གཟའ་ཉི་མའི་ཉིན་དྷ་ས་ས་གནས་འཐུས་ཚོགས་ཀྱི་ཚོགས་དུས་གཉིས་པ་ཚོགས་ཏེ། ས་གནས་མགོ་འཛིན་དང་འཐུས་མི་མཉམ་འཛོམས་ཐོག་ས་གནས་མི་མང་གི་བདེ་དོན་སོགས་ཀྱི་སྐོར་ལ་བགྲོ་གླེང་གོ་བསྡུར་གནང་ཡོད་འདུག
འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཚེས་ ༢༨ ཉིན་སྐབས་བརྒྱད་པའི་དྷ་ས་ས་གནས་འཐུས་ཚོགས་ཀྱི་ཚོགས་དུས་གཉིས་པ་དྷ་ས་ས་གནས་ཁོར་ཡུག་ཚོགས་ཁང་དུ་ཚོགས་ཡོད་པ་དང་། དེར་དྷ་ས་ས་གནས་འཐུས་ཚོགས་ཀྱི་ཚོགས་གཙོ་དང་། དྷ་ས་ས་གནས་མགོ་འཛིན། ས་གནས་ཀྱི་འཐུས་མི་བཅས་མི་ ༡༢ འཛོམས་ཏེ། ས་གནས་མི་མང་གི་བདེ་དོན་དང་ཁོར་ཡུག འཕྲོད་བསྟེན། ས་གནས་འགོ་འཛིན་ལས་ཁུངས་ཀྱི་ལས་བསྡོམས་བཅས་ཀྱི་སྐོར་ལ་བགྲོ་གླེང་གོ་བསྡུར་གནང་ཡོད་འདུག
ཐེངས་འདིའི་ཚོགས་འདུ་དབུ་འཛུགས་ཀྱི་གཏམ་བཤད་ནང་ཚོགས་གཙོ་ངག་དབང་མཐར་པ་ལགས་ཀྱིས། འདི་ལོའི་དབྱར་ཚོགས་དང་དགུན་ཚོགས་བཅས་ཚོགས་དུས་གཉིས་ཀྱི་བར་སྐབས་སུ་ས་གནས་མགོ་འཛིན་ལས་ཁུངས་ལ་གད་སྙིག་གཙང་བཟོའི་རླངས་འཁོར་ཉོ་བྱེད་དུ་ཧིན་སྒོར་འབུམ་ ༡༢ བར་བརྒལ་བཀའ་འཁྲོལ་དང་། ཁོར་ཡུག་ལས་ཁུངས་ཀྱི་ཆེད་དུ་ཧིན་སྒོར་འབུམ་ ༢༨༠༠༠༠ བཀའ་འཁྲོལ་སྤྲད་ཡོད་སྟབས། ས་འཐུས་རྣམ་པས་མཁྱེན་རྟོགས་ཡོང་རྒྱུ་ཧ་ཅང་གལ་ཆེན་ཡིན་པ་དང་། ས་གནས་འགོ་འཛིན་མཉམ་ཞུགས་གནང་བཞིན་པའི་སྐབས་འདིར་གནད་དོན་གསལ་བཤད་དང་། དྲི་བ་གཏོང་རྒྱུ། བསམ་ཚུལ་ཞུ་རྒྱུ་ས་འཐུས་རྣམ་པས་ལས་འགན་ཆགས་ཡོད་པ་ཤེས་པའི་ཐོག་བཀའ་མོལ་གནང་རྒྱུ་དང་། བོད་མིའི་དཀའ་ངལ་སེལ་རྒྱུར་༧གོང་ས་མཆོག་གི་དགོངས་གཞི་ལམ་དབུ་མའི་སྲིད་བྱུས་གཞིར་བཟུང་། བོད་རྒྱ་གཉིས་གྲོས་མོལ་གྱི་ལམ་ནས་སེལ་ཐུབ་རྒྱུའི་རེ་བ་གནང་གི་ཡོད་པ་ལྟར། དབུས་བོད་མིའི་སྒྲིག་འཛུགས་ཀྱིས་ལངས་ཕྱོགས་གང་ཡིན་པ་མཁྱེན་པའི་ཐོག་ནས་གཡས་ཞོལ་གཡོན་འཐེན་མེད་པར་ཤར་བསྐྱོད་གནང་རྒྱུ་གལ་ཆེན་པོ་ཡིན་པ་དང་། རེ་བ་མཐོང་གི་ཡོད་མེད་གང་ལྟར་ཀྱང་། ནུས་པ་མཉམ་དུ་སྤུངས་པ་ཡིན་ན་གྲུབ་འབྲས་རྩ་ནས་མེད་པ་ཆགས་མི་སྲིད་པ་ཞིག་ཡིན་སྐོར་སོགས་གཏམ་བཤད་གནང་ཡོད་འདུག
ཐེངས་འདིའི་ཚོགས་འདུའི་ཐོག་ས་འཐུས་ཚོས་དྷ་ས་ས་གནས་མི་མང་གི་བདེ་དོན་དང་ཁོར་ཡུག འཕྲོད་བསྟེན་སོགས་ཀྱི་དཀའ་ངལ་དང་འབྲེལ་བའི་གལ་གནད་ཅན་གྱི་གནད་དོན་དང་། དྷ་ས་ས་གནས་འགོ་འཛིན་ལས་ཁུངས་ཀྱི་ལས་བསྡོམས་སྙན་སྒྲོན་དང་འབྲེལ་བའི་སྐོར་བཅས་ལ་དྲི་བ་དང་བསམ་ཚུལ་ཞུས་ཡོད་པ་དང་། ས་གནས་མགོ་འཛིན་གྱིས་ས་འཐུས་རྣམ་པས་དྲི་བ་ཁག་ལ་ལན་འདེབས་དང་གསལ་བཤད། ཚང་མ་མཉམ་རུབ་ཀྱིས་ས་གནས་དཀའ་ངལ་སེལ་ཐབས་སུ་བགྲོ་གླེང་གོ་བསྡུར་བཅས་གནང་ཡོད་འདུག
དྷ་ས་ས་གནས་འཐུས་ཚོགས་ནི། ཕྱི་ལོ་ ༡༩༩༨ ལོར་གསར་འཛུགས་གནང་ཡོད་འདུག ༢༠༠༢ ལོར་སྒྲིག་གཞི་གསར་བཟོ་བྱས་ཏེ་ལོ་རེའི་ཕྱི་ཟླ་ ༣ པ་དང་ ༩ བཅས་སུ་ཚོགས་འདུ་ཐེངས་གཉིས་ཚོགས་ཀྱི་ཡོད་པ་དང་། ལོ་གསུམ་རེའི་མཚམས་སུ་རྒྱུན་ལས་གསར་འདེམས་བྱས་ཏེ་ད་ཆར་རྒྱུན་ལས་སྐབས་བརྒྱད་པ་ཆགས་ཡོད་འདུག ད་ལྟའི་ཆར་ས་གནས་འཐུས་ཚོགས་སུ་དྷ་རམ་ས་ལའི་ཁྱབ་ཁོངས་ཀྱི་སློབ་གྲྭ་དང་དགོན་སྡེ། མི་དམངས་བཅས་ཀྱི་ཆོལ་ཁ་རིས་མེད་ཀྱི་འཐུས་མི་ ༡༥ ཡོད་པ་དང་། ལས་དོན་གཙོ་བོ། དྷ་ས་ས་གནས་མགོ་འཛིན་གྱི་སྔོན་རྩིས་བཀའ་འཁྲོལ་དང་། འགྲོ་གྲོན་སྟངས་འཛིན། ལས་དོན་བྱེད་ཕྱོགས་ལ་ཞིབ་བཤེར་སོགས་ཀྱི་ལས་འགན་བསྒྲུབ་ཀྱི་ཡོད་འདུག
གསར་འགོད་པ། དོན་གོ
རྡ་རམ་ས་ལའི་གད་སྙིགས་ལས་ཁུངས་འདིས།
མི་མང་གི་ལག་ནས་དངུལ་མང་ཙམ་ལེན་པ་མ་གཏོགས།
གད་སྙིགས་གཙང་བཟོ་གནང་གི་མེད་པ་རྡ་སའི་རི་ཁུལ་གྱི་མི་ཚང་མས་ཧ་གོ་གི་རེད།