ཉེ་སྔོན་མཛོད་དགེ་རྫོང་ཐང་སྐོར་ཡུལ་ཚོའི་རུ་ཆེན་གཉིས་པའི་འབྲོག་པ་མང་ཚོགས་ཀྱིས་རྫོང་སྲིད་གཞུང་ལ་དགོས་འདུན་དོན་ཚན་གསུམ་ཅན་གྱི་ཞུ་ཡིག་ཅིག་སྤྲད་ཡོད་འདུག
འདི་གར་སྟོང་སྐོར་ཐུབ་བསྟན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༡ ཚེས་ ༢༨ ཉིན་ཏེ་སི་ཁྲོན་ཞིང་ཆེན་གྱི་མི་མང་འཐུས་མིའི་ཚོགས་ཆེན་ཐེངས་ ༣ པ་ཚོགས་བཞིན་པའི་སྐབས་དང་བསྟུན་ཏེ། མཛོད་དགེ་རྫོང་ཐང་སྐོར་ཡུལ་ཚོའི་འབྲོག་པ་ ༡༠ གྲངས་ཤིག་གིས་ཚོགས་ཁང་གི་ཕྱི་ལོགས་ནས་ཞི་རྒོལ་སྐད་འབོད་གནང་ཡོད་ཀྱང་། རྒྱ་གཞུང་གིས་བཟང་ཕྱོགས་ཀྱི་བརྡ་ལན་གང་ཡང་སྤྲད་མེད་པ་མ་ཟད། ཞི་རྒོལ་བ་འགའ་འཛིན་བཟུང་བཀག་ཉར་བྱས་པ་སོགས་དོན་འབྲས་གང་ཡང་སོན་མེད་སྟབས། ཉེ་སྔོན་ཡང་འབྲོག་པ་མང་ཚོས་ཀྱིས་མཛོད་དགེ་རྫོང་སྲིད་གཞུང་གི་མགོ་ཁྲིད་ཚོར་ཞུ་ཡིག་ཅིག་སྤྲད་དེ། ཁོང་ཚོའི་བྱ་སྤྱོད་ཀྱིས་འབྲོག་མང་ལ་བརྗོད་ཐབས་བྲལ་བའི་དཀའ་ངལ་བཟོས་ཡོད་པ་དང་། ད་ལྟ་ས་ཆ་མེད་ལ་ཁང་པའང་མེད་པས་འཚོ་བ་འཁྱོལ་དཀའ་བའི་གནས་སུ་ལྷུང་ཡོད་སྐོར་བརྗོད་ཡོད་པ་མ་ཟད། ས་གནས་སྲིད་གཞུང་གིས་ས་ཆ་བཙན་འཕྲོག་བྱས་པའི་འབྲོག་པ་ཁག་ཅིག་གིས། བརྙན་ཐུང་བརྒྱུད་མིག་ཆུ་ཤོར་བཞིན་དུ་མགོ་ཁྲིད་ཚོས་མི་མང་གི་དཀའ་སྡུག་ལ་བསམ་ཤེས་དགོས་པའི་རེ་སྐུལ་བྱས་འདུག
ཞུ་གཏུག་ཡི་གེ་དེའི་ནང་དུ། ཕྱི་ལོ་ ༢༠༡༠ ལོར་ཐང་སྐོར་ཡུལ་ཚོའི་ས་གནས་སྲིད་གཞུང་གིས་གྲོང་ཁྱེར་ལྗང་མདོག་ཅན་དུ་བསྒྱུར་བར་ཁ་གཡར་ཏེ། ཐང་སྐོར་ཡུལ་ཚོ་སྐ་བར་མ་སྡེ་བའི་རྩྭ་ས་དང་འབྲོག་མང་སྡོད་ཁུལ་གྱི་ཧ་ལམ་མུའུ་ ༤༠༠ ལྷག་བཙན་གྱིས་བླངས་སོང་བ་དང་། ས་དེར་ཡོད་པའི་དུད་ཁྱིམ་ཉི་ཤུ་ལྷག་གནས་སྤོར་མི་བྱེད་ཐབས་མེད་བྱུང་ཞིང་། དེའི་ཁྲོད་ཀྱི་དུད་ཁྱིམ་བཅུ་ལྷག་ནི་དབུལ་ཕོངས་ཁྱིམ་ཚང་འབའ་ཞིག་ཡིན་ལ། མིག་སྔར་ཁྱིམ་ཚང་ཉི་ཤུ་ལྷག་དེར་སྡོད་གནས་སོགས་ཅི་ཡང་བཀོད་སྒྲིག་བྱས་མེད་ཀྱང་། སྲིད་གཞུང་གིས་བཤད་ན། བཙན་གྱིས་གནས་སྤར་བའི་ཁྱིམ་ཚང་ ༢༠ ལྷག་དེས་འབྲོག་པའི་སྡེ་གསར་དང་། འབྲོག་མང་གཏན་སྡོད་འཛུགས་སྐྲུན་ཁྲོད་ཁང་སའི་སྲིད་ཇུས་ལོངས་སུ་སྤྱོད་ཐུབ་ཡོད་ཟེར་མོད། དོན་དངོས་སུ་འབྲོག་མང་གཏན་སྡོད་ནི་ ༢༠༡༤ ལོར་གསར་དུ་བསྐྲུན་པ་ཡིན་ལ། ཁྱིམ་ཚང་ཉི་ཤུ་ལྷག་དེ་ ༢༠༡༠ ལོར་རང་ལ་དབང་བའི་ཁང་ས་ནས་གནས་མི་སྤར་ཐབས་མེད་བྱུང་བ་རེད། གནས་སྤར་བའི་ལོ་ངོ་ ༤ རིང་སྲིད་གཞུང་གིས་གསལ་བཤད་ཅི་ཡང་བྱས་མེད། བཙན་གྱིས་བཤིག་པའི་ཁང་བ་དེ་དག་དང་བཙན་གྱིས་འཕྲོག་སོང་བའི་ཁང་ས་དེ་དག་ནི། འབྲོག་པ་རང་གིས་དངུལ་ཕུད་ནས་ཉོས་པ་རྐྱང་རྐྱང་ཡིན། འབྲོག་མང་གཏན་སྡོད་ཁང་བ་ནི་ཁང་བ་དང་ཁང་ས་འཕྲོག་སོང་བའི་ཁྱིམ་ཚང་དག་ལ་དམིགས་བསལ་གྱིས་ཐོབ་པ་མ་ཡིན་པར་སྡེ་བ་ཡོངས་ལ་ཡོད་པ་རེད། དེའི་ཕྱིར་འབྲོག་མང་གཏན་སྡོད་ནི་ཁང་ས་སྤར་དང་མ་སྤར་ལ་འབྲེལ་བ་མི་འདུག ཅེས་དང་།
མུ་མཐུད་དུ་བཀོད་དོན། འབྲོག་མང་གཏན་སྡོད་ཁང་བ་ཟེར་བ་འདིར་སྤུས་ཀ་ཧ་ཅང་ཞན་ལ། རླུང་གཡུག་པ་ཙམ་གྱིས་ཁང་བའི་ཀླད་ཚང་མ་ཁུར་འགྲོ་བས། གཏན་སྡོད་ཁང་བ་གསར་པ་དེ་ཚོ་ཉེན་ཁ་ཅན་ཞིག་མ་ཡིན་ནམ། བྱ་བ་འདི་རིགས་ནི་རྒྱལ་ཁབ་ཀྱི་མ་དངུལ་འཕྲོ་བརླག་ཏུ་བཏང་བ་མ་ཟད། ལྷག་པར་དུ་ཁང་བའི་ནང་འདུག་མཁན་གྱི་བདེ་འཇགས་ལ་འདང་གཏན་ནས་བརྒྱབ་མེད་པའི་ལས་ཀ་ཞིག་རེད། བསམ་ཡུལ་ལས་འདས་བ་ཞིག་ལ་འཁོས་ཆུང་དབང་ཆུང་གི་དབུལ་ཕོངས་ཁྱིམ་ཚང་སྐོར་ཞིག་རུ་སྤོར་དུ་བཅུག་པ་ལས། དབང་ཆ་ལྡན་པའི་ཁྱིམ་ཚང་རྣམས་སྔར་བཞིན་གཞི་སྡོད་གཏན་འཇགས་བྱས་འདུག