བོད་སྨན་ངོ་བོ་དང་བྱེད་ལས་ཙམ་ལ་བརྟེན་རྒྱུ་མ་ཡིན་པར་རྫས་སྦྱོར་ནུས་པ་རྟོཊ་ཐབས་བྱོས།

དེ་རིང་དྷ་ས་དབུས་སྨན་རྩིས་ཁང་དུ་ལུས་སེམས་སྲོག་གི་བགྲོ་གླེང་དབུ་འཛུགས་གནང་ཡོད་ཅིང་། ད་རེབ་བོད་སྨན་གཅིག་པུ་མིན་པར་རྒྱ་གར་གྱི་སྨན་ལུགས་ཁག་ཅིག་དང་རྒྱ་ནག་གི་གནའ་དེང་གི་གསོ་བྱེད་ཆེད་མཁས་པ་སྐོར་ཞིག་བཅས་གདན་ཞུས་ཡོད་འདུག

དེ་རིང་ཉིན་གུང་ཆུ་ཚོད་ ༡།༣༠ སྟེང་དྷ་ས་གངས་སྐྱིད་དབུས་བོད་ཀྱི་སྨན་རྩིས་ཁང་མཐོ་སློབ་ཚོགས་ཁང་དུ། སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱིས་དེ་རིང་ནས་ཉིན་གསུམ་རིང་ལུས་སེམས་སྲོག་གི་ངོས་འཛིན་དང་འབྲེལ་བ། ལུས་སེམས་སྲོག་གསུམ་གྱི་འཁྲུག་རྐྱེན་དང་བཅོས་ཐབས་བཅས་ཀྱི་བརྗོད་གཞིའི་ཐོག་ ༼རྒྱལ་སྤྱིའི་ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་གཉིས་པ།༽ཞེས་པ་དབུ་འཛུགས་ཀྱི་མཛད་སྒོ་ཞིག་ཚོགས་སོང་ལ། སྐུ་མགྲོན་གཙོ་བོར་བཀའ་ཟུར་ཀིརྟི་རིན་པོ་མཆོག་དང་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གཉིས་གཙོས་སྐུའི་བླ་སྨན་ཚེ་བརྟན་རྡོ་རྗེས་ལགས་དང་ཚེ་དབང་རྟ་མགྲིན་ལགས། འཕྲོད་བསྟེན་དྲུང་ཆེ། རྩིས་ཞིབ་ཞིབ་འགན་འཛིན། བདེ་ལེགས་སྨན་ཁང་གི་འགན་འཛིན། གཞན་ཐེངས་འདིའི་བགྲོ་གླེང་སྟེང་གདན་ཞུའི་ཆེད་མཁས་པ་ ༡༢ དང་། སྨན་རྩིས་ཁང་གི་འགན་འཛིན་དང་སྨན་པ། སློབ་མ། བོད་ཁྱིམ་སེ་ལ་ཀོའི་སློབ་ཕྲུག་ཁག་ཅིག་བཅས་མི་ ༢༠༠ ལྷག་འཛོམས་སོང་།

