རྙོག་མ་གཏིང་སློང་།

༄༅། །ཨ་རིའི་ཨེ་ཤ་ཡའི་རང་དབང་རླུང་འཕྲིན་ཁང་ནས་ཕྱི་ཟླ་ ༡༠ ཚེས་ ༣ ཉིན་རླུང་འཕྲིན་ཁང་གི་ལས་རིམ་གཙོ་སྐྱོང་བ་ཀརྨ་རྒྱ་མཚོ་ལགས་དང་རླུང་འཕྲིན་ཁང་གི་འགན་འཛིན་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་རྣམ་གཉིས་དྲི་བ་དྲི་ལན་རྒྱང་སྲིང་གནང་བའི་ནང་དོན་གཙོ་བོར། བར་ལམ་སི་ཀོཊ་ལེནྜ་དང་ཧོང་ཀོང་ནང་གི་གནས་ཚུལ་བྱུང་རིམ་ལས་འཕྲོས་ཏེ་དེ་སྔ་བོད་པའི་འཐབ་རྩོད་དེ་རང་བཙན་རྩོད་དང་མ་རྩོད་རེད། འདས་པའི་ལོ་བཅུ་ཕྲག་མང་པོའི་རིང་མཐའ་བསྐོར་རི་བསྐོར་བྱས་ནས་ཐ་མ་མི་མང་གིས་སྐུ་མདུན་ནས་ཐག་གཅོད་ཡོང་བ་ཞུས་དོན་ད་བར་དབུ་མའི་ལམ་ཐོག་སྐུ་ལས་ཞེ་པོ་གཅིག་བསྐྱོན་པ་དང་། ད་དུང་ཨུ་ཚུགས་སྐྱོན་གྱི་ཡོད་པ། ད་ཆ་བོད་དོན་ཐོག་ལ་བོད་པ་ཚོས་ཐབས་ལམ་གཞན་པ་ཞིག་འཚོལ་རྒྱུ་མེད་དམ། དངོས་གནས་བསམ་ཚུལ་ཞེ་པོ་ཞིག་ཡོད་པ་རེད། གླེང་སྟེགས་དཀོན་པོ་ཡོད་ཙང་མི་མང་གི་བསམ་ཚུལ་མི་མང་གི་དཀྱིལ་ལ་བསྡད་པ་མ་གཏོགས་ང་ཚོའི་སྤྱི་ཚོགས་ནང་སྤྱི་ཚོགས་གཞན་ནང་བཞིན་ལས་འགུལ་ཤུགས་ཆེན་པོ་མེད་རྐྱེན་རྩོད་པ་ཆེན་པོ་ཞིག་ཆགས་བསྡད་ཡོད་པ། ལམ་དབུ་མར་རྒྱ་མིས་ཡ་མ་བྱས་པའི་རྐྱེན་གྱིས་མི་མང་ཁྲོད་ནས་མང་མོས་བསམ་ཚུལ་བསྡུ་དགོས་བྱུང་བ་དེ་ཚུལ་དང་ལྡན་པ་ཞིག་བྱུང་ཡོད་མེད།

གལ་ཆེ་ཤོས་རྒྱ་ཕྱོགས་ནས་ཡ་མ་བྱས་པའི་རྒྱུ་མཚན་ལ་བརྟེན་ནས་༸གོང་ས་མཆོག་གིས་སྔ་རྗེས་སུ་ལམ་ལྷོང་ཕྱིན་མ་སོང་ཞེས་བཀའ་སློབ་ཕེབས་ཡོད་པ། ད་ལྟའི་ཆར་སྤྱི་ཚོགས་ནང་རང་བཙན་དང་ལམ་དབུ་མའི་ལངས་ཕྱོགས་ཀྱིས་རྐྱེན་པས་རྡོག་རྩ་ཆིག་སྒྲིལ་ལ་གནོད་ཡག་གི་བསམ་ཚུལ་ཆེན་པོ་ཡོང་གི་ཡོད་པ་སོགས་ལ་བརྟེན། སྐུ་ངོ་མཆོག་འབྲེལ་བ་ཆེ་ཤོས་ཡིན་ཙང་མ་འོངས་པའི་ཁ་ཕྱོགས་གང་འདྲ་ཞིག་ལ་འགྲོ་དགོས་ཀྱི་ཡོད་དམ། བོད་པས་རང་བཙན་བསྐྱར་གསོའི་འཐབ་རྩོད་བྱེད་དགོས་དང་མི་དགོས། མིང་དོན་མཚུངས་པའི་མང་མོས་ཀྱི་བསམ་ཚུལ་ཞིག་དགོས་ཀྱི་ཡོད་མེད་སོགས་དྲི་བ་ཁ་ཤས་ཞུས་པའི་ལན་འདེབས་སུ་བཀའ་ཟུར་བསྟན་འཛིན་རྣམ་རྒྱལ་མཆོག་ནས་བར་སྐབས་བྱུང་བའི་གོང་གསལ་ལས་འགུལ་གཉིས་ལས་འཕྲོས་ཏེ་བཀའ་ལན་གནང་དོན་སྙིང་པོར།

