སྐྱིད་བྱམས་བསྟན་འཛིན་དགའ་བ།
ལ་དྭགས་ནི་སྟོད་མངའ་རིས་ཕྱོགས་ནས་བཞུར་འོང་བའི་སེདྒེ་ཁ་བབས་ཀྱི་གཙང་པོའི་གཡས་གཡོན་དུ་ཆགས་པའི་ཡུལ་གྲུ་ཞིག་རེད་ལ། མི་རྣམས་ཀྱི་འཚོ་བ་སྐྱེལ་སྟངས་དང་ཡུལ་སྲོལ་གོམས་གཤིས་སོགས་ནི་བོད་པ་དང་གཅིག་མཚུངས་རེད། ཡུལ་གྲུ་འདི་དག་གི་མཐའ་སྐོར་དུ་རི་བོ་སྐམ་པོ་གནམ་ལ་ཟུག་པ་ལྟ་བུ་ཤ་སྟག་གིས་བསྐོར་ཡོད་སྟབས་མཐོང་སྣང་དུ་ས་ཆ་འདི་དག་དེ་ཙམ་གྱི་ཡིད་དུ་འོང་བ་ཞིག་མ་ཡིན་རུང་། ཡུལ་འདིའི་མཛེས་སྡུག་ངོ་མ་ནི་ཕྱི་རོལ་ན་མེད་པར་ཡུལ་འདིའི་མི་རྣམས་ཀྱི་སེམས་ཁམས་ན་མཆིས་པའི་མཛེས་སྡུག་དག་ཡུལ་འདིའི་མཛེས་སྡུག་ངོ་མ་དེ་ཡིན།
དེ་ལྟར་ཡུལ་འདིའི་མི་རྣམས་ཀྱི་སེམས་ཁམས་ན་མཆིས་པའི་མཛེས་སྡུག་དེས་ལོ་ལྟར་རེ་བཞིན་ཡུལ་འདིར་ཡུལ་བསྐོར་སྤྲོ་འཆམ་པའི་ངང་ཚུལ་ནི་ངང་པ་མཚོ་ལ་འཁོར་བ་བཞིན་རྒྱུན་ཆད་དང་བྲལ་བ་ཞིག་རེད། དེ་བས་ན་གནད་དོན་འདིར་རྒྱུས་མངའ་དེ་ཙམ་མེད་པའི་མི་རྣམས་ལ་མཚོན་ན་བློ་ངོར་འདི་སྙམ་དུ་བསམ་སྲིད་དེ། ཨ་ཡ་མཚན་ས་ཆ་སྐམ་པོ་འདིར་འདི་ལྟ་བུའི་ཕྱི་རྒྱལ་ཡུལ་བསྐོར་པ་མང་པོ་ཡོང་དོན་ཅི་ཡིན་ནམ་སྙམ་དུ་དྲི་བ་འདི་ངང་གིས་འཁོར་སྲིད་པ་ཞིག་རེད།
འོན་ཀྱང་ཉིན་ཤས་རིང་ཡུལ་འདིའི་མི་རྣམས་ལ་རྒྱུས་ལོན་བྱས་ཚེ་ད་གཟོད་ཕྱི་ཤུན་ཁོ་ནའི་འཁྲུལ་སྣང་ལ་ཡིད་ཐང་ཆད་དྲགས་པའི་མགོ་སེར་ཚོས་ནང་སེམས་ཀྱི་མཛེས་སྡུག་དག་དོན་ངོ་མའི་མཛེས་སྡུག་དེ་ཡིན་པར་ཤེས་ཏེ་ཡུལ་གྲུ་འདི་ལྟ་བུ་དག་ཏུ་སྤྲོ་འཆམ་ལ་ཡོང་རྒྱུར་དགའ་མོས་བྱེད་ཀྱི་ཡོད་པ་གཞི་ནས་ཁྱེད་རང་གིས་ཤེས་ཚོར་ཐུབ་ཀྱི་རེད།
ཡུལ་འདིའི་མི་རྣམས་ཀྱི་ཀུན་སྤྱོད་ཇི་ཡིན་ཐད་ངའི་མྱོང་བ་དང་འབྲེལ་ནས་དཔེ་མཚོན་འགའ་ཞིག་ཞུས་ན། ཉིན་ཞིག་གི་ཕྱི་དྲོ་ང་དང་ངའི་རོགས་པས་ལ་དྭགས་ཀྱི་རྒྱལ་ས་གླེ་རུ་བསྐྱོད་ཅིང་ ཕྱིར་ཞི་བའི་ཚལ་དུ་ལོག་འོང་དུས་ལམ་བར་དུ་ས་རུབ་ཅིང་མཚན་གྱི་ཆུ་ཚོད་དགུ་པ་ཙམ་ལ་སླེབས། ང་དང་ངའི་རོགས་པས་འགྲུལ་བསྐྱེལ་རླངས་འཁོར་འབབ་ཚུགས་བར་གོམ་པ་བརྒྱབ་ནས་ཡོང་ཞིང་ལམ་བར་དུ་བལ་པོའི་བུད་མེད་གཅིག་དང་འཕྲད་དེ་ཁོ་མོ་དང་ཁ་བརྡ་བྱས་ནས་ཡོང་།
