རོ་སེ་ཐང་གིས་ཞི་ཅིན་ཕིན་རྒྱ་གར་ལ་སྐོར་སྐྱོད་སྐབས་བོད་མི་ངོ་རྒོལ་བར་གནང་བའི་གཏམ་བཤད།

རྩོམ་པ་པོ། རོ་སེ་ཐང་། རིགས་སློབ། མཚོ་སྒོ་འཇམ་དབྱངས་ཀྱིས་སྒྱུར།

འདས་པའི་མི་ལོ་ལྔ་བཅུ་ང་ལྔའི་རིང་རྒྱ་ནག་དམར་པོའི་སྲིད་གཞུང་གིས་བོད་ནང་བཙན་གནོན་བྱས་ཏེ་མི་རིགས་རྩ་མེད་བཟོས་པར། ངས་ཐོག་མར་བོད་རིགས་སྤུན་ཟླ་ཡོངས་ལ་སྙིང་ཁོངས་རུས་པའི་གཏིང་ནས་དགོང་སེལ་ཞུ་བ་དང་ཆབས་ཅིག ང་དེ་རིང་འདིར་ཡོང་བ་འདི་ཚོགས་པའམ་ཡང་ན་མི་སྒེར་སུ་ཞིག་གི་ངོ་ཚབ་མིན་པར་སོ་སོ་རང་ངོས་ནས་བཅར་བ་ཞིག་ཡིན། ལྡི་ལིར་རྔམ་སྟོན་ཁྲོམ་སྐོར་ཡོང་བའི་ལམ་བར་དུ་མི་ཚོགས་བརྒྱུད་ནས་འཇམ་དཔལ་ཡེ་ཤེས་ལགས་ཀྱི་ཕུང་པོའི་སྐུ་པར་དེ་དག་འགྲོ་བ་མིའི་དཔལ་འབར་གྱི་དཔའ་ངར་ཡིན་པ་ཤེས་པ་དང་ང་ཧ་ཅང་གིས་སེམས་སྐྱོ་བོ་བྱུང་། ཁོང་དང་རང་ལུས་མེར་བསྲེགས་གནང་མཁན་གཞན་ཚང་མའི་ཚེ་སྲོག་གིས་སྐྲུན་པའི་མེ་ལྕེ་རེ་རེས་བོད་ནང་དང། རྒྱ་ནག ཤར་ཏུར་ཀི་སི་ཐན། ལྷོ་སོག་པོ། ང་ཚུད་པའི་མི་མང་པོ་ཞིག་གི་མུན་པ་སེལ་ཡོད།

བོད་མི་རྣམས་ཀྱིས་མི་ལོ་ ༥༥ རིང་རེ་སྒུག་བྱས་ཡོད་ལ། རྒྱ་མི་རྣམས་ཀྱིས་ཀྱང་མི་ལོ་ ༦༥ རིང་རེ་སྒུག་བྱས་ཡོད། ང་ཚོས་དཀའ་སྡུག་ཆེན་པོས་ཡུན་རིང་རེ་སྒུག་བྱས་ཡོད། ང་ཚོས་མནར་གཅོད་ཀྱི་སྡུག་བསྔལ་ལ་ཐེ་ཚོམ་མེད་པར་ངེས་པར་དུ་ཡར་ལངས་བྱེད་དགོས། རྒྱ་ནག་དམར་པོའི་སྲིད་གཞུང་འདི་ངེས་པར་དུ་ཕྱིར་འཕུད་བྱེད་དགོས། ཁོང་ཚོས་ཁྲིམས་འགལ་གྱི་ཐོག་ནས་བོད་དང་རྒྱ་ནག་ནང་ཡུན་རིང་བཙན་འཛུལ་བྱས་པ་མ་ཟད། ང་ཚོའི་ས་ཆ་དྲག་ཤུགས་ཀྱིས་ཧམ་བཟུང་བྱས་ཡོད། ཁོང་ཚོས་དབང་ཆ་བེད་སྤྱད་དེ་དྲག་སྤྱོད་སྤེལ་ཡོད། ཁོང་ཚོས་སྐྱག་རྫུན་མང་དག་ཅིག་གི་ཐབས་ཇུས་ཐོག་ནས་རྒྱ་རིགས་རྣམས་ལ་ལྟ་བའི་སློབ་གསོ་རྒྱག་གི་འདུག་ཅེས་རྒྱ་རིགས་གཞོན་ནུ་ཞིག་གིས་ང་ལ་གསུངས་བྱུང་།

