ཨ་རིའི་ཕྱི་སྲིད་ལྷན་ཁང་དུ་བོད་ཀྱི་ལོ་གསར་སྲུང་གཙི།

ཁ་ཉིན་ཨ་རིའི་ཕྱི་སྲིད་ལྷན་ཁང་གིས་བོད་ཀྱི་ལོ་གསར་སྲུང་གཙི་དང་འབྲེལ་བོད་ཀྱི་ཐུན་མོང་མིན་པའི་ཆོས་རིག་ལ་ཆེ་བསྟོད་ཞུས་ཡོད་འདུག

ཟླ་འདིའི་ཚེས་ ༢༣ ཉིན་ཝ་ཤིན་ཌོན་དུ། ཨ་རིའི་ཕྱི་སྲིད་ལྷན་ཁང་གི་བོད་དོན་འབྲེལ་མཐུད་ཁང་གི་གོ་སྒྲིག་འོག བོད་པའི་ལོ་གསར་སྲུང་གཙི་ཞུས་ཡོད་ཅིང་། དེར་ཨ་རིའི་ཕྱི་སྲིད་ལྷན་ཁང་གི་བོད་དོན་འབྲེལ་མཐུད་པ་ལྕམ་སཱ་ར་སི་ཝལ་ (Sarah Sewall) མཆོག་དང་གཞུང་ཚབ་ཁག་གི་ལས་བྱེད་རྣམ་པ། ༧གོང་ས་མཆོག་གི་དམིགས་བསལ་སྐུ་ཚབ་ཟུར་བ་རྒྱ་རི་བློ་གྲོས་རྒྱལ་མཚན་དང་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ། གཞན། ས་གནས་བོད་རིགས་དང་བོད་རིགས་སྤྱི་མཐུན་ཚོགས་པའི་རྒྱུན་ལས་དང་བོད་དོན་རྒྱབ་སྐྱོར་བ་བཅས་ཁྱོན་མི་ ༡༠༠ ཡས་མས་ཤིག་མགྲོན་འབོད་གནང་ཡོད་པ་དང་། དེ་ནི་ཨ་རིའི་ཕྱི་སྲིད་ལྷན་ཁང་གིས་བོད་ཀྱི་ལོ་གསར་སྲུང་བརྩི་ཞུས་པ་ཐོག་མ་དེ་ཡང་ཆགས་ཡོད་འདུག

ཨ་རིའི་ཕྱི་སྲིད་ལྷན་ཁང་གི་བོད་དོན་འབྲེལ་མཐུད་པ་ལྕམ་སཱ་ར་སི་ཝལ་མཆོག་གིས་ངོ་སྤྲོད་གཏམ་བཤད་གནང་དོན། “ད་རེབ་ཐེངས་དང་པོར་ཨ་རིའི་ཕྱི་སྲིད་ལྷན་ཁང་ནང་བོད་པའི་ཆོས་རིག་གི་ངོ་བོ་མཚོན་མཁན་ཚོ་དང་ལྷན་དུ་བོད་ཀྱི་ལོ་གསར་སྲུང་གཙི་ཞུ་རྒྱུ་བྱུང་བར་དགའ་སྤོབས་ཆེན་པོ་བྱུང་། དུས་རྒྱུན་ང་ཚོ་མང་ཆེ་བའི་སྡོད་ཁྱིམ་གྱི་ཕྱི་ནང་དུ་རླུང་དར་འདོགས་སྲོལ་ཡོད་ཀྱང་། ད་ཐེངས་ཕྱི་སྲིད་ལྷན་ཁང་ནང་རྒྱལ་སྤྱིའི་ཐོག་བོད་ཀྱི་རིག་གཞུང་གི་ངོ་བོ་མཚོན་ཞིང་། མཛེས་སྡུག་རྣམ་པར་བཀྲ་བའི་རླུང་དར་འདོཊ་ཐུབ་པར་སྤྲོ་བ་ཆེན་པོ་སྐྱེས་བྱུང་བ་མ་ཟད། མ་འོངས་པར་མུ་མཐུད་ལོ་གསར་གྱི་དུས་སྟོན་འདི་གཉེར་ཐུབ་པའི་རེ་བ་ཡོད” ཅེས་དང་།

