འཛམ་ཐང་བསམ་གྲུབ་ནོར་ནུའི་གླིང་དུ་ཞི་བདེའི་ལྷན་ཚོགས་ཐེངས་གཉིས་པ་བསྐོངས་པའི་ཐོག བོད་མི་ནང་ཁུལ་དུ་འཁྲུག་འཛིང་རྐུ་འཕྲོག་བཅོམ་གསུམ་སོགས་མི་བྱེད་པའི་གྲོས་ཆོད་དོན་ཚན་བཞི་བཞག་ཡོད་འདུག
ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ཟླ་ ༢ ཚེས་ ༢༥ ཉིན་ནས་བཟུང་ཉིན་གསུམ་རིང་ཇོ་ནང་པའི་གདན་ས་ཆེན་མོ་ཤར་འཛམ་ཐང་བསམ་གྲུབ་ནོར་བུའི་གླིང་དུ། ཕྱི་ལོ་ ༢༠༡༢ ལོར་དྲག་པོའི་མཚོན་ཆའི་རིགས་རྩ་རྫོགས་བྱས་ཤིང་རང་རིགས་ཕུ་ནུ་ཡོངས་ལ་ནང་དམེ་དང་། ནང་རྐུན་མི་བྱེད་པའི་དམ་བཅའ་བཞག་ནས་ལོ་འཁོར་གསུམ་འཁོར་བའི་རྗེས་དྲན་དང་འབྲེལ་བའི་ཞི་བདེའི་ལྷན་ཚོགས་ཐེངས་གཉིས་པ་ཞེས་པ་ཞིག་སྐོང་ཚོགས་གནང་ཡོད་པ་དང་། ཚོགས་ཐོག་ཏུ་ཇོ་ནང་ཆོས་བརྒྱུད་ཀྱི་དབུ་འཛིན་མཆོག་སྤྲུལ་འཇིགས་མེད་རྡོ་རྗེ་མཆོག་གིས་དབུས་གཙང་བ་དགོན་པ་དང་། ཆོས་རྗེ་དགོན། ཚེ་བཅུ་དགོན། གསང་ལུང་དགོན། ཨ་སིག་དགོན་སོགས་འཛི་གཞུང་གི་ཇོ་ནང་དང་། རྙིང་མའི་དགོན་སྡེ་བཅུ་ ༣༠ ལྷག་གི་བླ་སྤྲུལ་མཁན་གསུམ་དབུ་བཞུགས་ཐོག་ཚོགས་འདུ་དབུ་འཛུགས་གནང་ཡོད་པ་དང་། ཚོགས་འདུའི་ཉིན་དང་པོར་སྟོད་མ་ཡུལ་ཚོ་སྟེ་ཚྭ་ཁ་དང་། གོང་རྒྱ། རི་འཕོང་། ཤོས་མདའ་སོགས་དང་། ཉིན་གཉིས་པར་བར་མ་ཡུལ་ཚོ་སྟེ་ཆོས་རྗེ། གཙང་བ། ཡུལ་བ། ཡག་མདོ། ཀ་ཐོག་ཡུལ་ཚོ། ཉིན་གསུམ་པར་ན་མདའ་ཡུལ་ཚོ་དང་། རྫོང་མདའ་ཡུལ་ཚོ་གཉིས་བཅས་ཆ་བགོས་ཀྱིས་འཛོམས་ཡོད་ཅིང་། ཉིན་རེར་ཁྱོན་མི་གྲངས་ཆིག་སྟོང་ནས་ཉིས་སྟོང་ལྷག་འདུ་འཛོམས་བྱུང་ཡོད་འདུག
ཡང་གནས་ཚུལ་མཁོ་སྤྲོད་པས་ལྷན་ཚོགས་ཀྱི་དགོས་དམིགས་དང་བརྗོད་དོན་སྐོར་ངོ་སྤྲོད་གནང་བ་ལྟར་ན། ཕྱི་ལོ་ ༢༠༡༢ ཟླ་ ༢ པ་ནས་བཟུང་ཇོ་ནང་འཛམ་ཐང་དགོན་ཆེན་དུ་འཛམ་ཐང་གཙང་སྡེ་ཚོ་བ་དང་། ཆོས་རྗེ་ཚོ་བ་གཉིས་ཀྱིས་གཙོས་འཛི་གཞུང་གི་ཚོ་བ་ཡོངས་ཀྱི་མི་སྐྱ་ཕོ་མོ་ཡོངས་ཀྱིས། བོད་མིའི་ནང་ཕན་ཚུན་ལ་ནང་དམེ་དང་། ནང་རྐུ་སོགས་མི་བྱེད་པའི་དམ་བཅའ་བརྟན་པོར་བཞག་ནས་ལོ་འཁོར་གསུམ་འཁོར་བའི་རྗེས་དྲན་འཚོགས་འདུ་ཡིན་པ་དང་། ཐེངས་འདིའི་ཚོགས་འདུ་དང་འབྲེལ་ནས་འཛི་ཡུལ་སྟོད་སྨད་བར་གསུམ་གྱི་རྒན་དར་གཞོན་གསུམ་གྱིས་མཐུན་པའི་ལག་ཟུང་དམ་དུ་སྦྲེལ་ཏེ། འཚེ་མེད་ཞི་བདེའི་ལམ་བཟང་བརྟན་འཇགས་ཡོང་ཆེད། མ་བསྐུལ་དང་བླངས་པ་ཆིག་ཁྲི་ལྷག་གིས་ཤོ་མི་རྒྱག་པ་དང་། མི་རིགས་གང་ཡིན་ཡང་འཁོན་འཛིང་མི་བྱེད་པ། རྐུ་འཕྲོག་བཅོམ་གསུམ་སོགས་མི་བྱེད་པ་དང་། ཡང་ན་མང་ཚོགས་ཁྲོད་དོན་རྐྱེན་གང་བྱུང་འདུམ་འགྲིག་ཚོགས་པའམ་ཞི་བདེ་ཚོགས་པས་ཐག་གཅོད་ལ་གུས་བཀུར་ཞུ་རྒྱུ་བཅས་ཀྱི་གྲོས་ཆོད་དོན་ཚན་བཞི་གཏན་འབེབས་གནང་ཡོད་འདུག
གསར་འགོད་པ། པདྨ་མཚོ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
་་་་་་་་་་ འཚེ་མེད་ཞི་བདེའི་ལམ་བཟང་བརྟན་འཇགས་ཡོང་ཆེད། མ་བསྐུལ་དང་བླངས་པ་ཆིག་ཁྲི་ལྷག་གིས་ཤོ་མི་རྒྱག་པ་དང་། མི་རིགས་གང་ཡིན་ཡང་འཁོན་འཛིང་མི་བྱེད་པ། རྐུ་འཕྲོག་བཅོམ་གསུམ་སོགས་མི་བྱེད་པ་དང་།
ཡང་ན་མང་ཚོགས་ཁྲོད་དོན་རྐྱེན་གང་བྱུང་འདུམ་འགྲིག་ཚོགས་པའམ་ཞི་བདེ་ཚོགས་པས་ཐག་གཅོད་ལ་གུས་བཀུར་ཞུ་རྒྱུ་བཅས་ཀྱི་གྲོས་ཆོད་དོན་ཚན་བཞི་གཏན་འབེབས་གནང་ཡོད་འདུག ་་་་་་་་་་་་་་་་