ཚེ་རིང་རྡོ་རྗེས།
ཇོ་ནང་པ་ཚོས་དམངས་གཙོའི་འགྲོ་ལུགས་ལྟར་ཐོབ་ཐང་བརྩོན་ལེན་བྱས་པའི་སྐོར་ལ་གཞིས་བྱེས་གཉིས་སུ་ལབ་གླེང་སྣ་ཚོགས་བྱུང་། ངས་མཐོང་ཡུལ་དུ་གྱུར་བའི་བསམ་ཚུལ་ཡི་གེར་འཁོད་པ་ཕལ་ཆེར་གྱིས་ཇོ་ནང་པ་ལ་རྒྱབ་སྐྱོར་བྱས་འདུག་པ་མ་ཟད། ད་དུང་བོད་མི་གཞིས་པ་ལ་ལས་བཙན་བྱོལ་གྱི་གྲོས་ཚོགས་ལ་བློ་ཕམ་ཡིད་ཆད་ཀྱི་རྣམ་འགྱུར་ཡང་བསྟན་འདུག ང་ལ་མཚོན་ན། ཆོས་ལུགས་གྲུབ་མཐའ་དང་ཆོས་བརྒྱུད་དབྱེ་སྟངས་ལ་རྒྱུས་མངའ་མེད་པ་དང་། ཆོས་བརྒྱུད་རང་སྐྱ་འཕེར་བ་ཞིག་ལ་ཆ་རྐྱེན་དང་ཐོབ་ཐང་ཇི་འདྲ་ཡོད་མེད་མི་ཤེས། དེའི་ཕྱིར་བདག་གིས་ཆོས་ལུགས་གྲུབ་མཐའི་སྟེང་ནས་བདེན་ཁ་སུ་ལ་ཡོད་མེད་བབ་ཅོལ་སྨྲ་མི་ཕོད་པ་དང་། སྐབས་འདིའི་གླེང་བྱའང་དེ་མིན།
སྤྱིར་ང་ནི་གྲུབ་མཐའ་རིས་མེད་ལ་མོས་ཤིང་ཆོས་ལུགས་ཀྱི་སྤྱི་འཐུས་མི་དགོས་པར་འདོད་མཁན་གྱི་གྲས་ཡིན། དེ་ལྟ་མོད་ཀྱང་། ཇོ་ནང་པ་ཚོས་དམངས་གཙོ་ནོར་བུའི་ནོར་ཉམས་ཆོད་དེ་སྐོམ་པ་ཆུ་འདོད་ཀྱི་ཐོབ་ཐང་ཞིག་བརྩོན་ལེན་བྱས་པ་དེ་ལ་ངས་རྗེས་སུ་ཡི་རངས་ཞུ་བཞིན་ཡོད། གལ་སྲིད་དྷ་རམ་ས་ལ་ན་ཡོད་ཚེ། ང་ཡང་ཁོ་ཚོའི་ངོ་རྒོལ་ལས་འགུལ་ལ་ཞུགས་ཏེ་གདུང་སེམས་མཉམ་བསྐྱེད་བྱས་ཡོད་ངེས། བཙན་བྱོལ་ལ་སླེབས་པའི་ལོ་དེ་ནས་བཟུང་། ངའི་སེམས་ལ་བོད་མི་ཚོས་རྒྱ་དམར་གཞུང་ལ་ངོ་རྒོལ་བྱ་ཕོད་པ་དེ་བཞིན་དུ། བཙན་བྱོལ་བོད་གཞུང་དང་གྲོས་ཚོགས་ལའང་མ་འགྲིག་པ་དང་མ་དྲང་པ་གང་ཞིག་ཡོད་ན། མངོན་ལྐོག་མེད་པར་གདོང་ལ་བུད་དེ། དམངས་གཙོའི་འགྲོ་ལུགས་མཐུན་པའི་ངང་ནས་ཞུ་གཏུགས་དང་ངོ་རྒོལ་བྱ་དགོས་པར་བསམ་མྱོང་། དེ་ལྟར་བྱས་ན། བཙན་བྱོལ་གྱི་དམངས་གཙོ་ལམ་ལུགས་ཡང་དག་པ་ཞིག་འོང་བ་ལ་དགེ་མཚན་ཤིན་ཏུ་ཆེ།
