རྒྱབ་ཕྱིར་བཞུགས་སྒར་དུ་ཆིབས་བསྒྱུར་གནང་སོང་།
དེ་རིང་ཕྱི་ཚེས་ ༢༡ ཉིན་གྱི་ཉིན་རྒྱབ་ཆུ་ཚོད་ ༢།༠༠ ཐོག ༧གོང་ས་མཆོག་གིས་ལ་དྭགས་ཁུལ་གྱི་མཛད་འཕྲིན་ལེགས་པར་གྲུབ་ཏེ་ཕྱིར་བཞུགས་སྒར་ཕོ་བྲང་དུ་ཞབས་སོར་བདེ་བར་འཁོད་གནང་སོང་།
ཟླ་སྔོན་མའི་ཕྱི་ཚེས་ ༢༦ ཉིན་ནས་བཟུང་༧གོང་ས་མཆོག་གིས་ལ་དྭགས་ཟངས་དཀར་དང་སླེ་ཇོ་ཁང་། དཔེ་ཐུབ་དགོན། པ་ཀུ་ལ་དྲན་རྟེན་གླིང་། ཀླུ་འཁྱིལ་དགོན་བཅས་སུ་ཆོས་ཕྱོགས་ཀྱི་མཛད་འཕྲིན་བསྐྱངས་ཡོད་པ་དང་། ཟླ་འདིའི་ཕྱི་ཚེས་ ༣ ཉིན་ནས་ཕྱི་ཚེས་ ༡༣ བར་ལ་དྭགས་ཞི་བའི་ཚལ་གསུང་ཆོས་རྭ་བར་དུས་འཁོར་དབང་ཆེན་གྱི་སྟ་གོན་དང་སྔོན་འགྲོའི་གསུང་ཆོས། དབུ་མ་རིན་ཆེན་ཕྲེང་བ་དང་བཤེས་སྦྲིངས་ཀྱི་གསུང་ཆོས། དུས་འཁོར་དབང་ཆེན་གྱི་སྒྲུབ་ཆོག་དང་སྔོན་འགྲོའི་བཀའ་དབང་། དུས་འཁོར་བཀའ་དབང་དང་དུས་འཁོར་གྱི་དབང་ཆེན་བཅས་གནང་ཡོད།
ཕྱི་ཚེས་ ༡༥ ཉིན་ལྕོག་ལམ་སར་ཡོད་པའི་རུ་ཐོག་ལྷུ་འགྲུབ་ཆོས་སྡིངས་གྲྭ་ཚང་རབ་གནས་དབུ་འབྱེད་དང་། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་གྲོས་ཚོགས་སུ་ཆིབས་བསྒྱུར་གྱིས་དབུས་གྲོས་ཚོགས་འཐུས་མི་ ༣༠ ཙམ་ལ་མཇལ་འཕྲད་དང་ལམ་སྟོན་བཀའ་སློབ། ཕྱི་ཚེས་ ༡༦ ཉིན་གྱི་སྔ་དྲོ་ལ་དྭགས་དབུས་གཞུང་ནང་པའི་རིག་གནས་སློབ་གྲྭ་དང་། ས་བྷོ་ས་གནས་སུ་དྭ་ཕྲུག་སློབ་མའི་སྡོད་ཁང་གསར་རྒྱག་ལེག་འགྲུབ་ཀྱི་མཛད་སྒོར་ཆིབས་བསྒྱུར་ཀྱི་བཀའ་སློབ་གནང་ཡོད། ཉིན་རྒྱབ་ལ་དྭགས་སླེ་ཁ་ཆེ་ཚོགས་པའི་གསོལ་འདེབས་ལྟར་ཆིབས་བསྒྱུར་གྱིས་ལམ་སྟོན་བཀའ་སློབ་བཅས་གནང་ཡོད།
ཟླ་རྗེས་མར་༧གོང་ས་མཆོག་འཇར་མན་ནང་ཆིབས་བསྒྱུར་གནང་སྟེ། ཕྱི་ཚེས་ ༢༣ ནས་ ༢༦ བར་ཧན་བྷེག་གྲོང་ཁྱེར་དུ་ང་ཚོའི་མི་ཚེ་ནང་གི་འགྲོ་བ་མིའི་རིན་ཐང་ཞེས་པའི་བརྗོད་གཞིའི་ཐོག་བགྲོ་གླེང་དང་། མི་མང་ལ་བཀའ་ཆོས་བཅས་གནང་རྒྱུ་ཡིན་འདུག
གསར་འགོད་པ། དོན་གོ
