སྤང་རི་སྣ་རིན་པོ་ཆེའི་སྐུ་གཟུཊ་སྐྱོ་བོ་ཆཊ་འདུག

རྒྱ་གཞུང་གིས་བཙོན་འཇུག་ཁྲིམས་ཐག་བཅད་ཡོད་པའི་སྤྲུལ་སྐུ་སྤང་རི་སྣ་རིན་པོ་ཆེའི་སྐུ་གཟུགས་གནས་སྟངས་ཧ་ཅང་སྐྱོ་བོ་ཆགས་ཡོད་འདུག

རྒྱ་གཞུང་གིས་ཕྱི་ལོ་ ༢༠༠༨ ལོའི་ཕྱི་ཟླ་ ༥ ཚེས་ ༡༨ ཉིན་གྱི་ཞོགས་པར་དཀར་མཛེས་དགོན་པའི་སྤྲུལ་སྐུ་སྤང་རི་སྣ་རིན་པོ་ཆེ་མཆོག་འཇུ་བཟུང་གིས་ལོ་ ༨ དང་ཟླ་ ༦ བཙོན་འཇུག་ཁྲིམས་ཐག་བཅད་དེ། རིན་པོ་ཆེ་མཆོག་བཙོན་ཁང་དུ་ལོ་ ༦ དང་ཟླ་ ༣ ལྷག་འགྲོ་བཞིན་ཡོད་ཀྱང་། བཙོན་ཁང་དུ་སྡོད་རིང་ཉེས་རྡུང་དང་ཟས་བཀག་སོགས་མི་སྤྱོད་ལས་འདས་པའི་ཉེས་པ་འདྲ་མིན་བཏང་སྟབས། ད་ཆར་རིན་པོ་ཆེ་མཆོག་གི་སྐུ་གཟུགས་གནས་སྟངས་ཧ་ཅང་སྐྱོ་བོ་ཆགས་ཡོད་འདུག

སྤྲུལ་སྐུ་སྤང་རི་སྣ་རིན་པོ་ཆེ་འམ་ཕུར་བུ་ཚེ་རིང་མཆོག་ནི། ༡༩༥༧ ལོའི་ཟླ་ ༡ ཚེས་ ༢ ཉིན་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ། དཀར་མཛེས་རྫོང་བེ་རི་གསེར་མཁར་ཤང་མཆིག་རིང་གྲོང་གི་ཡབ་ཚེ་དབང་དར་རྒྱས་དང་ཡུམ་དབྱངས་ཅན་ལྷ་མོ་གཉིས་ཀྱི་སྲས་སུ་འཁྲུངས་བ་དང་། རྗེས་སུ་དཀར་མཛེས་སྤང་རི་སྣ་བཙུན་དགོན་དང་། ཡར་སྟེང་བཙུན་དགོན་གཉིས་ཀྱི་དགོན་བདག་དང་། སྤང་རི་སྣ་རྒན་གསོ་ཁང་གི་འགན་འཛིན་བཅས་གནང་ཡོད་འདུག

༢༠༠༨ ལོ་ནས་བཟུང་རྒྱ་གཞུང་གིས་རིན་པོ་ཆེར། བཙུན་དགོན་གཉིས་ཀྱི་བཙུན་མ་ཚོས་རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་སྤེལ་བར་ངོ་རྒོལ་བྱས་པ་དང་། ༧གོང་ས་མཆོག་ལ་སྐྱོན་བརྗོད་ཀྱི་ཡིག་ཆའི་སྟེང་མཚན་རྟགས་མ་བཀོད་པ། ༢༠༠༨ ཟླ་ ༥ ཚེས་ ༡༤ ཉིན་སྤང་རི་སྣ་དགོན་པའི་བཙུན་མ་ ༥༤ དཀར་མཛེས་རྫོང་ཐོག་ཏུ་ཞི་བའི་ཁྲོམ་སྐོར་བྱས་པ་སོགས་དང་འབྲེལ་བ་ཡོད་པར་བཤད་དེ་རིན་པོ་ཆེར་རྗེས་འདེད་རྟོག་ཞིབ་བྱས་ཡོད་པ་དང་། བཙུན་ཚོར་ངན་སྐུལ་བྱས་པ་སོགས་སྙད་འདོགས་འདྲ་མིན་བྱས་ཡོད་པར་མ་ཟད། ༢༠༠༢ ལོར་གནས་མཆོག་རྡོ་རྗེ་གདན་དུ་༧གོང་ས་མཆོག་གློ་བུར་སྙུང་གཞི་མཛད་སྐབས། རིན་པོ་ཆེ་དབུ་བཞུགས་ཐོག་དཀར་མཛེས་མི་མང་གིས་༧གོང་ས་མཆོག་ལ་བརྟན་བཞུགས་བསྟར་འབུལ་དང་། ཞབས་རིམ་གསོག་སྒྲུབ་བྱས་པ་སོགས་རྒྱལ་ཁབ་ཁ་བྲལ་གྱི་ཉེ་མིང་འོག ༢༠༠༨ ཟླ་ ༥ ཚེས་ ༡༨ ཉིན་གྱི་བོད་ནང་གི་ཞོགས་པའི་ཆུ་ཚོད་ ༤།༠༠ ཙམ་ལ་འཛིན་བཟུང་བཙན་འཁྲིད་བྱས་ཡོད་འདུག

རྗེས་སུ་ས་གནས་སེར་སྐྱ་མི་མང་གིས་ཟླ་བ་མང་པོའི་རིང་རིན་པོ་ཆེ་གར་ཡོད་ཅི་བྱུང་གི་གནས་ཚུལ་ཤེས་མེད་ཀྱང་། ༢༠༠༩ ལོའི་ཟླ་ ༡༢ ཚེས་ ༢༣ དཀར་མཛེས་ཁུལ་དར་མདོ་འབྲིང་རིམ་མི་དམངས་ཁྲིམས་ཁང་གིས་ཁོང་ལ་ལོ་ ༨ དང་ཟླ་ ༦ བཙོན་འཇུག་ཁྲིམས་ཐག་བཅད་དེ་མེན་ཡྰང་བཙོན་ཁང་དུ་བཙོན་འཇུག་བྱས་ཡོད་སྟབས། ད་ཆར་རིན་པོ་ཆེ་ཁོང་གི་བདག་གཉེར་བྱེད་བཞིན་པའི་སྤང་རི་སྣ་བཙུན་དགོན་ལ་བཙུན་མ་ ༡༠༠ ལྷག་དང་། ཡར་སྟེང་བཙུན་དགོན་ལ་བཙུན་མ་ ༦༠ ལྷག རྒན་གསོ་ཁང་ལ་རྒན་འཁོགས་ ༡༠ ལྷག་བཅས་དང་། ཁོང་གི་གསར་འཛུགས་གནང་བའི་སྨན་ཁང་བཅས་ལ་སྣེ་འཁྲིད་དང་ལམ་སྟོན་གནང་མཁན་མེད་པར་ལྷག་ཡོད་འདུག

གསར་འགོད་པ། དོན་གོ