རྒྱ་རིགས་བོད་དོན་ཆེད་མཁས་པ་ཧུ་ཧྲེ་ཧྲིན་གྱིས་༧གོང་ས་མཆོག་འདི་ལོར་རྒྱ་ནག་རི་བོ་རྩེ་ལྔར་གནས་སྐོར་ལ་ཕེབས་ཐུབ་རྒྱུ་ཁག་པོ་ཆགས་ཡོད་སྐོར་བརྗོད་འདུག
ཟླ་འདིའི་ཚེས་ ༢༤ ཉིན་ངའི་མི་སེར་རྒྱལ་ཁབ་ (My Republica) ཅེས་པའི་བལ་ཡུལ་གྱི་གསར་ལམ་ཐོག་གནས་ཚུལ་སྤེལ་བ་ལྟར་ན། རྒྱ་ནག་ཕྱི་སྲིད་ལྷན་ཁང་གི་དེང་རབས་རྒྱལ་སྤྱིའི་འབྲེལ་ལམ་ཞིབ་འཇུག་ཁང་གི་ འགན་འཛིན་དང་བོད་དོན་ཆེད་མཁས་པ་ཧུ་ཧྲེ་ཧྲིན་ (Hu Shisheng) གྱིས། ཉེ་ལམ་ཏཱ་ལའི་བླ་མ་མཆོག་གིས་རྒྱ་ནག་རི་བོ་རྩེ་ལྔར་གནས་སྐོར་ལ་ཕེབས་འདོད་ཡོད་སྐོར་གསུངས་ཡོད་སྟབས། པེ་ཅིན་གྱི་སྐུ་ཚབ་དང་ཏཱ་ལའི་བླ་མ་མཆོག་བར་ནང་མོལ་བྱེད་ཀྱིན་ཡོད་ཀྱང་། ད་ལྟ་ཕྱོགས་གཉིས་བར་གནད་དོན་ཁག་ཅིག་ཐོག་གྲོས་མཐུན་ཡོང་གི་མེད་སྟབས་གནས་སྐོར་ལ་ཕེབས་ཐུབ་རྒྱུ་ཁག་པོ་ཆགས་ཡོད་སྐོར་བརྗོད་འདུག
འདིའི་ཐད་ཧུ་ཧྲེ་ཧྲིན་གྱིས། “ཏཱ་ལའི་བླ་མ་མཆོག་རི་བོ་རྩེ་ལྔར་གནས་སྐོར་ལ་ཕེབས་ཐུབ་ཚེ། དེ་ནི་ལོ་རྒྱུས་ཐོག་གི་དུས་འགྱུར་གལ་ཆེན་ཞིག་ཆགས་རྒྱུ་ཡིན་ཡང་། ད་ལྟ་རྒྱ་ནག་གཞུང་དང་ཏཱ་ལའི་བླ་མའི་བར་པཎ་ཆེན་རིན་པོ་ཆེ་གཙོས་བོད་ཆེན་པོ་དང་བོད་རང་བཙན། བོད་ཀྱི་ལོ་རྒྱུས་སོགས་གནད་དོན་ཁག་ཅིག་ལ་ཕན་ཚུན་ལྟ་ཕྱོགས་མི་མཐུན་པ་ཡོང་གི་ཡོད་པ་མ་ཟད། འདི་ལོ་བོད་རང་སྐྱོང་ལྗོངས་མགོ་འཛུགས་ཏེ་ལོ་ ༥༠ འཁོར་བའི་དུས་སྟོན་སྲུང་གཙི་ཞུ་བཞིན་ཡོད་སྟབས། ཕན་ཚུན་བསམ་ཤེས་བྱས་ནས་དཀའ་རྙོག་དེ་སེལ་ཐབས་མ་བྱས་ཚེ། ཁོང་འདི་ལོ་ཙམ་མ་ཟད་མ་འོངས་པར་ཡང་གནས་སྐོར་ལ་ཕེབས་ཐུབ་རྒྱུ་ཁག་པོ་ཆགས་ཡོད”ཅེས་བརྗོད་འདུག
