ཞི་ཅིན་ཕིན་ཕེབས་ལམ་གྱི་འབོད་སྒྲ།

དེ་རིང་ཉིན་རྒྱབ་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་འབྱོར་ཏེ་རྒྱ་གར་སྲིད་བློན་ནཱ་རེན་ཌ་མུ་དྷེ་དང་ལྷན་དུ་རྒྱལ་ཁབ་གཉིས་བར་གྱི་ཚོང་དོན་དང་ས་མཚམས་སྐོར་བཅས་ལ་གྲོས་མོལ་གནང་ཡོད་འདུག

དེ་རིང་ཕྱི་དྲོའི་ཆུ་ཚོད་ ༢།༣༠ ཐོག་རྒྱ་ནག་སྲིད་འཛིན་ཞི་ཅིན་ཕིན་རྒྱ་གར་གྷུ་ཅུ་ར་ཌེ་མངའ་སྡེའི་རྒྱལ་ས་ཨ་མེ་ཌ་བྷ་ཌ་ (Ahmedabad)གནམ་ཐང་དུ་འབྱོར་ཡོད་ཅིང་། སྐབས་དེར་གྷུ་ཅུ་ར་ཌེ་མངའ་སྡེའི་སྤྱི་ཁྱབ་བློན་ཆེན་ཨ་ནན་ཌི་བྷན་ (Anandiben Patel)གཙོས་མཐོ་རིམ་དཔོན་རིགས་ཁག་གིས་ཕེབས་བསུ་བྱས་ཡོད་འདུག

སྲིད་འཛིན་ཞི་ཡི་བཞུགས་ཡུལ་མགྲོན་ཁང་ (Hyatt) ཞེས་པ་རུ། རྒྱ་གར་སྲིད་བློན་ནཱ་རེན་ཌ་མུ་དྷེ་ཡིས་ཕེབས་བསུ་བྱས་ཡོད་ཅིང་། སྐབས་དེར་གྲོང་ཁྱེར་གཞུང་ལམ་གཡས་གཡོན་དུ་ཉེན་རྟོག་པ་ ༥༠༠༠ ཙམ་འགྲེམ་འཇོག་བྱས་ཡོད་པ་དང་། ཁ་སང་ས་གནས་དེ་གའི་བོད་པའི་སློབ་ཕྲུག་ཚོ་སྡོད་ཡུལ་དུ་རྒྱ་གར་ཉེན་རྟོག་པ་ཡོངས་ཏེ་བོད་པའི་སློབ་ཕྲུག་ ༨༠ ཙམ་འཛིན་བཟུང་བཀག་ཉར་བྱས་ཡོད་འདུག

ཞི་ཅིན་ཕིན་གྱིས་རྒྱ་གར་ཧིན་རྡུ་ཚགས་ཤོག་ནང་བརྗོད་པར། “རྒྱ་ནག་དང་རྒྱ་གར་ནི་ཤུགས་རྐྱེན་ཆེ་ཤོས་ཀྱི་རྒྱལ་ཁབ་གཉིས་ཆགས་ཡོད་སྟབས། མ་འོངས་པར་རྒྱལ་ཁབ་གཉིས་བར་མཉམ་ལས་བྱེད་ཤུགས་ཆེ་རུ་བཏང་སྟེ། འཛམ་གླིང་ཐོག་གི་མཐུན་གྲོགས་རྒྱལ་ཁབ་ཆེ་ཤོས་སུ་འགྱུར་བ་བྱ་རྒྱུ་ཡིན།” €ཞེས་དང་། རྒྱ་གར་སྲིད་བློན་མུ་དྷེ་ཡིས། “རྒྱ་ནག་དང་རྒྱ་གར་ནི་ལུས་གཉིས་ལ་སེམས་གཅིག་ཡོད་པའི་རྒྱལ་ཁབ་ཅིག་ཆགས་ཡོད་སྟབས། རྒྱལ་ཁབ་གཉིས་བར་ཁྱད་གཞི་ཁྱད་ཆོས་མི་འདྲ་བ་ཡོད་ཀྱང་། རྒྱ་ནག་གི་འབྲུག་དང་རྒྱ་གར་གྱི་སྟག་ཟུང་འབྲེལ་ཐོག་ཞི་བདེ་དང་འདྲ་མཉམ། དྲང་བདེན་ལ་མོས་གུས་བྱ་རྒྱུ་ཡིན།”€ ཞེས་བརྗོད་འདུག