མཛད་སྒོའི་ཐོག་མར་ལུས་སེམས་སྲོག་གི་སྡེ་ཚན་འགན་འཛིན་དགེ་བཤེས་བསྟན་པ་བཀྲ་ཤིས་ལགས་ཀྱིས་ངོ་སྤྲོད་གནང་དོན། ཐེངས་འདིའི་ལུས་སེམས་སྲོག་གསུམ་གྱི་བརྗོད་གཞིའི་ཐོག་རིག་གཞུང་མི་འདྲ་བ་དྲུག་གི་བཞེད་ཚུལ་གཙོར་བཟུང་གིས་བགྲོ་གླེང་གནང་གི་ཡོད། དེ་ནི་ཕྱི་ལོའི་སྔོན་ནས་སྟོན་པ་གཤེན་རབ་མི་བོ་ཆེའི་གདུང་སྲས་དཔྱད་བུ་ཁྲི་ཤེས་ཀྱིས་གསོ་བྱེད་ཇི་བཞིན་གསར་རྩོམ་གནང་བ་སོགས་རྨང་གཞི་ཡོད་པའི་ཁར། དུས་རབས་ ༧ པའི་ནང་ཆོས་རྒྱལ་ཁྲི་སྲོང་ལྡེ་བཙན་གྱིས་བསམ་ཡས་མི་འགྱུར་གཙུག་ལག་ཁང་དུ་ཕྱི་ནང་གི་སྨན་པ་མཁས་པ་དུ་མ་གདན་དྲངས་ཏེ་རྒྱལ་སྤྱི་རང་བཞིན་གྱི་གསོ་རིག་བགྲོ་གླེང་ཐེངས་དང་པོ་བསྐྱངས་པ་དང་། གཡུ་ཐོག་ཡོན་ཏན་མགོན་པོས་སྔར་ཡོད་བོད་ཀྱི་གསོ་བྱེད་སྨན་བཅོས་ལག་ལེན་སྟེང་ཁྱིམ་མཚེས་རྒྱལ་ཁབ་ཁག་གི་གསོ་བྱེད་དུ་མའི་སྙིང་བཅུད་བསྡུས་ཏེ་དཔལ་ལྡན་གསོ་བ་རིག་པའི་རྒྱུད་བཞིའི་ཕྱི་མོ་གསར་རྩོམ་མཛད། དུས་རབས་ ༨ པའི་ནང་ཀོང་པོ་སྨན་ལུང་དུ་གསོ་རིག་སློབ་གྲྭ་ཐོག་མ་ཆེད་བཙུགས་ཀྱིས་སྨན་བསྡུས་ར་བ་དང་དཀའ་བཅུ་བ། རབ་འབྱམས་པ་དང་། འབུམ་རམས་པ་བཅས་ཀྱི་གཞུང་ཚད་ཆེད་སྒྲིག་གནང་ཡོད་པ་དང་། ༡༦༩༦ ལོར་རྒྱལ་དབང་ལྔ་པ་ཆེན་པོ་མཆོག་གིས་བོད་ཀྱི་རྒྱལ་ས་ལྷ་སར་ལྕགས་པོ་རི་རིག་བྱེད་འགྲོ་ཕན་གླིང་གསར་འཛུགས་དང་ཕྱོགས་མཚུངས་མདོ་དབུས་ཁམས་གསུམ་གྱི་དགོན་སྡེ་ཆེ་ཁག་ཕལ་མོ་ཆེའི་ནང་སྨན་པ་གྲྭ་ཚང་ཆེད་བཙུགས་ཀྱིས་འཕྲོད་བསྟེན་ཞབས་འདེགས་རྒྱ་ཆེར་ཞུས་པའི་ལོ་རྒྱུས་ཀྱི་རྒྱུན་ད་ལྟ་ཡང་ཡོད་མུས་ཡིན། ༡༩༡༦ ལོར་རྒྱལ་དབང་བཅུ་གསུམ་པ་ཆེན་པོས་བོད་ཀྱི་རྒྱལ་ས་ལྷ་སར་སྨན་རྩིས་ཁང་གསར་འཛུགས་གནང་ཡོད། ༡༩༥༩ ལོར་བོད་དུ་དུས་འགྱུར་བྱུང་རྗེས་ ༡༩༦༡ ལོར་༧གོང་ས་བཅུ་བཞི་པ་ཆེན་པོ་མཆོག་གིས་བཙན་བྱོལ་ནང་སྨན་རྩིས་བསྐྱར་འཛུགས་གནང་སྟེ་ད་བར་ལོ་ ༥༠ ལྷག་འགྲོ་བཞིན་ཡོད། དུས་ཡུན་དེའི་ནང་དབུས་འཛིན་སྐྱོང་དུ་འཛིན་སྐྱོང་སྡེ་ཚན་ ༨ དང་སྨན་རྩིས་མཐོ་སློབ་གཙོས་དབུས་རིག་གཞུང་སྡེ་ཚན་ ༩ ། ཕྱོགས་མཐའི་ཡན་ལག་སྨན་རྩིས་ཁང་ ༥༤ བཅས་དབུས་ས་གཉིས་སུ་སྨན་རྩིས་ལས་བྱེད་ ༥༠༠ ལྷག་གིས་སྤྱི་ཚོགས་འཕྲོད་བསྟེན་དང་རྩིས་རིག་ལམ་སྟོན་གྱི་ཞབས་འདེགས་ཞུ་བཞིན་ཡོད་ཅེས་བརྗོད་སོང་།