ཁོ་མོས་མུ་མཐུད་དུ། “ད་ལྟ་ཨ་རིའི་ནང་བོད་རིགས་ཁྲི་གཅིག་ཙམ་ལས་མེད་ཀྱང་། ཁྱེད་ཚོར་བླ་ན་མེད་པའི་དབུ་ཁྲིད་དང་རླུང་དར། ཟློས་གར་གཙོས་ཐུན་མོང་མིན་པའི་རིག་གཞུང་བརྒྱུད། རྒྱལ་སྤྱིའི་སྤྱི་ཚོགས་དང་མང་ཚོགས་ལ་བོད་ཀྱི་གནས་བབ་དང་རིག་གཞུང་དག་ཁྱབ་སྤེལ་གཏོང་ཐུབ་པ་བྱུང་སྟེ། ད་ལྟ་ཡུལ་གྲུ་མང་པོ་ཞིག་ནང་ལོ་གསར་སྲུང་གཙི་ཞུ་བཞིན་ཡོད་སྟབས། ཁྱེད་ཚོའི་ཤུགས་རྐྱེན་ནི་ཧ་ཅང་ཆེན་པོ་དང་འགུལ་ཤུགས་ལྡན་པ་ཞིག་ཆགས་ཡོད། ༡༩༤༢ ལོར་ཨ་རིའི་སྲིད་འཛིན་རའོ་སེ་ཝལ་ (Franklin D. Roosevelt) གྱིས་དགུང་གྲངས་བདུན་ལ་ཕེབས་པའི་ཏཱ་ལའི་བླ་མ་མཆོག་ལ་ཕྱག་བྲིས་ཤིག་སྤྲིངས་པའི་ནང་། ཁོང་གིས། དུས་ཡུན་རིང་པོ་ཞིག་ནས་བཟུང་ཨ་རིའི་ནང་ཕྲན་གྱི་གཙོས་མི་མང་པོ་ཞིག་གིས་ཁྱེད་ཀྱི་ཡུལ་དང་མི་མང་ལ་དགའ་མོས་བྱེད་ཀྱི་ཡོད་གསུངས་ཡོད་པ་དེ་ད་ལྟ་དོན་དངོས་ཤིག་ཆགས་ཏེ། ལག་ལེན་དངོས་ཐོག་སྐྱོད་བཞིན་ཡོད་པ་རེད། ན་ནིང་ཕྲན་བལ་ཡུལ་དང་རྒྱ་གར་ནང་བོད་མི་འདུས་སྡོད་བྱེད་ཡུལ་གྱི་གཞིས་ཆགས་ཁག་ཅིག་ནང་ལྟ་སྐོར་བྱེད་རྒྱུའི་གོ་སྐབས་ཐོབ་ཅིང་། དྷ་རམ་ས་ལར་བོད་ཀྱི་ཟློས་གར་བལྟས་པ་དང་བོད་མི་མང་པོ་ཞིག་དང་གླེང་མོལ་བྱས་སྐབས། ཁོ་ཚོ་མང་ཆེ་བས་སོ་སོའི་རིག་གཞུང་ལ་སྤོབས་སེམས་ཆེན་པོ་བྱེད་ཀྱི་འདུག་ལ། བྱམས་སྙིང་རྗེ་དང་ཡ་རབས་སྤྱོད་ཚུལ་ལྡན་ཞིང་ཀུན་གྱིས་དགའ་འོས་པ་ཞིག་འདུག དེ་རིང་ཕྱི་སྲིད་ལྷན་ཁང་དང་འདིར་མཉམ་འཛོམས་བྱུང་བའི་མང་ཚོགས་ཚོས་བོད་པའི་རིག་གཞུང་བཟང་པོ་དེར་ཆེ་བསྟོད་ཞུ་རྒྱུའི་གོ་སྐབས་བྱུང་བ་ནི་གཟི་བརྗིད་རེད”ཅེས་སོགས་བརྗོད་འདུག