རྒྱ་ནག་གི་སྲིད་འཛིན་རྒྱ་གར་ནང་འབྱོར་བཞིན་ཡོད་པ་དང་བསྟུན་ཏེ། ལྡི་ལི་ཁུལ་གྱི་གཞོན་ནུ་ལྷན་ཚོགས་གཙོས་པའི་བོད་མི་ཚོས་ངོ་རྒོལ་ལས་འགུལ་ཞིག་སྤེལ་འཆར་ཡོད་ཀྱང་། དེ་རིང་ཞོགས་པར་བསམ་ཡས་གླིང་ནས་ཐོན་སྐབས། རྒྱ་གར་ཉེན་རྟོག་པ་འབོར་ཆེན་འབྱོར་ཏེ་རྒྱབ་ལོགས་ཀྱི་ཟམ་པའི་འོག་ནས་བཀག་ཡོད་འདུག ལྡི་ལི་རྒྱ་ནག་གཞུང་ཚབ་ཁང་གི་ཉེ་འཁོར་དང་། ལྡི་ལི་བོད་སྒར་བསམ་ཡས་གླིང་། དེ་བཞིན། རྒྱ་ནག་གི་སྲིད་འཛིན་ཕེབས་ཡུལ་གྱི་གཞུང་ལམ་ཁག་ཏུ་རྒྱ་གར་སྐོར་སྲུང་བ་འབོར་ཆེན་གྱིས་བརྟན་སྲུང་བྱས་ཡོད་འདུག

ཉེན་རྟོག་པས་བཀག་འགོག་བྱས་མིན་ལ་མ་ལྟོས་པར་བོད་མི་ཚོས་ས་གནས་དེ་རང་དུ་བོད་པའི་རྒྱལ་དར་དང་འབོད་ཚིག་སྣ་ཚོགས་འཁོད་པའི་འཕྲེད་དར་འཕྱར་ནས་ངོ་རྒོལ་སྐད་འབོད་ཤུགས་ཆེན་བྱས་ཡོད་པ་དང་། གཞན། བོད་པའི་སློབ་ཕྲུག་སྐོར་ཞིག་གིས་རྒྱ་ནག་གཞུང་ཚབ་ཉེ་འཁོར་དུ་ངོ་རྒོལ་སྐད་འབོད་བྱས་སྐབས་རྒྱ་གར་ཉེན་རྟོག་པས་འཛིན་བཟུང་བྱས་ཡོད་འདུག སྐབས་དེར་རྒྱ་གར་གྱི་གསར་འགོད་པ་མང་པོ་འབྱོར་ཏེ་བོད་མི་ཚོས་ངོ་རྒོལ་བྱེད་བཞིན་པའི་གནས་ཚུལ་ཁྱབ་སྤེལ་ཆེན་པོ་བྱས་ཡོད་འདུག

ཕྱི་དྲོའི་ཆུ་ཚོད་ ༥ ཡོལ་ཙམ་ལ་གྷན་དྷི་སཱ་བྷར་མཱ་ཌི་(Sabarmati Ashram)ཞེས་པར་ཕེབས་ཏེ། རྒྱ་ནག་གིས་རྒྱ་གར་ལ་ཨ་སྒོར་ཐེར་འབུམ་ ༥ ཡི་མ་རྩ་བཙུགས་ཏེ། རྒྱ་གར་གྲོང་ཁྱེར་པུ་ནེ་དང་ཨ་མེ་ཌ་བྷ་ཌ་ནང་ཁེ་ལས་གསར་འཛུགས་དང་། རྒྱ་ནག་གིས་པ་ཀི་སི་ཐན་ལ་དམག་དོན་རོགས་རམ་བྱེད་བཞིན་ཡོད་པའི་སྐོར། རྒྱ་གར་སྲིད་འཛིན་ཝེ་ཋི་ནམ་ལ་གཟིགས་སྐོར་གནང་བའི་གནད་དོན། ས་མཚམས་རྩོད་རྙོག་དང་བོད་དོན་བཅས་ཀྱི་སྐོར་ལ་གྲོས་མོལ་གནང་རྒྱུ་ཡིན་འདུག