ཚོགས་ཆེན་དམིགས་ཡུལ་སྐོར་ལ་ཁོང་གིས། ༢༠༡༣ ལོའི་ཟླ་ ༦ ནང་ལུས་སེམས་སྲོག་གསུམ་ཐོག་བགྲོ་གླེང་ཚོགས་ཆེན་ཐེངས་དང་པོ་ཚོགས་ཡོད་པ་མ་ཟད་། ༧གོང་ས་མཆོག་གིས་ཚོགས་བཅར་བ་ཡོངས་ལ་ལམ་སྟོན་བཀའ་སློབ་ཀྱི་སྐལ་བཟང་ཡང་ཐོབ། སྐབས་དེ་དང་བསྟུན་ཏེ་ལུས་སེམས་སྲོག་གི་སྡེ་ཚན་གསར་འཛུགས་གནང་སྟེ། བོད་ཀྱི་ཐུན་མོང་སྨན་རྩིས་ལས་གསུངས་པའི་ལུས་སེམས་འཕྲོད་བསྟེན་གཞི་རྩར་བཟུང་ཐོག ༧གོང་ས་མཆོག་གི་བཀའ་སློབ་ལམ་སྟོན་ལྟར། རིག་གཞུང་གསར་རྙིང་མང་པོའི་སྙིང་བཅུད་བསྡུ་ལེན་གྱིས་འགྲོ་བ་མིའི་ལུས་སེམས་ལས་གཙོ་བོ་སེམས་ཁམས་འཕྲོད་བསྟེན་ཞབས་ཞུ་ཚད་མཐོར་ཡོང་ཐབས་བྱ་རྒྱུའི་དམིགས་ཡུལ་བཟུང་བ་ཞིག་ཡིན། ད་ལོའི་བགྲོ་གླེང་ཐེངས་གཉིས་པ་འདི་སྔར་དང་ཅུང་མི་འདྲ་བར་རྒྱ་གར་ནང་དུ་ཡོད་པའི་སྨན་ལུགས་མི་འདྲ་ཁག་དང་། རྒྱ་ནག་སྲོལ་རྒྱུན་སྨན་ལུགས་དང་དེང་གི་སེམས་ཁམས་རིག་པ། བོད་བརྒྱུད་ནང་བསྟན་བཅས་ཀྱི་མཁས་པ་གདན་འདྲེན་ཞུས་ཡོད་སྟབས། སྔར་ལས་གཞི་རྒྱ་ཆེ་བ་དང་རྒྱལ་སྤྱི་རང་བཞིན་གྱི་བགྲོ་གླེང་ཞིག་ཆགས་ཡོད། བགྲོ་གླེང་འདིར་དམིགས་ཡུལ་གསུམ་ཡོད་པ་ནི། དང་པོ། སེམས་ཁམས་འཕྲོད་བསྟེན་གྱི་བྱ་བཞག་ཡར་རྒྱས་གཏོང་ཐབས་བྱ་རྒྱུ་དང་། གཉིས་པ། ཕྱི་ནང་གི་རིག་གཞུང་འདྲ་མིན་གྱི་ལེགས་ཆ་བརྗེ་རེས་བྱ་རྒྱུ། གསུམ་པ། འགྲོ་བ་མིའི་སེམས་ཁམས་ལེགས་བཅོས་ཐད་ཆོས་ལུགས་དང་གསོ་རིག་འདྲ་མིན་ཐོག་ཐུན་མོང་གི་བསྒྲུབ་བྱ་གང་ཡོད་འཚོལ་ཞིབ་བྱ་རྒྱུ་བཅས་ཡིན་ཞེས་བརྗོད་སོང་།