ཁོ་མོས་བཤད་རྒྱུར་ཁོ་མོའི་ཁྱིམ་འགྲུལ་བསྐྱེལ་རླངས་འཁོར་འབབ་ཚུགས་ཀྱི་ཉེ་འགྲམ་ན་ཡོད་པ་དང་། ཁོ་མོའི་ཚོང་ཁང་རྒྱལ་ས་སླེ་ན་ཡོད་ཚུལ་བརྗོད་བྱུང་། རྒྱལ་ས་སླེ་དང་ཁོ་མོའི་ཁྱིམ་གྱི་བར་རྒྱང་ཐག་ལེ་བར་ཁ་ཤས་ཀྱིས་ཆོད་ཡོད་ཅིང་ལམ་བར་དུ་མཚམས་རེར་གློད་འོད་ཆེམ་ཆེམ་འཕྲོ་ཞིང་། མཚམས་རེ་ཟླ་འོད་བྲལ་བའི་མཚན་དུས་བཞིན་རང་གི་རྐང་ལག་ཀྱང་མི་མཐོང་བའི་ཚོད་དུ་སྣང་།
ཁོ་མོས་མུ་མཐུད་ནས་བརྗོད་རྒྱུར་ཡུལ་འདིར་ཁེར་རྐྱང་དུ་ཕྱིན་རུང་ཉེན་ཁ་གང་ཡང་མེད་པ་མ་ཟད། ཁོ་མོ་འདིར་བསླེབས་ནས་ལོ་ངོ་དྲུག་ཙམ་སོང་ཞིང་དུས་ཡུན་དེའི་རིང་སྔ་དགོང་ཚོང་ཁང་དང་ཁྱིམ་བར་ཁེར་རྐྱང་དུ་ཕྱིན་ཚུལ་བརྗོད་བྱུང་། སྐབས་དེར་ངའི་སེམས་ལ་ཡུལ་འདིར་ས་རུབ་མཚམས་སུའང་བུད་མེད་གཅིག་ཁེར་རྐྱང་དུ་ལེ་བར་གཅིག་ཙམ་གྱི་བར་སྐྱོད་ཀྱང་། བཙན་གཡེམ་དང་འཕྲོག་བཅོམ་སོགས་ཀྱི་ཉེན་ཁ་མེད་པ་ནི་རྒྱ་གར་གྱི་རྒྱལ་ས་ལྡི་ལིར་ཉིན་ལྟར་སྐར་མ་ཉི་ཤུ་རེའི་ནང་དུ་ཡང་བཙན་གཡེམ་གྱི་གནད་དོན་རེ་ལྷག་ཚུལ་ལ་བསམས་ཚེ། ཡུལ་འདིའི་མི་རྣམས་ལ་དཀོན་མཆོག་ཅེས་བོས་ཀྱང་གཅམ་བུའི་ཚིག་ཏུ་སོང་མེད་སྙམ་པ་ཞིག་བྱུང་།
འོན་ཀྱང་ཁོ་མོར་དེའི་སྐོར་གང་ཡང་མ་བརྗོད་པར་ཁོ་མོའི་ཁྱིམ་གྱི་ཉེ་འགྲམ་ནས་ང་དང་ངའི་རོགས་པས་ཁོ་མོའི་ལམ་སྟོན་བཞིན་རླངས་འཁོར་འབབ་ཚུགས་ཕྱོགས་སུ་ཡོང་བ་ཡིན། དེ་ནི་ཡུལ་འདིའི་བུད་མེད་ཀྱི་བདེ་འཇགས་སྐོར་མཚོན་པའི་དཔེ་མཚོན་ཆུང་ངུ་ཞིག་རེད།
