ཟླ་འདིའི་ཕྱི་ཚེས་ ༡༨ ཉིན་རྒྱ་གཞུང་གི་མནར་གཅོད་འོག་འདས་གྲོངས་སུ་ཕྱིན་པའི་བོད་མི་སྦྱིན་པ་མཐར་ཕྱིན་ལགས་ཀྱི་ཆུང་མས་རང་ཤི་བརྒྱབ་ཡོད་འདུག
འཆམ་ར་དྲི་མེད་རྒྱལ་མཚན་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༢ ཉིན་ནས་བཟུང་རྒྱ་གཞུང་གིས་འདན་མ་ཤུག་པ་སྡེ་བའི་ནང་དམག་མི་མང་པོ་འགྲེམས་འཇོག་གིས་དམ་དྲག་ཆེན་པོ་བྱེད་བཞིན་ཡོད་པ་མ་ཟད། སྡེ་བའི་སྐྱ་སེར་སྐྱེས་པ་ཚང་མ་འཛིན་བཟུང་བྱས་ཏེ་བཙོན་ཁང་དུ་རྡུང་རྡེག་བཏང་ནས་ཉུང་མཐར་བོད་མི་ ༥ འདས་གྲོངས་སུ་གྱུར་ཡོད་པ་ལྟར། ཟླ་འདིའི་ཕྱི་ཚེས་ ༡༨ ཉིན་རྡུང་རྡེག་མནར་གཅོད་འོག་འདས་གྲོངས་སུ་ཕྱིན་པའི་སྦྱིན་པ་མཐར་ཕྱིན་ལགས་ཀྱི་ཆུང་མས་ཁྱོ་ག་གྲོངས་བའི་གནས་ཚུལ་ཤེས་རྟོགས་བྱུང་རྗེས། རང་གི་སྐེ་ལ་ཐག་པ་བརྒྱབ་ནས་རང་ཤི་བརྒྱབ་ཡོད་པ་དང་། ཁོ་མོའི་མངལ་དུ་ཟླ་ངོ་ ༧ ཙམ་ལོན་པའི་ཕྲུ་གུ་ཞིག་ཀྱང་ཡོད་འདུག
གཞན་ཡང་། ཤུག་པ་སྡེ་བའི་སྡེ་དཔོན་དབང་གྲགས་ལགས་ཀྱི་ཨ་སྲུ་རང་ལོ་ ༦༤ ཡིན་པ་ཟླ་བ་ལྷ་མོ་ལགས་ལ། སེར་ཤུལ་བཙོན་ཁང་དུ་རྡུང་རྡེག་བཏང་སྟེ་ཀླད་ཁྲག་འདྲེས་ནས་ཁ་གྲགས་རྒྱུ་མེད་པར་གྱུར་ཡོད་པ་མ་ཟད། གཟུགས་པོའང་འགུལ་སྐྱོད་མི་ཐུབ་པར་ཛ་དྲག་གི་གནས་སུ་ལྷུང་ཡོད་སྟབས། ཟླ་འདིའི་ཕྱི་ཚེས་ ༢༣ ཉིན་དར་མདོའི་སྨན་ཁང་ཞིག་ཏུ་ཁྱེར་ཡོད་ཀྱང་། ཁོ་མོར་ནད་གཡོག་བྱེད་དུ་ཁྱིམ་མི་སོགས་སུ་གཅིག་ཀྱང་འགྲོ་རུ་མ་བཅུག་པར་རྒྱ་གཞུང་གི་ལྟ་རྟོག་འོག་སྨན་བཅོས་བྱེད་བཞིན་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཟླ་འདིའི་ཕྱི་ཚེས་ ༡༢ ཉིན་རྒྱ་ནག་ཉེན་རྟོག་པས་མི་མང་ནང་གང་བྱུང་མེ་མདའ་རྒྱག་སྐབས། མི་མང་གི་ནང་དུ་ཡོད་པའི་ཉེན་རྟོག་པ་ཞིག་གི་སྐེ་ལ་མེ་མདའ་ཕོག་ནས་འདས་གྲོངས་སུ་གྱུར་ཡོད་ཀྱང་། དེའི་ཐད་སྲིད་གཞུང་གིས་ས་གནས་སུའང་གསང་རྒྱ་དམ་པོ་བྱེད་བཞིན་ཡོད་འདུག
གསར་འགོད་པ། པདྨ་མཚོ།
དཀོན་མཆོག་མཁྱེན་་་ད་དངོས་གནས་ཅིག་དཀའ་རྒྱུ་རེད།