གདུག་རྩུབ་ཅན་གྱི་རྒྱལ་ཁབ་འདི་ཁ་བྲལ་དུ་གཏོང་བར་ཁྱེད་མོས་མཐུན་ཡོད་དམ། བོད་ཀྱིས་རང་ལུས་མེ་བསྲེགས་གཞན་ཞིག་བློས་གཏོང་བྱེད་མི་འོས་པ་ཞིག་རེད། རྒྱ་ནག་གིས་སྡེབ་གསོད་གཞན་ཞིག་བློས་གཏོང་བྱེད་མི་འོས་པ་ཞིག་རེད། འཛམ་གླིང་གིས་འགྲོ་བ་མིའི་ཚེ་སྲོག་གཞན་ཞིག་བློས་གཏོང་བྱེད་མི་འོས་པ་ཞིག་རེད། འགྲོ་བ་མིའི་རང་གཤིས་ལ་གཞི་བཞག་པའི་བདེན་པ་དང་དྲང་བདེན་ལ་འཐབ་རྩོད་བྱེད་རྒྱུར་དཀའ་ལས་ཁག་པོ་འདི་འདྲ་ཡོང་དགོས་དོན་ཅི་ཞིག་ཡིན་ནམ། རྒྱལ་སྤྱིའི་སྟེང་འཚེ་བ་དང་རྫུན་མ་དར་ཁྱབ་གཏོང་དགོས་དོན་ཅི་ཡིན་ནམ། ད་དུང་མནར་གཅོད་ཀྱི་སྡུག་བསྔལ་དེ་འདྲ་མྱོང་དགོས་དོན་ཅི་ཡིན་ནམ།

བོད་མི་རྣམས་ཀྱིས་འཇིགས་སུ་རུང་བའི་ཆབ་སྲིད་ཀྱི་ལམ་ལུགས་འདི་ལས་མི་ལོ་བཅུ་ཕྲག་ཁ་ཤས་རིང་ཚོགས་པ་ཆུང་ཆུང་ཞིག་གི་འཐབ་རྩོད་ཅིག་ལེགས་གྲུབ་ཡོང་བ་ལ་སྙིང་རུས་དང་གདོང་ལེན་གང་འདྲ་བྱས་མིན་རྒྱལ་སྤྱིའི་སྟེང་དུ་མིག་དཔེ་བསྟན་ཡོད། བཙན་ཤེད་ཀྱིས་མིའི་སྙིང་སྟོབས་ནམ་ཡང་གཅོག་མི་ཐུབ་པ་མ་ཟད། བཙན་ཤེད་ནམ་ཡང་རྣམ་པར་རྒྱལ་མི་ཐུབ། གང་ཡིན་ཞེ་ན་བདེན་པ་དང་དྲང་བདེན་ནི་འདི་ལས་ནུས་པ་མཆོག་ཏུ་གྱུར་བ་མ་ཟད་དར་ཁྱབ་ཆེན་པོ་འགྲོ་ངེས་ཡིན། ད་ཆ་ཧོང་ཀོང་ནང་གི་དམངས་གཙོའི་ལས་འགུལ་དེ་ནི་མི་རབས་རྗེས་མ་རྣམས་ཀྱིས་མི་རབས་གོང་མའི་རྗེས་མཐུད་དེ་དམར་པོའི་གདུག་རྩུབ་ལ་མི་མང་སྒེར་ལངས་བྱེད་ཀྱི་ཡོད་པ་ང་ཚོས་ཤེས་ཀྱི་ཡོད། ཧོང་ཀོང་ལ་ཁྱེད་ཀྱི་རྒྱབ་སྐྱོར་གནང་རོགས། ཐུགས་རྗེ་གཟིགས།