ཇོ་ནང་པའི་ཞི་རྒོལ་དེ་ནི་བཙན་བྱོལ་གྱི་དམངས་གཙོ་ལག་ལེན་ལ་དོན་སྙིང་ལྡན་པའི་ལོ་རྒྱུས་ཀྱི་ཟིན་ཐོ་ཞིག་ཆགས་པ་མ་ཟད། མ་འོངས་པར་བཙན་བྱོལ་གྱི་ཚོགས་པ་དང་སྒེར་བ་སུ་ཡིན་ཡང་དམངས་གཙོའི་དྲང་ལམ་ལ་ཞུགས་རྒྱུར་ཤུགས་རྐྱེན་བཟང་པོ་ཞིག་ཐེབས་ནུས་པ་གདོན་མི་ཟ། ངོ་རྒོལ་དེ་འདྲ་ནི་དམངས་གཙོའི་འགྲོ་ལུགས་དང་མཐུན་པ་མ་ཟད། མ་འོངས་པར་ཡང་འབྱུང་འོས་པ་ཞིག་ཏུ་མཐོང་། གཞན་དབང་སྟབས་བསྟུན་བྱ་དགོས་པའི་བཙན་བྱོལ་གྱི་གནས་བབ་འོག་ཏུ། དམངས་གཙོ་ནི་ཡང་དག་པ་ཞིག་ཆགས་རྒྱུ་སླ་བོ་མིན་ཡང་། ང་ཚོས་དམངས་གཙོའི་རིན་ཐང་ངོས་ཟིན་པ་དང་བདག་གཅེས་གང་ལེགས་བྱ་རྒྱུ་ནི་ལྡོག་ཏུ་མེད་པའི་འོས་འགན་ཞིག་ཡིན།
བཙན་བྱོལ་གྱི་དམངས་གཙོ་ལག་ལེན་ད་དུང་ཇེ་ལེགས་སུ་འགྲོ་དགོས་པའི་གནས་བབ་ན་ཡོད་པ་མ་གཏོགས། སྐྱོན་ཀུན་ཟད་ཀྱི་གནས་རིམ་ན་མེད། དེར་བརྟེན་གྲོས་ཚོགས་ནང་དུ་སྣང་ཚུལ་བཟང་ངན་གཉིས་ཀ་འོང་སྲིད་པ་མ་ཟད། ཚུལ་མིན་གྱི་རྩོད་གླེང་དང་འཐེན་འཁྱེར་སོགས་ཀྱང་འབྱུང་སྲིད། འོན་ཀྱང་མི་ལེགས་པའམ་ཞན་པའི་ཆ་ཁོ་ན་ལ་བལྟས་ཏེ་བཙན་བྱོལ་གྱི་དམངས་གཙོའི་མདུན་ལམ་ལ་ཡིད་ཆེས་ཉམས་མི་རུང་། གཞུང་དང་གྲོས་ཚོགས་གང་ཡིན་ཡང་མ་འགྲིག་ས་དང་མ་དྲང་ས་ཡོད་ན། འབྲེལ་ཡོད་ཚོགས་པ་དང་སྒེར་བ་དག་གིས་ངེས་པར་དུ་དམངས་གཙོའི་འགྲོ་ལུགས་ལྟར་ཞུ་གཏུགས་དང་ངོ་རྒོལ་བྱ་དགོས་པ་མ་ཟད། སྐབས་བབ་ཀྱི་གནད་དོན་དང་འབྲེལ་བ་མེད་པ་བཙན་བྱོལ་བ་གཞན་ཚོས་ཀྱང་ལག་ཟུང་མཆན་ལ་བཅུག་ནས་ལྟད་མོ་ལྟ་མི་འོས། ཚང་མས་ཕྱར་བ་གྲུ་འདེགས་ཀྱིས་ང་ཚོའི་དམངས་གཙོ་ཚགས་སུ་ཚུད་པ་འོང་རྒྱུར་ནུས་པ་འདོན་དགོས། ད་ཐེངས་ཇོ་ནང་པའི་དམངས་གཙོ་ལག་ཏུ་བླངས་ཏེ་ཐོབ་ཐང་བརྩད་པ་འདི་དགའ་འོས་པའི་དོན་བཟང་ཞིག་ཡིན་ནའང་། ཁོ་ཚོའི་དཀའ་ངལ་དང་འབྲེལ་བ་མེད་པའི་བཙན་བྱོལ་བ་གཞན་མང་པོ་ངོ་རྒོལ་ལས་འགུལ་དེར་ཞུགས་མེད་པས་བློ་ཕམ་པ་ཞིག་འདུག འདིས་ང་ཚོ་བཙན་བྱོལ་བ་ཚོ་ད་དུང་དམངས་གཙོ་ལག་ལེན་གྱི་ཕྱོགས་ནས་གོ་རྟོགས་དང་སྙིང་སྟོབས་ཞན་པ་བསྟན་འདུག