དེ་དང་འདྲ་བའི་དཔེ་མཚོན་གཞན་ཞིག་ནི་ཡང་ཉིན་ཞིག་ང་དང་ངའི་ངོ་ཤེས་ཕྱི་རྒྱལ་པ་ཞིག་ཞི་བའི་ཚལ་ཞེས་པའི་༸གོང་ས་མཆོག་གི་གཟིམ་ཆུང་ཡོད་ས་ནས་རྒྱང་ཐག་ལེ་བར་གཅིག་ཙམ་གྱི་ས་ན་ཆགས་པའི་ཤེལ་དགོན་པར་བསྐྱོད་ཅིང་། ཕྱིར་ལོག་ཡོང་དུས་ལམ་བར་ནས་རླངས་འཁོར་ཞིག་བཀག་ཏེ་ཡོང་ཞིང་ཞི་བའི་ཚལ་དང་ཉེ་ས་ནས་ངེད་གཉིས་རླངས་འཁོར་ལས་བབས་ཏེ་ཁ་ལོ་པར་གླ་ཆ་ག་ཚོད་ཡིན་མིན་དྲིས་སྐབས། ཁོ་པས་གླ་ཆ་མི་དགོས་ཞེས་གླ་ཆ་བླངས་མ་སོང་། གལ་ཏེ་ཁ་ལོ་པས་ངེད་གཉིས་ལ་གླ་ཆ་བླངས་ཚེ་ཉུང་མཐར་ཡང་ཧིན་སྒོར་ལྔ་བཅུ་ཙམ་གནས་པ་ཡོད། ཧིན་སྒོར་ལྔ་བཅུ་ནི་ཡོང་འབབ་ཆེ་བའི་མི་སྣ་ཞིག་ལ་མཚོན་ན་དེ་ཙམ་ཆེན་པོ་མིན་རུང་ཧིན་སྒོར་བཅུ་ཙམ་རག་པ་ལའང་ལུས་ཀྱི་རྔུལ་ཆུ་འདོན་དགོས་པའི་ལས་མི་ཞིག་ལ་མཚོན་ན་དེ་ནི་ཧ་ཅང་གི་རིན་ཐང་ཆེན་པོ་ཞིག་རེད།
ཡང་དེ་དང་མཚུངས་པར་ཉིན་ཞིག་གི་ཕྱི་དྲོར་ང་ཁེར་རྐྱང་དུ་རྒྱལ་ས་སླེ་ནས་ཞི་བའི་ཚལ་བར་འགྲུལ་སྐྱེལ་རླངས་འཁོར་ཞིག་གི་ནང་ཡོང་ཞིང་། སྐབས་དེར་ང་ལ་དངུལ་སིལ་མ་མེད་པ་དང་སྟབས་འཁེལ་ཏེ་ཁ་ལོ་པས་དངུལ་བླངས་མ་སོང་། འདི་ལྟ་བུའི་ཡ་རབས་ནི་མི་རྣམས་དཔལ་འབྱོར་གྱི་བྲན་གཡོག་ཏུ་ཚུད་པའི་དུས་འདིར་ཧ་ཅང་མཐོང་དཀོན་པའི་བྱུང་བ་ཞིག་རེད། དེ་ལྟར་བཟང་སྤྱོད་ཀྱི་རྟགས་མཚན་མང་པོ་ཞིག་ངས་དངོས་སུ་མིག་མཐོང་ལག་ཟིན་བྱུང་བར་ ང་རང་ཡ་མཚན་ཞིང་ཡུལ་འདིའི་མི་རྣམས་ལ་སེམས་གཏིང་ནས་དགའ་ཞེན་སྐྱེས།
དེ་ལྟར་གོང་ཞུས་དཔེ་མཚོན་དེ་དག་གིས་ཡུལ་འདིའི་སྐྱེ་བོ་ཐམས་ཅད་ཀྱི་ཀུན་སྤྱོད་དེ་ལྟར་ཡིན་པ་མཚོན་མི་ཐུབ་ཀྱང་། གནའ་བོའི་བོད་ཀྱི་གཏམ་དཔེར་ཟུར་བལྟས་ལེབ་མཐོང་ཞེས་བཤད་སྲོལ་ཡོད་པ་ལྟར་ཡུལ་འདིའི་མི་བརྒྱ་ཆ་བདུན་ཅུ་ལྷག་ཙམ་གྱི་ཀུན་སྤྱོད་ཡག་པོ་ཡོད་པ་གསལ་བཤད་བྱེད་ཐུབ།
མཚམས་འདི་ནས་ཁྱེད་ཀྱིས་ཡུལ་གྲུ་འདིའི་མི་རྣམས་ལ་དེ་ལྟ་བུའི་ཡ་རབས་བཟང་སྤྱོད་དང་ལྡན་པའི་རྒྱབ་ལྗོངས་ཀྱི་རྒྱུ་མཚན་ཇི་ཡིན་ལ་བསམ་བློ་ཞིག་ཐོངས་དང་། ངས་ཚོད་དཔག་བྱས་པ་ནོར་མེད་ན་ཁྱེད་ཀྱིས་ཀྱང་དེའི་རྒྱབ་ལྗོངས་ཀྱི་རྒྱུ་མཚན་དེ་ལོ་ངོ་སྟོང་ཕྲག་བརྒལ་བའི་ཡར་སྔོན་ནས་ནང་བསྟན་ཆོས་ལུགས་ཀྱིས་བཞག་པའི་བག་ཆགས་ལས་བྱུང་བ་ཞིག་ཏུ་འདོད་པར་ཡིད་ཆེས་ཡོད།