ཕྱི་ལོ་ ༡༩༩༧ ལོའི་ནང་ང་གྲོང་ཁྱེར་ནང་གནས་སྤོ་བྱས་པའི་ཟླ་ཤས་སྔོན་ལ་དབྱིན་ཇི་གཞུང་གིས་ཧོང་ཀོང་རྒྱ་ནག་ལ་ཕྱིར་སྤྲོད་བྱས་པ་དང་དེར་ངོ་རྒོལ་ཏོག་ཙམ་བྱུང་ཡོད། ས་གནས་ཀྱི་མི་དམངས་མང་ཆེ་བ་མ་འོངས་པའི་འགྱུར་ལྡོག་འདི་ལ་དོགས་པ་སྐྱེས་ཡོད། ཡིན་ཡང་པེ་ཅིང་ཕྱོགས་ནས་ཧོང་ཀོང་གི་རྩ་ཁྲིམས་དང་མཐུན་པའི་གཞི་རྩའི་ཁྲིམས་སྲུང་སྐྱོབ་བྱེད་རྒྱུའི་ཁས་ལེན་ལ་འགྱུར་ལྡོག་མི་ཡོང་བའི་རེ་བ་བྱས་ཡོད་མོད། ལོ་བཅུ་བདུན་རྗེས་ཀྱི་དེ་རིང་ཡང་ཁོང་ཚོས་སྤྱོད་པ་རྩུབ་པོ་བྱེད་རྒྱུར་གོ་རྟོགས་རྙེད་པ་མ་ཟད་དེའི་ཐོག་ནས་འཐབ་རྩོད་བྱེད་ཀྱི་ཡོད། ཁོང་ཚོའི་འབོད་ཚིག་“抗命”པེ་ཅིང་གི་སྤྱི་སྐད་(Mandarin དང་། ཧོང་ཀོང་གི་སྤྱི་སྐད་Cantonese)ནང་ཡིན་ལ། དེའི་ནང་དོན་ཡང་དགྲ་བོ་ལ་འཐབ་རྩོད་བྱེད་རྒྱུ་ནི་ལས་དབང་ཞིག་ཡིན་ཞེས་པའི་དོན་རེད། ད་ཆ་ཁོང་ཚོས་གྱེན་ལངས་ལ་གདོང་ལེན་བྱེད་དགོས་པ་གསལ་པོར་ཤེས་ཀྱིན་ཡོད།

སྡུག་བསྔལ་ནི་བོད་མི་ཙམ་མ་ཟད་སུ་གཅིག་གིས་ཀྱང་མྱོང་དགོས་པའི་ལས་ཤིག་མ་རེད། རྫུན་ལ་མཁས་པའི་རྒྱ་ནག་དམར་པོའི་སྲིད་གཞུང་གིས་གློ་བུར་དུ་གནད་དོན་གང་ཡང་ཁས་ལེན་བྱེད་པ་དང་གུ་ཡངས་བྱེད་རྒྱུར་རེ་འདོད་བཅང་བ་ནི་དོན་མེད་ཀྱི་བསམ་བློ་ཞིག་ཡིན། དམར་གསོད་པ་དེ་དག་སྐྱེ་བ་རྗེས་མ་འཚང་བརྒྱ་བའི་རེ་སྨོན་བཅང་བ་ནི་སྙིང་པོ་མེད་པ་ཞིག་རེད། གང་ཡིན་ཟེར་ན་ཁོང་ཚོ་ནམ་ཡང་སངས་རྒྱས་ཀྱི་མ་རེད།

འཇིགས་སྐུལ་རིང་ལུགས་པ་དང་ལྷན་དུ་གྲོས་མོལ་བྱེད་མི་ཉན། རྒྱ་ནག་དམར་པོའི་སྲིད་གཞུང་ནི་འཛམ་གླིང་ནང་གི་འཇིགས་སྐུལ་རིང་ལུགས་པའི་ཚོགས་པ་ཆེ་ཤོས་ཤིག་རེད། ཕྱི་ལོ་ ༡༩༨༩ ནང་ང་ཚོ་སློབ་ཕྲུག་ཚང་མས་རྒྱ་ནག་གཞུང་དང་ལྷན་དུ་གྲོས་མོལ་བྱ་རྒྱུར་རེ་བ་ཆེན་པོས་མཐའ་སྐོར་ཏེ་ཟས་བཅད་ངོ་རྒོལ་དང་། གོམ་བགྲོད་ངོ་རྒོལ་བྱས་ཀྱང་ཁོང་ཚོའི་ཡ་ལན་ནི་དམར་གསོད་ལས་གཞན་གྲུབ་འབྲས་གང་ཡང་མེད།༄༅ ངས་དེ་རིང་ཞི་ཅིན་ཕིན་ལ་བརྡ་ལན་ཞིག་སྤྲོད་ཀྱིན་ཡོད། ཞི་ཅིན་པིན་ཞི་ཌི་ལོ་(Xitler)ཁྱེད་ཡག་པོ་བྱས་ཏེ་ཉོན་ཞིག རྒྱ་རིགས་རྣམས་ཀྱི་རྨི་ལམ་དེ་ཡིས་རྒྱ་ནག་འདི་བཞིན་སླར་ཡང་རིག་གནས་གསར་བརྗེ་ཞིག་ཡོང་རྒྱུར་དྲུད་པ་བཞིན་ད་ལྟ་གནས་ཚུལ་དེ་འབྱུང་གིན་ཡོད། བཙན་པོ་དབང་ཡོད་ཀྱིས་ཉིན་ལྟར་མི་གསད་པ་མ་ཟད། མནར་གཅོད་དང་སུན་གཙེར་བཟོ་བའི་ས་ཆ་འདི་ལ་དུག་གིས་ཡོངས་སུ་ཁྱབ་པའི་རྒྱ་ནག་ཞེས་ཟེར་གྱིན་ཡོད། (Xitler)ཞི་ཌི་ལར་ཁྱེད་ཀྱིས་ང་ཚོ་བཙོན་དུ་འཇུག་ཐུབ་ཀྱང་ང་ཚོ་ཚང་མ་འཇུག་ཐུབ་ཀྱི་མ་རེད། ཁྱེད་ཀྱིས་ང་ཚོ་དམར་གསོད་གཏོང་ཐུབ་ཀྱང་ང་ཚོ་ཚང་མ་གསོད་ཐུབ་ཀྱི་མ་རེད།

