ཤིན་ཏུ་བཀུར་འོས་པའི་དཔལ་ལྡན་བཀའ་སྤྱི་ཐུན་མོང་ལ།

༄༅།། ཆེད་ཞུ། བོད་མིའི་ཤེས་ཡོན་སྲིད་ཇུས་ཀྱི་ནང་དོན་དུ།

རྒྱལ་ཁབ་དང་མི་རིགས་ཀྱི་མ་འོངས་གནས་བབས་ཤེས་ཡོན་ལ་རག་ལས་པ་དང་། ཤེས་ཡོན་བཟང་ཞན་དགེ་རྒན་ལ་རག་ལས་པར་བརྟེན། སྤྱི་ཚོགས་ནང་ནས་མི་གཤིས་དང་ཀུན་སྤྱོད་ལེགས་ཤོས། ཤེས་ཡོན་གནས་ཚད་བཟང་ཤོས་རྣམས་དགེ་རྒན་གྱི་ལས་སྒོར་འཇུག་ཐབས་གནང་དགོས་པ་དང་། དགེ་རྒན་ལ་གསོལ་ཕོགས་ཐོབ་ཐང་སོགས་མཐུན་རྐྱེན་ལས་ཚན་གཞན་ལས་ཁྱད་དུ་འཕགས་པ་སྤྲོད་དགོས་པ་སོགས་སྲིད་ཇུས་ནང་རྫིག་པོ་མ་ཤ་ཏག་བཀོད་ཡོད་རེད། ཡིན་ནའང་ཚོགས་ཆུང་གཅིག་ཡོད་པ་གོ་རྒྱུ་འདུག་པ་ཙམ་ལས། དགེ་རྒན་ཚོར་དྲི་རྩད་གནང་མཁན་སུ་གང་མ་བྱུང་གསུང་མཁན་ཡང་འདུག གང་ལྟར་བཀའ་ཤག་སྐབས་བཅུ་བཞི་པ་འདེ་དང་སྤྱི་འཐུས་སྐབས་བཅོ་ལྔ་པ་འདི་གཉིས་སློབ་དགེ་དང་ལས་བྱེད་ཀྱི་ཐོག་ལ་གཟིགས་སྟངས་དང་དགོངས་པ་བཞེས་སྟངས་ཧ་ལས་པའི་སྡུག་པོ་མཐོག་གི་འདུག ད་བར་གྱི་གནང་ཕྱོགས་ལ་ལྟས་ན་༼གཞན་ལས་རང་གཅེས་པ༽ ཤ་ཏག་རེད་འདུག །བོད་ཁྱིམ་སློབ་གྲྭ་ལྟ་བུ་ཡིན་ཡང་ཚོགས་པའི་རྩ་ཚིག་དེ་ནང་པ་སངས་རྒྱས་པའི་བལྟ་སྤྱོད་ ༼རང་ལས་གཞན་གཅེས་པ་༽ འཛིན་རྒྱུ་དེ་རེད་ལ། ཤེས་ཡོན་སྲིད་ཇུས་ནང་དུའང་རང་ལས་གཞན་གཅེས་པའི་ལྷག་བསམ་ལ་གདེང་འཇོག་ཆེན་པོ་གནང་ཡོད།