དེ་ལས་ཀྱང་ཐལ་དྲགས་པའི་གནས་ཚུལ་ཞིག་ནི། སྲིད་གཞུང་གིས་གྲོང་ཁྱེར་ལྗང་མདོག་ཅན་དུ་བསྒྱུར་བའི་དར་ཆ་མཐོན་པོར་བསྒྲེངས་བཞིན་རྒྱལ་ཁབ་ཀྱི་མིང་བྱང་གཡར་ཏེ། རྩྭ་ས་ཕལ་ཆེར་མི་སྒེར་ལ་བཙོང་སྟེ་ལྗོངས་རྒྱུ་ལྟེ་གནས་བཙུགས་ཡོད་པ་མ་ཟད། ཐ་ན་ཕྱུགས་ཟོག་གིས་ཆུ་འཐུང་སའི་གནས་ཡུལ་དག་ཀྱང་ལས་ཁུངས་གང་ཡང་རུང་བ་ཞིག་གིས་སྒེར་གཅོད་བྱས་ནས་གྲུ་ཁ་འཛུགས་སྐྲུན་བྱེད་བཞིན་འདུག དེ་སྔོན་སྲིད་གཞུང་གིས་མགྲིན་པ་གཟེངས་སུ་བཏེགས་ཏེ། གྲོང་ཁྱེར་ལྗང་མདོག་ཅན་དུ་བསྒྱུར་བའི་ཁ་གཡང་དེ་ད་ནི་སྒེར་གྱི་ཧམ་སེམས་འགང་བྱེད་ཀྱི་འདུ་བཀོད་ལས་མ་འདས་སོ། དེ་བས་འབྲེལ་ཡོད་སྡེ་ཁག་གིས་ཐུགས་ཁུར་ཟབ་བཞེས་གནང་སྟེ། རྒྱལ་ཁབ་ཀྱི་རྩྭ་ཁྲིམས་ལྟར་མི་མང་མང་ཚོགས་ཀྱི་ཁེ་དབང་ལ་སྲུང་སྐྱོབ་བྱེད་རྒྱུ་མཁྱེན་མཁྱེན། ཞེས་བཀོད་འདུག
ཡང་ཞུ་ཡིག་ནང་། ཕྱི་ལོ་ ༢༠༡༤ ལོར་རྩྭ་ས་དང་སྡོད་གནས་ཤོར་བའི་གནོད་འཚེ་ཐེབས་མཁན་དག་གིས་འཐུས་ཚབ་མི་སྣ་སྐོར་ཞིག་བདམགས་ཏེ་སྡེ་མང་ཨུ་ཡོན་ལྷན་ཁང་དང་གྲོང་རྡལ་སྲིད་གཞུང་། རྫོང་སྲིད་གཞུང་སོགས་ལ་གནད་དོན་ཐག་གཅོད་ཐད་ཀྱི་སྙན་གསེང་རབས་དང་རིམ་པ་ཐེངས་མང་ཞུས་མྱོང་ལ། རྫོང་སྲིད་གཞུང་གིས་ཀྱང་ཟླ་གཉིས་ཀྱི་ནང་གནད་དོན་མཐའ་དག་ཐག་གཅོད་བྱེད་རྒྱུ་ཡིན་པར་དམ་བཅས་ཡོད། ཡིན་ནའང་རྫོང་སྲིད་གཞུང་གིས་ཁ་བཤད་ཆུ་ཡི་ལྦུ་བ་ཟེར་བའི་དཔེ་ནང་བཞིན་མང་ཚོགས་ཀྱི་རེ་འབོད་རྩྭ་བཞིན་དོར་ཏེ་དང་དུ་བླངས་མ་བྱུང་། ཐེངས་སྔོན་མར་སྙན་གསང་ཞུས་པའི་དུས་ཚོད་ནི་ ༢༠༡༤ ཟླ་ ༡༡ པའི་ཚེས་ ༡༧ ཡིན་ལ། ཟླ་གཉིས་ཀྱི་དབང་དུ་བྱས་ནས་ ༢༠༡༥ ལོའི་ཟླ་ ༡ ཚེས་ ༡༧ ཉིན་ནི་དུས་བཅད་ཀྱི་ཉིན་མོར་བསླེབས་འདུག་ཀྱང་། ད་ལྟའང་གནད་དོན་ཐག་གཅོད་བྱས་མ་བྱུང་། དེའི་རྗེས་འཐུས་ཚབ་མི་སྣ་རྣམས་ཡང་བསྐྱར་རྫོང་སྲིད་གཞུང་གི་སྒོ་ཐེམ་བསྙེགས་ཏེ་མྱུར་མོར་གནད་དོན་ཐག་གཅོད་བྱེད་དགོས་ཚུལ་གྱི་བླང་བྱ་བཏོན་ཡང་། སྔར་བཞིན་ངལ་བ་འབྲས་མེད་དུ་གྱུར་སོང་སྟབས། གནོད་འཚེ་ཐེབས་མཁན་གྱི་མང་ཚོགས་རྣམས་ཐབས་ཟད་དེ་ཁྲིན་ཏུའུ་གྲོང་ཁྱེར་ལ་གཏུག་བཤེར་བྱེད་པར་མི་འགྲོ་ཀ་མེད་བྱུང་། ཞེས་དང་།
འདི་ལྟར་བགྱིས་པའི་དམིགས་ཡུལ་ཕྲ་མོ་ཡང་ངེས་པ་དོན་གྱིས་མང་ཚོགས་རྣམས་ཀྱི་གནད་དོན་ཐག་གཅོད་དང་། གནད་དོན་ལ་ཐུགས་འཁུར་བྱེད་མཁན་གྱི་མགོ་ཁྲིད་དམ་འབྲེལ་ཡོད་སྡེ་ཁག་ཅིག་འཚོལ་དུ་ཕྱིན་པ་ཡིན། ཐེངས་འདིའི་གཏུག་བཤེར་ཁྲོད་རྔ་བ་ཁུལ་མི་མང་སྲིད་གཞུང་གིས་གནད་དོན་འདི་དག་ཐག་གཅོད་ཕྱིར་ཆེད་དུ་ལས་བྱེད་མི་སྣ་སྐོར་ཞིག་མངགས་པར་དམ་བཅས་སོང་། ཡིན་ནའང་། འདི་ཐམས་ཅད་ཀྱང་བྱིས་པ་བསམ་མེད་ལ་མགོ་སྐོར་གཏོང་བྱེད་ཀྱི་གནའ་གཏམ་ལས་མ་འདས་སོ། དེ་ལས་ཀྱང་མི་སེམས་ལ་ཟུག་གཟེར་སློང་བྱེད་ཀྱི་དོན་དག་ཅིག་ནི། མཛོད་དགེ་རྫོང་མི་མང་སྲིད་གཞུང་གིས་བཙན་ཤེད་ཀྱིས་གཏུག་བཤེར་མི་སྣའི་ཁྲོད། རྒྱ་སྐད་བཤད་མཁན་གཉིས་ཡོད་པའང་འཛིན་བཟུང་བྱས་ཏེ་མཛོད་དགེ་རྫོང་དུ་བཙན་ཁྲིད་བྱས་པ་མ་ཟད། མི་གཅིག་ཉིན་བདུན་དང་མི་གཞན་གཅིག་ཉིན་བཅུའི་རིང་བཀག་སྐྱིལ་བྱས་ཡོད་པ་དང་། བཀག་སྐྱིལ་སྐབས་མི་སུ་དང་གང་ལའང་འཕྲད་དུ་མ་བཅུག་ཅིང་ཟས་རིགས་སོགས་ཀྱང་མཁོ་སྤྲོད་བྱེད་པར་བཀག་སྡོམ་བྱས། དེ་ལས་ཀྱང་ཚབས་ཆེ་བ་ཞིག་ནི་ཉེན་རྟོག་ཕྱོགས་ཀྱིས་བཟའ་མི་ལའང་བརྡ་ཙམ་མ་བཏང་བས། བཟའ་མི་རྣམས་ཀྱིས་ཕྱོགས་ཡར་མར་ལ་རྩད་བཅད་རྗེས་ད་གཟོད་ཉེན་རྟོག་ཕྱོགས་ཀྱིས་བཀག་སྐྱིལ་བྱས་ཡོད་པ་ཤེས་རྟོགས་བྱུང་། ཞེས་བཀོད་འདུག
ཡང་ཞུ་ཡིག་ནང་། ཚོགས་ཆེན་སྐབས་གཏུག་བཤེར་བྱས་རྗེས་ཁུལ་སྲིད་གཞུང་གིས་གནད་དོན་ཐག་གཅོད་ཀྱི་ལས་བྱེད་མི་སྣ་མངགས་མ་བྱུང་བས། ཕྱི་ལོ་ ༢༠༡༥ ཟླ་ ༢ ཚེས་ ༥ ཉིན་རྫོང་སྲིད་གཞུང་གིས་དྲང་བདེན་མིན་པའི་བསམ་འཆར་ཡི་གེ་ཞིག་བརྒྱུད་སྒྲོག་བྱས་བྱུང་། ཡིན་ནའང་། ང་ཚོས་སྔར་བཞིན་ཁ་ཞེ་གཉིས་མེད་དང་བློ་ཐག་རྦད་ཆོད་ཀྱིས་ས་གནས་སྲིད་གཞུང་ལ་ཡིད་ཆེས་བརྟན་པོ་བཅངས་ཡོད་པས། བརྒྱུད་རིམ་ལྡན་པའི་སྒོ་ནས་ཡང་བསྐྱར་གནད་དོན་ཐག་གཅོད་པར་རེ་ཞུ་བྱས་པ་ཡིན་ལ། མཛོད་དགེ་རྫོང་མི་མང་སྲིད་གཞུང་གིས་ཀྱང་ཉིན་ ༡༥ ནང་གནད་དོན་མཐའ་དག་ཐག་གཅོད་བྱེད་རྒྱུར་དམ་བཅས་པ་མ་ཟད། གལ་ཏེ་ཐག་གཅོད་ཀྱི་མཇུག་འབྲས་མང་ཚོགས་ཀྱི་འདོད་བློ་དང་མི་མཐུན་ན། རྔ་བ་ཁུལ་སྲིད་གཞུང་ལ་རེ་ཞུ་བྱས་ཆོག་ཟེར། འོན་ཀྱང་རྫོང་སྲིད་གཞུང་གིས་ཡང་བསྐྱར་མི་མང་མང་ཚོགས་ཀྱི་རེ་འབོད་རྣ་རྒྱབ་ཀྱི་ལྷག་པ་བཞིན་རྒྱང་དུ་དོར་ཏེ་ཨ་ལན་སྤྲད་མེད་པ་མ་ཟད། ད་ལྟ་ས་གནས་སྲིད་གཞུང་གིས་ནམ་རྒྱུན་ང་ཚོའི་གནད་དོན་འཚོལ་བཞིན་ཡོད་པ་མ་ཟད། ང་ཚོའི་བྱ་བ་སྤྱོད་པ་ནི་ཁྲིམས་འགལ་ཡིན་པའི་འཇིགས་སྐུལ་གནང་གི་འདུག