ཉེ་ཆར་བོད་རང་སྐྱོང་ལྗོངས་སྙེ་མོ་རྫོང་ཐོན་པ་བ་རུ་དུས་རབས་བདུན་པའི་ནང་བོད་ཡིག་གསར་གཏོད་མཛད་མཁན་ཐོན་མི་སམ་བྷོ་ཊའི་བཞུགས་གནས་གསར་རྙེད་བྱུང་ཡོད་འདུག
དེ་རིང་ཀྲུང་གོའི་བོད་ལྗོངས་དྲ་བ་ཞེས་པར་གནས་ཚུལ་སྤེལ་དོན་ལྟར་ན། ཉེ་ལམ་སྙེ་མོ་རྫོང་ཐོན་པ་སྡེ་བའི་པདྨ་བསམ་འགྲུབ་ཞུ་བ་ཞིག་གིས་སྡོད་ཁང་གཙང་སྤྲ་བྱེད་སྐབས། དཀྱིལ་གྱི་ཁང་མིག་གི་གྱང་ལྡེབས་ངོས་སུ་སྦྱར་བའི་ཚགས་པར་དང་། གྱང་ངོས་སུ་བྱུག་པའི་ཚོན་རྩི་དཀར་པོ་དག་གཙང་བཟོ་བྱས་རྗེས། གྱང་ངོས་སུ་ཚོན་མདོག་སྣ་ལྔའི་ལྡེབས་རིས་ཡོད་པ་ཤེས་རྟོགས་བྱུང་ཡོད་སྟབས། ཁོས་འབྲེལ་ཡོད་ས་གནས་སྲིད་གཞུང་ལ་སྙན་སེང་ཞུས་པར་བརྟེན། བོད་རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་འབྲེལ་ཡོད་མགོ་ཁྲིད་དང་ཆེད་མཁས་པ་ཁག་ཅིག་གིས་བརྟག་དཔྱད་བྱེད་དུ་སོང་སྟེ། བརྟག་དཔྱད་བྱས་པ་བརྒྱུད་གྱང་ངོས་ཀྱི་ལྡེབས་རིས་ཐོག་ཏུ་བྲིས་པའི་སློབ་དཔོན་ཐོན་མིའི་སྡོད་གནས་རྙིང་པ་དང་། ད་ལྟའི་ཞིང་ཁྱིམ་ར་བ་དེ་གཉིས་ཀྱི་བཅའ་བཀོད་ཕལ་ཆེར་གཅིག་མཚུངས་ཡིན་པར་བརྟེན་ཐོན་མི་སམ་བྷོ་ཊའི་བཞུགས་གནས་ཡིན་པར་ངོས་འཛིན་བྱས་ཡོད། ཅེས་བཀོད་འདུག
ཐོན་པ་སྡེ་བ་ནི་ལྷ་ས་གྲོང་ཁྱེར་དང་བར་ཐག་སྤྱི་ལེ ༡༤༠ ལྷག་གི་སར་ཡོད་པ་དང་། བོད་ཀྱི་ལོ་རྒྱུས་ཐོག་ས་གནས་དེ་ནི་ཐོན་མི་སམ་བྷོ་ཊའི་འཁྲུངས་ཡུལ་ཡིན་ཞེས་བཤད་སྲོལ་ཡོད་ཀྱང་། ད་བར་ཁོང་གི་བཞུགས་གནས་ག་པར་ཡིན་མིན་ཤེས་མཁན་བྱུང་མེད་པ་དང་། ༡༩༥༩ ལོར་རྒྱ་གཞུང་གིས་བོད་བཙན་བཟུང་བྱས་རྗེས་སྡོད་ཁང་དེ་ཞིང་བ་ཚོས་བེད་སྤྱོད་བཏང་ཡོད་འདུག
