༧གོང་ས་མཆོག་གིས་སྔ་འགྱུར་ཟབ་གསང་ཆོས་འཁོར་གླིང་གི་དབུ་འབྱེད་མཛད་སྒོའི་ཐོག་བཀའ་སློབ་གནང་སྟེ། དགེ་རྒན་ཚོས་གཞོན་སྐྱེས་ཚོ་མི་རབས་གསར་བའི་མཇུག་སྐྱོང་མཁན་དང་། མ་འོངས་པའི་ལས་ཀ་འཕྲོ་སྐྱོང་གནང་མཁན་ཡིན་བསམ་ཏེ་དམིགས་བསལ་ལྟ་རྟོག་བྱེད་རྒྱུ་ཧ་ཅང་གལ་ཆེན་པོ་ཡིན་སྐོར་གསུངས་སོང་།
དེ་རིང་ཕྱི་ཚེས་ ༢༨ ཉིན་གྱི་སྔ་དྲོར་༧གོང་ས་མཆོག་སྦིར་ཅོང་ཏ་རར་ཡོད་པའི་སྔ་འགྱུར་རྙིང་མའི་དགོན་པ་ཟབ་གསང་ཆོས་འཁོར་གླིང་གིས་གསོལ་འདེབས་ཞུས་དོན་ལྟར་ཆིབས་བསྒྱུར་བསྐྱངས་ཏེ། དགོན་པའི་འདུ་ཁང་དང་གྲྭ་ཤག་གསར་བཞེངས་ལེགས་གྲུབ་ལ་རབ་གནས་དང་འདུ་ཁང་དབུ་འབྱེད་གནང་སོང་། དེར་བོད་མིའི་སྒྲིག་འཛུཊ་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ངག་དབང་འཕེལ་རྒྱལ་མཆོག སྤྱི་འཐུས་ཚོགས་གཙོ་སྤེན་པ་ཚེ་རིང་དང་ཚོགས་གཞོན་མཁན་པོ་བསོད་ནམས་བསྟན་འཕེལ། དེ་བཞིན། ཐའེ་ཝན་དང་སེང་གྷ་པུར་གྱི་སྤྱིན་བདག་རྣམ་པ། སུ་ཇཱ་དང་ཅོང་ཏ་རའི་དགེ་ལས་སློབ་ཕྲུག་བཅས་འཛོམས་འདུག
མཛད་སྒོའི་ཐོག་མར་༧གོང་ས་མཆོག་གིས་འདུ་ཁང་དབུ་འབྱེད་རབ་གནས་གནང་རྗེས། ཤར་སྦྲུལ་དམ་ཆོས་རིན་པོ་ཆེ་མཆོག་ནས་དགོན་པའི་ལོ་རྒྱུས་དང་འབྲེལ་བའི་གསུང་བཤད་གནང་དོན་ལྟར་ན། ལོ་བརྒྱ་ཕྲག་དུ་མའི་སྔོན་དུ་སྟོད་མངའ་རིས་ནས་ཤར་དར་རྩེ་མདོའི་བར་ཉི་གྲགས་གསང་སྔགས་ཀྱི་དགོན་སྡེ་དར་ཁྱབ་ཆེན་པོ་ཡོད་ཀྱང་། ཕྱིས་སུ་སྔར་གྱི་ལམ་སྲོལ་རྒྱུན་འཛིན་ཆེད་བཤད་སྒྲུབ་ཀྱི་བསྟི་གནས་བཟང་པོ་ཞིག་བྱུང་མེད་པ་དང་། རྒྱ་ནག་གཞུང་གིས་བོད་ཀྱི་སྣོད་བཅུད་དང་ཆོས་དང་རིག་གཞུང་རྩ་མེད་བཏང་བ་བཅས་ཀྱི་དབང་གིས། ད་ཆ་བོད་ཆོལ་ཁ་གསུམ་དུ་གསང་སྔགས་ཀྱི་བཤད་གྲྭ་དང་སྒྲུབ་གྲྭ་ཕར་ཞོག