༄༅། །མཁྱེན་དཔྱོད་ལྷག་བསམ་གྱིས་ཁུར་བླངས་ཤིང་ཞི་བདེའི་བདེན་དོན་ལ་བློ་ཁ་ཕྱོགས་པའི་རང་རེའི་ཤེས་ལྡན་པ་ཡོངས་ལ།
ཆེད་ཞུ།
དེ་ཡང་<<༸གོང་ས་མཆོག་གི་གསུང་རྩོམ་འགྲེམས་སྟོན་>>གྱི་ལས་དོན་འདི་ཁོ་བོས་ཕྱི་ལོ་ ༢༠༡༢ ཟླ་ ༡༢ ཚེས་ ༡༠ ཉིན་འགོ་བཙུགས་ཏེ་ད་ལྟའི་བར་དུ་ཧ་ལམ་ལོ་ངོ་གསུམ་ལྷག་རིང་ཤེས་རིག་གི་སྡེ་ཁག་གཙོ་བོར་གྱུར་བ་ཁྱོན་ས་གནས་མི་འདྲ་བ་ ༤༥ ཙམ་དུ་སྤེལ་བ་ཡིན་ལ། དམིགས་དོན་ཡང་དྲང་བདེན་དང་ཞི་བདེ་ལ་དགའ་བའི་མིའི་རིགས་ཀྱི་འཚོ་བའི་བྱ་གཞག་ཐད་དུ་ཤེས་རབ་ཀྱི་གནང་སྦྱིན་མཛད་པར་དྲིན་ཤེས་དང་། གཞན་ཡང་༸ཁོང་གི་མཛད་འཕྲིན་སྤྱིའི་དགོངས་དོན་ཐོག་མིག་ལྟོས་ཀྱིས་རྒྱུན་ལོན་ཞིག་བྱེད་ཐུབ་ན་སྙམ་པ་དེའོ། །
ཐོག་མའི་འཆར་ཟིན་ལྟར་གྱི་འདི་ལོར་ཡང་༸ཁོང་གི་གསུང་རྩོམ་དང་འབྲེལ་བའི་ལས་འཆར་ཁག་ཅིག་བསྒྲིགས་ཡོད།
༡༽ཆོས་སྲིད་གཉིས་གཙོ་བོར་གྱུར་པའི་ཚན་རིག་དང་། འཕྲོད་བསྟེན། ཁོར་ཡུག བྱམས་བརྩེ། ཤེས་རིག་སོགས་ཀྱི་ཐད་དུ་༸གོང་ས་མཆོག་གི་དགོངས་གཞི་གང་ཡིན་དང་། དེའི་ཐོག་རྒྱུས་ཡོད་ཀྱི་ཤེས་ལྡན་མི་སྣ་གདན་ཞུས་ཀྱིས་བགྲོ་གླེང་བཀོད་སྒྲིག
༢༽༸ཁོང་གི་སྣ་མང་རང་བཞིན་གྱི་གསུང་རྩོམ་རྣམས་ཁག་དབྱེ་ཐོག་ཤེས་རིག་གི་ཁྱབ་ཁོངས་སུ་ཀློག་རྩལ་འགྲན་བསྡུར།
༣༽སྐབས་དོན་འགྲན་རྩོམ་བཅས་ཀྱི་གྲུབ་དོན་དུ་<<༸གོང་ས་མཆོག་གི་མཁྱེན་པ།>>ཞེས་པའི་མཁས་པའི་ཆེད་རྩོམ་ཕྱོགས་བསྡུས་ཀྱིས་དེབ་ཅིག་བཅས་འདོན་འཆར་ཡོད་པ་ལགས་ན། ས་ཡུལ་དུ་བཞུགས་ཤིང་རྩོམ་རྩལ་རིགས་ལམ་གྱི་སྨྱུག་ཁ་རྒོད་པའི་རང་རེའི་ཤེས་ལྡན་པ་ཚོས་དེའི་དོན་བདེན་གཟིགས་རྒྱབ་སྐྱོར་གྱི་ཚུལ་དུ་གཤམ་འཁོད་བརྗོད་གཞི་དང་འབྲེལ་བའི་རྩོམ་ཡིག་རེ་བསྐུར་བར་རེ་ལྟོས་ཆེའོ། །
འགྲན་རྩོམ་གྱི་བརྗོད་གཞི།
༡༽༸གོང་ས་མཆོག་གི་གསུང་རྩོམ་སྤྱིའི་དགོངས་དོན་དང་བསམ་བློའི་རིན་ཐང་ལ་བལྟ་བ།