འདི་སྐོར་ལ་དཔེ་མཚོན་རྙིང་རྗེ་པོ་ཞིག་བརྗོད་འདོད་བྱུང། དེ་ནི་བཀའ་ཤག་སྐབས་བཅུ་བཞི་པས་བོད་མིའི་སྒྲིག་འཛུགས་ཀྱི་འཛིན་སྐྱོང་ཐུགས་འགན་བཞེས་རྗེས། སྲིད་སྐྱོང་མཆོག་ནས་ལས་བྱེད་པར་ཚོགས་འདུ་ཐེངས་དང་པོའི་སར་གསོལ་ཕོགས་བརྒྱ་ཆ་ ༣༥ ཙམ་སྤར་ཐུབ་པ་གནང་རྒྱུ་གསུང་བཤད་སྙན་པོ་ཞིག་གནང་ཡོད་སྐད་འདུག འོན་ཀྱང་རྗེས་སུ་ཚོགས་ཆུང་གཅིག་བཙུགས་ནས་ཚོགས་ཆུང་དེས་འཆར་འབུལ་ལྟར་དེ་སྔ་འུར་སྒྲོག་བྱས་པའི་བརྒྱ་ཆ་མ་ལོངས་པར་བརྟེན། ངལ་སེལ་ཟེར་བའི་བརྒྱ་ཆ་ ༣༢ འཕྲལ་སེལ་གྱི་དཀའ་ངལ་གདོང་ལེན་ཆེད་དུ་གནང་འདུག །འོན་ཀྱང་ཕོགས་སྤར་གནང་མི་འདུག ངལ་སེལ་རོགས་སྐྱོར་རམ་སྐྱོབ་གསོའི་རིགས་འདི་ག་དུས་ཕྱིར་བསྡུ་མཚམས་འཇོག་བྱེད་ཀྱང་བྱས་ཆོག་རེད། དེ་སྔ་ཡིན་ན་ལོ་ལྔ་རེའི་མཚམས་སུ་ཕོགས་རིམ་བསྐྱར་ཞིབ་ཚོགས་ཆུང་བཙུགས་ནས་ཕོགས་སྤར་གནང་སྲོལ་ཡོད་འདུག

འོན་ཀྱང་ཆེས་ཡ་མཚན་ཞིག་ལ། རྒྱུན་དུ་ཡ་རབས་བཟང་སྤྱོད་དང་མིག་དཔེ་ཡར་སྟོན་སྐོར་ཡང་ནས་ཀྱང་དུ་གསུང་མཁན་གྱི་མཛད་གཙོ་རྣམས་པ་ཞེས། ཁོང་རང་ཚོ་དབང་འཛིན་པ་རྣམས་ཀྱི་གསོལ་ཕོགས་སྤར་ཕྱོགས་སྤྱི་མཐུས་ལྷན་ཚོགས་ནང་གྲོས་བསྡུར་གནང་སྐབས་སྤྱི་འཐུས་རྣམས་ནས་ངལ་སེལ་ཟེར་བ་ལམ་ལུགས་སྲོལ་དང་མ་མཐུན་པས། ཁས་ལེན་མ་གནང་པར་ཁོང་ཚོ་རྡོག་བསྒྲིལ་ནས་བརྒྱ་ཆ་ ༣༢ དེ་ཟླ་ཕོགས་རང་གི་ནང་བཅུག་ནས་གསོལ་ཕོགས་སྤར་ཆ་གཏན་འབེབས་གནང་ཡོད་པ་དངོས་འབྲེལ་རེད་འདུག ཡིན་ནའང་ལས་བྱེད་ཚོར་བཀའ་ཤག་ནས་འགྲེལ་བཤད་གང་གནང་དེར་སྤྱི་འཐུས་ནས་མོས་མཐུན་གནང་སྟེ་ད་ལྟའང་ངལ་སེལ་ཟེར་བ་དེ་རང་འཇགས་བཞག་ཡོད་འདུག སྤྱི་འཐུས་རྣམས་ནས་ཁོར་ང་ཚོའི་ཐོབ་ཐང་དེ་རང་མ་གཏོགས་འགན་མ་འཁྱེར་བ་ངོ་ཚ་པོ་རེད། སོང་ཙང་ལས་བྱེད་ཀྱི་གནས་སྟངས་བདེ་སྡུག་ཐོག་བསམ་བཞེས་མི་བྱེད་རྒྱུར་བཀའ་སྤྱི་གཉིས་ཁྱི་སྤྱང་ལག་སྦྲེལ་ལྟར་ཆགས་ཡོད་པ་རེད། མཛད་གཙོ་རྣམས་ནི། བཀའ་བློན་ཚོ་དང་། སྤྱི་འཐུས་ཚོ་དང་། ཁྲིམས་དཔོན་ཚོ། ཡིན་འདུག