ཐ་ན་ཆོས་བརྒྱུད་སླར་གསོའི་དགོན་སྡེ་རེ་གཉིས་ཀྱང་མཐོང་དཀོན་པའི་གནས་སུ་གྱར་ཡོད་སྟབས། བོད་རང་གི་ཐུན་མོང་མ་ཡིན་བསྟན་པ་སྤྱི་དང་བྱེ་བྲག་ཉི་གྲགས་ཆོས་བརྒྱུད་འདི་ཉིད་ཉམས་པ་སླར་གསོ་དང་མི་ཉམས་གོང་འཕེལ་ཆེད་རྒྱ་གར་རང་དབང་ལུང་པར་གསར་འཛུཊ་གནང་ཡོད་པ་དང་། མ་འོངས་པར་བསྟི་གནས་འདི་ཉིད་བཤད་སྒྲུབ་ཆ་ཚང་བའི་ཤེས་ཡོན་གྱི་བསྟི་གནས་ཤིག་ཏུ་བསྒྱུར་འཆར་ཡོད་སྐོར་སོགས་གསུངས་སོང་།
དེའི་རྗེས་༧གོང་ས་མཆོག་གིས་སློབ་གནང་སྐབས་སློབ་ཕྲུག་ཚོར་དམིགས་ཏེ་གསུངས་དོན། བོད་མི་རིགས་ཞེས་ལབ་དུས་འཛམ་གླིང་གི་མི་གྲལ་དུ་ཚུད་མཁན་ཞིག་རེད། བོད་པ་ཟེར་མཁན་དེ་སྐྱོ་བོ་ཁྱོན་ནས་རེད་མི་འདུག སྙིང་སྟོབས་ལ་ཆ་བཞག་ནའང་། དཀའ་ངལ་རིམ་པ་བརྒྱུད་ནས་འགྲོ་ཡི་ཡོད་ཀྱང་། དངོས་ནས་སྙིང་སྟོབས་ཞུམ་པ་མེད་པ་དང་འགྱུར་བ་མེད་པ། ལྷག་བསམ་རི་ལྟར་བརྟན་པའི་མི་རིགས་ཤིག་རེད། ཁྱེད་རང་ཚོ་སློབ་ཕྲུག་གཙོ་བོར་གྱུར་བའི་ཚང་མར་བོད་པ་ཞིག་ཡིན་པའི་སྤོབས་པ་དགོས་པ་རེད། སྤོབས་པ་བྱས་ནས་མིར་མཐོང་ཆུང་བྱས་པའི་སྲོལ་དེ་འདྲ་མ་རེད། སེམས་ནང་ང་ཚོས་ཐུབ་ཀྱི་ཡོད་ཅེས་པའི་སྤོབས་པ་དགོས་པ་རེད། སྤོབས་པའི་ནང་ང་རྒྱལ་འདྲེས་ན་ཡག་པོ་ཡོད་པ་མ་རེད། དེ་ནས་མིར་མཐོང་ཆུང་དང་ཧམ་བཤད། མགོ་སྐོར་བཏང་། སྐྱག་རྫུན་བཤད་ན་མ་རབས་རེད། སྤོབས་པ་བྱས་ནས་བདེན་པ་རྒྱུ་མཚན་ཡོད་བསྡད་པ་དེས་དཀའ་ངལ་ག་རེ་འཕྲད་ཀྱང་གདོང་ལེན་བྱེད་ཐུབ་ཀྱི་རེད་བསམ་པའི་སྤོབས་པ་དགོས་པ་རེད། བོད་པ་མི་སྤྱི་ཡོངས་ཀྱི་ཆ་ནས་དངོས་ནས་སྙིང་སྟོབས་ལྡན་པ་ཞིག་ཆགས་བསྡད་ཡོད་པ་རེད། ང་ཚོ་བཙན་བྱོལ་ནང་ཡོད་མཁན་ཚོས་ཀྱང་དེ་བཞིན་བྱས་ཏེ། ལྷག་པར་དུ་མི་རབས་གསར་བ་ཚོའི་སེམས་ནང་སོ་སོར་ཡིད་ཆེས་དང་སྤོབས་པ་ཡོད་རྒྱུ་གལ་ཆེན་པོ་རེད། ཅེས་གསུངས་སོང་།