འདིའི་ཐོག་བོད་མིའི་ངོས་ནས་བསམ་ཚུལ་བསྡུས་པ་དང་། མང་ཚོགས་ཀྱིས་ཐག་གཅོད་བྱས་པ་ཟེར་སྐོར། ད་རེས་སྤྱི་འཐུས་ལྷན་ཚོགས་ནང་ང་ཚོས་མང་ཚོགས་ནས་དྲི་བ་ལེན་བྱས། སྲིད་བྱུས་གཏན་འབེབས་བྱས་པ་རེད་ཟེར་བ་ཞིག་རྩ་བ་ཉིད་ནས་བྱུང་ཡོད་པ་མ་རེད་གསུངས་ཤག དེ་འདྲ་ཡིན་སྟབས་བཙན་བྱོལ་བོད་མིའི་སྤྱི་ཚོགས་ནང་ལ་ག་རེ་གོ་རྟོགས་སྤེལ་གྱི་ཡོད་རེད་ཟེར་ན། དབུ་མའི་ལམ་འདི་༸རྒྱལ་བ་རིན་པོ་ཆེས་བཀའ་སློབ་ལམ་སྟོན་གནང་བ་ལ་བཙན་བྱོལ་སྒྲིག་འཛུགས་ཀྱིས་རྒྱབ་སྐྱོར་ཞུས། རྒྱབ་སྐྱོར་ཞུས་དོན་བོད་མི་མང་གི་བསམ་ཚུལ་བསྡུ་ལེན་གྱི་ཐོག་ནས་རྒྱབ་སྐྱོར་ཐག་གཅོད་བྱས་པ་རེད་ཅེས་སྤྱིར་བཏང་གོ་ཚུལ་དེ་འདྲ་ཞིག་རེད། བསམ་ཚུལ་བསྡུ་ལེན་བྱེད་པའི་སྐབས་མི་མང་གིས་བསམ་ཤོག་མང་པོ་ཕུལ་ཏེ་བརྒྱ་ཆ་ ༦༤ ལྷག་གིས་རྒྱབ་སྐྱོར་ཞུས་པ་རེད་ཅེས་རྗོད་ཀྱི་ཡོད། འདིས་གསལ་ལ་མ་གསལ་གྱི་གནས་ཚུལ་ཞིག་མང་པོའི་ནང་ལ་ཡོང་གི་ཡོད་པའི་གནས་ཚུལ་གཅིག་རེད། འདིའི་ཐོག་རྒྱ་མིའི་ངོས་ནས་གུ་ཤངས་གང་ཡང་མ་བྱས་པར་བརྟེན་༸རྒྱལ་བ་རིན་པོ་ཆེས་དབུ་མའི་ལམ་གྱི་སྲིད་བྱུས་དེ་ནུས་མེད་ཕྱིན་སོང་ཞེས་བཀའ་ཕེབས་ཡོད་རེད། བོད་མི་མང་པོས་དབུ་མའི་ལམ་དང་། རང་བཙན། བདེན་པའི་ཨུ་ཚུགས། རང་ཐག་རང་གཅོད་བཅས་ཀྱི་སྐོར་གདམ་ཀ་ཆེན་པོ་ཞིག་ཕལ་ཆེར་བྱས་པའི་བཟོ་འདྲ་ཞིག་གི་སྣང་བ་ཡོད་པ་འདྲ། ཡིན་ནའང་དངོས་སུ་དེ་འདྲ་བྱུང་མེད།

