ས་ཡོམ་དྲ་བརྙན་ཆེད་སྒྲིག་གི་འགྲེལ་བཤད།

༡༽ ཕྱི་ལོ་ ༢༠༡༥ ཟླ་ ༤ པའི་ཚེས་ ༢༥ ཉིན་གྱི་སྔ་དྲོའི་ཆུ་ཚོད་ ༡༡།༣༠ སྟེང་། བལ་ཡུལ་ནང་ཚད་རིམ་ ༧ དང་གྲངས་ཆུང་ ༩ ཅན་གྱི་ས་ཡོམ་ཞིག་བརྒྱབ་སྟེ། མི་རྒྱུ་གཉིས་ལ་བསམ་ཡུལ་ལས་འདས་པའི་གོད་ཆག་ཆེན་པོ་བྱུང་ཡོད་པ་རེད། ཕྱི་ཟླ་ ༥ ཚེས་ ༡༠ ཉིན་བར་ས་ཡོམ་ཁྲོད་ཉུང་མཐར་མི་ ༨༡༧༠ ལྷག་རྐྱེན་འདས་སུ་ཕྱིན་ཡོད་པ་དང་། མི་མང་པོ་ཞིག་གར་སོང་ཆ་མེད། མི་ ༡༦༥༠༠ ཙམ་ལ་རྨས་སྐྱོན་ཕོག་ཡོད་པའི་གནས་ཚུལ་ཐོན་འདུག ཐེངས་འདིའི་བལ་ཡུལ་ས་ཡོམ་ཁྲོད་བོད་མིའང་མང་པོ་ཞིག་ལ་གནོད་འཚེ་ཐེབས་ཡོད་པ་དང་། ད་སྔ་ཤེས་རྟོགས་བྱུང་བར་བལ་ཡུལ་ནང་གི་བོད་མི་ ༡༣ ཙམ་འདས་གྲོངས་སུ་སོང་ཡོད་འདུག

༢༽ ཐེངས་འདིའི་ས་ཡོམ་ཁྲོད་འཛམ་གླིང་གི་རི་བོ་མཐོ་ཤོས་ཇོ་མོ་གླིང་མའི་རི་རྒྱུད་ཁུལ་དང་། བོད་ཀྱི་རྒྱལ་ས་ལྷ་ས་དང་གཞིས་ཀ་རྩེ། གཉའ་ལམ། སྐྱིད་གྲོང་། འགྲམ་སོགས་སུའང་ས་ཡོམ་གྱི་ཤུགས་རྐྱེན་ཆེན་པོ་ཐེབས་ཏེ། རྒྱ་ནག་གཞུང་ཕྱོགས་ནས་གསལ་བསྒྲགས་བྱས་པར་ཕྱི་ཟླ་ ༥ ཚེས་ ༡༠ བར་མི་ ༢༨ ཙམ་འདས་གྲོངས་སུ་ཕྱིན་ཡོད་པ་དང་། སྡོད་ཁང་ ༦༣༢༠ དང་། དགོན་པ་ ༣༠ ལྷག་ལ་གཏོར་སྐྱོན་ཐེབས་ཡོད་པ་དང་། མང་ཚོགས་ཀྱི་སྡོད་ཁང་སྤྱི་ཡོངས་ཀྱི་བརྒྱ་ཆ་ ༩༠ ཙམ་ལ་ཚད་མི་འདྲ་བའི་གནོད་སྐྱོན་ཐེབས་ཡོད་འདུག

༣༽བོད་བཙན་པོའི་དུས་ནས་ཁྱིམ་མཚེས་སུ་གནས་ཤིང་། ཆོས་དང་རིག་གཞུང་གི་འབྲེལ་བ་ཟབ་མོ་ཡོད་པའི་བལ་ཡུལ་ནང་། ཐེངས་འདིར་རང་བྱུང་གི་གནོད་པ་ཚབས་ཆེན་ཕོག་པའི་དུས་སྐབས་འདིར། རྒྱ་གར་དྷ་རམ་ས་ལར་རྟེན་གཞི་བྱས་པའི་བྱོལ་བོད་མིའི་སྒྲིག་འཛུགས་བཀའ་ཤག་གིས་བལ་སྒོར་འབུམ་ ༦༠ ཞལ་འདེབས་སུ་ཕུལ་ཡོད་པ་མ་ཟད། ༸གོང་ས་སྐྱབས་མགོན་ཆེན་པོ་མཆོག་གི་ཐེབས་རྩ་ནས་བལ་སྒོར་་་་་་་་དང་། དཔལ་རྒྱལ་བ་ཀརྨ་པ་མཆོག་གིས་ཨ་སྒོར་འབུམ་ ༢ བཅས་ཀྱི་ཞལ་འདེབས་ཕུལ་འདུག
༤༽ བལ་ཡུལ་ནང་ས་ཡོམ་གྱི་གོད་ཆག་ཆེན་པོ་བྱུང་མ་ཐག བོད་མིའི་སྒྲིག་འཛུགས་བཀའ་ཤག་གིས་ཛ་དྲག་གི་ཚོགས་འདུ་བསྐོངས་ཏེ། ཕྱི་རྒྱལ་དོན་གཅོད་ཁག་དང་། ས་གནས་གཞིས་མགོ་ཁག་གིས་སྣེ་འཁྲིད་དེ་བལ་ཡུལ་མང་ཚོགས་ལ་ངལ་སེལ་ཞལ་འདེབས་བསྡུ་དགོས་པའི་འབོད་སྐུལ་ཞུས་ཡོད་པ་དང་། བོད་པའི་དགོན་སྡེ་ཁག་གི་གྲྭ་བཙུན་དང་། གཞུང་འབྲེལ་མ་ཡིན་པའི་ཚོགས་པ་སོགས་ཆེད་དུ་བལ་ཡུལ་ནང་བསྐྱོད་དེ། དཀའ་སྡུག་འོག་ཡོད་པའི་མང་ཚོགས་ལ་ཟས་གོས་དང་སྨན་བཅོས་སོགས་ཀྱི་རོགས་རམ་གནང་ཡོད་ལ། དེ་མིན་བོད་པའི་དགོན་སྡེ་ཁག་གིས་མཆོད་འབུལ་སྨོན་ལམ་དང་ཐུགས་གསོའི་འཚམས་འདྲི་སོགས་གནང་བཞིན་ཡོད་པ་རེད།