ཡང་ཁོང་གིས་འདབ་གཤོག་གཉིས་ལྡན་གྱི་མི་ཞིག་འཁྱོང་དགོས་སྐོར་གསུངས་དོན། དེང་དུས་ཀྱི་ཤེས་ཡོན་མེད་ན་འཛམ་གླིང་གི་མི་གྲལ་དུ་ཚུད་ཀྱི་མ་རེད། དེང་དུས་ཀྱི་ཤེས་ཡོན་ཚད་མཐོ་བོ་ཡོད་ཀྱང་ བོད་རང་གི་སྐད་ཡིག་ནང་ཡོད་བསྡད་པའི་སེམས་ཀྱི་འགྲོ་སྟངས་ཤེས་ཀྱི་མེད་ན་བོད་པ་ཕྱེད་ཀ་རེད་ལ། གཉིས་ནས་སྒེར་ངོས་ནས་དཀའ་ངལ་འཕྲད་སྐབས་སྐད་ངན་ལུང་པ་གང་རྒྱག་དགོས་ཆགས་ཀྱི་རེད། སོ་སོ་སྒེར་གྱི་མི་ཚེ་སྐྱེལ་བའི་ཐད་ལའང་བཀའ་བསྟན་པོ་ཏི་སུམ་བརྒྱའི་ནང་ཡོད་པའི་བསམ་བློ་གཏོང་ཕྱོགས་དང་། བསམ་བློའི་འགྲོ་སྟངས་དེ་དག་ཤེས་ཚེ་ཕན་ཐོགས་ཆེན་པོ་ཡོད་པ་རེད། སྔ་མོ་ང་ཚོ་ཐོག་མར་འཛུཊ་སྐབས་ནས་འདབ་གཤོག་གཉིས་ལྡན་དགོས་ཀྱི་འདུག་ཅེས། དེང་དུས་ཀྱི་ཤེས་ཡོན་གཤོག་པ་གཅིག ང་རང་ཚོ་ལོ་སྟོང་ཕྲག་རིང་གི་བོད་ཀྱི་ཆོས་དང་རིག་གཞུང་སོ་སོའི་བོད་ཡིག་རང་དུ་ཡོད་པའི་ཆ་དེར་གཤོག་པ་ཡ་གཅིག་ཅེས་བཏོན་པ་རེད། ཡིན་ནའང་། བར་སྐབས་ང་ཚོས་ལག་ལེན་བསྟར་བ་ལྟར་ཇི་མ་ཇི་བཞིན་འཁེལ་མ་ཐུབ་པར་འཐུས་ཤོར་གང་འཚམ་ཕྱིན་ཡོད་པ་རེད། དེ་སྔ་ང་ཚོས་དམིགས་ཡུལ་གང་འདྲ་ཞིག་བཟུང་ཡོད་པ་དེ་ཕྲུ་གུ་ཚོ་རེད། ལྷག་པར་དུ་ཁྱེད་རང་ཚོ་དགེ་རྒན་ལས་བྱེད་ཚོས་ངེས་པར་དེ་སེམས་འཁུར་གནང་དགོས་པ་རེད། སློབ་གྲྭའི་སློབ་མ་ཚོར་ལྟ་རྟོག་བྱེད་རྒྱུ་དེ་སོ་སོའི་ལྟོ་ཕོགས་དོན་དུ་ཉི་མ་གང་འཁྱོལ་གྱི་སྲོལ་མིན་པར། ཕྱོགས་གཅིག་ནས་མི་གཅིག་ལ་རོགས་བྱེད་ཀྱི་ཡོད་པ་རེད། ཕྱོགས་གཞན་ཞིག་ནས་བོད་མི་རིགས་རིག་གཞུང་དང་བཅས་པ་ཆགས་འཇིག་ཀྱི་མཚམས་སུ་བསླེབ་བསྡད་སྐབས། གཞོན་སྐྱེས་ཚོ་མི་རབས་གསར་བའི་མཇུག་མཐུད་མཁན་ཡིན་སྟབས། དེ་དག་ང་ཚོའི་མ་འོངས་པའི་སོན་རྩ་ཡིན། མ་འོངས་པའི་ལས་ཀ་འཕྲོ་བསྐྱལ་མཁན་ཡིན་བསམ་ཏེ་དམིགས་བསལ་སེམས་འཁུར་བླངས་ཏེ་ལྟ་རྟོག་བྱེད་རྒྱུ་ཧ་ཅང་གལ་ཆེན་པོ་རེད། ཁྱེད་རང་ཚོ་དགེ་རྒན་ལས་བྱེད་ཚོ་ཧ་ཅང་གལ་ཆེན་པོ་རེད། ཅེས་གསུངས་སོང་།
མཇུག་ཏུ་༧གོང་ས་མཆོག་གིས་དགེ་འདུན་པ་ཚོར་དམིགས་ཏེ་གསུངས་དོན། སངས་རྒྱས་ཀྱི་བསྟན་པར་ལུང་དང་རྟོགས་པའི་བསྟན་པ་ཞེས་གཉིས་ཡོད་པ་ལྟར། ལུང་རྟོགས་ཀྱི་བསྟན་པ་དེ་མིའི་གཤིས་རྒྱུད་ནང་ཚང་དགོས་ཀྱི་ཡོད་པ་ལས་ཕྱིར་མངོན་བསྡད་པ་ཞིག་མིན་པ་དང་། དགེ་འདུན་པ་དང་བཙུན་མ་ཚོ་ལུས་ལ་གྲྭ་ཆས་གྱོན་པ་ཡིན་ན་སངས་རྒྱས་ཀྱི་བསྟན་པ་འཛིན་མཁན་ཆགས་ཡོད་ཀྱང་། སངས་རྒྱས་ཀྱི་བསྟན་པ་ཞེས་པ་དེ་ཕྱིར་མཛུབ་མོ་ཀེར་ས་མེད་པར། སོ་སོའི་གཤིས་རྒྱུད་ལ་མཛུབ་མོ་ཀེར་དགོས་པ་དང་། དེ་ཡང་བཤད་སྒྲུབ་གཉིས་ཀྱི་ཐོག་ནས་འཛིན་སྐྱོང་སྤེལ་གསུམ་བྱ་རྒྱུ་མཁྱེན་དགོས་སྟབས། ལ་དྭགས་དང་མོན། ཁུ་ནུ། དེ་བཞིན། བཙུན་མ་བཅས་ནས་གཞུང་ཆེན་ཁག་ལ་སློབ་གཉེར་བྱ་རྒྱུ་ཧ་ཅང་གལ་ཆེན་པོ་ཡིན་པ་དང་། མ་འོངས་པར་དགོན་པ་ཞེས་ལབ་དུས་མི་མང་གི་ངོས་ནས་སློབ་སྦྱོང་བྱེད་ས་ཞིག་དང་ཤེས་ཡོན་གྱི་བསྟི་གནས་ཤིག་ཡིན་བསམ་པའི་བློ་ཤར་ཐུབ་པ་ཞིག སངས་རྒྱས་ཀྱི་ཆོས་དེ་ཡང་ཕྱིའི་དངོས་པོའི་གནས་ཚུལ། ལམ་བགྲོད་པའི་རིམ་པ། འབྲས་བུ་མངོན་དུ་བྱེད་པ་བཅས་ཀྱི་སྒོ་ནས་འགྲོ་རྒྱུ་ཧ་ཅང་གལ་ཆེན་ཡིན། ཅེས་སོགས་གསུངས་སོང་།