སྔོན་འགྲོའི་འོས་བསྡུའི་སྐབས་ས་ཁུལ་འགའ་ཤས་ནས་མི་མང་གི་གདམ་ཀ་དེ་སྐུ་མདུན་རང་གིས་ཐག་གཅོད་གནང་ཡག་རེད་ཅེས་པའི་བསམ་ཚུལ་ཕུལ་བ་རེད། བསམ་ཤོག་ཕུལ་མཁན་གྱི་མི་གྲངས་ག་ཚོད་ཡོད་མེད་ད་ལྟ་གསལ་པོ་ཡོད་པ་མ་རེད། བོད་རྒྱ་ཆེའི་མི་མང་ལ་བཀའ་འདྲི་ཞུ་རྒྱུའི་ཆ་རྐྱེན་ཡོད་པ་མ་རེད། བཙན་བྱོལ་ནང་མི་འབུམ་གཅིག་དང་ཕྱེད་ཀ་ལྷག་ལས་ཡོད་པ་མ་རེད། འདིའི་ནང་ནས་གྲངས་ཀ་གསལ་པོ་ཞིག་བྱུང་ན་ཐུགས་ཕན་གསོས་ཀྱི་འདུག སྤྱི་འཐུས་ལྷན་ཚོགས་ཀྱིས་ཐག་གཅོད་གནང་དུས་དབུ་མའི་ལམ་ལ་ཐག་གཅོད་ཡིན་ཞེས་གྲོས་ཆོད་གསལ་པོ་ཞིག་བྱུང་མ་སོང་། ཐོག་མ་དེར་༸རྒྱལ་བ་རིན་པོ་ཆེར་ཡེ་ཤེས་དབྱིངས་དཔྱད་གནང་རོགས་ཞུས་པ་དེར་མོས་མཐུན་ཞུས་ཡོད། འདི་ལ་༸རྒྱལ་བ་རིན་པོ་ཆེས་དབུ་མའི་ལམ་གྱི་སྲིད་བྱུས་སི་ཊ་སི་སྦག་ཏུ་བཀའ་སློབ་ཕེབས་ཡོད་སྟབས། དེ་ག་རང་ལ་རྒྱབ་སྐྱོར་ཞུས་པ་རིམ་པ་གཉིས་པ་མ་གཏོགས་དང་ཐོག་ནས་སྲིད་བྱུས་འདི་ལ་རྒྱབ་སྐྱོར་བརྒྱ་ཆ་བརྒྱ་ཡོད་ཅེས་བྱུང་མེད་པའི་བཟོ་འདྲ་ཞིག་རེད། བོད་པའི་སྤྱི་ཚོགས་ནང་འདིའི་སྐོར་གླེང་སློང་གྲོས་བསྡུར་ལྷུག་པོ་ཞིག་བྱུང་ན་ཡག་པོ་ཡོད་རེད་བསམ་གྱི་འདུག ༸རྒྱལ་བ་རིན་པོ་ཆེས་བོད་མི་མང་གི་བསམ་ཚུལ་དེ་མཐའ་མ་གཞི་བཞག་དགོས་རེད་གསུངས་ཡོད་ལུགས་སོགས་འགྲེལ་བཤད་གནང་སོང་།

སྤྱིར་བཏང་གསར་འགྱུར་ལས་རིགས་མཐའ་གཉིས་སུ་མ་ལྷུང་པ་དྲང་ཚུགས་ཟིན་པོ་ཞིག་དགོས་པ་རེད། འོན་ཀྱང་ཀརྨ་རྒྱ་མཚོ་ལགས་ཀྱིས་འཆར་ཅན་མཐའ་བསྐོར་རི་བསྐོར་བྱས་ཏེ་རང་ཉིད་ཀྱི་ལངས་ཕྱོགས་རང་བཙན་ཐོག་ཤུགས་བརྒྱབ་པ་ལས་ཕྱོགས་ཡོངས་ཀྱི་གནས་ཚུལ་རྡོག་རོལ་གཏོང་རྐྱང་བྱེད་པ་ཚང་མས་ཤེས་གསལ་རེད།

སྐུ་ངོ་བསྟན་འཛིན་རྣམ་རྒྱལ་མཆོག་ལ་མཚོན་ན། བཀའ་བློན་གྱི་མཛད་འཁུར་བཞེས་རིང་ཁུར་མཉམ་བཞེས་གནང་ཡོད་རུང་། དེ་ནི་ལྷག་བསམ་རྣམ་དག་དང་ཞལ་ཞེ་གཉིས་མེད་ཡིན་མིན་གཞན་གྱིས་དཔྱད་བརྗོད་བྱེད་མི་དགོས་པར། གང་ཉིད་བཀའ་བློན་ལས་འཁུར་བཞག་རྗེས་རང་ཐག་རང་གཅོད་ཀྱི་ལས་འགུལ་སྤེལ་བ་ནས་གསལ་པོ་རེད། ད་ཆ་དགུང་ལོ་བགྲེས་ཏེ་དྲན་པ་ཉམས་པའམ། ཡང་ན་གོང་གསལ་བྱུང་རིམ་ཡིག་ཆ་ཁག་གཟིགས་རིན་མེད་པར་རྩིས་ནས་བསྐྱུར་བ། ཡང་ན་རྙོག་མ་གཏིང་སློང་གནང་འདོད་ཅི་ཡིན་ཆ་མ་མཆིས། གང་ལྟར་གཏམ་གླེང་འདི་སྐོར་བཀའ་སྤྱི་གཉིས་ནས་གསལ་བཤད་གནང་ཤག་གིས་ད་བར་ངང་སྒུག་ཞུས་རུང་འདི་བྱས་གང་ཡང་གནང་མཁན་མེད་སྟབས། ད་ཆ་གཏམ་ཨ་ཕས་གཏོང་རྒྱུ་ཨ་མས་དང་། ཁྱི་བདག་པོས་བཀག་རྒྱུ་མགྲོན་པོས་བཀག་ཟེར་བ་ལྟར་སྐུ་ངོ་བཀའ་ཟུར་མཆོག་གིས་ཞབས་བྲོ་མཉམ་དུ་བསྐྱོན་ནས་སྐེད་གཟེར་ལོགས་སུ་གནང་སྟངས་འདི་མ་བཟོད་པར་བྱུས་གཏོགས་མི་བྱེད་ཐབས་མེད་བྱུང་།