ཁྱེད་ཀྱིས་ཚད་ལས་རྒལ་བའི་ཐོག་ནས་ང་ཚོར་བསམ་བློའི་སློབ་གསོ་ཐེབས་རྒྱུ་དང་དྲ་རྒྱར་དོ་དམ་བྱེད་ཐུབ་ཀྱང་། གནས་ཚུལ་རྒྱུན་ཆད་རྒྱུར་ནམ་ཡང་བཀག་འགོག་བྱེད་ཐུབ་ཀྱི་མ་རེད། དྲང་བདེན་ནི་ངེས་པར་དུ་ཕྱིར་མངོན་ཡོང་དགོས་པ་ཞིག་ཡིན་པ་མ་ཟད་ད་ཆ་ཇེ་གསལ་ནས་ཇེ་གསལ་ལ་འགྲོ་བཞིན་ཡོད། རྒྱ་ནག་ནང་རྒྱ་རིགས་ཇེ་མང་ནས་ཇེ་མང་རྨོངས་གཉིད་ལས་སད་དེ་འཇིགས་སྣང་མེད་པར་འཐབ་འཛིང་བྱེད་པ་མ་ཟད་བོད་རིགས་དང་ཡུ་གུར། སོག་པོ་སོགས་ཇེ་མང་ནས་ཇེ་མང་སྲིད་དབང་སྒེར་འཛིན་ལམ་ལུགས་ལ་ངོ་རྒོལ་སྒེར་ལངས་བྱས་དང་བྱེད་མུས་ཡིན། ད་ངོ་མ་འགྲིག་ཚོད་ཡིན། ང་ཚོ་ཡུན་རིང་སྡུག་པོ་ཞེ་དྲག་མྱོང་དགོས་བྱུང་། རྒྱ་རིགས་མི་དམངས་རྣམས་ཀྱིས་ཁྱེད་ལ་ཞི་ཌི་ལིར(Xitler)ཞེས་པའི་མིང་འདོགས་བཏགས་པ་བཞིན་མིང་དོན་མཚུངས་པ་ཞིག་རེད།

ཏིན་ཞའོ་ཕིན་དུས་སྐབས་ནས་བཟུང་ཁྱེད་ནི་ཡ་ང་སྙིང་རྗེ་མེད་པའི་དབང་སྒྱུར་བ་ཞིག་རེད། ཞི་ཌི་ལིར་(Xitler)ཡག་པོ་བྱས་ཏེ་ཉོན་ཞིག ཕྱི་ལོ་ ༡༩༨༩ ལོའི་སྔོན་གྱི་ནག་ཉེས་མེད་པའི་རྒྱ་ནག་མི་དམངས་དེ་དག་ད་ཆ་གནས་མེད་པ་མ་ཟད། ང་ཚོ་ཡར་རྒྱས་ཀྱི་ཕྱོགས་སུ་མདུན་སྐྱོད་བྱེད་པར་ཁྱེད་ལ་བཤོད་དགོས་དོན་མེད། ང་ཚོས་གནམ་བདེ་སྒོ་མོ་ཆེའི་གནས་ཚུལ་འདི་འདྲ་ཞིག་སླར་ཡང་མི་ལྷག་པ་བྱེད་རྒྱུ་ཡིན། ཞི་ཌི་ལིས་(Xitler)ལས་དབང་འདི་དྲན་པ་བྱེད་དགོས། ཁྱེད་ཀྱིས་སྐྱུག་བྲོ་བའི་དབང་སྒྱུར་གྱི་ལས་ངན་འདི་དག་ལ་དཀའ་ལས་ཁག་པ་མ་ཟད་ཆད་པ་འཕོག་ངེས་ཡིན།

ཉིན་མོ་འདི་ནི་རྒྱ་ནག་དམར་ཤོག་ཚོགས་པ་འདི་བཞིན་ཉམ་ཉེས་སུ་འགྲོ་བའི་ཉིན་མོ་ཞིག་ཀྱང་རེད། བོད་མི་རྣམས་འཕེལ་རྒྱས་དང་རིང་དུ་འཚོ་བའི་གོ་སྐབས་གནང་བར་རྒྱ་གར་ལ་ཐུགས་རྗེ་ཆེ་ཞུ་བཞིན་ཡོད་ལ། སྲིད་འཛིན་མུ་ཌེ་(Modi)མཆོག་ལ་འབོད་སྐུལ་ཞིག་ཡོད། འཛམ་གླིང་གཞན་གྱི་དབུ་ཁྲིད་(British)ཨིན་ཇི་སྲིད་འཛིན་(DavidCameron)བཞིན་གཅིག་མཇུག་གཉིས་མཐུད་ཀྱིས་པུས་མོ་ས་ལ་བཙུགས་ཏེ་རྒྱ་ནག་ལ་མགོ་སྒུར་བ་དང་། དེ་ལས་ཀྱང་ཁྱད་མཚར་བ་ཞིག་ལ། ཨ་རི་ནི་འཛམ་གླིང་བདེ་སྲུང་རྒྱལ་ཁབ་ཞིག་ཡིན་ན་ཡང་། བོད་ནང་དང་རྒྱ་ནག ཤར་ཏུར་ཀི་སི་ཐན། ལྷོ་སོག་པོ་བཅས་ཀྱིས་མནར་གཅོད་སྡུག་བསྔལ་མྱངས་དང་མྱོང་བཞིན་པའི་གནས་ཚུལ་རྣམས་ལ་ལུག་འཐོམས་དང་ཞར་ལྐོག་ལྟར་མི་མཐོང་ཁུལ་བྱས་ཏེ་གནས་ཚུལ་མུ་མཐུད་ལྷག་གིན་པ་དེ་རེད། སྲིད་འཛིན་མུར་ཌེ(Modi)མཆོག ཁྱེད་ཀྱིས་གང་ཞིག་གནང་དགོས་མིན་ངེས་པར་དུ་མཁྱེན་ཐུབ་པ་བྱེད་དགོས།

རྒྱ་གར་དེ་བཞིན་འཛམ་གླིང་ནང་དམངས་གཙོའི་རྒྱལ་ཁབ་ཆེ་ཤོས་ཞིག་ཡིན་པ་འཛམ་གླིང་ཐོག་ཤེས་སུ་བཅུག་དགོས། དངུལ་གྱིས་མཛའ་བརྩེ་དང་བྱམས་བརྩེ་ཉོ་མི་ཐུབ་པ་བཞིན་དུ་དངུལ་གྱིས་དམངས་གཙོ་ཕྱིར་བཙོང་མི་ཐུབ་ལ་ཉོ་ཡང་དེ་བས་ཀྱང་མི་ཐུབ། ཨོ་བྷོ་མ། ཁྱེད་ནི་ཞི་ཌི་ལིར་(Xitler)གྱི་མདུན་དུ་དེ་འདྲའི་མི་སྡར་མ་དང་གཉོམ་ཆུང་ཞིག་རེད་ཨང་། རྒྱ་ནག་གཞུང་ནི་དཔེར་ན་སློབ་གྲྭའི་ནང་དབང་ཡོད་ཤོད་མཁན་དང་ཐུབ་ཚོད་གཏོང་མཁན་ཞིག་དང་གཉིས་སུ་མེད། གལ་སྲིད་མི་སུ་ཞིག་གིས་ཀྱང་དེ་བཀག་འགོག་མ་བྱས་པར་མུ་མཐུད་ནས་དེ་ལྟར་བྱེད་དུ་བཅུག་ཚེ། དེ་ནི་ཧ་ཅང་ཉེན་ཁ་ཆེ་བའི་དབང་ཡོད་ཅིག་དང་ཐུབ་ཚོད་ཅིག་ཏུ་འགྱུར་རྒྱུ་རེད།

ཧེ་ཊི་ལིར་ཁོ་རང་གི་སྐྱུག་བྲོ་བའི་གཡོ་བྱུས་དེ་དག་ཕྱིར་སྟོན་བྱེད་པའི་བློ་ཁོག་མེད་ན། ཨ་རི་ནི་འཛམ་གླིང་གི་དབང་ཡོད་ཤོད་མཁན་ཆེ་ཤོས་ཤིག་ཆགས་པ་མ་ཟད། ནུབ་ཕྱོགས་ཀྱི་ཞི་མཐུན་འགྲིག་འཇགས་བྱེད་མཁན་ཚོས་ཧ་ཅང་གདུག་རྩུབ་ཆེ་བའི་སྲིན་པོ་ཞིག་ལ་བློ་སྟོབས་སྤེལ་ཏེ་སྐྱེད་བསྲིང་བྱས་པ་ཞིག་རེད། སྲིད་གཞུང་ཁག་གི་དབུ་འཛིན་རྣམས་ངེས་པར་དུ་རྨོངས་གཉིད་ལས་སད་ཏེ་རྒྱ་ནག་གཞུང་ལ་གདོང་གཏད་དེ་སྐྱོན་བརྗོད་བྱེད་དགོས། ང་ཚོས་ཁོང་ཚོའི་ཆབ་སྲིད་ཀྱི་བྱ་སྤྱོད་དེ་དག་སྤེལ་བ་ལ་དུས་ཚོད་སྤྲོད་མི་ཐུབ་པ་མ་ཟད། ང་ཚོས་ངེས་པར་དུ་རྡོག་རྩ་གཅིག་སྒྲིལ་གྱི་ཐོག་ནས་མཉམ་དུ་འཐབ་རྩོད་བྱེད་དགོས། གཅིག་སྒྲིལ་བྱས་ན་རྒྱལ་ཁ་འཐོབ་རྒྱུ་དང་ཞེན་ཁོག་བྱས་ན་ཕམ་རྒྱུ་ཉག་གཅིག་རེད། དེར་བརྟེན་བོད་རིགས་དང་རྒྱ་རིགས། ཡུ་གུར་བ། སོག་རིགས་བཅས་ང་ཚོས་ངེས་པར་དུ་མཉམ་རུབ་བྱེད་དགོས། ང་ཚོ་ཚང་མ་གདུག་རྩུབ་ཆེ་བའི་ཆབ་སྲིད་ཀྱི་ལམ་ལུགས་ལ་འཐབ་རྩོད་བྱེད་མཁན་གཅིག་པ་རེད།

འཛམ་གླིང་གི་ས་ཕྱོགས་གང་ས་ནས་བོད་མི་རྣམས་ལ་བརྡབ་གསིག་བཏང་དང་གཏོང་མུས་ཡིན་ལ། ལྷག་པར་དུ་བལ་ཡུལ་དང་ཡུ་རོབ་ནང་བོད་མི་རྣམས་ལ་དཀའ་ངལ་བཟོ་གིན་ཡོད། འཇིགས་སུ་རུང་བའི་བྱེད་ཕྱོགས་འདི་དག་གང་སར་དར་ཁྱབ་ཏུ་འགྲོ་དགོས་དོན་ཅི་ཞིག་ཡིན་ནམ། གང་ཡིན་ཟེར་ན། དེ་ནི་སྲིད་གཞུང་གི་དབུ་ཁྲིད་དེ་དག་པེ་ཅིན་གྱི་དངུལ་གྱིས་ཉོས་པའམ་ཡང་ན་པེ་ཅིན་གཞུང་ནས་སོ་སོ་རང་ཉིད་ལ་བརྙས་བཅོས་བྱེད་དུ་འཇུག་གི་ཡོད་པ་དེ་རེད། ང་ཚོས་ངེས་པར་དུ་མུ་མཐུད་ནས་སྐད་ཆ་ཤོད་དགོས་པ་མ་ཟད་ཁོང་ཚོ་ལ་ཁ་གཏད་གཅོག་དགོས།

རྒྱ་ནག་དམར་ཤོག་ཚོགས་པས་མགོ་ཁྲིད་པའི་བཤུ་གཞོག་དང་ལྐོག་ཟ་རུལ་སུངས། འཚེ་བའི་ལས་ལ་ཞུགས་པའི་རྒྱ་ནག་སྲིད་གཞུང་ལ་རྒྱབ་སྐྱོར་བྱེད་པ་ནི་ཆེས་ནོར་འཁྲུལ་ཞིག་རེད། རྒྱ་ནག་དམར་ཤོག་སྲིད་གཞུང་གིས་གདུག་རྩུབ་དང་དྲག་སྤྱོད་ཀྱི་ཐོག་ནས་འཛམ་གླིང་ཡོངས་ལ་ལྐོག་ཟ་རུལ་སུངས་བྱེད་བཞིན་ཡོད། རྒྱ་ནག་སྲིད་གཞུང་གིས་འབགས་བཙོག་དང་རྫུས་མས་བཟོས་པའི་ཅ་ལག་ཕྱིར་ཚོང་བྱས་པ་གཅིག་པུ་ཙམ་མ་ཡིན་པར། ཀུན་སྤྱོད་དང་མི་མཐུན་ཞིང་གནོད་འཚེའི་བྱེད་སྟངས་ཀྱི་ཐོག་ནས་འགྲོ་བ་མིའི་གཞི་རྩའི་ཐོབ་ཐང་དང་ཀུན་སྤྱོད་ལ་རྡོག་རོལ་དང་བཙན་གནོན་བྱེད་བཞིན་ཡོད། མགོ་བསྐོར་བསླུ་བྲིད། སྐྱག་རྫུན་དང་འཚེ་བ། ཡིད་ཆེས་མེད་པ། ལྐོག་རྔན་སྤྲོད་ལེན་གྱི་བྱ་བ་འདི་ནི་རྒྱ་ནག་ནང་སྤྱོད་བཟང་གི་ཚད་གཞི་གསར་པ་ཞིག་ཏུ་འགྱུར་བཞིན་ཡོད་ལ། དེ་ལྟ་བུའི་འགྲོ་བ་མིའི་རང་གཤིས་ངན་པ་འདི་བཙན་ཤེད་ཀྱིས་འཛམ་གླིང་གི་ས་ཕྱོགས་གང་སར་ཁྱབ་གདལ་དུ་བཏང་དང་གཏོང་མུས་ཡིན།