ÃÃÂ དེ་བས་ན་ད་ལྟའི་བཟང་སྤྱོད་འདི་ལོ་ངོ་སྟོང་ཕྲག་གོང་ནས་དར་བའི་ནང་བསྟན་ཆོས་ལུགས་ཀྱིས་བཞག་པའི་བག་ཆགས་ལས་བྱུང་བར་འདོད་ན། འབྱུང་འགྱུར་གྱི་ཡུལ་འདིའི་མི་རབས་གསར་པ་ཚོ་ཡང་འདི་ལྟ་བུའི་བཟང་སྤྱོད་དང་ལྡན་པ་ཞིག་ཡོང་བའི་ཡིད་ཆེས་ཡོད་དམ། དྲི་བ་འདི་གལ་གནད་ཆེན་པོ་ཆགས་ཡོད། གལ་ཏེ་དྲི་བ་འདིར་ལན་འདེབས་བྱེད་དགོས་ན་བོད་ཀྱི་གཏམ་དཔེར་ཡོད་པ་བཞིན། སྔ་མ་གང་བྱས་ད་ལྟའི་ལུས་ལ་ལྟོས། །ཕྱི་མ་གང་འགྲོ་ད་ལྟའི་སེམས་ལ་ལྟོས། །ཞེས་པ་ལྟར་ད་ལྟའི་མི་རབས་ཚོའི་གནས་སྟངས་ལ་གཞིགས་ནས་ལན་འདེབས་དགོས་པ་ཞིག་ཆགས་ཡོད།
དེ་བས་ན་ད་ལྟའི་མི་རབས་ཚོའི་ནང་བསྟན་ཆོས་ལུགས་ཀྱི་ཤེས་ཚད་དང་དེ་ལས་བྱུང་བའི་བཟང་ཕྱོགས་ཀྱི་ཤུགས་ རྐྱེན་ཇི་ཡིན་ནི་མ་འོངས་པའི་མི་རབས་ཚོའི་གནས་སྟངས་ཇི་འགྱུར་གྱི་རྐྱེན་རྩ་ཆགས་ཡོད། དེ་བས་ན་ཁྱེད་ཀྱིས་ལོ་ངོ་སྟོང་ཕྲག་གི་རིང་བོད་ཡིག་བཀོལ་སྤྱོད་བྱེད་མྱོང་སའི་ཡུལ་འདིའི་ད་ལྟའི་བོད་ཡིག་གི་གནས་སྟངས་ལ་ལྟོས་དང་དེས་ཁྱེད་ལ་འབྱུང་འགྱུར་གྱི་ཡུལ་འདིའི་ནང་ཆོས་དང་དེ་དང་འབྲེལ་བའི་རིག་གཞུང་མང་པོ་ཞིག་ལ་ཆག་སྒོ་ཇི་འབྱུང་གི་སྔོན་དཔག་བྱེད་ཐུབ།
བོད་ཡིག་བཀོལ་སྤྱོད་ཀྱི་ཕྱི་ཚུལ་རྣམ་པ་འདིས་ཁྱེད་རང་ལོ་ངོ་ལྔ་བཅུ་ལྷག་གི་རིང་བོད་པ་གནས་སྡོད་བྱས་དང་བྱེད་བཞིན་པའི་དྷ་རམ་ས་ལར་སླེབས་པ་དང་འདིར་སླེབས་པ་གཉིས་ལས་གང་ཞིག་གིས་སྔོན་ལ་ཁྱེད་རང་བོད་པ་གནས་སྡོད་བྱེད་སའི་ཡུལ་ཞིག་ཏུ་སླེབས་པའི་ཚོར་སྣང་སྟེར་ཐུབ་བམ་ཞེ་ན། ཡུལ་འདིས་སྔོན་ལ་ཁྱེད་རང་བོད་པ་གནས་སྡོད་བྱེད་སའི་ཡུལ་ཞིག་ཏུ་སླེབས་པའི་ཚོར་སྣར་སྟེར་ཐུབ་པ་དེ་ལོངས་པས་བལྟས་ཀྱང་ཁམས་གསུམ་ཞེས་པའི་དཔེ་ལྟར་རེད། དེའི་རྒྱུ་མཚན་དེ་ཁྲོམ་རྭའི་སྒོ་བྱང་ཁག་གི་སྟེང་བོད་ཡིག་བཀོལ་སྤྱོད་ཀྱི་ཁྱབ་ཚད་དེ་ཡུལ་འདི་གཉིས་བར་གནམ་སའི་ཧེ་བག་ཤོར་ཡོད་པས་རེད།