སྐུ་ངོ་མཆོག་ལ་དྲན་གསོ་ཞུ་རྒྱུར། ཕྱི་ལོ་ ༡༩༨༧ ལོར་ཨ་རིའི་གྲོས་ཚོགས་སུ་སྤྱི་ནོར་༸གོང་ས་སྐྱབས་མགོན་ཆེན་པོས་ཕུགས་ཀྱི་འཆར་སྣང་ཞི་བདེ་སྔོན་འགྲོའི་དོན་ཚན་ལྔ་འདོན་གནང་མཛད་པའི་གསལ་བཤད་ཕྱི་ལོ་ ༡༩༨༨ ལོར་སི་ཊས་སི་སྦག་ཡུ་རོབ་གྲོས་ཚོགས་སུ་མ་གནང་གོང་བཀའ་ཤག་དང་། ཆོས་ལུགས་ཆོལ་གསུམ་དང་བཅས་པའི་བོད་མི་མང་སྤྱི་འཐུས་རྣམ་པ། གཞུང་ཞབས་དྲུང་གཞོན་ཡན། ཟུར་སྐྱོང་སྡེ་ཚན་ཁག་གི་འགན་འཛིན། གཞུང་འབྲེལ་མ་ཡིན་པའི་ཚོགས་པ་ཁག་དང་། བོད་ནས་གསར་དུ་འབྱོར་བའི་འཐུས་མི་བཅས་ནས་ཉིན་བཞིའི་རིང་ལྷན་ཚོགས་གནང་སྟེ་གསལ་བསྒྲགས་གནང་རྒྱུར་སྤྱི་མོས་རྒྱབ་སྐྱོར་ཞུས་པ་དེ་བོད་མིའི་ངོ་བོ་མཚོན་པའི་འབྲེལ་ཡོད་སྐུ་ཚབ་ཚང་འཛོམས་ཐོག་ནས་ཐག་གཅོད་གནང་བ་ཞིག་རེད། སི་ཊས་སི་སྦག་ཡོ་རོབ་གྲོས་ཚོགས་སུ་གསལ་བསྒྲགས་བསྐྱངས་པའི་ནང་རྒྱ་ནག་དང་གྲོས་མོལ་བྱས་པར་འབྲས་བུ་གང་འདྲ་ཞིག་ཡོང་མིན་ལ་མ་ལྟོས་པར་མཐའ་མའི་ཐག་གཅོད་བྱ་རྒྱུའི་དབང་ཆ་བོད་མི་མང་ལ་ཡོད་ཅེས་གསལ་ཡོད།

འོན་ཀྱང་རྒྱ་ཕྱོགས་ནས་རང་བཙན་དང་ཕྱེད་རང་བཙན། རྣམ་པར་འགྱུར་བའི་རང་བཙན་ཡིན་ཚུལ་དང་། བོད་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཡིན་ལུགས་ལོ་རྒྱུས་ལ་འཁྱོག་བཤད། སི་ཊས་སི་སྦག་གི་གྲོས་འཆར་ནང་བོད་རང་བཙན་གྱི་ལྟ་བ་འདོར་མེད་པར་བརྟེན་སྐད་ཆ་བཤད་རྒྱུའི་རྨང་གཞི་ཡོང་ཐབས་མེད་ལུགས་སོགས་སྔ་ཕྱི་རིམ་པར་སྐྱོན་བརྗོད་བྱུང་བར་བརྟེན་ཕྱི་ལོ་ ༡༩༩༢ ལོའི་གསུམ་བཅུའི་གསུང་འཕྲིན་དང་། ཡེལ་གཙུག་ལག་སློབ་ཁང་དུ་བསྩལ་བའི་གསུང་བཤད་བཅས་ཀྱི་ནང་གྲོས་འཆར་རང་བཞིན་ནུས་མེད་གྱུར་ཚུལ་གསལ་བསྒྲགས་བསྐྱངས་པ་དང་། ༡༩༩༤ དང་ ༡༩༩༥ ལོ་སོ་སོའི་ཡོངས་ཁྱབ་གསུམ་བཅུའི་གསུང་འཕྲིན་ནང་། མ་འོངས་པར་ང་ཚོའི་རང་དབང་འཐབ་རྩོད་བྱེད་སྟངས་སྐོར་མི་མང་རང་ལ་ཐད་ཀར་དྲི་བསྡུར་བྱས་ཏེ་ཆབ་སྲིད་ལམ་ཕྱོགས་ཅི་འདྲ་ཞིག་ཏུ་འགྲོ་རྒྱུའི་སྐོར་བོད་མི་མང་ནས་བསམ་གྲོས་ཞིབ་བསྡུར་བྱེད་རྒྱུ་ཤིན་ཏུ་གལ་ཆེ་བས་མི་མང་ཚང་མས་ཡིད་གཟབ་གོ་བསྡུར་ཞིབ་ལྷུག་གིས་ཐག་གཅོད་བྱེད་དགོས། ཞེས་བཀའ་ནན་ཕེབས་ཡོད།

གསུང་འཕྲིན་འདི་གཉིས་ཕེབས་པ་ལ་བརྟེན་ནས་བཀའ་སྤྱི་གཉིས་ཀྱི་གཙོ་སྐྱོང་འོག་དྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་ཉིན་གསུམ་རིང་བཀའ་སྤྱི་ལྷན་རྒྱས་དང་། གཞུང་ཞབས། ཟུར་སྐྱོང་སྡེ་ཚན་ཁག་གི་འགན་འཛིན། བོད་མི་འདུ་སྡོད་ས་གནས་ཁག་གི་མགོ་འཛིན་དང་འཐུས་མི། བོད་ནས་གསར་འབྱོར་བའི་འཐུས་མི་བཅས་གཞིས་བྱེས་བོད་མིའི་སྐུ་ཚབ་མཚོན་པའི་དམིགས་བསལ་ཆབ་སྲིད་ཚོགས་ཆེན་ནང་རང་བཙན་དང་། དབུ་མའི་ལམ། རང་ཐག་རང་གཅོད། བདེན་པའི་ཨུ་ཚུགས་བཅས་གྲོས་གཞི་དོན་ཚན་བཞི་སོ་སོའི་དགོས་པ་གནད་འགག་ཐོག་བགྲོ་གླེང་ཞིབ་ལྷུག་གནང་རྗེས་རྒྱ་བལ་འབྲུག་གསུམ་ནང་སྤྱི་འཐུས་རྣམ་པ་དང་། གཞུང་ཞབས་ཆ་བགོས་ཀྱིས་ཆེད་མངགས་གསལ་བསྒྲགས་གནང་བར་ཕེབས་པ་དང་། ཕྱི་རྒྱལ་ཡུལ་ཁག་ཏུ་སྐུ་ཚབ་དོན་གཅོད་རྣམ་པ་དང་། ཕྱོགས་མཐའི་སྤྱི་འཐུས་རྣམ་པ་བརྒྱུད་མང་ཚོགས་ལ་མ་གོ་མ་ཐོས་མེད་པའི་གསལ་བསྒྲགས་གནང་ཡོད།