རྒྱ་རི་བློ་གྲོས་རྒྱལ་མཚན་ལགས་ཀྱིས་ཨ་རིའི་གཞུང་གིས་ད་ཐེངས་བོད་ཀྱི་ལོ་གསར་སྲུང་གཙི་ཞུས་པ་དེས་གང་མཚོན་གྱི་ཡོད་མེད་ཐད། ད་རེབ་ཨ་རིའི་གཞུང་དང་ལྷག་པར་དུ་ཕྱི་སྲིད་ལྷན་ཁང་ངོས་ནས་བོད་ཀྱི་ལོ་གསར་སྲུང་གཙི་ཞུས་པ་དེ་ནི། ཨ་རིས་བོད་ཀྱི་ཐུན་མོང་མིན་པའི་ངོ་བོ་སྟེ་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་གནང་རྒྱུའི་སྲིད་ཇུས་གཏན་ལ་ཕབ་ཡོད་པ་དེ་རྒྱུན་འཛིན་བྱས་ཏེ། དེར་མུ་མཐུད་རྐྱབ་སྐྱོར་བྱེད་ཀྱི་ཡོད་པ་གསལ་སྟོན་བྱས་པ་ཞིག་ཆགས་ཡོད་ཅེས་སོགས་བརྗོད་འདུག

རྒྱལ་སྤྱིའི་བོད་དོན་ལས་འགུལ་ཁང་འགན་འཛིན་གཞོན་པ་བུ་ཆུང་ཚེ་རིང་ལགས་ཀྱིས། ཨ་རིའི་ཕྱི་སྲིད་ལྷན་ཁང་གིས་དུས་སྟོན་འདི་འདྲ་ཞིག་གོ་སྒྲིག་གནང་བ་དེ་ནི། བོད་རིགས་ཨ་རི་བ་ཚོའི་རིག་གཞུང་དང་དེས་ཨ་རིའི་སྤྱི་ཚོགས་ལ་ལེགས་སྐྱེས་འབུལ་གྱི་ཡོད་པར་ངོས་འཛིན་གནང་བ་ཞིག་ཆགས་ཡོད་སྟབས། ཨ་རིའི་གཞུང་གིས་ལས་འཆར་འདི་འདྲ་ཞིག་མགོ་འཛུགས་གནང་བར་ང་ཚོར་དགའ་སྤྲོ་ཆེན་པོ་བྱུང་ཞེས་དང་། ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་རིག་ལྡན་སྒྲོལ་མ་ལགས་ཀྱིས། ཉེ་ལམ་༧གོང་ས་མཆོག་ཨ་རིའི་རྒྱལ་ཡོངས་སྔ་དྲོའི་སྨོན་ལམ་གསོལ་སྟོན་སྟེང་ཕེབས་པར་དགའ་སྤོབས་ཆེན་པོ་བྱུང་ཡོད་པའི་སྐབས་འདིར། ཨ་རིའི་ཕྱི་སྲིད་ལྷན་ཁང་གིས་བོད་ཀྱི་ལོ་གསར་དགའ་སྟོན་སྲུང་གཙི་ཞུས་པ་ནི་དེ་ལས་དགའ་སྤྲོ་འཕེལ་བ་ཞིག་ཡིན་སྐོར་བརྗོད་འདུག

ལོ་གསར་དུས་སྟོན་སྐབས་ས་གནས་བོད་རིགས་ཚོས་སྐུ་མགྲོན་ཚོར་བོད་ཀྱི་གཞས་སྣ་འཁྲབ་སྟོན་དང་། སྲོལ་རྒྱུན་གྱི་བཞེས་སྤྲོ་དང་འབྲས་ཆང་སོགས་འདེགས་འབུལ་ཞུས་ཡོད་འདུག

གསར་འགོད་པ། དོན་གྲུབ།