འོན་ཀྱང་ཁྱེད་ཀྱིས་ཡུལ་འདིའི་ཁྲོམ་རྭར་བཀོལ་སྤྱོད་བྱས་པའི་བོད་ཡིག་དག་ལ་ཞིབ་ཏུ་བརྟག་ན་དེ་དག་ནི་དབྱིན་ཇིས་རྒྱ་གར་ལ་དབང་སྒྱུར་སྐབས་རྒྱ་གར་གྱི་ཤེས་ཡོན་སྲིད་བྱུས་གཏན་འབེབས་བྱེད་མཁན་དབྱིན་ཇི་པ་མེ་ཁོ་ལིས་ཞེས་པས་གལ་ཏེ་ཤེས་ཡོན་སྲིད་བྱུས་འདི་ལག་བསྟར་བྱས་ཚེ་རྒྱ་གར་པ་རྣམས་ཀྱི་ངོ་གདོང་ནག་པོ་ཡིན་པ་དེ་དཀར་པོར་བསྒྱུར་མི་ཐུབ་པ་མ་གཏོགས་གཞན་དབྱིན་ཇི་པར་བསྒྱུར་ཐུབ་ཅེས་བརྗོད་མྱོང་བ་དེ་དང་ཤིན་ཏུ་འདྲ་སྟེ། ད་ལྟའི་བོད་ཡིག་བཀོལ་སྤྱོད་བྱས་ཡོད་པ་དེ་དག་ཕྱིའི་གཟུགས་བརྙན་ཙམ་མ་གཏོགས་ནང་དོན་དབྱིན་ཡིག་རང་རེད།
དེ་བས་ན་དེ་ལྟ་བུའི་བོད་ཡིག་དེ་དག་ནི་དཔེར་ན་ལྕགས་ལ་གསེར་ཆུ་བྱུགས་ན་གསེར་དུ་སྣང་རུང་དོན་ངོ་མར་ལྕགས་རང་ཡིན་དུས་ཡུན་རིང་སོང་བ་དང་མཉམ་དུ་ལྕགས་ཀྱི་རྣམ་པ་དེ་ཇེ་གསལ་དུ་མངོན་འོང་ཞིང་གསེར་གྱི་རྣམ་པ་དེ་ཇེ་ཆུང་དུ་འགྱུར་འགྲོ་བ་ཆོས་ཉིད་ཡིན་སྟབས། མི་རིང་བར་བོད་ཡིག་གི་གཟུགས་བརྙན་འདི་ཡང་དེ་བཞིན་དུ་འགྱུར་འགྲོ་བ་བརྗོད་མི་དགོས་པ་ཞིག་རེད།
ÃÃÂ དེ་ལྟར་འགྱུར་འགྲོ་བའི་སྣང་ཚུལ་གཞན་ཞིག་ནི་ཡར་རྒྱས་ཀྱི་རྣམ་པ་ཆེས་གསལ་བའི་མགྲོན་ཁང་ལ་སོགས་པ་དེ་དག་རེད། དེ་དག་གི་སྒོ་བྱང་སྟེང་དབྱིན་ཡིག་བྲིས་ཡོད་པ་ལས་བོད་ཡིག་གི་གཟུགས་བརྙན་ཙམ་ཡང་བྲིས་མེད་པ་དེ་རེད། གནད་དོན་འདིས་ཡར་ཐོན་གྱི་རྣམ་པ་ཇེ་གསལ་དུ་འགྱུར་བ་དང་ལྷན་དུ་བོད་ཡིག་གི་བཀོལ་སྤྱོད་ཇེ་ཆུང་དུ་འགྱུར་རྒྱུ་ཡིན་པ་དེ་མཚོན་ཐུབ།
དེ་བས་ན་ད་ལྟའི་བོད་ཡིག་གི་གནས་སྟངས་ནི་གནའ་བོའི་ཕ་མེས་ཡང་མེས་ནས་དར་བའི་བོད་ཡིག་གི་རྩ་བ་དེ་མཚམས་མ་ཆད་ཙམ་གྱི་ཚོད་དུ་སྣང་ཞིང་། དེ་ལྟར་བོད་ཡིག་གི་ཁྱབ་རྒྱ་དང་ཤེས་ཚད་ཇེ་ཆུང་དུ་གྱུར་པ་དང་མཉམ་དུ་བོད་ཡིག་ལ་བརྟེན་ནས་ཡོད་པའི་ནང་བསྟན་ཆོས་ལུགས་ལ་