དེ་བཞིན་སྐབས་དེར་བོད་ཕྱི་ནང་གཉེན་འཕྲད་འགྲོ་འོང་གི་གོ་སྐབས་དང་བསྟུན་ཆོལ་གསུམ་ཁྱོན་ན་གནས་པའི་བོད་ཀྱི་ས་ཁུལ་ཁག་ནས་མི་རིགས་ཀྱི་བདེ་དོན་ལ་ལོ་མང་འབད་བརྩོན་གནང་མཁན་རྒྱུས་ཅན་དང་། ཤེས་ཡོན་ཅན་གྱི་མི་སྣ་བཅས་པར་མངོན་ཆུང་ཐོག་ནས་བསལ་ཚུལ་བསྡུ་བཞེས་གནང་བ་བཅས་དོན་སྙིང་ཕྱི་ལོ་ ༡༩༩༥ ལོའི་དམངས་གཙོའི་དུས་དྲན་ནས། ཕྱི་ལོ་ ༡༩༩༧ ཟླ་ ༧ པའི་ཟླ་མཇུག་བར་ལོ་གཉིས་མ་ཟིན་ཙམ་རིང་བོད་ཕྱི་ནང་གཉིས་ནས་གོང་གསལ་ཐབས་ལམ་གང་གི་ཐོག་བསྐྱོད་རྒྱུར་མི་མང་གི་བསམ་ཚུལ་བསྡུ་བཞེས་ལ་ཕྱོགས་བསྡོམས་གནང་སྐབས་བརྒྱ་ཆ་ ༦༤ བརྒལ་བས་ཐབས་ལམ་གང་གི་ཐོག་འགྲོ་དགོས་མིན་འོས་བསྡུ་མ་དགོས་པར་དབུ་མའི་ལམ་གྱི་སྲིད་བྱུས་རྒྱུན་འཛིན་ནམ། སྤྱི་ནོར་༸གོང་ས་སྐྱབས་མགོན་ཆེན་པོས་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་བསྟུན་ཏེ་དུས་ནས་དུས་སུ་ཐག་གཅོད་གནང་སྐྱོང་ཡོང་བའི་གསོལ་འདེབས་ཞུས་པའི་བརྒྱ་ཆའི་གྲངས་འབོར་བཀའ་སྤྱི་ཐུན་མོང་ནས་ཞིབ་བཤེར་གྱིས་གཏན་འབེབས་གནང་ཡོད་པ་རེད། དེ་སྐབས་སྐུ་ངོ་མཆོག་ཀྱང་ཐག་གཅོད་གནང་མཁན་གྱི་དཀྱིལ་འཁོར་ནང་ཡོད་པ་གསལ་པོ་དྲན་གྱི་འདུག མང་ཚོགས་ཀྱི་བསམ་ཚུལ་བསྡུ་བཞེས་ཀྱིས་མང་མོས་གཏན་འབེབས་གནང་བ་དེ་དག་དམངས་གཙོའི་འགྲོ་སྟངས་དང་ཡོངས་སུ་མཐུན་པ་ལས། དེ་མིན་གྱི་དམངས་གཙོའི་འགྲོ་སྟངས་གཞན་ཞིག་ཡོད་པར་ངོས་འཛིན་བྱེད་ཀྱི་མེད།

དེ་འདྲའི་རྒྱུ་མཚན་ལ་བརྟེན་ནས་ཕྱི་ལོ་ ༡༩༩༧ ལོར་སྐབས་བཅུ་གཉིས་པའི་བོད་མི་མང་སྤྱི་འཐུས་གྲོས་ཚོགས་ཐེངས་བཞི་པའི་ཐོག་༸གོང་ས་༸སྐྱབས་མགོན་ཆེན་པོས་དུས་ནས་དུས་སུ་ཡེ་ཤེས་དབྱིངས་དཔྱད་ཀྱིས་ཐག་གཅོད་མཛད་གནང་ཡོང་བའི་གསོལ་འདེབས་ཨུ་ནན་དང་འབྲེལ། བོད་ཀྱི་རྩ་དོན་དང་དེའི་སྒྲུབ་ཐབས་སྲིད་བྱུས་ཐག་གཅོད་ཇི་གནང་ལ་མང་མོས་ཐག་གཅོད་འོས་བསྡུའི་ལམ་ནས་གཏན་ལ་ཕབ་པ་དང་ཁྱད་པར་མེད་པའི་ནུས་ཤུགས་ལྡན་པར་བོད་མི་ཡོངས་ནས་ཚད་འཛིན་ཞུ་རྒྱུའི་སྤྱི་མོས་གྲོས་ཆོད་བཞག་པ་ཐུགས་བསྙེལ་བྱུང་འདུག་པ་དྲན་གསོ་ཞུ་རྒྱུ་ཡིན།

ཆོལ་གསུམ་ཆོས་ལུགས་དང་བཅས་པའི་སྤྱི་འཐུས་རྣམ་པ་ནི་བཙན་བྱོལ་བོད་མི་སེར་སྐྱ་ཡོངས་ཀྱིས་འོས་འདེམས་ཞུས་པའི་སྤྱི་འཐུས་ཡིན་པར་བརྟེན་དེ་དག་གིས་ཐག་གཅོད་གནང་བ་དེ་དམངས་གཙོའི་ལམ་ལུགས་དང་མཐུན་ལ། ཁྲིམས་དང་སྒྲིག་གཞི་དང་ཡང་མཐུན་ཡོད། འོན་ཀྱང་ཐོག་ཐ་བར་གསུམ་གྱི་གནས་ཚུལ་ནང་དངོས་སུ་ཞུགས་ཏེ་ཆ་རྒྱུས་ཡོད་པའི་མི་སྣ་གཅིག་གིས་ཆ་རྒྱུས་མེད་འདྲའི་བཀའ་མོལ་གནང་སྟངས་འདི་ལ་ཡ་མཚན་མི་སྐྱེ་ཀ་མེད་རེད།

ཡང་། ཕྱི་ལོ་ ༢༠༠༨ ལོར་བཀའ་སྤྱི་གཉིས་ཀྱི་ཐོག་གཞུང་ཞབས་དང་། ཟུར་སྐྱོང་སྡེ་ཚན། གཞུང་འབྲེལ་མ་ཡིན་པའི་ཚོགས་པ། ཆོས་སྒར་ཁག་དང་བོད་མི་འདུ་སྡོད་ས་ཁུལ་ཁག་གི་འཐུས་མི་བཅས་མི་གྲངས་ ༦༠༠ ལས་གྲུབ་པའི་དམིགས་བསལ་ཚོགས་ཆེན་གྱི་ཉིན་ ༦ རིང་གྲོས་བསྡུར་ཞིབ་ཕྲ་གནང་བའི་བསམ་འཆར་བརྒྱ་ཆ་ ༨༠ ལྷག་གིས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཞུས་ཡོད། དེ་སྐབས་སྐུ་ངོ་མཆོག་དང་ཀརྨ་རྒྱ་མཚོ་ལགས་གཉིས་ཀ་ཚོགས་ཞུགས་གནང་ཡོད། ཕྱོགས་མཐའི་སྐུ་ཚབ་རྣམ་པས་ས་གནས་མི་མང་གི་བསམ་ཚུལ་ཡིག་ངག་གཉིས་ཐོག་ནས་སྙན་སྒྲོན་ཐོག་ཚོགས་བཅར་བ་རྣམས་ཆ་བགོས་བྱས་པའི་ཚོགས་ཆུང་ཁག་གི་བསམ་འཆར་བཅས་ཕྱོགས་བསྡོམས་ཀྱི་བརྒྱ་ཆ་གོང་དུ་གསལ་བ་ལྟར་ཡིན་པ་ཐུགས་དྲན་མི་གསོས་སམ།

དེ་ལ་བརྟེན་ནས་ཕྱི་ལོ་ ༢༠༡༠ ལོའི་སྐབས་བཅུ་བཞི་པའི་སྤྱི་འཐུས་གྲོས་ཚོགས་ཐེངས་དགུ་པའི་ཐོག ཕྱི་ལོ་ ༡༩༩༧ ལོར་སྤྱི་མོས་གྲོས་ཆོད་ལ་མཇུག་གནོན་དང་འབྲེལ་འབྱུང་འགྱུར་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་ཡེ་ཤེས་དབྱིངས་དཔྱད་ཀྱིས་ཐག་གཅོད་གང་གནང་ལ་གྲོས་ཚོགས་ཀྱིས་མོས་མཐུན་མཐའ་གཅིག་ཏུ་ཞུ་རྒྱུ། ཞེས་གསལ་ཡོད། གྲོས་ཚོགས་ཀྱི་འཐུས་མི་རྣམས་བཙན་བྱོལ་བོད་མིས་འོས་འདེམས་བྱས་པའི་འཐུས་མི་ཡིན་སྟབས། ཁོང་རྣམ་པས་ཐག་གཅོད་གནང་བ་དེ་མི་མང་གི་ཐག་གཅོད་ལ་ངོས་འཛིན་ཞུ་དགོས་རྒྱུ་དམངས་གཙོའི་སྤྱི་སྲོལ་ཡིན་པ་ཞུ་ག་ལ་དགོས། དཔེར་ན། རྒྱ་གར་དང་། ཨ་རི། དབྱིན་ཡུལ་སོགས་དམངས་གཙོའི་རྒྱལ་ཁབ་ཁག་ནང་གྲོས་ཚོགས་ཀྱིས་གཏན་ལ་ཕབ་པའི་ཐག་གཅོད་དེ་མི་མང་གི་ཐག་གཅོད་ལ་བརྩི་བཀུར་ཞུ་གི་ཡོད་པ་ཀུན་ཤེས་ཡིན།