འདས་ལོའི་ཕྱི་ཟླ་ ༥ ཚེས་ ༡༢ ཉིན་༧གོང་ས་མཆོག་ཧོ་ལན་ཌིའི་རོ་ཊར་ཌམ་ (Rotterdam) གྲོང་ཁྱེར་དུ་ཆིབས་བསྒྱུར་གནང་སྐབས། རྒྱ་རིགས་ཤིག་གིས་སྲིད་འཛིན་ཞི་ཅིན་ཕིན་དང་མཇལ་མོལ་ཞུ་འདོད་ཡོད་མེད་བཀའ་འདྲི་ཞུས་པར། ༧གོང་ས་མཆོག་གིས། “༡༩༥༤ ལོ་ནས་བཟུང་ངོས་རྒྱ་ནག་ལ་ཆོས་ཕྱོགས་ཁོ་ནའི་ཐོག་ནས་རི་བོ་རྩེ་ལྔར་གནས་སྐོར་འགྲོ་རྒྱུའི་འདོད་པ་ཡོད་ཀྱང་། ཏཱ་ལའི་བླ་མ་ལ་ཆབ་སྲིད་ཀྱི་གནས་ཚུལ་ཡོད་པར་བརྟེན་འགྲིག་གི་མ་རེད་ཟེར་བྱུང་། ༢༠༠༡ ནས་ངོས་རང་ཕྱེད་རྒན་ཡོལ་དུ་བསྡད་པ་མ་ཟད། ༢༠༡༡ ལོ་ནས་རྒས་ཡོལ་ཆ་ཚང་ཞུས་ཏེ་ཆབ་སྲིད་ཀྱི་འགན་མེད་སྟབས། ངོས་ཀྱིས་རི་བོ་རྩེ་ལྔར་འགྲོ་རྒྱུའི་འདོད་པ་སྔར་ལས་ཤུགས་ཆེ་བྱས་པར་བརྟེན། ཐའེ་ཝན་གྱི་དགེ་སློང་ཏ་ཝེས་ངེད་གཉིས་ཉིན་གཅིག་རི་བོ་རྩེ་ལྔར་གནས་སྐོར་དུ་འགྲོ་ཐུབ་ངེས་ཡིན་པ་མ་ཟད། སྐབས་དེར་ཁོང་གིས་རྩ་བ་ཤེས་རབ་རྒྱ་ཡིག་ཐོག་འདོན་རྒྱུ་དང་ངོས་ཀྱིས་བོད་ཡིག་ཐོག་འདོན་རྒྱུ་བྱས། སྐབས་དེར་རྒྱ་གར་མཁས་པ་ཞིག་ཀྱང་ཏན་ཏན་ཡོང་གི་རེད། ཁོང་གིས་ལེགས་སྦྱར་གྱི་ཐོག་ནས་འདོན་རྒྱུའི་སྐད་ཆ་བྱུང་། ད་ཆ་ཁོང་འདས་ཟིན་ཡོད་ཀྱང་དེང་སང་རྒྱ་ནག་ཏུ་ནང་པ་མང་པོ་ཡོད་སྟབས། ངོས་ཀྱིས་ནང་པ་ཚོར་ཕྲན་བུ་ཞབས་འདེགས་བསྒྲུབ་ཐུབ་ཀྱི་རེད། ང་ཚོ་བོད་པ་ཚོས་ཞི་ཅིན་ཕིན་དང་ཐུག་རྒྱུའི་རེ་འདུན་དེ་བསྒྲུབ་ཐུབ་ན་ཧ་ཅང་དགའ་པོ་ཡོང་ས་རེད་ལ། རེ་འདུན་དེ་བསྒྲུབ་ཐུབ་པའི་རེ་བ་ཡང་ཡོད།” ཅེས་གསུངས་འདུག