སྲིད་སྐྱོང་བློ་བཟང་སེང་གེ་མཆོག་གིས། ཤར་སྦྲུལ་དམ་ཆོས་རིན་པོ་ཆེ་མཆོག་ནས་རྒྱ་གར་འཕགས་པའི་ཡུལ་དུ་རྙིང་མའི་ཆོས་རྒྱུད་རྫོགས་ཆེན་གྱི་དགོན་པ་ཞིག་བསྐྱར་གསོ་གནང་བར་བསྔགས་བརྗོད་དང་འབྲེལ། ལོ་རྒྱུས་ཐོག་བོད་ནང་སྐྱེས་ཆེན་དམ་པ་ཚོས་རྒྱ་གར་འཕགས་པའི་ཡུལ་ནས་སངས་རྒྱས་པའི་ཆོས་བོད་ཁ་བ་ཅན་ལ་གདན་འདྲེན་ཞུས་ཡོད་པ་དང་། བོད་མི་གཞི་རྩའི་ཆ་ནས་རང་དབང་མེད་ཀྱང་། འདས་པའི་ལོ་དེ་དག་གི་རིང་༧གོང་ས་མཆོག་གི་མཛད་འཕྲིན་དང་། བླ་ཆེན་རྣམ་པ་དང་དགེ་འདུན་པ་རྣམ་པ་གང་དུ་ཕེབས་པ་དེར་ནང་པ་སངས་རྒྱས་པའི་ཆོས་དང་རིག་གཞུང་མི་ཉམས་གོང་འཕེལ་ཕྱིན་པ་ལ་བརྟེན་ནས། ད་ཆར་འཛམ་གླིང་སྡིངས་ཆའི་ཐོག་བོད་པ་ཟེར་དུས་ནང་པ་དང་ནང་པ་སངས་རྒྱས་པའི་ཆོས་ཉམས་ལེན་བྱེད་མཁན་ཞིག་ལ་ངོས་འཛིན་ཞུ་བཞིན་ཡོད་པར་མ་ཟད། ད་ཆར་འཛམ་གླིང་ནང་བོད་པའི་ནང་པ་སངས་རྒྱས་པའི་ཆོས་དེ་ཆ་ཚང་བ་དང་ཡང་དག་ཤོས་སུ་ངོས་འཛིན་ཡོད་པ་ཞིག་ཆགས་ཡོང་གི་ཡོད། དེང་དུས་ཤེས་ཡོན་གྱི་ཐོག་ནས་ང་ཚོའི་སྤྱི་ཚོགས་ནང་ཡར་རྒྱས་འགྲོ་དགོས་པ་ཞིག་ཆགས་ཡོད། རྒྱ་ནག་ནང་མི་གྲངས་ཐེར་འབུམ་གཅིག་དང་ས་ཡ་ཉིས་བརྒྱ་ཆགས་ཏེ། མི་འབོར་གྱི་ཐོག་ནས་ཁྱད་པར་ཆེན་པོ་འགྲོ་བཞིན་ཡོད་སྟབས། ང་ཚོས་གྲོགས་པོ་བསྒྲིགས་ཏེ་འབད་པ་བྱེད་པར་ཤེས་ཡོན་ལས་ལྷག་མེད་སྟབས། མ་འོངས་པར་ཤེས་ཡོན་ཐོག་འབད་བརྩོན་བྱ་རྒྱུ་གལ་ཆེན་ཆགས་ཡོད། དེ་ནི་༧གོང་ས་མཆོག་གི་དགོངས་གཞི་དང་བོད་ནང་གི་བོད་མིའི་རེ་འདུན་འགྲུབ་པར་མེད་དུ་མི་རུང་བ་ཆགས་ཡོད་སྐོར་སོགས་གསུངས་སོང་།
སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། ཤར་སྦྲུལ་རིན་པོ་ཆེས་བོད་ནང་དཀའ་ངལ་ཆེན་པོ་ཡོད་པའི་གནས་སྟངས་འོག་དགོན་པ་དེ་འདྲ་ཞིག་བཞེངས་ཐུབ་པ་དང་། མ་འོངས་པར་དགོངས་གཞི་རླབས་ཆེན་ཡོད་པ་དེ་གཟི་བརྗིད་ཅིག་ལ་ངོས་འཛིན་ཞུ་བཞིན་ཡོད། དེང་སང་དགེ་འདུན་པ་ཞལ་གྲངས་ཉུང་དུ་འགྲོ་བཞིན་ཡོད་པ་དང་། བོད་ནང་ནས་ཕེབས་མཁན་ཡང་ཉུང་དུ་འགྲོ་བཞིན་པ་རེད། བཙན་བྱོལ་ནང་ཡོད་པའི་བོད་པའི་ཕྲུ་གུ་མང་ཆེ་བ་དགོན་སྡེ་ཁག་ལ་མཐུན་འགྱུར་གནང་གི་མེད་སྟབས། ཧི་མ་ལ་ཡའི་རི་རྒྱུད་ཀྱི་ཕྲུ་གུ་ཚོར་བརྟེན་དགོས་ཐུག་ཡོད་པ་རེད་ལ། མ་འོངས་པར་བོད་རྒྱུད་ནང་བསྟན་གྱི་འགན་འཁུར་མཁན་གཙོ་བོ་ཧི་མ་ལ་ཡའི་རི་རྒྱུད་ཆགས་ཡོད་པ་དེ་ང་ཚོའི་གནས་སྟངས་མང་པོ་ཞིག་ལ་བལྟས་ཡོང་ན་མངོན་གསལ་རེད། ༧གོང་ས་མཆོག་གིས་ཀྱང་དེ་སྔོན་བཀའ་སློབ་མང་པོ་ཞིག་གནང་ཡོད་པ་རེད། དེར་བརྟེན། མ་འོངས་པར་དགེ་འདུན་པའི་ཞལ་གྲངས་མང་ཉུང་ལ་མ་ལྟོས་པར། བསླབ་པ་སློབ་གཉེར་ཚད་དང་ལྡན་པ་ཡོང་དགོས་པ་གལ་ཆེན་པོ་རེད། དེང་སང་གྲྭ་བ་མང་པོ་བྱས་སློབ་གཉེར་ཚད་ལྡན་མ་བྱུང་བར་སངས་རྒྱས་བསྟན་པའི་ཞབས་འདེགས་ཀྱི་ཚབ་དུ་ཞབས་འདྲེན་ཞུ་བའི་གནས་བབ་དེ་འདྲ་ཡང་ཡོང་གི་འདུག མ་འོངས་པར་དེ་འདྲ་མི་ཡོང་བའི་རེ་བ་ཞུ་བཞིན་ཡོད། ཅེས་དང་། ད་ལྟའི་བར་བོད་གཞིས་བྱེས་གཉིས་ཀྱི་རེ་བ་གཏོད་ས་དང་། བོད་པའི་གནད་དོན་དང་བོད་པའི་བསྟན་པ་འཛམ་གླིང་ནང་ཁྱབ་ཐུབ་པར་བྱུང་བ་༧གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ཡོད་སྟབས། མ་འོངས་པར་དེ་དག་ཤེས་པར་བྱས་ཏེ་བླ་སློབ་བར་གྱི་འབྲེལ་བ་དམ་ཟབ་བྱས་ཏེ་ཉར་རྒྱུ་དང་ཁོང་གི་བཀའ་སློབ་ལྟར་བསྒྲུབ་རྒྱུ་གལ་ཆེན་པོ་རེད། ཅེས་སོགས་གསུངས་སོང་།
སང་ཉིན་ཕྱི་ཚེས་ ༢༩ ཉིན་༧གོང་ས་མཆོག་གྷོ་པ་པུར་བོད་ཁྱིམ་དུ་ཆིབས་བསྒྱུར་གྱིས་དགེ་སློབ་རྣམས་ལ་བཀའ་སློབ་གནང་རྒྱུ་ཡིན་འདུག
གསར་འགོད་པ། དོན་གོ
ད་ལྟ་མཐོང་བཞིན་པའི་རི་རྒྱུད་ནས་ཨུ་ཚུགས་ཀྱིས་བསྡུས་ཡོང་པའི་གྲྭ་པ་དེ་ཚོ་མཐོང་དུས་སེམས་པ་ངང་གིས་སྐྱོ་འོང་བ་ཞིག་རེད།