 ཕྱི་ལོ ༢༠༡༠ ལོར་རྒྱ་གར་ལྷོ་ཕྱོགས་མལ་སོར་གཞིས་ཆགས་སུ་བོད་གཞུང་དམངས་རྒྱལ་ཡོངས་ཚོགས་ཆེན་སྐབས་བཀའ་སྤྱི་གཉིས་ཀྱིས་དབུས་རྒྱ་བལ་འབྲུག་གསུམ་དང་། ཕྱི་རྒྱལ་སོགས་ནས་ཚོགས་བཅར་བ་མི་གྲངས་ ༣༥༠ བརྒལ་བ་རྣམས་ཀྱིས་གཞིས་བྱེས་བོད་མི་མང་གིས་གཏན་ལ་ཕབ་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་ཡིད་ཆེས་དང་རྒྱབ་སྐྱོར་བསྐྱར་ནན་དང་སྦྲགས་གཞི་རིམ་རྒྱ་ཆེའི་མང་ཚོགས་ཀྱི་སྐུ་ཚབ་མཚོན་པའི་ཚོགས་ཆེན་འདི་ཐོག་ནས་སླར་ཡང་སྤྱི་ནོར་༸གོང་ས་སྐྱབས་མགོན་ཆེན་པོར་རྒྱལ་སྤྱི་དང་བོད་ཕྱི་ནང་གི་ཆབ་སྲིད་འགྱུར་འགྲོས་དང་བསྟུན་ནས་ཡེ་ཤེས་དབྱིངས་དཔྱད་ཀྱིས་ཐག་གཅོད་སྔར་མུས་བཞིན་གནང་སྐྱོང་ཡོང་བའི་གསོལ་འདེབས་ཨུ་ནན་ཞུས་ཡོད་པ་མ་མཁྱེན་པ་ག་ལ་སྲིད།

དེ་ལྟར་དབུ་མའི་ལམ་གྱི་སྲིད་བྱུས་འདི་སྤྱི་ནོར་༸གོང་ས་སྐྱབས་མགོན་ཆེན་པོའི་དགོངས་འཆར་ལ་གཞིས་བྱེས་བོད་རིགས་མང་ཚོགས་ཀྱིས་ཡང་དག་པའི་དམངས་གཙོའི་ཐབས་ལམ་བརྒྱུད་ཡང་ནས་ཡང་དུ་རྒྱབ་སྐྱོར་ཞུས་ཏེ་གཏན་ལ་ཕབ་པའི་མང་ཚོགས་ཀྱི་མངོན་འདོད་དང་མཐུན་པའི་སྲིད་བྱུས་ཤིག་ཡིན་པ་ལས། ༸གོང་ས་༸སྐྱབས་མགོན་ཆེན་པོས་བརྒྱ་ཁ་གཅིག་གཅོད་དང་། རལ་གྲི་གནམ་གཡུགས་ཀྱིས་ཐག་གཅོད་གནང་བའམ། ཡང་ན་མང་ཚོགས་ལ་སྲིད་བྱུས་བཙན་འགེལ་གནང་བ་ཞིག་རྩ་བ་ནས་མིན་པ་གསལ་པོ་མཁྱེན་པ་གནང་དགོས།

གལ་ཏེ་དབུ་མའི་ལམ་འདི་༸གོང་ས་མཆོག་གི་དགོངས་འཆར་ལས། མི་མང་གིས་བཏོན་ཏེ་གཏན་འབེབས་བྱས་པ་ཞིག་མིན་པའི་རྒྱུ་མཚན་གྱིས་ལུགས་མཐུན་མིན་ཞེས་གསུངས་ན། རང་རེ་བཙན་བྱོལ་བོད་མིའི་དམངས་གཙོ་འདི་ཡང་༸གོང་ས་མཆོག་ནས་གསོལ་རས་གནང་བ་ཞིག་ཡིན་ཞེས་གོང་འོག་ཚང་མས་གསུངས་དང་གསུང་མུས་སུ་ཡོད་པ་འདི་དག་ཀྱང་ལུགས་མཐུན་མིན་པར་ཐལ་བའི་སྐྱོན་དུ་མི་འགྱུར་རམ། སྤྱིར་ན་འཛམ་གླིང་གི་གསར་བརྗེའི་འགྱུར་འགྲོས་ཚང་མ་རླབས་ཆེན་གྱི་བསམ་བློ་པ་ཉུང་ཤས་ཀྱིས་ཐོག་མར་སྣེ་འཁྲིད་གནང་བ་ཡོངས་ཁྱབ་ཀྱི་གནས་ཚུལ་ཞིག་ཡིན། གནས་ཚུལ་འདི་ཁྱེད་གཉིས་ཀྱི་ཐུགས་ལ་བཅངས་ནས་སླད་ཕྱིན་མི་མང་གི་བསམ་བློ་འཁྲུག་གཞིའི་གནས་ཚུལ་རིགས་མི་གསུང་བའི་རེ་བ་ཡོད།

ཅེས་ཕྱི་ལོ་ ༡༩༨༨ དང་། ༢༠༠༨ དང་ ༢༠༡༠ སོ་སོར་ས་གནས་མི་འཐུས་སུ་ཚོགས་བཅར་ཞུ་མྱོང་བའི་ལྷ་ས་བ་བསྟན་འཛིན་ནོར་བུས།།