ཡང་། ལས་བྱེད་ཚོ་ལྷག་དཀར་ཉིན་ཕྱུ་པ་གྱོན་ཆེད་ཕྱུད་པ་བཟོ་དོད་སྒོར ༥༠༠༠། གནང་རྒྱུའི་གསལ་བསྒྲགས་གནང་ཡང་། དངོས་སུ་སྒོར་ ༣༥༠༠། ལས་གནང་མིན་འདུག འདིའི་སྐོར་སྤྱི་འཐུས་གྲོས་ཚོགས་ནང་བགྲོ་གླེང་བྱུང་བར། སྲིད་སྐྱོང་གིས་གསལ་བཤད་དུ་ཕོགས་སྤར་ཚད་བརྒྱ་ཆ་ནས་བཅག་སྐོར་གསུང་འདུག དེ་གོ་རྗེས་ལས་བྱེད་མང་པོར་མགོ་སྐོར་དང་གྱོང་གུན་བཏང་པའི་བློ་ཕམ་གྱི་ཚོར་བ་ཤུགས་ཆེན་པོ་འདུག དེང་སང་ལྷག་དཀར་ཉི་བོད་ཆས་ཆ་ཚང་གྱོན་མཁན་སྲིད་སྐྱོང་ཙམ་ཡིན་པ་འདྲ་འདུག དེ་ནི་དངོས་གནས་ལས་བྱེད་ཚོར་ཐུགས་ཁག་མིན་འདུག། གང་ལ་ཟེར་ན། སྒོར་ ༣༥༠༠། དེ་ཐེངས་གཅིག་རང་རེད། འོན་ཀྱང་ཕོགས་སྤར་ཚད་ཀྱི་བརྒྱ་ཆ་ནས་བཅག་པ་དེ་ཟླ་བ་ནས་ཟླ་བ་ལོ་ནས་ལོ་གྱོང་གུན་འཕོགས་ཀྱི་ཡོད་རེད། སོང་ཙང་འདི་མགོ་སྐོར་ཙམ་མིན་པར་གྱོང་གུན་ཧ་ཅང་ཆེན་པོ་བཏང་བ་རེད།

ང་ཚོས་བོད་མིའི་སྒྲིག་འཛུགས་འདི་ལ་ཆ་འཇོག་དང་ཆེ་མཐོང་གང་ཐུབ་ཞུ་གི་ཡོད་དེ། དེ་སྔ་བཙན་བྱོལ་དུ་༸གོང་ས་སྐྱབས་མགོན་ཆེན་པོས་དབུ་ཁྲིད་པའི་བོད་གཞུང་དགའ་ལྡན་ཕོ་བྲང་གི་འཛིན་སྐྱོང་གནང་རིང་ཉེ་རིང་དང་གྲལ་རིམ་གྱི་དབྱེ་བ་རྩ་བ་ནས་མེད་རུང་། ད་ཆ་༸གོང་སྐྱབས་མགོན་ཆེན་པོས་ཆབ་སྲིད་དང་འཛིན་སྐྱོང་གི་འགན་དབང་མང་ཚོགས་ནས་འོས་འདེམས་བྱས་པའི་མི་མང་གི་འགོ་ཁྲིད་ཚོར་རྩིས་སྤྲོད་གནང་ནས་དུས་ཡུན་གང་ཡང་མ་སོང་བའི་རིང་དེར་འདི་ལྟ་བུའི་གྲལ་རིམ་གྱི་དབྱེ་བ་དང་། མཐོས་གནོན། བཤུ་གཞོག་གི་ལམ་ལུགས་སྲོལ་གཏོད་ན་དགྲ་བོར་ཕྱར་རྒྱུ་དང་། ང་ཚོ་བོད་མི་ཚང་མ་ངོ་གནོངས་དགོས་པ་འདི་འདྲ་མི་ཡོང་བ་གནང་རོགས་གནང་ཞུ་འདོད་བྱུང་།

