ང་ཚོར་རང་བཙན་མི་དགོས་ཟེར།

ཁ་སང་སི་ཀོ་ལན་ཌི་དབྱིན་ཇིའི་མངའ་འོག་ནས་ལོགས་སུ་རང་བཙན་བྱེད་མིན་ལ་མང་མོས་འོས་བསྡུ་བྱས་པར་མང་ཚོགས་བརྒྱ་ཆ་ ༥༥ ཡིས་དབྱིན་ཇིའི་མངའ་འོག་ཏུ་སྡོད་རྒྱུའི་འོས་ཤོག་འཕངས་ཡོད་འདུག

ཟླ་འདིའི་ཚེས་ ༡༨ ཉིན་དབྱིན་ཇིའི་གཞུང་གིས་སེ་ཀོ་ལན་ཌི་ (Scotland) དབྱིན་ཇིའི་མངའ་འོག་ནས་ལོགས་སུ་རང་བཙན་བྱེད་མིན་ལ་མང་མོས་འོས་བསྡུ་བྱས་སྐབས། མང་ཚོགས་བརྒྱ་ཆ་ ༤༤།༧ ཡིས་སོ་ཀོ་ལན་ཌི་ལ་རང་བཙན་དགོས་པའི་འོས་ཤོག་འཕངས་ཡོད་པ་དང་། མང་ཚོགས་བརྒྱ་ཆ་ ༥༥།༣ ཡིས་དབྱིན་ཇིའི་མངའ་འོག་ཏུ་མུ་མཐུད་སྡོད་རྒྱུའི་འོས་ཤོག་འཕངས་ཡོད་སྟབས། སི་ལོ་ལན་ཌི་དབྱིན་ཇིའི་མངའ་འོག་ཏུ་སྡོད་རྒྱུའི་མང་མོས་ཐོབ་ཡོད་ཅིང་། དེ་ནི་སི་ཀོ་ལན་ཌི་དབྱིན་ཇིའི་མངའ་འོག་ཏུ་བསྡད་དེ་ལོ་ ༣༠༧ འཁོར་རྗེས་བྱུང་བའི་མང་མོས་འོས་བསྡུ་དང་པོ་དེ་ཆགས་ཡོད་འདུག

སི་ཀོ་ལན་ཌི་རྒྱལ་ཡོངས་སུ་མི་འབོར་ས་ཡ་ ༧ ལྷག་དང་། འོས་བསྡུའི་ས་ཁུལ་ ༣༢། འོས་བསྡུའི་ས་ཚིགས་ ༢༦༠༠ དུ་གདམ་བྱ་འདེམ་བྱེད་ཀྱི་ཐོབ་ཐང་ཡོད་པའི་མི་ས་ཡ་ ༦ ཙམ་ཡོད་པ་ལས། ཐེངས་འདིར་དེབ་སྐྱེལ་བྱས་ཡོད་པ་ས་ཡ་ ༥ དང་ཕྱེད་ལྷག་བྱུང་ཡོད་ཀྱང་། དངོས་སུ་འོས་ལྡུག་མཁན་ས་ཡ་ ༤།༢ ཙམ་ལས་བྱུང་མེད་པ་དང་། དེ་དག་ཁྲོད་བརྒྱ་ཆ་ ༦༢ ཙམ་གཞོན་སྐྱེས་ལོ་ ༡༦ ནས་ ༤༥ བར་ཆགས་ཡོད་པ་དང་། དེ་མིན་ལོ་ ༤༦ ནས་ ༦༥ བར་གྱིས་བརྒྱ་ཆ་ ༣༠ ལྷག་ཟིན་ཡོད་འདུག

