རྒྱ་ནག་དང་པ་ཀི་སི་ཐན་བར་དམག་སྦྱོང་།

རྒྱ་གར་དང་པ་ཀི་སི་ཐན་གྱི་བར་རྩོད་རྙོག་ཆེ་བའི་ཀ་ཤི་མར་ས་མཚམས་སུ་རྒྱ་དམག་གིས་པ་ཀི་སི་ཐན་གྱི་དམག་མིར་དམག་སྦྱོང་དང་མཚོན་ཆ་མཁོ་སྤྲོད་བྱེད་བཞིན་ཡོད་འདུག

ཁ་སང་ཕྱི་ཚེས་ ༡༤ ཉིན་རྒྱ་གར་རྒྱལ་སྲུང་དམག་དཔུང་གི་གསང་བའི་ལས་ཁུངས་ཀྱིས་གནས་ཚུལ་སྤེལ་བ་ལྟར་ན། ཉིན་འདི་གར་རྒྱ་གར་དང་པ་ཀི་སི་ཐན་གཉིས་བར་རྩོད་རྙོག་ཡོད་པའི་རྒྱ་གར་བྱང་ཕྱོགས་ཇ་མུ་ཀ་ཤི་མུར་མངའ་སྡེའི་ར་ཇོབ་རེ་ (Rajouri) ཁུལ་དུ། རྒྱ་ནག་བཅིངས་འགྲོལ་དམག་དཔུང་གིས་འཇིགས་སྐུལ་དྲག་སྤྱོད་པར་ཁ་གཏད་གཅོག་ཆེད་ཡིན་ཚུལ་གྱིས་པ་ཀི་སི་ཐན་གྱི་མཐའ་མཚམས་དམག་དཔུང་ལ་དམག་སྦྱོང་སྤྲོད་ཀྱིན་ཡོད་པ་མ་ཟད། མཚོན་ཆ་མཁོ་སྤྲོད་དང་དམག་ས་གསར་རྒྱག་སོགས་བྱས་ཏེ་རྒྱ་གར་གྱི་བདེ་འཇགས་ལ་ཉེན་ཁ་བཟོ་བཞིན་ཡོད་སྐོར་བསྒྲགས་འདུག

རྒྱ་གར་རྒྱལ་སྲུང་དམག་དཔུང་ལས་ཁུངས་ནས་གསར་འགོད་པར་བརྗོད་དོན། ད་ལྟའི་ཆར་པ་ཀི་སི་ཐན་གྱིས་བདག་བཟུང་འོག་ཡོད་པའི་ཀ་ཤི་མར་ས་ཁུལ་དུ་རྒྱ་དམག་གིས་པ་ཀི་སི་ཐན་མདུན་ཕྱོགས་དམག་སྡེ་ཨང་གསུམ་པ་དང་བཞི་པར་དམག་སྦྱོང་སྤྲོད་པ་དང་མཚོན་ཆ་མཁོ་སྤྲོད་བྱེད་བཞིན་ཡོད་པ་དེས་རྒྱ་དཀར་ནག་གཉིས་བར་གྱི་འབྲེལ་ལམ་ལ་ཛ་དྲག་རང་བཞིན་གྱི་དོ་ཕོག་བཟོ་བཞིན་ཡོད་པ་རེད་ཅེས་བརྗོད་འདུག

རྒྱལ་སྲུང་གསང་བའི་ལས་ཁུངས་ཀྱིས་ཇ་མུ་ཀ་ཤི་མར་མངའ་སྡེའི་གྲོས་ཚོགས་ཀྱིས་མི་འགྱངས་བར་འོས་བསྡུ་བྱ་འཆར་ཡོད་སྟབས། པ་ཀི་སི་ཐན་མདུན་ཕྱོགས་ཀྱི་ས་གནས་སཱེལ་ཀོལ་ཊི་ (Sialkot) ནང་འཇིགས་སྐུལ་ཚོགས་པ་མང་པོ་སྦས་སྐོང་བྱས་ཡོད་པ་དང་། ཁོ་ཚོས་འོས་བསྡུའི་གོ་སྐབས་དང་བསྟུན་ཏེ་ལྷོ་ཀ་ཤི་མར་གྱི་གྲོང་བརྡལ་ཁག་ནང་འཇབ་རྒོལ་བྱས་ཏེ། ས་གནས་དེའི་ཉེན་རྟོག་པ་དང་བདེ་སྲུང་དམག་མི། སྲིད་དོན་མི་སྣ་བཅས་ལ་འཇབ་རྒོལ་བྱེད་སྲིད་པའི་ཉེན་བརྡ་ཞིག་རྒྱ་གར་དབུས་གཞུང་ལ་བཏང་ཡོད་འདུག

