རྒྱལ་ཁབ་འགའི་བར་རྩོད་རྙོག་ཡོད་པའི་ལྷོ་རྒྱ་ནག་རྒྱ་མཚོའི་བྱེ་གླིང་དུ་རྒྱ་ནག་གིས་གནམ་ཐང་ཞིག་རྒྱག་གི་ཡོད་པའི་པར་ཞིག་གསར་ལམ་ཐོག་ཐོན་པར། ཨ་རི་གཙོས་ལྷོ་ཨེ་ཤ་ཡའི་རྒྱལ་ཁབ་ཁག་གིས་རྒྱ་ནག་ལ་སྐྱོན་བརྗོད་བྱས།
ཟླ་འདིའི་ཚེས་ ༢༤ ཉིན་དབྱིན་ཡུལ་གྱི་བདུན་རེའི་བདེ་སྲུང་དུས་དེབ་སྟེང་གནས་ཚུལ་སྤེལ་བའི་ནང་། ཟླ་འདིའི་ཚེས་ ༡༤ ཉིན་ལྷོ་རྒྱ་ནག་རྒྱ་མཚོའི་མངའ་ཁུལ་གྱི་རྒྱ་ནག་དང་ཧྥི་ལི་ཕིན། མཱ་ལེ་ཤི་ཡ་དང་བྷི་རོབ་ནེ་(Brunei)། ཝེ་ཋི་ནམ་བཅས་ཀྱི་བར་རྩོད་རྙོག་ཡོད་པའི་རྒྱ་ནག་རྒྱ་མཚོའི་ལྷོ་ངོས་བྱེ་གླིང་ཧྥེ་རེའུ་ཁུ་རོབ་སི་རེ་ཧྥི་ (Fiery Cross Reef) ཞེས་པའི་སྟེང་དུ། རྒྱ་ནག་གིས་གནམ་ཐང་ཞིག་གསར་རྒྱག་བྱེད་ཀྱིན་ཡོད་པའི་པར་ཞིག་ཁྱབ་བསྒྲགས་བྱས་ཡོད་སྟབས། ཨ་རིའི་གཙོས་གོང་གི་རྒྱལ་ཁབ་ཁག་གིས་རྒྱ་ནག་གི་བྱ་སྤྱོད་དེར་སྐྱོན་བརྗོད་བྱས་ཡོད་འདུག
ཧྥི་ལི་ཕིན་གཞུང་གིས་ལྷོ་རྒྱ་ནག་རྒྱ་མཚོའི་ནང་གི་མཚོ་གླིང་དུ་རྒྱ་ནག་གིས་ཨར་ལས་འཛུགས་སྐྲུན་བྱེད་པ་དེས་མཚོ་རྒྱུད་ཀྱི་གནས་སྟངས་ཛ་ཇེ་དྲག་ཏུ་གཏོང་གི་ཡོད་སྟབས། ལྷོ་ཨེ་ཤ་ཡའི་རྒྱལ་ཁབ་ཁག་གིས་མཉམ་རུབ་ཐོག་མཚོ་རྒྱུད་དུ་རྒྱ་ནག་གི་ཚོང་ཟོག་སྐྱེལ་འདྲེན་བཀག་སྡོམ་བྱེད་དགོས་ཚུལ་བརྗོད་འདུག
ཨ་རིའི་རྒྱལ་དོན་ལས་ཁུངས་ཀྱི་མགྲིན་ཚབ་པས། རྒྱ་ནག་གིས་མཚོ་གླིང་གི་སྒྲིག་ཁྲིམས་ལ་བརྩི་བཀུར་བྱས་ཏེ། རྩོད་རྙོག་ཡོད་པའི་མཚོ་རྒྱུད་ཀྱི་ཨར་ལས་གནད་དོན་དེར་ལྷོ་ཨེ་ཤ་ཡའི་རྒྱལ་ཁབ་ཁག་གིས་གྲོས་བསྡུར་བརྒྱུད་སེལ་ཐུབ་བྱེད་དགོས་ཚུལ་བརྗོད་ཡོད་པ་དང་། ཨ་རིའི་དམག་དོན་ལས་ཁུངས་ཀྱིས་རྒྱ་ནག་གིས་ངེས་པར་དུ་འཛུགས་སྐྲུན་ལས་གཞི་དེ་མཚམས་འཇོག་བྱས་ཏེ་མཚོ་གླིང་ཞི་བདེ་ལྷིང་འཇགས་བཟོ་དགོས་ཚུལ་བརྗོད་འདུག