བོད་དང་རྒྱ་ནག ཧོང་ཀོང་། ཤར་ཏུར་ཀི་སི་ཐན། ལྷོ་སོག་པོ་བཅས་ནི་ཉེན་ཁའི་ནང་ལྷུང་ཡོད་པ་མ་ཟད། འཛམ་གླིང་འདི་ཡང་ཟང་ཟིང་ནང་དུ་དྲུད་འགྲོ་གིན་ཡོད། ད་ཆ་ང་ཚོས་གནད་དོན་དེའི་རིགས་ལ་ངེས་པར་དུ་ངོ་རྒོལ་བྱེད་དགོས་པའི་དུས་ཚོད་ལ་སླེབས་ཡོད་ལ། དུས་ཚོད་དེ་ནི་ད་ལྟ་རང་རེད། ད་ལྟ་ནི་གང་ལས་ཀྱང་གལ་ཆེ་བ་ཞིག་དང་ཛ་དྲག་པོ་ཞིག་ཆགས་ཡོད། གལ་སྲིད་ང་ཚོས་གནད་དོན་འདི་ཚོའི་ཐོག་ལ་སྐད་ཆ་མ་བཤད་པའམ་ཡང་ན་ལས་འགུལ་མ་སྤེལ་ཚེ། བོད་ནང་དུ་ཡོད་པའི་ང་ཚོའི་སྤུན་ཟླ་ཙམ་མིན་པར་རྒྱ་ནག་དང་ཧོང་ཀོང་། ཤར་ཏུར་ཀི་སི་ཐན། ལྷོ་སོག་པོ་བཅས་ཀྱིས་སྡུག་བསྔལ་ཇེ་ཆེར་འགྲོ་བ་མ་ཟད། འཛམ་གླིང་འདི་བཞིན་མུན་ནག་གི་དུས་རབས་ཤིག་ཏུ་འགྱུར་འགྲོ་གི་རེད།

ངའི་བོད་རིགས་སྤུན་ཟླ་ཚོ། ཁྱེད་ཚོས་སོ་སོ་རང་ཉིད་ཀྱི་མིག་རྐྱང་ཐུང་དུ་གཏོང་མི་ཉན། ཁྱེད་ཚོར་གང་ཞིག་དབང་བ་དང་འོས་བབ་ཡོད་པའི་དགོས་འདུན་འདོན་དགོས་ལ། སོ་སོའི་འབོད་སྒྲ་དང་སྙིང་སྟོབས་ལ་ཡང་དོ་སྣང་བྱེད་དགོས། ཁྱེད་ཚོའི་འཐུས་མི་རྣམས་ཀྱིས་བོད་ཕྱི་ནང་གང་སར་ཡོད་པའི་མི་མང་དཀྱུས་མ་ཚོའི་འབོད་སྒྲ་དང་སེམས་གཏམ་ལ་ཉན་པའི་རེ་བ་བྱེད་བཞིན་ཡོད། བོད་ཀྱི་བདག་པོ་བོད་མི་ཡིན་ལ། བོད་ནི་རྒྱ་ནག་གི་ཆ་ཤས་མིན་ལ་ནམ་ཡང་རྒྱ་ནག་གི་ཆ་ཤས་ཆགས་མི་ཉན།