དེ་སྔ་རང་བཙན་ཡོད་སྐབས་ཀྱང་གཞུང་གི་འགོ་ཁྲིད་ཚོས་ལས་འབྲས་མ་སྲུང་སྤྱི་དོན་རས་སུ་བོར་བས་རྐྱེན་གྱི་ང་ཚོ་བོད་མི་རིགས་དང་རྒྱལ་ཁབ་ཀྱི་གནས་སྟངས་དཀའ་རྙོག་འདི་འདྲ་ཞིག་ལ་གྱར་དགོས་བྱུང་བ་རེད། ད་ཆ་དྲང་པོ་དྲང་བཞག་དང་ལས་འབྲས་དཔང་འཕེར་ཞིག་གནང་རོགས་གྱིས།

ལས་བྱེད་ཚོས་སྐད་རྒྱག་གི་མ་རེད། གང་ཡིན་ཟེར་ན་རྡོ་མར་ལ་རྒྱབ་ཀྱང་མར་ཕམ། མར་རྡོ་ལ་རྒྱབ་ནའང་མར་ཕམ་ཞེས་པ་ལྟར་རེད།

ཡིན་ནའང་བཀའ་སྤྱི་གཉིས་ནས་དགོངས་པ་དེ་འདྲ་བཞེས་ན་ནོར་འཁྲུལ་རེད། ལས་རྒྱུན་འབྲས་བརྩི་དགོས་རེད་ལ༸གོང་ས་སྐྱབས་མགོན་ཆེན་པོ་ཡང་ཐུགས་ཕམ་མི་བྱུང་བ་ཞིག་གནང་རྒྱུ་མཛད་གཙོ་རྣམ་པའི་འགན་འཁུར་ལྡོག་ཏུ་མེད་པ་ཞིག་རེད། དེ་ངོས་བཟུང་ཐུབ་པ་གྱིས་རོགས།

དགེ་རྒན་གྱི་གསོལ་ཕོགས་དང་ཐོབ་ཐང་སྐོར་རྡ་ས་དང་མ་སུ་རི་བོད་ཁྱིམ་གཉིས་ནས་སོ་སོའི་དཔལ་འབྱོར་གནས་སྟངས་དང་བསྟུན་ནས་སྤར་ཆ་ཕྲན་བུ་གནང་ཡོད་པ་དེ་ལས་ལྷག་གནང་ཐབས་མེད་པ་གསུངས་སྐད་འདུག དེ་བཞིན་སམ་བྷོ་ཊའི་དགེ་རྒན་ལ་ཤེས་རིག་ནས་ལས་བྱེད་ཚོར་ངལ་སེལ་བརྒྱ་ཆ་ཟེར་བ་དེ་པར་བཀབ་གནང་ཡོད་པ་གོ་རྒྱུ་འདུག འོས་མཚམས་དགོངས་བཞེས་དང་དྲང་བདེན་མ་གནང་ན་ཤིན་ཏུ་ཐབས་སྐྱོ་པོ་རེད། དེང་སྐབས་བོད་མི་མང་ཆེ་བ་ནུབ་ཕྱོགས་རྒྱལ་ཁབ་ལ་ཁ་ཕྱོགས་ཏེ་སོ་སོའི་སྒེར་དོན་ལ་གཉེར་བའི་སྐབས་འདིར་དགེ་རྒན་དང་ལས་བྱེད་བསམ་ཡོད་རང་ལས་གཞན་གཅེས་པའི་ཀུན་སློང་བཅང་ཏེ་མིང་དང་མཐོ་གོ་ས་ལ་མི་རེ་བར་སྤྱི་བའི་ལས་ཀ་གནང་མཁན་ཚོར་མཐོང་ཆུང་དང་ཁོང་ཚོ་དང་ཁོང་ཚོའི་ནང་མི་ལྟོས་བཅས་ལ་འཚོ་རྟེན་ཕོགས་དང་ཐོབ་ཐང་སོགས་མཛད་གཙོ་རྣམས་པ་ལས་ལྷག་པ་དགོངས་བཞེས་གནང་རོགས་ཞུ་རྒྱུ་མེད་དེ། འགྲོ་སྟངས་ལམ་ལུགས་གཅིག་མཚུངས་ཞིག་དགོངས་བཞེས་གནང་མ་ཐུབ་ན། ང་ཚོའི་སེམས་ཚབ་ལ་བོད་མིའི་སྒྲིག་འཛུགས་འདི་ལ་ཡིད་ཆེས་རླགས་ཉེན་དང་མ་འོངས་པར་ལྷག་བསམ་བཅང་ནས་ཡུན་རིང་ཞབས་ཞུ་སྒྲུབ་མཁན་ལས་བྱེད་དང་དགེ་རྒན་ཉུང་དུ་ཉུང་དུ་འགྲོ་གི་རེད་བསམ་གྱི་འདུག