ཤེས་ནས་ཐོབ་པའི་དད་པ་རྣམ་དག་དང་དེས་བཞག་པའི་ཡ་རབས་བཟང་སྤྱོད་ཀྱི་བག་ཆགས་དག་ཀྱང་རང་རྒྱུད་ལ་ལྡན་རྒྱུ་དེ། དཀོན་མཆོག་ཏ་ལ་ལའི་གཟུངས་ལས། །ས་བོན་མེ་ཡིས་འཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་པ་ལྟར་ཧ་ཅང་ཁག་པོ་ཆགས་ཡོད། དེས་ན་འབྱུང་འགྱུར་གྱི་ཡུལ་འདིའི་མི་རབས་གསར་པ་རྣམས་ད་ལྟའི་མི་རབས་བཞིན་དུ་ཡ་རབས་བཟང་སྤྱོད་དང་ལྡན་པའི་མི་རབས་ཤིག་ཡོང་རྒྱུ་དེ་ཁག་ཙམ་ཆགས་ཡོད།
གལ་ཏེ་དེ་ལྟར་ཡོང་དགོས་ན་ཕ་མེས་ཡང་མེས་ནས་བརྒྱུད་འོང་བའི་བོད་ཡིག་དང་དེ་ལ་བརྟེན་ནས་ཡོད་པའི་ནང་ བསྟན་ཆོས་ལུགས་ཀྱི་རིག་གཞུང་བཟང་པོ་འདི་དག་ལ་མུ་མཐུད་ནས་སློབ་གཉེར་བྱེད་དགོས་པ་དེ་རེད། ལོ་ངོ་བརྒྱ་ཕྲག་གཅིག་ཙམ་གྱི་གོང་ནས་ཤོར་བའི་ང་ཚོའི་འཐུས་ཤོར་དེས་ད་ལྟ་ཡུལ་གྲུ་འདི་དག་རྒྱ་གར་གྱི་མངའ་ཁོངས་སུ་ཚུད་ཡོད་ཅིང་། དེས་ཡུལ་གྲུ་འདི་དག་གི་གནའ་བོའི་རིག་གཞུང་ལ་རྒྱ་གར་དང་ཁ་ཆེའི་རིག་གཞུང་སོགས་ཀྱི་ཤུགས་རྐྱེན་ཐེབས་ཚད་དེ་ཉུང་ཉུང་ཞིག་གཏན་ནས་མིན།
མ་གཞི་དཔལ་དུས་ཀྱི་འཁོར་ལོའི་གཞུང་ནས་ནང་པའི་ཡུལ་གྲུ་དུ་མ་ཞིག་ལ་ཁ་ཆེའི་དབང་བསྒྱུར་རྒྱུ་ཡིན་པ་དེ་ལུང་དུ་བསྟན་ཡོད་སྟབས་དེ་ནི་གཡོལ་དུ་མེད་པ་ཞིག་ཡིན་རུང་ཡུལ་གྲུ་འདི་དག་ནི་དེའི་སྔ་ལྟས་ལྟ་བུར་མཐོང་། འོན་ཀྱང་རྒན་པོའི་ངོ་གདོང་གཉེར་མས་ཁེངས་ཀྱང་འཛུམ་མདངས་ལྷུག་གེར་ཡོང་བ་བཞིན་ཡུལ་གྲུ་འདི་དག་ད་དུང་ཡང་གནའ་བོའི་བོད་ཀྱི་རིག་གཞུང་གི་རྣམ་པས་ཟིན་ཡོད།
ÃÃÂ དེ་བས་ན་ཡུལ་གྲུ་འདི་དག་མུ་མཐུད་དུ་བོད་པའི་རིག་གཞུང་གི་རྣམ་པར་གནས་ཕྱིར་བོད་ཡིག་ཚད་དང་ལྡན་པ་ཞིག་དར་སྤེལ་གཏོང་དགོས་པ་གལ་ཆེར་ཐོངས། དེའི་ཐབས་ལམ་ཡག་ཤོས་ནི་བོད་པའི་དགོན་སྡེ་ཁག་དང་སློབ་གྲྭ་ཁག་གི་ནང་ཡུལ་འདིའི་སློབ་ཕྲུག་མི་ཉུང་བ་ཞིག་ཡོད་པ་འདི་དག་ལ་བོད་ཡིག་དང་དེ་ལ་བརྟེན་ནས་ཡོད་པའི་ནང་ཆོས་སོགས་བོད་ཀྱི་རིག་གཞུང་དག་ཚད་དང་ལྡན་པ་ཞིག་སློབ་ཁྲིད་བྱེད་དགོས་པ་དང་། དེ་ལྟར་གསོ་སྐྱོང་བྱས་པའི་མི་སྣ་དེ་དག་གིས་ཡུལ་གྲུ་འདིའི་མི་རབས་གསར་པ་རྣམས་རང་གི་ཕ་མེས་ནས་དར་བའི་བོད་སྐད་དང་བོད་ཡིག་ཤེས་པའི་མི་རབས་ཤིག་ཏུ་གསོ་སྐྱོང་བྱེད་དགོས་པ་དེ་རེད།
མ་གཞི་༸གོང་ས་མཆོག་གིས་བཀའ་སློབ་རིམ་ཕེབས་བཞིན་ཡུལ་འདིའི་མཐོ་རིམ་མི་སྣ་དག་གིས་བོད་ཡིག་ཐོག་ལ་ཤུགས་སྣོན་རྒྱག་གི་ཡོད་པ་མ་ཟད། ལ་དྭགས་གསར་འགྱུར་ཞེས་པའི་བོད་ཡིག་ཚགས་པར་ཞིག་ཀྱང་འདོན་སྤེལ་བྱེད་བཞིན་འདུག་ལ་དེར་ཤེས་ལྡན་མི་སྣའི་ཁྲོད་ནས་རྒྱབ་སྐྱོར་ཐོབ་ཚད་ཀྱང་ཉུང་ཉུང་ཞིག་མ་རེད། འདི་དག་ནི་ཡུལ་གྲུ་འདི་དག་ཏུ་བོད་ཡིག་སླར་གསོ་ཡོང་བའི་སྔ་ལྟས་ཙམ་དུ་མ་ཟད་དེས་ནང་བསྟན་ཆོས་ལུགས་ལ་ཤེས་ནས་ཐོབ་པའི་དད་པ་རྣམ་དག་དང་དེས་ཡུལ་འདིའི་མི་རབས་གསར་པ་རྣམས་ཡ་རབས་བཟང་སྤྱོད་དང་ལྡན་པ་ཞིག་ཡོང་བའི་རྒྱུ་ཚོགས་ཀྱང་ཆགས་ཡོད།
ང་རང་ཡུལ་འདིར་བསླེབས་པ་ནས་དེ་སྔོན་ལ་དྭགས་ཕྱོགས་ཀྱི་ས་མཚམས་སུ་རྒྱ་ཕྱོགས་ནས་བཙན་འཛུལ་བྱས་སྐབས། རྒྱ་གར་པ་དང་མཉམ་དུ་བོད་པ་ཚོས་ཀྱང་ངོ་རྒོལ་བྱས་པ་དག་མིག་ལམ་དུ་འཁོར་ཞིང་ངོ་རྒོལ་ནང་མཉམ་ཞུགས་བྱེད་མཁན་གྱི་བོད་པ་དེ་དག་ལ་ཨ་ཁ་སྙམ་པ་ཞིག་ཀྱང་ཤར་བྱུང་། མ་གཞི་བོད་པ་ངོ་རྒོལ་པ་དེ་དག་ལ་དྭགས་ཕྱོགས་སུ་དངོས་སུ་སྐྱོད་མྱོང་མཁན་གྱི་མི་སྣ་དེ་དག་མིན་ཤས་ཆེ། གང་ལགས་ཞེ་ན། ང་ལ་དྭགས་ཕྱོགས་སུ་དངོས་སུ་སྐྱོད་མྱོང་མེད་དུས་ངས་ལ་དྭགས་ཕྱོགས་ཀྱི་ས་ཁུལ་དག་ལོ་རྒྱུས་ཀྱི་ཐོག་ནས་བོད་ཀྱི་མངའ་ཁོངས་ཡིན་པ་ཤེས་རུང་། རྒྱ་ཕྱོགས་ནས་ལ་དྭགས་ཕྱོགས་སུ་བཙན་འཛུལ་བྱས་པ་གོ་དུས་དེ་ཙམ་གྱི་བཟོད་མི་བདེ་བ་གང་ཡང་ཡོང་མྱོང་མེད། དེའི་རྒྱུ་མཚན་ནི་ངས་ལ་དྭགས་ཕྱོགས་ཀྱི་ས་ཁུལ་དག་དངོས་སུ་མཐོང་མྱོང་མེད་པས་རེད། ངའི་ཉམས་མྱོང་འདིས་བོད་པ་ངོ་རྒོལ་པ་དེ་དག་གིས་ཡུལ་འདིར་འཛིན་པའི་ལྟ་སྟངས་དག་ཀྱང་མཚོན་པའི་ཡིད་ཆེས་ཡོད།