ཟླ་སྔོན་མའི་ཚེས་ ༦ ཉིན་པ་ཀི་སི་ཐན་གྱི་དམག་མི་རྒྱ་གར་གྱི་ས་མཚམས་ནང་སིམ་འཛུལ་བྱེད་སྐབས། རྒྱལ་ཁབ་གཉིས་ཀྱི་མཐའ་སྲུང་དམག་མི་ཕན་ཚུན་བར་མེ་མདའ་རྒྱག་རེས་བྱས་ཏེ། པ་ཀི་སི་ཐན་གྱི་དམག་མི་ལྔ་དམར་གསོད་བྱས་ཡོད་སྟབས། པ་ཀི་སི་ཐན་གྱིས་དགྲ་ཤ་ལེན་ཆེད་དུས་ངེས་མེད་དུ་རྒྱ་གར་ལ་འཇབ་རྒོལ་བྱེད་སྲིད་པར་དོགས་པ་ཟ་བཞིན་ཡོད་ལ། ད་ལྟའི་ཆར་ཇ་མོ་ (Jammu)ས་ཁུལ་ནང་ཡོད་པའི་རྒྱ་གར་དང་པ་ཀི་སི་ཐན་བར་གྱི་རྒྱལ་སྤྱིའི་ས་ཐིག་ཁག་ནང་ཕྱོགས་གཉིས་ཀས་དམག་དཔུང་འགྲེམས་འཇོག་གིས་གནས་སྟངས་ཛ་དྲག་ཆགས་ཡོད་སྟབས། པ་ཀི་སི་ཐན་ཕྱོགས་སུ་ཡོད་པའི་མི་མང་ཚོ་ས་གནས་གཞན་དུ་གནས་སྤོ་བྱེད་བཞིན་ཡོད་འདུག

ཟླ་འདིའི་ཚེས་ ༡༤ ཉིན་རྒྱ་ནག་གི་བདེ་སྲུང་བློན་ཆེན་ཆང་ཝན་ཆོན་དང་པ་ཀི་སི་ཐན་གྱི་མཁའ་དམག་སྤྱི་ཁྱབ་པ་པོ་ཊྲི་ (Rafique Butt) གཉིས་པེ་ཅིན་དུ་ཐུག་འཕྲད་བྱས་ཏེ། རྒྱ་ནག་གིས་པ་ཀི་སི་ཐན་གྱི་དམག་དཔུང་ལ་སྦྱོང་བརྡར་དང་མཚོན་ཆ་མཁོ་སྤྲོད། འཇིགས་སྐུལ་དྲག་སྤྱོད་པར་རྒོལ་རྡུང་སོགས་ལ་རོགས་སྐྱོར་བྱེད་རྒྱུའི་ཁས་ལེན་བྱས་ཡོད་པ་དང་། ཚེས་ ༡༣ ཉིན་ཨུ་རུ་སུས་ཀྱང་ཀི་སི་ཐན་གཞུང་གིས་འཇིགས་སྐུལ་རིང་ལུགས་པར་རྒོལ་རྡུང་བྱེད་ཆེད་པ་ཀི་སི་ཐན་ལ་དམག་འཐབ་ཐད་འཕུར་གནམ་གྲུ་རྟགས་ (Mi-35)ཞེས་པ་བཙོང་རྒྱུ་ཡིན་ཚུལ་བསྒྲགས་ཡོད་ལ། ཟླ་འདིའི་ཚེས་ ༢༦ ཉིན་ཨུ་རུ་སུས་པ་ཀི་སི་ཐན་ལ་དཔལ་འབྱོར་ཚོང་ལས་གཙོས་དམག་དོན་དང་མཚོན་ཆ་ཉོ་ཚོང་གི་སྐོར་ལ་གྲོས་ཆོད་ཁག་ཅིག་འཇོག་འཆར་ཡོད་འདུག

སྲིད་དོན་དབྱེ་ཞིབ་པ་ཚོས། རྒྱ་ནག་གིས་རྒྱ་གར་དང་པ་ཀི་སི་ཐན་གཉིས་བར་རྩོད་རྙོག་ཆེ་བའི་ཀ་ཤི་མར་མཐའ་ མཚམས་སུ་པ་ཀི་སི་ཐན་དམག་དཔུང་ལ་སྦྱོང་བརྡར་སྤྲད་པ་དེས། ཕྱོགས་གཅིག་ནས་རྒྱ་གར་ལ་གནོན་ཤུགས་སྤྲོད་ཀྱི་ཡོད་པ་དང། ཕྱོགས་གཞན་ནས་པ་ཀི་སི་ཐན་གྱི་བདག་བཟུང་འོག་ཡོད་པའི་ཀ་ཤི་མར་ས་ཁུལ་པ་ཀི་སི་ ཐན་གྱི་རྒྱལ་ཁོངས་ཡིན་པར་ངོས་འཛིན་ཀྱིན་ཡོད་ཚུལ་བརྗོད་འདུག

གསར་འགོད་པ། ལྷ་སྐྱབས་རྒྱལ།