ད་གཞིས་ནས་མང་གཙོའི་མི་སེར་སློབ་ཕྲུག་ཚོ་སྦྱོང་བརྡར་ལ་དོན་ཞག། འོ་བྱས་ཙང་ཆོས་ལུགས་སྲིད་ཀྱི་ལྡིང་ཆ་ལ་བཞག་ན་མ་འོངས་པའི་དུས་བབས་ནང་ཧ་ཅང་རྙོག་རྫིང་ཆགས་གཏན་འཁེལ་བ་རེད། མང་གཙོའི་རྒྱལ་ཁབ་གང་དུའང་འདི་དར་མེད་བཙན་བྱོལ་མ་འོངས་ལམ་སྟོན་མང་གཙོ་འདི་ལ་བོད་མི་དུམ་བུར་འགྱུར་གཞི་ཆོས་ལུགས་ཀྱི་མ་ཤེས་ཤེས་མདོག་དང་ མ་མྱོང་འཇོན་མདོག་གི་བཟོ་ཉེན་འདུག། ཆོས་ལུགས་སྲིད་ཀྱི་གྲོས་ཚོགས་ནང་འཐུས་མི་བཞག་ཚེ་བུ་རང་མགོ་མ་འཐོན་ གཞན་མགོ་འབད་འབད་ ཞེས་པ་ལྟར་ཆགས་ངེས་རེད། གལ་ཏེ་ཆོས་ལུགས་གང་གི་བླ་མ་དང་ དགེ་བཤེས་ མཁན་པོ་ གྲ་རྐྱང་དཀྱུས་མ་ མང་གཙོའི་འོས་བསྡུ་བྱས་ནས་ལྷན་ཁང་སླེབས་ཚེ་དེ་ནི་ཞན་ཆ་མེད་པ་རེད། དེ་མིན་ཆོས་ལུགས་པའི་འོས་འགན་ནི་ནང་ཆོས་དར་རྒྱས་ཀྱི་སྤྱི་ཚོགས་ལ་སྲི་ཞུ་སྒྲུབ་ནས་འཛམ་གླིང་ནང་མིག་དཔེ་འོས་པའི་གཞན་ཕན་སྤྱི་ཚོགས་བསྐྲུན་ན་ལེགས་ཤོས་དང་ འོས་ཤོས་ཡོད་རད། ཡེ་ཤུའི་བླ་ཆེན་ལ་སྲིད་དབང་ཞབས་སྟེགས་མེད་པ་མ་ཟད་རྒྱ་གར་ནང་ཡང་དེར་མིག་དཔེ་ལེན་ཡོད་ བོད་པའི་འགྲོ་ལུགས་འདི་ལྟ་བུ་ཕལ་ཆེར་ཁ་ཆེ་བ་ཚོས་སྲིད་དབང་སྒེར་འཛིན་ནང་མང་པོ་མཐོང་ལ་ དེར་ཤིཡ་དང་ སུ་ནི་ཞེས་ད་ལྟ་རང་ཤི། ང་རྒྱལ། ཞེས་འཐབ་རྩོད་བྱེད་པ་འདིས་ཤེས་ཐུབ། རྣོ་བསམ་ངོ་མ་གཞི་སྟངས་ནས་བསྒྱུར་བཅོས་ཀྱི་ཆོས་ལུགས་སྤྱི་འཐུས་ཡོངས་རྫོགས་ད་ལྟ་རང་མེད་པ་བཟོ་དགོས། འདིའི་ཐོག་བོད་རིགས་ན་གཞོན་ཡོངས་ནས་མང་གཙོའི་ལས་འགུལ་སྤེལ་དགོས་པ་རེད།
ང་ཚོར་དགོས་པ་དེ་བོད་ཆོལ་ཁ་གསུམ་གཅིག་ཏུ་བསྒྲིལ་བའི་འཐུས་མི་དགོས་ཤིང་། དེ་ཡང་ས་རྒྱ་ལ་བལྟས་ནས་བཞག་ན་འགྲིག་ལ། མི་འབོར་ལ་བལྟས་ནས་བཞག་ནའང་འགྲིག་ཤིང་། དེ་ཡི་གཞི་འཛིན་ས་ནི་བོད་རང་ལ་བྱེད་དགོས་པ་ལས་བཙན་བྱོལ་གྱིས་མི་འབོར་གྱི་གཏན་ནས་ཡོང་གི་མ་རེད། ནམ་ཞིག་གོམས་པ་བརྒྱག་དུས་སླེབས་སྐབས། ཧ་ཅང་བཏབ་བདེ་ལ་དོན་སྙིང་ལྡན་པ་ཞིག་ཆགས་ཀྱི་རེད། ད྄་ལྟའི་བཙན་བྱོལ་མང་གཙོའི་འགྲོ་ལུགས་ལ་རྒྱ་གར་གྱིས་ལྷད་ཆེན་པོ་ཡོད་ལ། ཡིན་ཡང་རྒྱ་གར་བས་ཆོས་ལུགས་འཐུས་མི་བཀོད་ཕྱོགས་ལ་ཤ་ཚའི་ལམ་སྟོན་བྱས་མེད། རྒྱ་གར་ཁོ་རང་གི་འགྲོ་སྟངས་འདི་ལག་སྟར་བྱེད་ཀི་མེད་པ་རེད། རྒྱ་གར་བ་ཆབ་སྲིད་མཁས་དབང་ཚོས་ཆོས་ལུགས་འདི་མགོ་རྙོག་ཡིན་པར་ངོས་འཛིན་གསལ་པོ་བྱེད་པ་རེད།
བོད་པའི་སྤྱི་ཚོགས་སྤྱིའི་གོ་རྟོགས་དང་། བོད་ཀྱི་གནས་བབ་གང་ལ་བལྟས་ཀྱང་ད་དུང་སྐུ་ཉིད་ཀྱིས་བརྗོད་པའི་དམངས་གཙོའི་རེ་འབོད་དེ་ཏག་ཏག་འཚམས་པོ་ཡིན་པའི་ངེས་པ་རྙེད་ཀྱིན་མི་འདུག་་་རྩ་བའི་དམངས་གཙོ་ཤིན་ཏུ་གལ་ཆེ་ཡང་དེ་ལ་རྒྱུ་རྐྱེན་ཁོར་ཡུག་ངེས་ཅན་ཞིག་དགོས་ལ། ལྷག་དོན་མི་རིགས་ཤིག་ཆགས་འཇིག་གཉན་ཕྲེང་གི་དུས་ལ་སླེབས་པའི་སྐབས་དང་། ནང་སྒོས་དམངས་གཙོའི་རྨང་གཞིིའི་བདག་དབང་འཐབ་རྩོད་ཀྱི་དུས་སྐབས་སོགས་སུ། དམངས་གཙོའི་འགྲོ་ལུགས་སོགས་ཁ་གཡར་རྒྱུ་མང་དྲག་ན་མཉམ་ལས་སྟོབས་ཤུགས་དང་འཐབ་རྩོད་སྟོབས་ཤུགས་དམའ་ཆགས་པར་འགྱུར་བའི་གནས་བབ་ཀྱང་མི་ཡོང་བ་མིན།
ངས་བསམ་ན་འུ་ཅག་གིས་དམངས་གཙོའི་སྔོན་འགྲོ་གྲ་སྒྲིག་ཙམ་བྱས་པ་ལས་དམངས་གཙོའི་དངོས་གཞི་ལ་སླེབས་རྒྱུར་གཞུང་དམངས་སྤྱི་ཚོགས་དང་། སྒོས་སུ་ཛ་དྲག་གནས་བབ་སོགས་ཀྱི་ངོས་གང་ནས་བལྟས་ཀྱང་བར་ཐག་ཧ་ཅང་རིང་བའི་དངོས་དོན་འདི་དང་ལེན་མི་ཞུ་ཐུ་མེད་རེད་འདོད།
ཡག་པོ་འདུག ཞི་འབོད་འདི་རང་གཞུང་ལ་བློ་སེམས་དཀར་བ་མཚོན་འདུག་ལ། ཞུ་ཚིག་ཀྱང་ང་ཚོར་སྒྲིག་འཇུགས་ནང་ནས་འདྲ་མཉམ་དགོས་ཟེར་བ་དེ་རེད་འདུག མི་ཤེས་པ་ཁ་ཤས་ཀྱིས་དོན་དེ་མ་གོ་ནས། སྒྲིག་འཇུགས་ལ་ནག་པོ་བྱེད་པ་ལྟབུ་ཞིག་ཏུ་གོ་བ་ནི་ནོར་བ་རེད། ནག་པོ་བྱེད་ན་འདི་འདྲ་བྱེད་རྒྱུ་མ་རེད། འདིས་ང་ཚོར་དབང་ཆ་མང་ཚོགས་ཀྱི་ལག་པར་ཡོད་པ་ཤེས་སུ་འཇུག་པ་རེད། ད་ནས་བཟུང་ང་ཚོར་ཆོས་རྒྱུད་འཐུས་མི་ཟེར་བ་ཞིག་དགོས། མཐའ་གཅིག་ཏུ་ངོ་རྒ྄ོལ་ཡོད།