རྒྱ་གཞུང་གིས་ཤིན་ཅང་ནང་བྱུང་བའི་དོན་རྐྱེན་ ༦ ལ་འབྲེལ་ཡོད་ཀྱི་ཉེས་ཅན་ ༥༥ ལ་ཁྲིམས་ཆད་དང་དོགས་ཡོད་མི་སྣ་ ༣༨ དངོས་སུ་འཛིན་བཟུང་བྱས་པ་ཕྱིར་བསྒྲགས་བྱས་འདུག
ཟླ་འདིའི་ཕྱི་ཚེས་ ༢༧ ཉིན་ཤིན་ཅང་མཐོ་རིམ་ཁྲིམས་ཁང་གི་ཡཱས་ལི་ཁུལ་ཡན་ལག་ཁང་གིས། ཡཱས་ལི་གྲོང་ཁྱེར་ལུས་རྩལ་རྭ་བར་ཚོགས་ཆེན་བསྡུས་ཏེ། ཉེ་སྔོན་བྱུང་བའི་དོན་རྐྱེན་ ༦ ལ་འབྲེལ་བ་ཡོད་པའི་ཉེས་ཅན་ ༥༥ ལ་ཁྲིམས་ཐག་བཅད་པ་ཡོངས་བསྒྲགས་བྱས་ཡོད་པ་དང་། དེའི་ནང་ཡུ་གུར་བ་ཨཱ་བྷོ་ལི་མའི་ཊི་ཨཱ་བྷོ་ཏོའུ་ལཱ་ཟེར་བ་སོགས་མི་ ༣ ལ་སྲོག་ཁྲིམས་བཅད་ཡོད་པ་དང་། དེ་བཞིན། དོགས་ཡོད་ཉེས་ཅན་ ༣༨ དངོས་སུ་འཛིན་བཟུང་དང་མི་ ༢༧ བཀག་ཉར་བྱས་པ་ཕྱིར་བསྒྲགས་བྱས་འདུག ཐེངས་འདིའི་ཚོགས་ཆེན་ཐོག་རྒྱ་ནག་འཇིགས་སྐུལ་དྲག་སྤྱོད་རྒོལ་རྡུང་རུ་ཁག་དང་། ཡུ་གུར་མི་རིགས་རང་སྐྱོང་ཁུལ་གྱི་རྫོང་དང་གྲོང་ཁྱེར་གྱི་མི་རིགས་འདྲ་མིན་གྱི་དཔོན་རིགས་བཅས་མི་གྲངས་ ༧༠༠༠ ལྷག་འདུ་འཛོམས་བྱས་ཡོད་འདུག
ཤིན་ཅང་གི་གཞུང་འབྲེལ་གསར་ལམ་ཁག་ནས་ཐེངས་འདིའི་ཉེས་དོན་ནང་ལྐོག་གསོད་དང་རྒྱལ་ཁབ་ཁ་བྲལ་བཏང་བ། རྩ་འཛུགས་སྣེ་ཁྲིད། འཇིགས་སྐུལ་ཚོགས་པར་མཉམ་ཞུགས། ནག་ཉེས་འགེབ་སྲུང་བྱས་སྐོར་ཙམ་བརྗོད་ཡོད་པ་ལས་གསལ་བོ་ཕྱིར་བསྒྲགས་བྱས་མེད་ཀྱང་། དངོས་སུ་འཛིན་བཟུང་བཀག་ཉར་བྱས་པའི་དོགས་ཡོད་ཉེས་ཅན་ཚོས་རྒྱལ་ཁབ་ཁ་བྲལ་དང་ནག་ཉེས་འགེབ་སྲུང་། ཁྲིམས་འགལ་གཉེན་སྟོན། བཙན་གཡེམ་བཅས་ཀྱི་ནག་ཉེས་བཟོས་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༢༥ ཉིན་རྒྱ་ནག་དབུས་ཉེན་རྟོག་ཁང་གིས་ཚོགས་འདུ་བསྡུས་ཏེ། འཇིགས་སྐུལ་དྲག་སྤྱོད་རྒོལ་རྡུང་རུ་ཁག་གིས་མ་འོངས་ལོ་གཅིག་རིང་ཤིན་ཅང་གཙོ་བོར་གྱུར་བའི་འཇིགས་སྐུལ་དྲག་སྤྱོད་ཀྱི་བྱ་སྤྱོད་ལ་རྡུང་རྡེག་ནན་པོ་གཏོང་རྒྱུ་ཐག་གཅོད་བྱས་པ་ལྟར། ཐེངས་འདིའི་ཚོགས་ཆེན་ཐོག་སྲིད་གཞུང་གི་དཔོན་རིགས་ཚོས། ཤིན་ཅང་ནང་གཅིག་རྗེས་གཉིས་མཐུད་ཀྱི་དྲག་སྤྱོད་ལས་འགུལ་དང་ཐལ་ཆེ་བའི་ཆོས་ལུགས་ཀྱི་བྱེད་སྒོ་ཁག་ལ་མཐའ་གཅིག་ཏུ་བཀག་སྡོམ་བྱས་ཏེ། སྤྱི་ཚོགས་ཧྲིལ་པོའི་བདེ་འཇགས་ལ་སྲུང་སྐྱོབ་ཁག་ཐེག་བྱེད་རྒྱུ་ཡིན་སྐོར་དང་། ཉེས་ཅན་ཚོས་བྱ་སྤྱོད་ངན་པ་མཚམས་འཇོག་གིས་རང་སྐྱོན་ངོས་ལེན་བྱེད་རྒྱུ་དེ་ཐར་ལམ་གཅིག་པུ་ཡིན་སྐོར་བསྒྲགས་ཡོད་པ་མ་ཟད། ཉེ་སྔོན་ནས་ཤིན་ཅང་དུ་འཇིགས་སྐུལ་དྲག་སྤྱོད་ཀྱི་དོན་རྐྱེན་བསྟུད་མར་བྱུང་རྗེས། གཞུང་ཕྱོགས་ནས་རྣམ་འགྱུར་ཧ་ཅང་མཁྲེགས་པོ་བཟུང་ཡོད་ལུགས་བརྗོད་འདུག
གསར་འགོད་པ། པདྨ་མཚོ།