འོན་ཀྱང་ད་ལྟ་ངས་ལ་དྭགས་ཕྱོགས་ཀྱི་ས་ཁུལ་འདི་དག་དངོས་སུ་མིག་མཐོང་ལག་ཟིན་བྱུང་བ་ནས་ངས་ཡུལ་གྲུ་འདི་དག་ལ་བོད་དང་བོད་ཀྱི་རིག་གཞུང་གིས་གཅེས་སྐྱོང་དགོས་པ་གཞི་ནས་ཤེས་ཚོར་བྱུང་ལ་ཡུལ་གྲུ་འདི་དག་ལ་འཛིན་པའི་ངའི་ལྟ་སྟངས་ཀྱང་དེ་སྔོན་དང་བསྡུར་ན་རྦད་དེ་མི་འདྲ་བ་ཞིག་ཆགས་སོང་། དེ་བས་ན་བོད་པ་གཞན་རྣམས་ཀྱང་ཡུལ་འདིར་དངོས་སུ་སྐྱོད་རྗེས་རང་རང་གི་སྔར་གྱི་ལྟ་སྟངས་ལ་འགྱུར་བ་ཡོང་རྒྱུར་ང་ལ་ཐེ་ཚོམ་མེད།
མདོར་ན། ཡུལ་གྲུ་འདི་དག་ནི་གནའ་ནས་ད་བར་བོད་ཀྱི་རིག་གཞུང་ལས་ལོགས་སུ་མེད་ཕྱིར་ང་ཚོས་ནམ་ཡང་ཡུལ་གྲུ་འདི་དག་ཏུ་སྔར་ལས་ལྷག་པའི་བོད་ཀྱི་རིག་གཞུང་གཏིང་ཇེ་ཟབ་ཏུ་གཏོང་དགོས་པ་མ་ཟད། ལ་དྭགས་པ་དང་བོད་པ་ཞེས་ལོགས་སུ་བཙན་གྱིས་ཐ་དད་དུ་མི་འབྱེད་པར་བོད་རིགས་གཅིག་འགྱུར་ཡིན་པའི་འདུ་ཤེས་བསྐྱར་བསྐྲུན་དགོས་པ་ཡང་གལ་ཆེར་མཐོང་ངོ་། །
ཁྱེད་ཀྱིས་ <ལ་དྭགས་སུ་བསྐྱོད་པའི་མྱོང་ཚོར> དེ་བཞིན་གོ་བདེའི་ཚིག་གི་ལམ་ནས་བརྗོད་པར་ཡི་རང་ཞུ། ད་ལོའི་ལ་དྭགས་དུས་འཁོར་དབང་ཆེན་ལ་ཕེབས་མཁན་བོད་མི་མང་པོ་ཞིག་ཡོད་ཀྱང་། ཡུལ་དེའི་མཐོང་ཐོས་དང་མྱོང་ཚོར་ཡིག་ཐོག་ནས་བརྗོད་མཁན་ཁྱེད་རང་གཅིག་པུ་ཡིན་པ་འདྲ།
མིའི་བཤད་སྟངས་ལྟར་བྱས་ན(་ངའི་གྲོགས་པོ་དང་ངེད་གཉིས་)ཞེས་གྲོགས་པོ་མགོ་དང་རང་ཉིད་དེའི་རྗེས་ལ་སྦྱར་ནས་བཤད་གི་རེད།
(ང་དང་ངའི་གྲོགས་པོ)་ཞེས་རང་ཉིད་མགོ་དང་གྲོགས་པོ་མཇུལ་ལ་སྦྱོར་བ་འདི་ནི་མི་ཚད་ལྡན་ཞིག་གི་བཤད་སྟངས་མ་རེད། དེ་བས་བཀླགས་མེད།
༈བྱས་ཙང་བོད་ཟེར་པ་དེ་ད་ལྟ་རྒྱ་གཞུང་གིས་དབང་སྒྱུར་འོག་ཡོད་པའི་མདོ་དབུས་ཁམས་གསུམ་ཅིག་པུ་ལ་གོ་བ་དང་དེའི་སྐྱིད་སྡུག་འགན་ཡང་མདོ་དབུས་ཁམས་གསུམ་གཅིག་པུ་ལ་འཁྲི་པ་ཞིག་གཏན་ནས་མ་ཡིན་པར་གཙོས་ཆེ་པའི་བོད་ནི་འཛམ་གླིང་བོད་ཡིན་པ་ལས་ཀྲུང་གོའི་བོད་མ་རེད་དོ།