དོལ་རྒྱལ་བསྟོད་འགྲེལ་ལས་འཕྲོས་པ།

རིག་པའི་ཁུ་བྱུག

དེང་སང་དོལ་རྒྱལ་རྗེས་འབྲང་པ་འགའ་རེས་དོལ་རྒྱལ་གྱི་བསྟོད་པར་གྲགས་པ་དཔག་མེད་བསྐལ་སྔོན་མ་ཞེས་པ་དེ་ཉིད་དང་། དེའི་འགྲེལ་པ་སྐྱབས་རྗེ་ཁྲི་བྱང་རིན་པོ་ཆེས་མཛད་པ་གཉིས་ཁ་ལ་འཁྱེར་ནས་དོལ་རྒྱལ་ངོ་བོ་འཇམ་པའི་དབྱངས་ལ་རྣམ་པ་དྲེག་པའི་སྐུར་བཞེངས་པ་ཡིན་ཚུལ་དང་། དེ་ཁས་མ་བླངས་ན་སྐྱབས་རྗེ་ཁྲི་བྱང་རིན་པོ་ཆེའི་དགོངས་པ་དང་འགལ་ཚུལ་རྗོད་ཀྱི་འདུག དེ་ཡང་སྐྱབས་རྗེ་ཁྲི་བྱང་རིན་པོ་ཆེའི་བསྟོད་འབྲེལ་ལས། “དཔག་མེད་བསྐལ་སྔོན་མར་གྲགས་པ། དྭགས་པོ་སྐལ་བཟང་མཁས་གྲུབ་རིན་པོ་ཆེས་མཛད་པ་ལ། ཁྱབ་བདག་ཧེ་རུ་ཀཿ་འི་ངོ་བོ་རྡོ་རྗེ་འཆང་ཕ་བོང་ཁ་བདེ་ཆེན་སྙིང་པོས་ཚིག་གི་སྡེབ་སྦྱོར་གཅུང་ཟད་བསྣོན་འཕྲི་དང་བཅས་གོ་བདེར་མཛད་པ་འདི་ཉིད་ཀྱི་འགྲེལ་པ་ལོ་རྒྱུས་དང་བཅས་པ་འཆད་པ་ལ།” ཞེས་གསུང་བབས་ལ་བལྟས་ན་དྭགས་པོ་སྐལ་བཟང་མཁས་གྲུབ་ཀྱིས་བརྩམས་པར་གྲགས་པའི་བསྟོད་པ་དེར་སྐྱབས་རྗེ་ཕ་བོང་ཁ་རིན་པོ་ཆེས་ཚིག་དོན་བཅོས་གནང་ཡོད་པ་གསལ་པོ་གསུངས་འདུག

སྐྱབས་རྗེ་ཁྲི་བྱང་རིན་པོ་ཆེའི་བསྟོད་འབྲེལ་ནང་དོལ་རྒྱལ་རྗེ་བཙུན་འཇམ་པའི་དབྱངས་དྲེག་པའི་སྐུར་བཞེངས་པ་ཡིན་པར་གསུངས་ཤིང་། དེ་ཡང་དོལ་རྒྱལ་ནི་འབྲས་སྤུངས་གཟིམ་ཁང་གོང་གི་སྤྲུལ་སྐུ་དྲེག་པའི་སྐུར་བཞེངས་པ་ཡིན་པ་དང་། སྤྲུལ་སྐུ་གྲགས་པ་རྒྱལ་མཚན་ནི་པན་ཆེན་བསོད་ནམས་གྲགས་པ། འདུལ་འཛིན་གྲགས་པ་རྒྱལ་མཚན། བུ་སྟོན་ཐམས་ཅད་མཁྱེན་པ། ཁ་ཆེ་པཎ་ཆེན་ཤཱཀྱ་ཤྲི། གྲུབ་ཆེན་བིར་ཝ་པ་བཅས་ཀྱི་སྐྱེ་མཐའ་ཡིན་པར་ཁུངས་བཅོལ་གནང་ཡོད། སྐྱབས་རྗེ་རིན་པོ་ཆེས་བསྟོད་འབྲེལ་ནང་དྲངས་པའི་ལོ་རྒྱུས་ཀྱི་རྒྱབ་རྟེན་བཅོལ་ཡུལ་ཁུངས་དེད་བྱས་ན། སྐྱབས་རྗེ་