ཁ་སང་འོས་བསྡུའི་གྲུབ་འབྲས་གསལ་བསྒྲགས་བསྐྱངས་རྗེས་དབྱིན་ཇིའི་སྲིད་བློན་ཌ་ཝུ་ཌི་ཁེམ་རོན་ (David Cameron)གྱིས། “ད་རེབ་འོས་འདེམས་གྲུབ་འབྲས་ལ་དྲང་བཞག་མིན་པའི་གནས་ཚུལ་གང་ཡང་བྱུང་མེད་སྟབས། འོས་བསྡུ་བསྐྱར་དུ་བྱེད་དགོས་པ་གང་ཡང་ཆགས་མེད། སི་ཀི་ལན་ཌི་མང་ཚོགས་ཚོས་དབྱིན་ཇིའི་མངའ་འོག་ཏུ་མུ་མཐུད་སྡོད་རྒྱུའི་ཐག་གཅོད་བྱས་པ་དེས། རྒྱལ་ཁབ་བཞི་ལས་གྲུབ་པའི་དབྱིན་ཇིའི་མནའ་འབྲེལ་སྲིད་གཞུང་འདི་ཁ་བྲལ་མ་དགོས་བར་མུ་མཐུད་འཛིན་སྐྱོང་གཅིག་གི་འོག་ཏུ་གནས་ཐུབ་པ་བྱུང་ཡོད་སྟབས། དགའ་སྤོབས་ཆེན་པོ་བྱུང་སོང་། ངས་དེ་སྔོན་འོས་བསྡུའི་ཁྱབ་བསྒྲགས་སྐབས་གལ་ཏེ་དབྱིན་ཇི་མནའ་འབྲེལ་སྲིད་གཞུང་འདི། དུམ་བུར་སོང་ཚེ་བློ་ཕམ་དགོས་པ་ཞིག་རེད་ཅེས་བརྗོད་པ་ལྟར། རྒྱ་ཆེའི་མང་ཚོགས་ཚོས་ཀྱང་བློ་འཚབ་དེ་བཞིན་བྱུང་ཡོད་སྟབས། ད་རེབ་འོས་བསྡུ་འདི་བརྒྱུད་སླར་ཡང་རྒྱལ་ཁབ་ཅིག་གི་ངོ་བོའི་ཐོག་གནས་ཐུབ་པ་བྱུང་ཡོད་སྟབས། མ་འོངས་པར་དབྱིན་ཇིའི་གཞུང་གིས་སོ་ཀོ་ལན་ཌི་དང་ཝོལ་སེ་ ( Wales)། ནུབ་ཨར་ལན་ཌི་ (Northern Ireland) བཅས་ཀྱི་རྒྱབ་སྐྱོར་འོག་དབྱིན་ཇིའི་རྒྱལ་འབྲེལ་སྲིད་གཞུང་འདི་འཛམ་གླིང་ཐོག་སྟོབས་འབྱོར་མངའ་ཐང་ཅན་གྱི་རྒྱལ་ཁབ་ཅིག་ཡོང་ཐབས་བྱ་རྒྱུ་ཡིན” ཞེས་བརྗོད་འདུག

ཁོང་གིས་མ་འོངས་ལས་དོན་བྱེད་ཕྱོགས་ཐད་མུ་མཐུད་བརྗོད་དོན། “དབྱིན་ཇིའི་སྲིད་དོན་ཚོགས་པ་ཆེ་ཁག་གསུམ་གྱིས་སི་ཀོ་ལན་ཌི་རང་བཙན་བྱེད་མིན་གྱི་མང་མོས་འོས་བསྡུ་མ་བྱས་སྔོན་ལ། སི་ཀོ་ཊི་ལན་ཌི་མི་དམངས་ལ་དབྱིན་ཇིའི་གཞུང་གིས་སྨན་བཅོས་དང་འཕྲོད་བསྟེན་ལྟ་སྐྱོང་གི་མཐུན་རྐྱེན་ཡག་ཏུ་གཏོང་རྒྱུ་ཙམ་མ་ཟད། ས་གནས་གཞུང་ལ་དཔྱ་ཁྲལ་བསྡུ་ཕྱོགས་ཀྱི་དབང་ཚད་ཆེ་རུ་གཏོང་རྒྱུའི་ཁས་ལེན་བྱས་པ་དག་མ་འོངས་པར་དབྱིན་ཇིའི་གཞུང་གིས་ཁ་བཤད་ལག་བསྟར་དོན་འཁྱོལ་ཐུབ་པ་བྱུ་རྒྱུ་ཡིན” ཞེས་སོགས་བརྗོད་འདུག