འཛམ་གླིང་དམག་ཆེན་གཉིས་པའི་སྐབས་ཧེ་ཊི་ལིར་གྱིས་(Hitler)ནཱ་ཛི་དཔུང་དམག་གིས་པོ་ལནྜ་གྲི་ལ་བཙན་འཛུལ་བྱས་རྗེས་སུ་གལ་སྲིད་པོ་ལནྜའི་(polishpeople)ཡུལ་མི་རྣམས་ཀྱིས་ཧེ་ཊི་ལིར་ལ་རང་སྲིད་རང་སྐྱོང་སྤྲོད་རོགས་ཞེས་བརྗོད་ན་ཁྱེད་ཀྱིས་ཅི་ཞིག་བསམ་ཀྱིན་འདུག རྒྱ་ནག་གཞུང་གིས་བོད་ཀྱི་ཆེད་དུ་གང་ཞིག་བྱ་མིན་དྲི་བ་མ་འདྲི་རོགས། ངས་ཅི་ཞིག་བྱེད་ཐུབ་ཞེས་སོ་སོ་རང་ཉིད་ལ་དྲི་བ་འདྲི་རོགས། མི་སྒེར་བ་ཞིག་གི་ངོས་ནས་སོ་སོའི་ལུང་པའི་དོན་དུ་ཅི་ཞིག་བསྒྲུབ་ཐུབ་མིན་འདྲི་རོགས། སོ་སོའི་རྒྱལ་ཁབ་ཀྱི་ངོས་ནས་མི་མང་གི་ཆེད་དུ་གང་ཞིག་བསྒྲུབ་མིན་འདྲི་རོགས། ཁྱེད་ཀྱིས་སོ་སོ་ནུས་མེད་དང་མིང་གྲགས་མེད་མཁན་ཞིག་ཡིན་པ་བསམ་ཆོག་ཀྱང་། ཁྱེད་ཀྱིས་གནམ་བདེ་སྒོ་མོ་ཆེའི་ལྕགས་ཁྲབ་འཁོར་ལོའི་དཔའ་བོའི་(Tankman)སྐོར་ལ་བསམ་བློ་གཏོང་དགོས། ཁོང་ནི་སྔོན་མ་མིང་གྲགས་མེད་མཁན་ཞིག་ཡིན་ལ་ད་ལྟའང་རེད། ཁྱེད་ཀྱིས་བོད་ནང་དུ་ཡོད་པའི་བོད་རིགས་སྤུན་ཟླ་རྣམས་ཀྱི་སྐོར་ལ་བསམ་བློ་གཏོང་དགོས་ལ། དམིགས་གསལ་གྱིས་རང་ལུས་མེ་བསྲེགས་གནང་མཁན་རྣམས་ཀྱི་སྐུ་གཟུགས་ཀྱི་མེ་ལྕེའི་ཀི་སྒྲས་ང་ཚོ་རྨོངས་གཉིད་ལས་སད་པའི་ཐབས་ཤེས་བྱེད་ཀྱིན་ཡོད་པ་ང་ཚོས་དྲན་དགོས།

གལ་སྲིད་ང་ཚོ་སུ་ཞིག་གིས་ལས་ཀ་མཉམ་དུ་མི་བྱེད་ནའང་རེ་འགས་མཉམ་དུ་བྱེད་ཐུབ། ང་ཚོས་འགྱུར་ལྡོག་བཏང་སྟེ་ལོ་རྒྱུས་བཟོ་དགོས། མའོ་ཙེ་ཏུང་གིས་མེ་སྟག་ཆུང་ངུ་ཞིག་གིས་རི་བོ་མེར་སྲེག་གཏོང་ཞེས་གསུངས་པ་ལྟར། ང་ཚོ་མི་མང་དཀྱུས་མའི་མེ་སྟག་ཆུང་ངུ་འདིས་རི་བོ་གཙང་བཟོ་བྱས་ཏེ། མཛེས་སྡུག་ལྡན་པའི་ཡུལ་ལྗོངས་གསར་པ་ཞིག་བསྐྱེད་པའི་འགྱུར་བ་གཏོང་ཐུབ།

དེར་བརྟེན་༸གོང་ས་མཆོག་དང་ཁྱེད་རང་ཚོ་མཐོ་སྒང་བོད་ལ་ཕྱིར་ལོག་བྱ་ཐུབ། ང་ཚོ་ཚང་མས་མཉམ་དུ་སྐད་འབོད་བྱེད། ང་ཚོ་ཚང་མཉམ་དུ་ཡར་ལངས་བྱེད། བོད་རྒྱལ་ལོ། རྒྱ་ནག་རྒྱལ་ལོ།

༢༠༡༤ ་ལོའི་ཕྱི་ཟླ་ ༩ ཚེས་ ༡༧ ཉིན་རྒྱ་གར་རྒྱལ་ས་ལྡི་ལི་མན་ཇུ་ཀྲིག་ལ་བོད་སྒར་བསམ་ཡས་གླིང་དུ།

དབྱིན་ཇིའི་མ་ཡིག་དྲ་ཚིག་ཁ་བྱང་། Rose Tang’s Speech at a Tibet Rally in New Delhi Protesting Xi Jinping