༢༠༡༤ ལོའི་ཟླ་ ༨ ཚེས་ ༢༧ ཉིན་༧གོང་ས་མཆོག་གིས་འཇར་མན་གྱི་ཚོགས་འདུ་ཞིག་ཐོག་ཉིད་ཀྱིས་དེ་སྔོན་ཞི་ཅིན་ཕིན་གྱིས་བརྗོད་པའི་ཚིག་དུམ་ ༼ནང་བསྟན་གྱིས་རྒྱ་ནག་གི་རིག་གནས་དར་སྤེལ་ལ་ནུས་པ་གཙོ་བོ་འདོན་ཐུབ་པ་བྱེད་དགོས༽ཞེས་པའི་སྐད་ཆ་ལུང་འདྲེན་གནང་སྟེ། ཁོང་ཉིད་རྒྱ་ནག་རི་བོ་རྩེ་ལྔར་གནས་སྐོར་ལ་ཕེབས་འདོད་ཡོད་སྐོར་གསུངས་ཡོད་པ་མ་ཟད། ཟླ་ ༩ ནང་༧གོང་ས་མཆོག་མོམ་བྷེ་ལ་ཕེབས་སྐབས་ཀྱང་ཞི་ཅིན་ཕིན་ནི་གུ་ཡངས་ཅན་དང་དོན་དངོས་ལ་བསྟུན་ཤེས་མཁན་ཞིག་ཡིན་པའི་བསྔགས་བརྗོད་མཛད་ཡོད། ཟླ་ ༩ ཚེས་ ༢༩ ཉིན་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་གཞོན་པ་ཝུ་དབྱི་ཅེ་ཡིས། “རྒྱ་ནག་དབུས་གཞུང་དང་ཏཱ་ལའི་བླ་མའི་སྐུ་ཚབ་བར་འགོག་རྐྱེན་གང་ཡང་མེད་པར་གྲོས་མོལ་བྱ་རྒྱུར་ཤར་སྐྱོད་བྱེད་བཞིན་ཡོད་སྟབས། གཅིག་བྱས་ན་ཏཱ་ལའི་བླ་མ་རྒྱ་ནག་རི་བོ་རྩེ་ལྔར་གནས་སྐོར་དུ་ཕེབས་རྒྱུའི་ཆོག་མཆན་ཐོབ་སྟེ། རྒྱ་ནག་གི་མགོ་ཁྲིད་དང་མཇལ་འཕྲད་ཐུབ་རྒྱུ་མ་ཟད། དུས་རབས་ཕྱེད་ལྷག་རིང་ཡུལ་གྱར་གྱི་འཚོ་བ་མཇུག་བསྒྲིལ་ཏེ་རང་ཡུལ་དུ་ཕྱིར་ལོག་ཐུབ་སྲིད་པ་ཞིག་ཡིན” ཞེས་སོགས་བསྒྲགས་གཏམ་སྤེལ་ཡོད།
རྒྱ་ནག་རི་བོ་རྩེ་ལྔ་ཕེབས་དགོས་དོན་ཅི་ཞིག་ཡིན་ནམ། ལྷ་ས་ནས་བདུན་ཕྲག་ཁ་ཤས་ལ་ཞུགས་ནས་ཇོ་བོ་ཡིད་བཞིན་ནོར་བུ་གནས་མཇལ་འཐུབ་ན་ཡག་པོ་གདའ།
གསར་འགྱུར་ཡག་པོ་འདུག
༧གོང་ས་༧སྐྱབས་མགོན་ཆེན་པོ་མཆོག་རྒྱ་ནག་རི་བོ་རྩེ་ལྔར་ཕེབས་ཐུབ་པ་བྱུང་ན་བོད་གཞིས་བྱེས་གཉིས་དང་རྒྱ་ནག་མི་མང་དུང་ཕྱུར་བཅུ་གསུམ་གྱི་རེ་འདོད་འགྲུབ་པའི་ཉི་མ་འཆར་རྒྱུར་བར་ཐག་རིང་པོ་མེད་པའི་རྟགས་མཚན་ཤར་བ་རེད།