རྒྱ་གར་ཕྱི་སྲིད་ལྷན་ཁང་མགྲིན་ཚབ་པ་ཨག་རུ་ཌིན་ (Syed Akbaruddin) གྱིས་ (IBN Live) བརྒྱུད་བརྗོད་པར། “ད་རེབ་རྒྱ་གར་སྲིད་བློན་དང་རྒྱ་ནག་སྲིད་འཛིན་གྱིས་རྒྱ་གར་རྒྱལ་ས་ལྡི་ལིའི་ཕྱི་ཕྱོགས་སུ་གཞུང་འབྲེལ་གྲོས་མཐུན་བཞག་པ་ཐོག་མ་ཆགས་ཡོད། རྒྱ་གར་སྲིད་བློན་གྱིས་རྒྱ་ནག་སྲིད་འཛིན་ཞི་ཅིན་ཕིན་ཨ་མེ་ཌ་བྷ་ཌ་གྲོང་ཁྱེར་ནང་ཡོད་པའི་སཱ་བྷར་མཱ་ཌི་ (Sabarmati Ashram) རིག་གཞུང་བསྟི་གནས་ཁང་དུ་གདན་འདྲེན་ཞུས་ཏེ། རྒྱ་གར་སྲིད་བློན་མཆོག་གིས་ཁོང་ལ་ཕེབས་བསུའི་གསོལ་སྟོན་ཞིག་དང་བསྟུན་ཏེ། ས་མཚམས་དཀའ་རྙོག་དང་། རྒྱལ་ཁབ་གཉིས་བར་གྱི་ཚོང་དོན་ཁག་ཅིག་ལ་མིང་རྟགས་འགོད་རྒྱུ་རེད” ཅེས་སོགས་བརྗོད་འདུག

དེ་རིང་ཕྱི་དྲོའི་ཆུ་ཚོད་ ༧།༣༠ ཐོག་རྒྱལ་ཁབ་གཉིས་ཀྱི་དབུ་ཁྲིད་རྣམ་གཉིས་ཨ་མེ་ཌ་བྷ་ཌ་ནས་ལྡི་ལིར་ཕེབས་རྒྱུ་ཡིན་པ་དང་། སང་ཉིན་ཕྱི་དྲོའི་ཆུ་ཚོད་ ༤།༣༠ ཐོག་རྒྱ་ནག་སྲིད་འཛིན་ཞི་ཅིན་ཕིན་གྱིས་རྒྱ་གར་སྲིད་འཛིན་པར་ནཱབ་མུ་ཁར་ཇི་དང་། གྲོས་ཚོགས་འོག་མའི་ཚོགས་གཙོ་ལྕམ་མཱོ་ཧན་ཇན། རྒྱ་གར་ཀོང་རེ་སེ་ཚོགས་པའི་ཚོགས་གཙོ་ལྕམ་སོ་ནེ་གྷན་དྷེ་སོགས་ལ་ཐུག་འཕྲད་གནང་རྒྱུ་ཡིན་འདུག

དེ་རིང་སྔ་དྲོ་ཉི་ཧོང་སྲིད་བློན་ཤིང་ཛོ་ཨ་བྷེ་ཡིས་ནཱ་རེན་ཌ་མུ་དྷེའི་སྐྱེས་སྐར་འཚམས་འདྲི་ཞུས་ཡོད་པ་དང་། ཉིན་ཤས་སྔོན་རྒྱ་གར་སྲིད་འཛིན་ཝེ་ཋི་ནམ་དུ་ཕེབས་ཏེ་ཚོང་དོན་གྲོས་མཐུན་ཁག་བཞག་པའི་གནད་དོན་གཙོས།། རྒྱ་དཀར་ནག་་གཉིས་བར་གྱི་ཚོང་འབྲེལ་དང་། རྒྱ་གར་གྱི་རོགས་རམ་འོག་ཝེ་ཋི་ནམ་གྱིས་རྒྱ་ནག་རྒྱ་མཚོའི་ལྷོ་ངོས་སུ་རྡོ་སྣུམ་སྔོག་འདོན་བྱེད་ཕྱོགས་ལ་གྲོས་མོལ་གནང་རྒྱུ་ཡིན་འདུག

ཆབ་སྲིད་དབྱེ་ཞིབ་པ་ཚོས། ད་རེབ་རྒྱ་ནག་སྲིད་འཛིན་རྒྱ་གར་ནང་སྐོར་སྐྱོད་དང་འབྲེལ་ཨ་སྒོར་ཐེར་འབུམ་ ༡༠༠ ལྷག་གི་ཚོང་དོན་གྲོས་མཐུན་ཁག་ལ་མིང་རྟགས་འགོད་རྒྱུ་ཡིན་ཡང་། རྒྱ་དཀར་ནག་བར་གྱི་མཚམས་རྩོད་རྙོག་ལ་གྲུབ་འབྲས་གང་ཡང་འཐོན་ཐུབ་མེད་སྐོར་བརྗོད་འདུག

གསར་འགོད་པ། དོན་གྲུབ།