ཨ་རིས་རྒྱ་ནག་ལ་སྐྱོན་བརྗོད་བྱས་པའི་ལན་དུ། རྒྱ་ནག་གི་སྤྱི་ཁྱབ་དམག་དཔོན་ལའོ་ཡོན་ (Luo Yuan)ཡིས་ཤིན་ཧྭ་གསར་ཁང་དུ། ཨ་རིས་ཧྥི་ལི་ཕིན་དང་མ་ལཱ་ཤི་ཡ། ཝེ་ཋི་ནམ་བཅས་ཀྱིས་རྩོད་རྙོག་ཡོད་པའི་ལྷོ་རྒྱ་ནག་རྒྱ་མཚོའི་མཚོ་གླིང་ཁག་ཏུ་དམག་དཔུང་ལ་མཐུན་སྦྱོར་བྱེད་པའི་བསྟི་གནས་བཙུགས་པའི་ཐོག་སྐད་ཆ་གང་ཡང་མ་བཤད་པར། ད་རེབ་རྒྱ་ནག་གིས་བྱེ་གླིང་དུ་གནམ་ཐང་རྒྱག་གི་ཡོད་པར་སྐྱོན་བརྗོད་བྱས་པ་དེ་ཕྱོགས་ལྷུང་དང་འགན་འཁུར་མེད་པའི་སྐད་ཆ་ཞིག་རེད་ཅེས་བརྗོད་ཡོད། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་དཔའ་ཆོན་ཡུན་གྱིས་གསར་འགོད་པར། རྒྱ་ནག་གིས་རྩོད་རྙོག་ཡོད་པའི་རྒྱལ་ཁབ་ཚང་མའི་བར་ཕན་ཚུན་ཡིད་ཆེས་ཐོག་ནས་མཚོ་གླིང་གི་ཞི་བདེ་ལ་སྲུང་སྐྱོབ་བྱེད་པར་འབོད་སྐུལ་བྱེད་ཀྱིན་ཡོད་ཅེས་བརྗོད་འདུག
ཧྥི་ལི་ཕིན་ནང་རྟེན་གཞི་བྱས་པའི་ཞི་བདེ་ཞིབ་འཇུག་བསྟི་གནས་ཁང་གི་ཉམས་ཞིབ་པ་སྐུ་ཞབས་རོབ་མེལ་ལགས་ཀྱིས་གསར་འགོད་པར། ཧྥེ་རེའུ་ཁུ་རོབ་མཚོ་གླིང་དེ་དམག་དོན་ཐབས་ཇུས་ཐོག་ཧ་ཅང་གལ་ཆེན་ཆགས་ཡོད། གལ་སྲིད་རྒྱ་ནག་གིས་དམག་དོན་ཆེད་དུ་མཚོ་ཁུལ་དེར་གནམ་ཐང་བརྒྱབ་པ་ཡིན་ན། ཝེ་ཋི་ནམ་དང་མཱ་ལེ་ཤི་ཡ། ཧྥི་ལི་ཕིན་བཅས་ཀྱི་མཚོ་ངོས་འགུལ་སྐྱོད་ལ་སྟངས་འཛིན་བྱེད་ཐུབ་ཀྱི་ཡོད། ཅེས་བརྗོད་ཡོད་འདུག
ཧྥེ་རེའུ་ཁུ་རོབ་སི་རེ་ཧྥི་ (Fiery Cross Reef) ཞེས་པ་འདི་ལྷོ་རྒྱ་ནག་རྒྱ་མཚོའི་ནང་གི་རྩོད་རྙོག་ཆེ་བའི་སི་པུ་རད་ཊི་ལེ་མཚོ་གླིང་ཁག་ (Spratly Islands)གི་དབུས་སུ་ཡོད་པ་དང་། རྒྱ་ནག་གིས་དེའི་མིང་ལ་ཡུང་ཧྲའོ (Yongshu)ཟེར་བ་དང་། ཧྥི་ལི་ཕིན་གྱིས་ཀཱ་གྷེ་ཊིན་གྷན་ (Kagitingan) ཟེར་གྱི་ཡོད། མཚོ་ངོས་བྱེ་གླིང་འདི་ལ་ཐའེ་ཝན། མཱ་ལ་ཤི་ཡ། ཝེ་ཋི་ནམ། བྷི་རོབ་ནེ་བཅས་ཀྱིས་ཀྱང་བདག་དབང་ཡོད་ཚུལ་རྗོད་བཞིན་ཡོད་པ་དང་། ཚན་རིག་པས་མཚོ་གླིང་འདི་དག་ཏུ་རྡོ་སྣུམ་དང་སོལ་རླངས་འབོར་ཆེན་ཡོད་སྐོར་བརྗོད་ཡོད་འདུག