སེ་ཀོ་ལན་ཌིའི་བློན་ཆེན་དང་པོ་སཱལ་མོན་ (Alex Salmond) གྱིས། “ད་རེབ་མང་མོས་འོས་བསྡུའི་ཁྲོད་སི་ཀོ་ལན་ཌི་རང་བཙན་ཤོག་ཁག་ཕམ་ཉེས་བྱུང་ཡོད་ཀྱང་། མང་ཚོགས་ ༡༦༡༧༩༨༩ ལྷག་གིས་སི་ཀོ་ལན་ཌི་དབྱིན་ཇིའི་མངའ་འོག་ནས་རང་བཙན་དགོས་པའི་འོས་ཤོག་འཕངས་ཡོད་སྟབས། མ་འོངས་པར་དབྱིན་ཇིའི་གཞུང་གིས་དེ་སྔོན་སི་ཀོ་ལན་ཌི་ལ་རང་སྐྱོང་གི་གནས་བབ་ཆེན་པོ་ཞིག་སྤྲོད་རྒྱུའི་ཐག་གཅོད་གནང་ཡོད་པ་དེ་དག་ལག་བསྟར་དོན་འཁྱོལ་ཐུབ་པ་བྱ་དགོས། ཐེངས་འདིའི་འོས་བསྡུར་མང་ཚོགས་བརྒྱ་ཆ་ ༨༦ ཙམ་གྱིས་མཉམ་ཞུགས་བྱས་པ་དེ་ནི། དམངས་གཙོའི་ལམ་ལུགས་ནང་བྱུང་མྱོང་མེད་པའི་འོས་བསྡུ་ཞིག་ཆགས་ཡོད།” ཅེས་སོགས་བརྗོད་འདུག

སི་ཀོ་ལན་ཌི་རྒྱལ་ཡོངས་འོས་བསྡུ་འདིར་རྒྱལ་སྤྱིའི་ཐོག་རང་བཙན་འཐབ་རྩོད་བྱེད་བཞིན་པའི་རྒྱལ་ཁབ་མང་པོ་ཞིག་གིས་དོ་སྣང་བྱས་ཡོད་པ་ཙམ་མ་ཟད། ལྷག་པར་དུ་སི་པན་གྱི་ཁྱབ་ཁོངས་སུ་ཡོད་པའི་ཁེ་ཌ་ལོ་ནེ་ཡ་(Catalonia)དང་། ཁེ་ན་ཌའི་མངའ་འོག་གི་ཁེའུ་བྷེག་ (Quebec)། ཨི་ཌ་ལིའི་མངའ་འོག་ཏུ་ཡོད་པའི་གྲངས་ཉུང་མི་རིགས་ཁག་ལ་ཤུགས་རྐྱེན་ཆེན་པོ་ཐེབས་ཡོད་པ་ཙམ་མ་ཟད། ཟླ་འདིའི་ཚེས་ ༡༧ ཉིན་སི་པན་ཁྱབ་ཁོངས་ཀྱི་ཁེ་ཌ་ལོ་ནེ་ཡའི་མང་ཚོགས་ཁྲི་ ༡ ལྷག་གཞུང་ལམ་ཐོག་ཐོན་ཏེ་རང་བཙན་དགོས་སྐོར་ངོ་རྒོལ་སྐད་འབོད་བྱས་ཡོད་པ་མ་ཟད། རྒྱ་ནག་གི་གཞུང་འབྲེལ་གསར་འགྱུར་ལམ་ཁག་ཏུའང་སི་ཀོ་ལན་ཌི་དབྱིན་ཇིའི་མངའ་འོག་ནས་ལོགས་སུ་ཁ་བྲལ་རང་བཙན་ཐོབ་ཚེ། དབྱིན་ཇིའི་སྲིད་བློན་ཁེམ་རོན་མཆོག་ནི་དབྱིན་ཇིའི་ལོ་རྒྱུས་ཁྲོད་ཀྱི་ཉེས་ཅན་པ་ཞིག་ཆགས་རྒྱུ་ཡིན་སྐོར་སོགས་བརྗོད་ཡོད།

དབྱིན་ཇིའི་སྲིད་བློན་ཟུར་བ་གྷོ་ཌིན་བྷོ་རོན་གྱིས། “སི་ཀོ་ལན་ཌི་མང་ཚོགས་མང་ཆེ་བས་དབྱིན་ཇིའི་མངའ་འོག་ཏུ་སྡོད་རྒྱུའི་འོས་ཤོག་འཕངས་ཡོད་སྟབས། མ་འོངས་པར་འོས་བསྡུའི་དམག་ས་འདི་ནས་ཐུན་མོང་གི་གཞི་རྟེན་འཚོལ་བར་བསྐྱོད་དགོས་སྟབས། དབྱིན་ཇིའི་གཞུང་གིས་སྔར་ལྷག་འབད་བརྩོན་བྱས་ཏེ་དབྱིན་ཇིའི་རྒྱལ་འབྲེལ་རྒྱལ་ཁབ་འདི་འབྱོར་ཕྱུག་ལྡན་པ་ཞིག་ཏུ་འགྱུར་ཐུབ་པ་བྱ་དགོས” ཞེས་བརྗོད་འདུག

ཆབ་སྲིད་དབྱེ་ཞིབ་པ་ཚོས། སི་ཀོ་ལན་ཌི་དབྱིན་ཇིའི་མངའ་འོག་ཏུ་སྡོད་རྒྱུའི་མང་མོས་རྒྱལ་ཁ་ཐོབ་ཡོད་ཀྱང་། འོས་བསྡུ་མ་བྱས་གོང་དབྱིན་ཇིའི་གསར་འགྱུར་བརྒྱུད་ལམ་ཁག་གིས་སི་ཀོ་ལན་ཌི་དབྱིན་ཇིའི་མངའ་འོག་ཏུ་སྡོད་དགོས་སྐོར་ཤུགས་ཆེན་པོ་ཁྱབ་བསྒྲགས་བྱས་ཡོད་སྟབས། རང་བཙན་ལ་དགའ་མོས་ཡོད་མཁན་ཚོས་མ་རྣམ་འགྱུར་མི་ལེགས་པ་སྟོན་སྲིད་སྐོར་བརྗོད་འདུག

ཁ་སང་སི་ཀོ་ལན་ཌི་དབྱིན་ཇིའི་མངའ་འོག་ཏུ་མུ་མཐུད་སྡོད་རྒྱུའི་གསལ་བསྒྲགས་བྱས་ཡོད་སྟབས། དེ་རིང་སྔ་དྲོ་སེ་ཀོ་ལན་ཌིའི་བློན་ཆེན་དང་པོ་སཱལ་མོན་ (Alex Salmond)ཡིས་གསར་འགྱུར་བརྒྱུད་ལམ་ཐོག་ཁོང་ལས་གནས་ནས་དགོངས་པ་ཞུ་རྒྱུ་ཡིན་སྐོར་བསྒྲགས་ཡོད་འདུག

ད་ཐེངས་ཀྱི་འོས་བསྡུ་འདིའི་ཁྲོད། སི་ཀོ་ལན་ཌིའི་གྲོང་ཁྱེར་ཆེ་ཤོས་གྷེ་ལཱ་སེ་གྷོ་ (Glasgow) ཡི་མང་ཚོགས་བརྒྱ་ཆ་ ༥༣ དང་། ནུབ་དྷུན་བྷར་ཌོན་ཤཱེ་རེ་(West Dunbartonshire) གྲོང་ཁྱེར་གྱི་མང་ཚོགས་བརྒྱ་ཆ་ ༥༤། དྷུན་ཌི་ (Dundee) གྲོང་ཁྱེར་གྱི་མང་ཚོགས་བརྒྱ་ཆ་ ༥༧། ནུབ་ལཱ་ནག་ཤཱེ་རེ་ (North Lanarkshire) གྲོང་ཁྱེར་གྱི་མང་ཚོགས་བརྒྱ་ཆ་ ༥༡ བཅས་ཀྱིས་སི་ཀོ་ལན་ཌི་དབྱིན་ཇིའི་མངའ་འོག་ནས་ལོགས་སུ་རང་བཙན་དགོས་སྐོར་འོས་ཤོག་འཕངས་ཡོད་ཀྱང་། ཨི་ཌིན་བྷག་དང་ཨ་བྷར་ཌིན་ཤཱེ་རེ་ (Aberdeenshire)། ཧྥལ་ཁེར་(Falkirk)། ཨིན་ཝར་(Inverclyde)། ཨི་ལན་ (Eilean Siar)། ཁེ་ལག་མན་ (Clackmannanshire) སོགས་འོས་བསྡུའི་ས་ཁུལ་ ༢༨ ཙམ་གྱིས་དབྱིན་ཇིའི་མངའ་འོག་ཏུ་སྡོད་རྒྱུའི་འོས་ཤོག་འཕངས་ཡོད་སྟབས། མང་ཚོགས་ ༢༠༠༠༡༩༢༦ གིས་དབྱིན་ཇིའི་མངའ་འོག་ཏུ་སྡོད་རྒྱུ་དང་། མང་ཚོགས་བརྒྱ་ཆ་ ༡༦༡༧༩༨༩ ཡིས་རང་བཙན་དགོས་པའི་འོས་ཤོག་བླུགས་ཡོད་སྟབས། བརྒྱ་ཆར་བཀུག་ན་བརྒྱ་ཆ་ ༤༤།༧ གྱིས་རང་བཙན་དགོས་སྐོར་དང་། བརྒྱ་ཆ་ ༥༥།༣ གྱིས་དབྱིན་ཇིའི་མངའ་འོག་ཏུ་སྡོད་རྒྱུར་འོས་ཤོག་འཕངས་ཡོད་འདུག

གསར་འགོད་པ། དོན་གྲུབ།