སྲིད་སྐྱོང་བརྗེ་གི་རེད། སྤྱི་འཐུས་ཁྱུར་གི་རེད། ཡིན་ནའང་ཆུ་ཕྱིན་ཡང་ཟམ་པ་བསྡད་དགོས་རེད་ཟེར་བ་བཞིན་བོད་མིའི་སྒྲིག་འཛུགས་འདི་ཇི་སྲིད་བོད་དོན་བདེན་མཐའ་མ་གསལ་དེ་སྲིད་བར་གནས་ཐུབ་དགོས་རེད་ན། སྒྲིག་འཛུགས་འདི་དང་དེ་ལ་བསྟེན་པའི་སློབ་གྲྭ་ཁག་སྦོ་མ་ལུག་པར་བསྡད་དགོས་པ་ཧ་ཅང་གལ་ཆེན་པོ་རེད། བྱ་ལས་འདི་བསྒྲུབ་པར་རྒྱུན་མཐུད་ནས་ལས་གནང་མཁན་ལས་བྱེད་དང་དགེ་རྒན་དེ་ཚོ་ཤིན་ཏུ་ནས་གལ་ཆེན་པོ་ཡིན་པ་ལྟར་གསོ་སྐྱོང་དང་བདག་པོ་ཡག་པོ་བསྐྱོན་མ་ཐུབ་ན་ཉིན་གཅིག་ཨ་ཁ་ཁ་ཟེར་དགོས་ཤར་ཉེན་ཡོད། དེ་དུས་རི་ལུག་པ་ཐག་པས་མི་དོམ་ཟེར་བ་དངོས་གནས་ཆགས་ཀྱི་རེད། ༸གོང་ས་སྐྱབས་མགོན་ཆེན་པོས་རེ་བ་བཟང་ས་ལ་རྒྱོབས། གྲ་སྒྲིག་སྡུགས་ས་ནས་བྱོས་ཅེས་རྒྱུན་དུ་བཀའ་སློབ་ཕེབས་བཞིན་པ་དགོངས་པར་བཅང་ནས། རྒྱ་ཆེ་མི་མང་གི་ཁྱེད་རྣམ་པར་རེ་བ་བཅོལ་བ་དེ། བློ་གྲོད་པར་བཀལ། གྲོད་པས་ཆུ་སློད་ཟེར་བ་ལྟར་མ་སོང་བ་ཐུགས་རྗེ་གཟིགས།

སྐལ་བཟང་རྣམ་རྒྱལ་མིང་འདོགས་ཅན་ལས་ལྷག་བསམ་འབོད་བསྐུལ་དུ་ཕུལ་བ་དགེ། ༢༠༡༤།༡༠།༢༨ ཉིན།

ངོ་བཤུས། དགའ་ལྡན་ཕོ་བྲང་ཡིག་ཚང་། བོད་མིའི་སྒྲིག་འཛུགས་ལས་ཁུངས་ཁག སམ་བྷོ་ཊ་ཡིག་ཚང་། རྡ་ས་བོད་ཁྱིམ། མ་སུ་རི་བོད་ཁྱིམ། དུས་བབ་གསར་ཁང་། བོད་ཀྱི་བང་ཆེན་གསར་ཁང་།