༢༽༸གོང་ས་མཆོག་གི་ཆོས་དང་མ་འབྲེལ་བའི་བཟང་སྤྱོད་དང་མི་སྡེའི་སྤྱི་ཚོགས་ཀྱི་ལམ་བུ།
༣༽༸གོང་ས་མཆོག་གི་འཚེ་མེད་ཞི་བའི་ལྟ་གྲུབ་ཀྱི་ལག་ལེན་དང་དེའི་འཕེལ་རིམ་བཅས་ཡིན། སྐུ་ཉིད་ཀྱིས་གོང་འཁོད་བརྗོད་གཞི་འདི་གསུམ་ལས་གང་རུང་ཞིག་འདེམ་ཆོག་ལ་རྩོམ་ལུས་རང་མོས་ཡིན། ཡིག་གྲངས་སུ་དེ་ཙམ་གྱིས་ཚད་བཀག་མེད་མོད། རབ་བྱུང་ན་ཚེག་ཁྱིམ་ ༢༨༨༠ ལས་མ་བརྒལ་ན་ལེགས།
འགྲན་རྩོམ་གྱི་ཁྱབ་ཁོངས་ནས་ཨང་རིམ་རྩེར་སོན་རྣམས་ལ་རྗེས་སུ་ཡི་རངས་སམ་ཆེ་མཐོང་གི་རྩོམ་ཡོན་ལྟ་བུར།
ཨང་རིམ་དང་པོ། ༸གོང་ས་མཆོག་གི་གསུང་རྩོམ་དེབ་རིགས་གྲངས་ ༥༠། ཡང་ན་དེའི་དོད་དུ། (ཧིན་སྒོར་ ༢༥༠༠༠།)
ཨང་རིམ་གཉིས་པ། ༸གོང་ས་མཆོག་གི་གསུང་རྩོམ་དེབ་རིགས་གྲངས་༣༠། ཡང་ན་དེའི་དོད་དུ། (ཧིན་སྒོར། ༢༠༠༠༠།)
ཨང་རིམ་གསུམ་པ། ༸གོང་ས་མཆོག་གི་གསུང་རྩོམ་དེབ་རིགས་གྲངས་༢༠། ཡང་ན་དེའི་དོད་དུ། (ཧིན་སྒོར།༡༥༠༠༠།)
དེ་མིན་རྩོམ་ཡིག་ལེགས་གྲས་བཅུ་ལ་༸ཁོང་གི་གསུང་རྩོམ་དེབ་རིགས་གྲངས་ ༡༠ རེ་ཐུགས་གསོའི་རྩོམ་ཡོན་དུ་འབུལ་རྒྱུ།
གསལ་བཤད།
༡༽བརྗོད་གཞི་གང་ཡིན་ཐོག་༸ཁོང་གི་དགོངས་དོན་ལ་རྒྱུས་ལོན་གྱིས་གསུང་རྩོམ་ཁག་དམིགས་སུ་བཟུང་ཐུབ་ན་ལེགས་པར་སྙམ།
༢༽བརྗོད་གཞི་གང་ཡིན་ཐོག་རང་ཉིད་ཀྱི་བསམ་བློ་ཙམ་མ་ཡིན་པར་ལྟ་ཚུལ་དང་། དཔྱད་བརྗོད་ཀྱི་རིན་ཐང་ལྡན་པར་དམིགས་ཐུབ་ན་དོན་སྙིང་ཆེ་བར་འདོད།
རྩོམ་ཡིག་འབྱོར་ཚེས་ཀྱི་མཐའ་མའི་དུས་བཀག་ནི། ཕྱི་ལོ་ ༢༠༡༥ ཟླ་ ༧ ཚེས་ ༡༣ ཉིན་ཡིན།
འབྲེལ་ཡུལ་ཞལ་བྱང་། ས་རཱ་མཐོ་སློབ་ཀྱི་ལོ་རྒྱུས་དོན་གཉེར་བ་མགོན་པོ་རྒྱལ།
གློག་འཕྲིན་ཁ་བྱང་། donnie5908@gmail.com ལག་ཐོགས་ཞལ་ཨང་། ༨༦༧༩༠-༣༢༡༨༠ (86790-32180)
(Full Address)
Gonpo Gyal (M.A Student)
C.H.T.S P.O Sarah. Dharamsala.
Distt. Kangra. 176215 (H.P) India.)
ཕྱི་ལོ་ ༢༠༡༥ ཟླ་ ༣ ཚེས་ ༡༨ ཉིན། ལས་དོན་པ་མགོན་པོ་རྒྱལ་གྱིས། བཀྲ་ཤིས་བདེ་ལེགས།