ཁོ་ཚོའི་དམིགས་ཡུལ་ནི་ང་ཚོ་འགོག་པ་ལས་དོན་དག་དངོས་ལ་གཟིགས་ཏེ། ང་ཚོའི་གནད་དོན་ཐག་གཅོད་ལ་འབད་ཀྱི་མེད་པ་མ་ཟད། སྐབས་རེར་ཁྱོད་ཚོས་མུ་མཐུད་ས་དོན་བཤད་ན་ལོ་གསུམ་ནས་བཞི་བར་གྱི་ཁྲིམས་ཐག་གཅོད་ཀྱི་ཡིན་ཞེས་འཇིགས་སྐུལ་གནང་བ་དང་། མཚམས་རེར་འབྲོག་ཁྱིམ་དུ་ཡོང་ནས་གང་འདོད་ཀྱིས་པར་དུ་ལེན་པ། ཡང་མཚམས་རེར་ཁྱོད་ཚོའི་རྩོད་ལེན་ནི་འབྲས་བུ་མེད་པའི་བྱ་བ་ཞིག་ཡིན་སྐོར་བརྗོད་པ་སོགས་ཀྱིས། ང་ཚོའི་ལུས་སེམས་ཀྱི་བདེ་འཇགས་ཐད་འཇིགས་སྣང་ཚབས་ཆེན་ཐེབས་ཀྱི་འདུག ཅེས་དང་།
ཞུ་ཡིག་གི་མཇུག་ཏུ། བཀུར་འོས་པའི་མགོ་ཁྲིད་ལགས། ང་ཚོ་འབྲོག་པ་དག་གིས་རྒྱ་སྐད་མི་འཇོན་ལ། ཁྲིམས་ལུགས་ལའང་རྨོངས། ཡིན་ནའང་། ང་ཚོ་ལ་མཚོན་ན། རྩྭ་ས་ནི་འཚོ་བ་བརྟེན་ས་ཉག་གཅིག་ཡིན། གལ་ཏེ་རྩྭ་ས་མེད་སོང་བ་དང་། ཁང་ས་མེད་སོང་ན། ང་ཚོ་ལ་ཅི་ཡང་མེད་སོང་བ་རེད། ཡིན་ནའང་། ང་ཚོ་རྒྱལ་ཁབ་དང་ཀྲུའུ་ཞི་ཞི་ཅིན་ཕིན་ལ་ཡིད་ཆེས་ཡོད། འབྲེལ་ཡོད་གོང་རིམ་མགོ་ཁྲིད་ཀྱིས་ང་ཚོའི་ས་དོན་ཐག་གཅོད་དྲང་མོ་བྱེད་པར་རེ་སྒུག་བྱས་ཡོད། ང་ཚོ་ལ་རེ་བ་གསུམ་མ་གཏོགས་མེད། གཅིག་ང་ཚོའི་ཁང་བ་གཞུང་བཞེས་བྱས་པའི་ལོ་འདི་དག་ལ་གསབ་དངུལ་མི་དགོས། ཡིན་ནའང་། ས་གནས་སྲིད་གཞུང་གིས་བླངས་སོང་བའི་ང་ཚོའི་ཁང་ས་ཕྱིར་གནང་རོགས། གཉིས། ང་ཚོར་ས་གནས་སྲིད་གཞུང་གིས་དངོས་གནས་བདེ་འཇགས་ངང་གནས་སྡོད་ཆོག་པའི་འབྲོག་མང་གཏན་སྡོད་ཀྱི་ཁང་པ་ཞིག་སྤྲོད་རོགས། གསུམ། ང་ཚོར་ས་གནས་སྲིད་གཞུང་གི་མགོ་ཁྲིད་ཚོས་འཇིགས་སྐུལ་ཚབས་ཆེན་བྱས་སོང་བས། རྫོང་སྲིད་གཞུང་གི་མགོ་ཁྲིད་ཚོས་ང་ཚོའི་ཁེ་དབང་དང་བདེ་འཇགས་ལ་སྲུང་སྐྱོབ་གནང་རོགས། ཞེས་འབོད་སྐུལ་བྱས་འདུག
གསར་འགོད་པ། པདྨ་མཚོ།
