ཁ་སང་ཨ་རིའི་མཐུན་གྲོགས་རྒྱལ་ཁག་གིས་ཨི་རག་ནང་མཁའ་ཐོག་ནས་རྒོལ་འཛིང་བྱས་ཏེ་དྲག་སྤྱོད་ཤོག་ཁག་གི་རྫས་འགྱུར་མཚོན་ཆ་བཟོ་སྐྲུན་གཙོ་བོ་བསད་ཡོད་འདུག
ཁ་སང་བདུན་ཕྲག་སྔོན་མའི་གཟའ་སྤེན་པ་ནས་བཟུང་ཨ་རིའི་མཐུན་གྲོགས་རྒྱལ་ཁག་གིས་ཨི་རག་གི་མུ་སོལ་ (Mosul) གྲོང་ཁྱེར་ཉེ་འདབས་སུ། ཨི་རག་དང་སི་ར་ཡའི་མཉམ་འབྲེལ་དྲག་སྤྱོད་ཤོག་ཁག་ལ་མཁའ་ཐོག་ནས་ཕར་རྒོལ་བྱས་ཏེ། དྲག་སྤྱོད་ཤོག་ཁག་གི་རྫས་འགྱུར་མཚོན་ཆ་བཟོ་སྐྲུན་པ་ཨཱ་བྷུ་མཱ་ལེག་ (Abu Malik)ཚུད་པའི་དྲག་སྤྱོད་པ་མང་པོ་ཞིག་བསད་ཡོད་འདུག
ཨ་རིའི་དབུས་དམག་དོན་ལྷན་ཁང་གིས་རྒྱལ་སྤྱིའི་གསར་ལམ་ཐོག་བརྗོད་དོན། “ཁོ་ཤི་བ་དེས་དྲག་སྤྱོད་ཤོག་ཁག་གིས་རྫས་འགྱུར་མཚོན་ཆ་བེད་སྤྱོད་བཏང་སྟེ་ཉེས་མེད་མི་སེར་དམར་གསོད་གཏོང་རྒྱུའི་ནུས་པ་ཉམས་ཡོད་པ་མ་ཟད། ཁོ་ཚོའི་འབྲེལ་གཏུག་ས་ཚིགས་ཁག་ལའང་དོ་ཕོག་ཆེན་པོ་ཕྱིན་ཡོད། ཅེས་དང་། ཡང་ཁོ་ནི་རྫས་འགྱུར་མཚོན་ཆ་བཟོ་རྒྱུར་ཉམས་མྱོང་ཆེན་པོ་ཡོད་པར་བརྟེན། དེ་སྔོན་དྲག་སྤྱོད་པས་ཁོ་བེད་སྤྱོད་བཏང་སྟེ་རྫས་འགྱུར་མཚོན་ཆ་བཟོས་ཡོད་སྟབས། ད་ལྟ་ང་ཚོས་ཁོ་ཚོར་རྫས་འགྱུར་མཚོན་ཆ་ཅི་ཙམ་ཡོད་མེད་གསལ་བོ་ཞིག་བཤད་ཐུབ་ཀྱི་མི་འདུག”ཅེས་བརྗོད་འདུག
ཨཱ་བྷུ་མཱ་ལེག་ནི་དེ་སྔོན་སཱ་ཌམ་ཧུ་སན་ (Saddam Hussein) གྱིས་ཨི་རག་གི་དབང་ཆ་གཅིག་སྡུད་བྱེད་སྐབས་རྫས་འགྱུར་མཚོན་ཆ་བཟོ་སྐྲུན་ཁང་ཞིག་ཏུ་ལས་ཀ་བྱས་ཡོད་ཅིང་། ཨ་རིས་ཨི་རག་ལ་དམག་བརྒྱབ་ནས་སཱ་ཌམ་ཧུ་སན་བསད་རྗེས། ༢༠༠༥ ལོར་ཁོས་ཨི་རག་ནང་རྟེན་གཞི་བྱས་པའི་ཨལ་ཁཱལ་ཌ་འཇིགས་སྐུལ་ཤོག་ཁག་ནང་ཞུགས་ཏེ་མུ་མཐུད་རྫས་འགྱུར་མཚོན་ཆ་བཟོ་མཁན་གྱི་གཙོ་འགན་འཁུར་ཏེ། གནོད་ཚབས་ཆུང་བའི་རྫས་འགྱུར་མཚོན་ཆ་མང་པོ་བཟོས་ཡོད་པ་མ་ཟད། རྫས་འགྱུར་མཚོན་ཆ་གཅིག་ཨི་རག་གི་གྲོང་ཁྱེར་མུ་སོལ་ནང་འཕེན་རྒྱུའི་འཆར་གཞི་ལམ་ལྷོངས་བྱུང་མེད་སྟབས། ཁོས་ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་ (ISIS)ནང་འཛུལ་ཏེ། རྫས་འགྱུར་མཚོན་ཆ་བཟོ་སྐྲུན་བྱས་ཡོད་པ་མ་ཟད། དྲག་སྤྱོད་པ་མང་པོ་ཞིག་ལ་གཏོར་རྒོལ་དང་དམག་འཐབ་སྐོར་ལ་སློབ་སྦྱོང་སྤྲད་ཡོད་འདུག ཁོའི་མིང་གཞན་ལ་སཱ་ལེ་ཧ་ཇཱ་སེམ་ (Salih Jasim Mohammed Falah al-Sabawi) ཟེར་གྱི་ཡོད་འདུག
ཁ་སང་ཨ་རིའི་དབུས་དམག་དོན་ལྷན་ཁང་གི་ལས་བྱེད་ཞིག་གིས་དབྱིན་ཡུལ་གྱི་ཆ་འཕྲིན་ཐོག་བརྗོད་དོན། “ད་ལྟ་ང་ཚོར་དྲག་སྤྱོད་ཤོག་ཁག་ལ་རྫས་འགྱུར་མཚོན་ཆ་ཡོད་པའི་དཔང་རྟགས་གང་ཡང་རག་མེད་ཀྱང་། ཁོ་ཚོར་མི་གསོད་ཆེད་རླུང་ལམ་འགོག་བྱེད་ཀྱི་ཚྭ་བའི་དུག་རླངས་ (chlorine gas) ཡོད་པ་བདེན་པ་རེད”ཅེས་བརྗོད་འདུག
འདས་ལོའི་ཟླ་ ༨ ཚེས་ ༨ ཉིན་ནས་བཟུང་ཨ་རིའི་མཐུན་གྲོགས་རྒྱལ་ཁབ་ཀྱིས་ཨི་རག་དང་སི་རི་ཡའི་དྲག་སྤྱོད་ ཤོག་ཁག་ལ་མཁའ་ཐོག་ནས་ཕར་རྒོལ་བྱས་རྗེས། ད་བར་དྲག་སྤྱོད་ཤོག་ཁག་གི་གཡུལ་ས་དང་ས་ཚིགས་ཁག་ལ་གཏོར་རྒོལ་ཐེངས་ ༢༠༠༠ ཙམ་བཏང་སྟེ་དྲག་སྤྱོད་པ་ ༦༠༠༠ ལྷག་དང་། ཁོ་ཚོའི་མགོ་ཁྲིད་ཕྱེད་མན་ཙམ་བསད་ཡོད་པ་མ་ཟད། ཁ་ཉིན་སྔར་ཡང་ཨ་རིས་མཁའ་རྒོལ་བྱས་ནས་དྲག་སྤྱོད་པའི་མགོ་གཙོ་གསུམ་བསད་ཡོད་པ་ཨ་རིའི་དམག་སྤྱི་མཱར་ཌིན་ཌེམ་སེ་ཡིས་གསར་ལམ་ཐོག་འདུག