ཕ་བོང་ཁ་པའི་དོལ་རྒྱལ་གྱི་བསྐང་ཆོག་རྒྱས་པ་དེར་ཐུག་གི་ཡོད། སྐྱབས་རྗེ་ཕ་བོང་ཁས་བསྐང་ཆོག་རྒྱས་པའི་ནང་འདི་ལྟར་གསུངས་ཏེ། “འགའ་ཞིག་གིས། ལྷ་མཆོག་སྤྲུལ་པའི་རྒྱལ་པོ་ཆེན་པོ་འདི་ཉིད་ལ་ཐན་བོན་ཤི་སྟེ་ལས་ངན་གྱིས་ཡིད་ལུས་བཟུང་བའི་རྒྱལ་བཙན་པ་དག་དང་ཁྱད་པར་མ་མཆིས་པར་ལྟ་ཞིང་། གཞན་ལའང་སྐད་གསང་ཐོན་པོས་སྒྲོག་པར་བྱེད་པ་ལ་རང་ཉིད་ལྟ་ཅི་གཞན་བསྟེན་པར་བྱེད་པ་དག་ལའང་འཕྱ་བར་བྱེད་པ་མང་དུ་སྣང་ཞིང་། གཞན་དག་ཀྱང་དེའི་རྗེས་སུ་འབྲངས་ཏེ་ལོག་རྟོག་དམ་དུ་བཟུང་བ་ཆེས་མང་བ་དེ་དག་ནི།” ཞེས་སོགས་འཁོད་པར་གཞིགས་ན་དུས་སྐབས་དེའི་ནང་དོལ་རྒྱལ་དམ་སྲིར་ངོས་འཛིན་བྱེད་མཁན་གྱི་སྐྱེ་བོ་མང་དག་ཅིག་བྱུང་དང་འབྱུང་བཞིན་ཡོད་པར་མངོན་ཞིང་། དེས་སྐྱབས་རྗེ་ཕ་བོང་ཁ་པ་དཔོན་སློབ་ཉུང་ཤས་ལ་ཐུགས་ཕོག་ཆེན་པོ་བྱུང་ཚོད་དེ་དག་སུན་འབྱིན་ཆེད་འདི་ལྟར་གསུངས་ཏེ། “བསྟན་སྲུང་རྒྱལ་པོ་ཆེན་པོ་འདི་ཉིད་ནི་སྤྲུལ་སྐུ་གྲགས་པ་རྒྱལ་མཚན་གྱི་རྣམ་རོལ་འཕྲུལ་མེད་དུ་གྲགས་པ་ལ།” ཞེས་དང་། “དེར་མ་ཟད་རྗེ་འདུལ་བ་འཛིན་པ་ནི་བུ་སྟོན་ཐམས་ཅད་མཁྱེན་པའི་རྣམ་དོལ་དུ་གྲུབ་ལ། བུ་སྟོན་རྗེ་ནི་འཇམ་དབྱངས་དང་བིར་ཝ་པ། ས་པཎ་སོགས་ཀྱི་སྐྱེ་མཐར་དེབ་ཐེར་ཁུངས་ལྡན་དུ་མར་རྩོད་མེད་དུ་ཡོངས་སུ་གྲགས། དེས་ན་བསྟན་སྲུང་ཆེན་པོ་འདི་ཉིད་ནི་རྗེ་བཙུན་འཇམ་དབྱངས་ཞི་ཁྲོ་ཉིད་རང་བསྟན་སྲུང་ཕྱིར་འཇིགས་བྱེད་དྲེག་པའི་སྐུར་བཞེངས་པ་ཡིན་པ་གདོན་མི་ཟ་བར་གྲུབ་ཅིང་།” ཞེས་སོགས་གསུངས་འདུག

སྐྱབས་རྗེ་ཕ་བོང་ཁ་རིན་པོ་ཆེ་འཚོ་བཞུགས་སྐབས་སུའང་དོལ་རྒྱལ་དམ་སྲིར་ངོས་འཛིན་བྱེད་མཁན་མང་པོ་ཡོད་པར་མ་ཟད། དུས་སྐབས་དེའི་ནང་གི་དགེ་ལྡན་བསྟན་པའི་སྲོག་འཛིན་གྱི་སྐྱེ་བོ་དམ་པ་དུ་མ་ཡོད་པ་དཔོག་ཐུབ། དེ་ཡང་དུས་སྐབས་དེའི་ནང་༸གོང་ས་བཅུ་གསུམ་པ་ཆེན་པོས་དགའ་ལྡན་ཁྲི་པ་དག་ཐེར་མཛད་པའི་རྗེས་ཀྱི་ཁྲི་པ་དང་པོ་ཡེ་ཤེས་དབང་ལྡན་ནམ་མི་ཉག་ཨ་པས་ཞུ་བ་དང་སྐྱབས་རྗེ་ཕ་བོང་ཁ་པའི་བར་ཐུགས་སྣང་མི་གཤིན་པ་བྱུང་བ་ཡང་དོལ་རྒྱལ་གྱི་གནད་དོན་འདི་ཡིན་པ་དང་། དེ་རྗེས་ཁྲི་ལྷུན་འགྲུབ་བརྩོན་འགྲུས་རིན་པོ་ཆེས་ཀྱང་རྨེ་རུ་དཔྱིད་ཆོས་ཤིག་ཏུ་ལམ་རིམ་ལྷག་མཐོང་རྩལ་དམིགས་ཀྱིས་བཀའ་ཆོས་གནང་མཚམས་དེང་སང་འགའ་ཞིག་གིས་མན་ངག་ཡིན་ཟེར་བའི་དཔེ་ཐུང་དེ་འདྲ་འཁྱེར་ནས་གང་སར་རྒྱུགས་པ་དེ་གང་ཡིན་ངས་མི་ཤེས་གསུངས་པར། ཞབས་གྲས་ཚོས་དེ་ལྟར་བཀའ་གནང་ན་སྐྱབས་རྗེ་ཕ་བོང་ཁ་པ་དཔོན་སློབ་ལ་ཐུགས་ཕོག་ཡོང་ཉེན་ལ་སོང་བཀའ་གནང་མི་དགོས་པའི་གསོལ་འདེབས་ཞུས་ཚུལ་དང་། སྐྱབས་རྗེ་ཕ་བོང་ཁ་པ་དང་ཕན་ཚུན་བླ་སློབ་ཡིན་པ་ཁང་སར་རྡོ་རྗེ་འཆང་ཆེན་པོས་ཀྱང་དེང་སང་སྐྱབས་རྗེ་ཕ་བོང་ཁས་དོལ་རྒྱལ་བསྟེན་གསོལ་དར་སྤེལ་ཤུགས་ཆེན་གནང་བ་དེ་གང་འདྲ་ཡིན་ནམ་དེ་ལྟར་གནང་ན་དགའ་ལྡན་ཕོ་བྲང་ལ་ཡག་པོ་མེད། ཅེས་སློབ་མ་འགའ་ཤས་ལ་བཀའ་ཕེབས་པ་སོགས་ལས་ཤེས་ཐུབ། དེས་ན་གོང་གསལ་སྐྱེ་བོ་དམ་པ་དེ་དག་གིས་དོལ་རྒྱལ་དེ་བཞིན་དྲེག་པ་རྩོད་གཞི་ཅན་ཞིག་ཡིན་པར་ངོས་འཛིན་གནང་གི་ཡོད་པ་གསལ་པོ་རེད། སྐྱབས་རྗེ་ཕ་བོང་ཁ་རིན་པོ་ཆེས་དོལ་རྒྱལ་སྤྲུལ་སྐུ་གྲགས་པ་རྒྱལ་མཚན་གྱི་སྐྱེ་རྒྱུད་ཡིན་པ་དང་། གྲགས་རྒྱན་པཎ་ཆེན་བསོད་གྲགས་དང་། འདུལ་འཛིན་གྲགས་པ་རྒྱལ་མཚན་གྱི་སྐྱེ་རྒྱུད་ཡིན་པ། འདུལ་འཛིན་བུ་སྟོན་ཐམས་ཅད་མཁྱེན་པའི་སྐྱེ་རྒྱུད་ཡིན་པ། བུ་སྟོན་རྗེ་ནི་ས་པཎ་དང་། བིར་ཝ་པ། འཇམ་པའི་དབྱངས་ཀྱི་སྐྱེ་རྒྱུད་ཡིན་པ་ཁུངས་སུ་མཛད་ནས་དོལ་རྒྱལ་འཇམ་དབྱངས་ཀྱི་རྣམ་སྤྲུལ་ཡིན་པ་གསུངས་ཡོད། པཎ་ཆེན་བསོད་ནམས་གྲགས་པ་འདུལ་འཛིན་གྲགས་པ་རྒྱལ་མཚན་དང་། བུ་སྟོན་ཐམས་ཅད་མཁྱེན་པ་སོགས་ཀྱི་སྐྱེ་རྒྱུད་ཡིན་པ་ཁུངས་ལྡན་གྱི་རྣམ་ཐར་དེབ་ཐེར་སོགས་ཡོད་ངེས་ཀྱང་། སྤྲུལ་སྐུ་གྲགས་པ་རྒྱལ་མཚན་སྤྲུལ་སྐུ་བསོད་ནམས་དགེ་ལེགས་དཔལ་བཟང་གི་ཡང་སྲིད་འཕྲུལ་མེད་ཡིན་པའི་ཚད་ཐུབ་ཀྱི་ནམ་ཐར་དེབ་ཐེར་མཇལ་ཞུ་མེད། ད་དུང་དེ་ལས་ལྡོག་སྟེ་སྤྲུལ་སྐུ་གྲགས་པ་རྒྱལ་མཚན་སྤྲུལ་སྐུ་དགེ་ལེགས་དཔལ་བཟང་གི་ཡང་སྲིད་རྫུན་མ་ལམ་དུ་ལྷོང་བ་སྨོན་ལམ་ལོག་པའི་དམ་སྲིར་གྱུར་པ་ཚད་ཐུབ་ཀྱི་དམ་པའི་རྣམ་མཐར་ནང་གསལ་ཡོད། ཡ་མཚན་པ་ཞིག་ལ་སྐྱབས་རྗེ་ཕ་བོང་ཁ་རིན་པོ་ཆེས་ལོ་རྒྱུས་འདི་མ་གཟིགས་པ་ཡོང་ཤེས་ཐབས་མེད་ཀྱང་གང་གི་གསུང་ནང་འདི་འདྲ་ཞིག་མ་གཟིགས་པ་ལྟར་མཛད་འདུག་པ་ནི་གང་ཡིན་ཞུ་ཚོད་དཀའ་བར་མཐོང་།

སྐྱབས་རྗེ་ཁྲི་བྱང་རིན་པོ་ཆེས་དོལ་རྒྱལ་གྱི་བསྟོད་འབྲེལ་ནང་དོལ་རྒྱལ་ངོ་བོ་རྗེ་བཙུན་འཇམ་པའི་དབྱངས་རྣམ་པ་དྲེག་པའི་སྐུར་བཞེངས་པ་ཡིན་ཚུལ་གསུངས་པའི་ཁུངས་སུ་གོང་གསལ་སྐྱབས་རྗེ་བདེ་ཆེན་སྙིང་པོས་དོལ་རྒྱལ་གྱི་བསྐང་ཆོག་ཏུ་གསུངས་པ་དེ་རང་ཚིག་སྤྲོས་ཅུང་ཟད་གནང་བ་ཙམ་རེད་འདུག དོལ་རྒྱལ་གྱི་སྟོད་པ་དེ་འགྲེལ་དང་བཅས་པའི་ནང་པཎ་ཆེན་བསོད་ནམས་གྲགས་པ་དང་། འདུལ་འཛིན་གྲགས་པ་རྒྱལ་མཚན། བུ་སྟོན་ཐམས་ཅད་མཁྱེན་པ། ཆོས་རྗེ་ས་པཎ་སོགས་ཀྱི་ཆེ་བའི་ཡོན་ཏན་ཐམས་ཅད་བརྗོད་དེ་སྐྱེས་ཆེན་དམ་པ་དེ་དག་གི་མཛད་པ་དོལ་རྒྱལ་གྱི་ཆེ་བར་ཁ་བསྒྱུར་གནང་བ་ལྟར་མཐོང་། ལར་ནས་དོལ་རྒྱལ་གྱི་བསྟོད་པ་དང་འགྲེལ་བ་གཉིས་ཀར་སྐབས་འགར་རྗེ་བཙུན་འཇམ་པའི་དབྱངས་རྗེའི་བསྟན་པ་སྲུང་ཕྱིར་དྲེག་པའི་སྐུར་བཞེངས་པར་གསུངས་པ་དང་། ཡང་སྐབས་འགར་གཟིམ་ཁང་འོག་ལ་འཁོན་འཛིན་དབང་གིས་དྲེག་པའི་སྐུར་བཞེངས་པ་འདྲ་ཞིག་ཀྱང་གསུངས་འདུག་ན་ཡིད་གཉིས་བཅོས་དཀའི་གནས་སུ་མཆིས། དེས་ན་ཟུར་གནས་སྐྱེ་བོ་རྣམ་པས་ལེགས་པར་དཔྱད་དེ་དེང་གི་ལོག་སྨྲའི་ཝ་ཚོགས་དཔུང་དང་བཅས་པའི་མུན་སྤྲུལ་གྱི་དམིགས་གཏད་ཐམས་ཅད་བཤིག་དགོས་པར་མཐོང་ངོ་།།

ཡོངས་འཛིན་གླིང་རིན་པོ་ཆེ་དོལ་རྒྱལ་དང་འབྲེལ་བ་མེད་པ་ཡོངས་གྲགས་ཡིན་ན་ཡང་། དེང་སྐབས་དོལ་རྒྱལ་རྗེས་འབྲང་པ་ཚོས་དེ་སྔ་ཡོངས་འཛིན་རིན་པོ་ཆེར་ཝཱ་ཎ་མཐོ་སློབ་དགེ་ལུགས་སྤྱི་ནས་བསྐུལ་ངོར་༼བླ་མ་ཡི་དམ་བསྟན་སྲུང་བཅས་ལ་མཆོད་གཏོར་འབུལ་ཚུལ།༽ ཞེས་པ་དེ་ཉིད་ཁ་འཕྱར་བྱེད་ཀྱི་འདུག འོན་ཀྱང་འཕྲིན་བསྐུལ་དེ་ནི་ཝཱ་ཎ་དགེ་ལུགས་སྤྱི་ནས་དགེ་ལུགས་དང་འབྲེལ་བའི་སྲུང་མ་འདི་དང་འདིའི་འཕྲིན་བསྐུལ་དགོས་ཞེས་དམིགས་འཛུགས་ཀྱིས་ཞུ་བསྐུལ་བྱས་པ་ཞིག་རེད་འདུག དེ་ལྟར་ཡིན་པ་དེ་ཡང་འཕྲིན་བསྐུལ་དེའི་མཇུག་བྱང་ཡིག་ཆུང་དུ། “འདི་ཉིད་ཝཱ་ཎ་མཐོ་སློབ་དགེ་ལུགས་སྤྱི་ཚོགས་ནས་རྒྱུན་ལྡན་ཞབས་རིམ་སྐབས་གསུང་རྒྱུའི་མགོན་ཆོས་ལྷ་མོ་རྣམ་སྲས་རྒྱལ་ཆེན་ཤུགས་ལྡན་བཅས་ཀྱི་བསྐང་བཤགས་འཕྲིན་བཅོལ་གསེར་སྐྱེམས་བཅས་སྟབས་བདེ་ཞིག་དགོས་གསུང་པ་ལྟར། སྐུ་བཅར་ཕན་བདེ་ལེགས་བཤད་གླིང་གི་གསུང་རྒྱུན་གསེར་ཞུན་མ་དང་། གསེར་སྐྱེམས་བཅས་གཞིར་བཞག་ཐོག་ཆོས་སྲུང་གི་མཚན་དང་། བསྟོད་པ་བཅས་ལ་འབྱིན་འཇུག་ཕྲན་བུ་བགྱིས་ཏེ་ཡོངས་འཛིན་དགའ་ཁྲི་གླིང་སྐྱེ་མིང་པས་བྲིས་པ་དགེ་ལེགས་འཕེལ།།” ཞེས་གསུངས་འདུག དེ་དང་དེས་མཚོན་དེང་སྐབས་དོལ་རྒྱལ་རྗེས་འབྲངས་པས་དོན་གནད་འགའ་ཤས་ལ་འུར་སྒྲོག་བྱས་ཏེ་ཡིག་ཆ་འདྲ་མིན་གང་སར་འགྲེམས་སྤེལ་བྱེད་བཞིན་འདུག་པས་འདིར་གསལ་བཤད་ཅུང་ཟད་ཅིག་མི་བྱེད་ཐབས་མེད་དུ་མཐོང་ནས་སྤེལ་བའོ།། །།