བཀའ་ཟུར་ཀིརྟི་རིན་པོ་མཆོག་གིས་གསུངས་དོན། ང་ལ་དམིགས་བསལ་སྨན་དང་རྩིས། སྦྱིར་བཏང་ཆོས་དང་རིག་གཞུང་གང་ཅིའི་ཐད་ནས་ཤེས་རྒྱ་ཡོད་མཁན་ཞིག་མིན་སྟབས་འདི་རེད་ཟེར་ནས་ཞུ་རྒྱུ་གང་ཡང་མི་འདུག གཙོ་བོ་༧གོང་ས་མཆོག་གིས་བཀའ་སློབ་གནང་བཞག་དེ་དག་ད་ལྟ་དྲོད་མ་ཡལ་བར་བསྡད་ཡོད་པ་ཉིན་ནས་ཉིན་མཐུད་ནས་མ་བརྗེད་པ་བྱ་རྒྱུ་གལ་ཆེན་པོ་རེད། གཉིས་པ། དེ་རིང་འདིར་ཕེབས་པའི་མཁས་དབང་ཚོ་དངོས་གནས་མཁས་དབང་དང་ཉམས་མྱོང་ཆེན་པོ་ཡོད་པ་རྐྱང་རེད། ལོ་ཆུང་སློབ་གཉེར་བ་མང་པོ་ཞིག་ཕེབས་འདུག་སྟབས་དུས་ཚོད་འཕྲོ་བརླག་ཏུ་མི་གཏོང་བར་བགྲོ་གླེང་ལ་ཡག་པོ་གསན་ཏེ་སློབ་གཉེར་གནང་རྒྱུ་གལ་ཆེ་ཤོས་རེད། ཅེས་གསུངས་སོང་།

ཁོང་གིས་མུ་མཐུད་དུ། སྤྱིར་ངས་ཚན་རིག་སྐོར་གང་ཡང་ཤེས་ཀྱི་མེད་ཀྱང་། ང་ཚོས་ཉིན་མཚན་དུས་དྲུག་ཏུ་ང་ཚོ་དང་མཉམ་དུ་ཡོད་པ་དག་ལ་ཞིབ་འཇུག་བྱས་པ་ཡིན་ན། ཚན་རིག་མེད་པ་གཅིག་རྐྱང་ཡོད་མ་རེད། དེའི་ནང་ནས་ལྷག་པར་དུ་སྨན་དང་རྩིས་ཀྱི་སྐོར་ཚན་རིག་དང་འབྲེལ་བ་མཐུད་དགོས་པ་གལ་ཆེན་པོ་ཞིག་རེད། སྨན་དང་ནང་ཆོས། ཚན་རིག་གསུམ་མཉམ་རུབ་གནང་རྒྱུ་གལ་ཆེན་པོ་རེད། དཔེར་ན། ང་ཚོའི་བོད་སྨན་གྱི་ངོ་བོ་དང་ནུས་པ། ཁྱད་ཆོས་ཀྱི་ཐོག་ནས་ཕན་ཡོན་སྲུང་དགོས་པ་རེད་མ་གཏོགས་ཚན་རིག་གི་བཤད་སྟངས་ལྟར་རྫས་སྦྱོར་གྱི་ནུས་པ་འདི་དང་དེ་ཟེར་ནས་བཤད་ཁག་པོ་རེད། ལོ་གཞོན་པ་ཚོ་དང་སྐད་ཡིག་ཤེས་མཁན་ཚོས་འགན་བླངས་ཏེ་མ་འོངས་པར་བོད་སྨན་འདིས་འདི་ལ་ཕན་པ་རེད་གསུངས་བ་ཙམ་མ་ཡིན་པར་རྫས་རྡུལ་འདི་དང་འདི་འཕྲད་དེ་རྫས་རྡུལ་འདི་དང་འདི་གྲུབ་པ་ཚན་རིག་དང་སྦྱར་ནས་ཞིབ་ཚགས་པོས་འགྲོ་ཐུབ་ཐབས་ལ་འབད་བརྩོན་གནང་དགོས་ཞེས་གསུངས་སོང་།

མཛད་སྒོ་གྲུབ་སྟེ་ཉིན་རྒྱབ་ཆུ་ཚོད་ ༣ པའི་སྟེང་། ལུས་སེམས་སྲོག་གི་ངོས་འཛིན་སྟངས་སྐོར་ལ་བགྲོ་གླེང་གནང་སོང་ལ། སང་ཉིན་ལུས་སེམས་སྲོག་གསུམ་གྱི་འབྲེལ་བ་དང་དེ་གསུམ་འཁྲུག་པའི་རྒྱུ་རྐྱེན་སྐོར། གནངས་ཉིན་ལུས་སེམས་གཉིས་ཀྱི་ནད་བཅོས་སྐོར་བཅས་ལ་བགྲོ་གླེང་གནང་རྒྱུ་ཡིན་འདུག

གསར་འགོད་པ། ལྷ་སྐྱབས་རྒྱལ།