དེ་རིང་ཡེ་ཤུའི་ཆོས་དཔོན་ཌེ་སི་མོན་ཀྲའུ་ཀྲའུ་མཆོག་བཞུགས་སྒར་དྷ་རམ་ས་ལར་ཕེབས་ཡོད་ཅིང་། ༧གོང་ས་མཆོག་དང་ལྷན་དུ་ཉིན་ལྔའི་རིང་བདེ་སྐྱིད་སྐོར་གྱི་ཕྱག་དེབ་ཅིག་རྩོམ་སྒྲིག་གནང་ཕྱོགས་སྐོར་ལ་ཕྱག་ལས་གནང་རྒྱུ་ཡིན་འདུག
༧གོང་ས་མཆོག་དང་ལྷོ་ཨ་ཧྥི་རི་ཀའི་ཡེ་ཤུའི་ཆོས་དཔོན་ཌེ་སི་མོན་ཀྲའུ་ཀྲའུ་ (Archbishop Desmond Tutu) མཆོག་རྣམ་གཉིས་ཀྱིས་དགའ་སྐྱིད་(JOY)ཅེས་པའི་དཔེ་དེབ་ཅིག་ལྗགས་རྩོམ་གནང་འཆར་ཡོད་སྟབས། དེ་རིང་སྔ་དྲོའི་ཆུ་ཚོད་ ༡༡།༤༥ ཐོག་ཆོས་དཔོན་ཌེ་སི་མོན་ཀྲའུ་ཀྲའུ་མཆོག་གྷ་གྷལ་གནམ་ཐང་དུ་འབྱོར་ཡོད་པ་དང་། སྐབས་དེར་༧གོང་ས་མཆོག་ཆེད་དུ་བཞུགས་སྒར་ཕོ་བྲང་ནས་གྷ་གྷལ་གནམ་ཐང་དུ་ཞབས་སོར་བཀོད་དེ། ཁོང་གི་ཆོས་གྲོགས་ཌེ་སི་མོན་ཀྲའུ་ཀྲའུ་མཆོག་ལ་ཕེབས་བསུ་ཞུས་ཡོད་པ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བདེ་སྲུང་བཀའ་བློན་མཆོག དེ་མིན་བཞུགས་སྒར་ཁུལ་གྱི་མང་ཚོགས་བཅས་ཀྱིས་ཀྱང་ཕེབས་བསུ་ཞུས་སོང་།
ལྷོ་ཨ་ཧྥི་རི་ཀའི་ནོ་བྷེལ་ཞི་བདེའི་གཟེངས་རྟགས་བཞེས་མྱོང་མཁན་ཆོས་དཔོན་ཌེ་སི་མོན་ཀྲའུ་ཀྲའུ་མཆོག་གྷ་གྷལ་གནམ་ཐང་དུ་འབྱོར་མ་ཐག རྒྱ་གར་དང་བོད་པའི་གསར་འགོད་པ་ཚོས་ཁོང་ལ། དུས་ཡུན་གང་འཚམ་རྗེས་སླར་ཡང་རྒྱ་གར་དྷ་རམ་ས་ལར་ཕེབས་པར་ཚོར་བ་གང་འདྲ་བྱུང་བ་དྲིས་པའི་ལན་དུ་ཁོང་གིས། ད་རེབ་ངའི་བརྩེ་བའི་ཆོས་གྲོགས་དང་ལྷན་དུ་མཉམ་འཛོམས་བྱུང་བར་དགའ་ཚོར་ཆེན་པོ་ཞེ་དྲགས་བྱུང་། མི་འགའ་ཤས་ཀྱི་བྱ་སྤྱོད་དང་ཕྱིའི་གནོན་ཤུགས་དབང་གིས་ཆོས་གྲོགས་ངེད་གཉིས་ཁ་བྲལ་གཏོང་ཐབས་བྱེད་བཞིན་ཡོད་ཀྱང་། ངེད་གཉིས་བར་ཕན་ཚུན་བརྩེ་བ་ཟབ་མོ་ཡོད་པ་མ་ཟད། འཛམ་གླིང་ཀུན་ཁྱབ་ལ་མཁོ་བའི་རྒྱུ་རྐྱེན་མང་པོ་ཞིག་གི་དབང་གིས་ད་ལྟ་དང་མ་འོངས་པར་མཇལ་རྒྱུའི་གོ་སྐབས་ཡོང་གི་རེད། དེ་སྔོན་ང་རང་ལོ་ ༨༠ ལ་སོན་པའི་སྐྱེས་སྐར་སྐབས་ངས་༧གོང་ས་ཏཱ་ལའི་བླ་མ་མཆོག་ལྷོ་ཨ་ཧྥི་རི་ཀར་གདན་འདྲེན་ཞུས་ཀྱང་། ཁོང་ལ་ལྷོ་ཨ་ཧྥི་རི་ཀའི་གཞུང་གིས་ཐོངས་མཆན་ཕུལ་མེད་སྟབས། ངེད་གཉིས་ཀྱིས་དྲ་ཐོག་བརྒྱུད་སྐད་ཆ་བཤད་ནས་རྒྱལ་ཡོངས་ལ་ཐད་གཏོང་བྱས་ཡོད་པ་མ་ཟད། སྐབས་དེར་ངས་༧གོང་ས་ཏཱ་ལའི་བླ་མ་མཆོག་ལ་ཕུགས་བསམ་ག་ཚོད་ཡོད་མེད་དང་རྒྱ་ནག་གཞུང་ཁོང་ལ་ཞེད་དགོས་དོན་གང་ཡིན་དྲིས་པ་ཡིན།
ངས་ཁོ་ཚོས་བཤད་པ་དེ་བདེན་པ་ཡིན་སྲིད་པ་ཞིག་རེད། རྒྱ་ནག་གཞུང་གིས་བོད་མིའི་ཆོས་ཕྱོགས་ཀྱི་དབུ་ཁྲིད་༧གོང་ས་མཆོག་གི་མཛད་འཕྲིན་ཁག་ལ་དུས་དང་རྣམ་པ་ཀུན་ཏུ་དོ་ནན་ཆེན་པོས་འགོག་རྐྱེན་བཟོ་བཞིན་ཡོད། དེ་སྔོན་༧གོང་ས་མཆོག་ནེལ་སན་མན་ཌ་ལཱ་ལྷོ་ཨ་ཧྥི་རི་ཀའི་སྲིད་འཛིན་གནང་སྐབས་ལྷོ་ཨ་ཧྥི་རི་ཀའི་ནང་ཆིབས་བསྐྱུར་བསྐྱངས་ཡོད་ཀྱང་། སྐབས་དེར་གཞུང་དམངས་གཉིས་ལ་སྡུག་ཕྱོགས་ནས་ཤུགས་རྐྱེན་གང་ཡང་ཐེབས་མེད་པ་ལྟར། མ་འོངས་པ་ལའང་ཕྱོགས་གཉིས་བར་ཕན་ཚུན་འཆམ་མཐུན་དང་བྱམས་བརྩེ། བསམ་ཤེས་དང་མཉམ་གནས་བྱེད་ཐུབ་པ་ཡིན་ན། ད་ལྟ་དཀྱིལ་ཤར་ཡུལ་གྲུའི་ནང་སི་རི་ཡ་དང་ཨི་རག་གི་མཉམ་འབྲེལ་དྲག་སྤྱོད་ཤོག་ཁག་ (ISI) གིས་ཁེན་ཡཱ་སོགས་ནང་དྲག་སྤྱོད་བྱ་འགུལ་སྤེལ་ཏེ། དཀོན་མཆོག་ངུ་ཤོར་བ་བཟོ་བཞིན་པ་དག་འབྱུང་གི་མ་རེད། ད་ཐེངས་ང་འདིར་ཡོང་དགོས་དོན་ནི་༧གོང་ས་མཆོག་དང་མཉམ་འཛོམས་བྱས་ནས་མཛའ་གྲོགས་ཀྱི་དཔལ་ལ་རོལ་རྒྱུ་དང་འབྲེལ་བདེ་སྐྱིད་དང་དགའ་བ་སྐོར་ལ་བཀའ་མོལ་གནང་རྒྱུ་ཡིན། ཞེས་གསུངས་སོང་།
༧གོང་ས་མཆོག་གྷ་གྷལ་གནམ་ཐང་དུ་ཆོས་དཔོན་ཌེ་སི་མོན་ཀྲའུ་ཀྲའུ་མཆོག་གི་ཕེབས་བསུར་བཅར་སྐབས་གསར་འགོད་པར། དེ་རིང་ངའི་བརྩེ་བའི་ཆོས་གྲོགས་འདིར་ཕེབས་ཀྱི་ཡོད་སྟབས་དགའ་ཚོར་ཆེན་པོ་འདུག གང་ཡིན་ཟེར་ན་གཅིག་ནས་ཁོང་འགྲོ་བ་མིའི་རིགས་ཤིག་ཡིན་པའི་ཆ་ནས་བཤད་ན། མི་ངོ་མཚར་ཅན་ཞིག་ཡིན་པ་དང་། གཉིས་ནས་ཆོས་ཕྱོགས་ཐོག་ནས་བཤད་ན་ཆོས་ཉམས་ལེན་བྱེད་མཁན་གྱི་ཆོས་པ་རྣམ་དག་ཅིག་ཡིན། གསུམ་ནས་ཁོང་ནི་ངོས་ཀྱི་མཛའ་མཐུན་གྱི་ཆོས་གྲོགས་ཡག་པོ་ཞིག་ཡིན་པ་མ་ཟད། དུས་རྒྱུན་ཁོང་གིས་ངོས་ཀྱི་སྐོར་འགྲེལ་བཤད་གནང་སྐབས་ངོས་ནི་འཚུབ་ཆ་ཅན་གྱི་ཏཱ་ལའི་བླ་མ་རེད་རྗོད་ཀྱི་ཡོད་པ་ལྟར། ངོས་ཀྱིས་ཀྱང་ཁོང་འཚུབ་ཆ་ཅན་གྱི་མི་ཞིག་རེད་ཅེས་ཁོང་ལ་ཀུ་རེ་བྱས་ནས་ཞུ་གི་ཡོད། ཁོང་ནི་སྙན་གྲགས་ཅན་གྱི་མི་སྣ་ཞིག་ཡིན་པ་མ་ཟད་མི་བཟང་པོ་ཞིག་ཀྱང་ཡིན། ཁོང་ཡེ་ཤུའི་ཆོས་པ་ཡིན་པ་གང་ཞིག་ཆོས་ལུགས་ཚང་མར་གུས་བརྩི་གནང་མཁན་གྱི་སྐྱེ་བུ་ཞིག་ཡིན། དེ་རིང་ཞོགས་པར་ཁོང་གིས་ཨཱ་མེར་སར་གསེར་གྱི་ལྷ་ཁང་ (Golden Temple) མཇལ་གནང་ཡོད་པ་རེད། ཅེས་གསུངས་སོང་།
གསར་འགོད་པས་སྐུ་སྒེར་དྲུང་ཆེ་འཆི་མེད་རིག་འཛིན་ལགས་སུ། ད་རེབ་ཌེ་སི་མོན་ཀྲའུ་ཀྲའུ་མཆོག་བཞུགས་སྒར་དྷ་རམ་ས་ལར་ཕེབས་དོན་གང་ཡིན་སྐོར་དྲིས་པར་ཁོང་གིས། དེ་སྔོན་༧གོང་ས་མཆོག་དང་ཌེ་སི་མོན་ཀྲའུ་ཀྲའུ་མཆོག་རྣམ་གཉིས་ཀྱིས་དགའ་སྐྱིད་ཅེས་པའི་དཔེ་དེབ་ཅིག་ལྗགས་རྩོམ་གནང་རྒྱུའི་བཀའ་མོལ་བྱུང་ཡོད་སྟབས། ད་ཐེངས་ཁོང་འདིར་ཕེབས་ནས་༧གོང་ས་མཆོག་དང་དེབ་དེའི་སྐོར་ལ་བཀའ་བསྡུར་དང་དྲི་བ་དྲིས་ལན་གནང་རྒྱུ་མ་ཟད། དཔེ་དེབ་རྩོམ་སྒྲིག་གནང་མཁན་གྱི་ཕྱི་རྒྱལ་བ་དང་༧གོང་ས་མཆོག་གི་གསུང་བསྒྱུར་དགེ་བཤེས་ཐུབ་བསྟན་སྤྱིན་པ་ལགས་ཀྱང་ཕེབས་ཡོད་པ་རེད། ཅེས་བརྗོད་བྱུང་།
ཁོང་ལ་ཆོས་དཔོན་ཌེ་སི་མོན་ཀྲའུ་ཀྲའུ་མཆོག་དྷ་རམ་ས་ལར་ཉིན་གྲངས་ག་ཚོད་བཞུགས་མིན་དང་མཛད་འཆར་གང་དག་ཡོད་མེད་དྲིས་པར་ཁོང་གིས། ཌེ་སི་མོན་ཀྲའུ་ཀྲའུ་མཆོག་བཞུགས་སྒར་དུ་ཉིན་ ༥ རིང་བཞུགས་རྒྱུ་ཡིན་ཡང་། དུས་ཚོད་མང་ཆེ་བ་དཔེ་དེབ་རྩོམ་སྒྲིག་སྐོར་ལ་གཏོང་རྒྱུ་ཡིན་སྟབས། ད་ལྟའི་ཆར་མཛད་འཆར་གང་ཡང་གཏན་འཁེལ་བྱས་མེད་ཀྱང་། ད་ལྟ་ང་ཚོས་ཐབས་ཤེས་བྱེད་བཞིན་པ་ཞིག་ལ་ཉིན་གཅིག་༧གོང་ས་མཆོག་དང་ཌེ་སི་མོན་ཀྲའུ་ཀྲའུ་མཆོག་རྣམ་གཉིས་དྷ་སྟེང་བོད་ཁྱིམ་ལ་བཅར་ནས་སློབ་ཕྲུག་ཚོ་དང་་བཀའ་མོལ་གནང་རྒྱུའི་གོ་སྐབས་ཤིག་བསྐྲུན་རྒྱུར་འབད་བརྩོན་བྱེད་བཞིན་ཡོད། ཅེས་བརྗོད་བྱུང་།
གསར་འགོད་པ། དོན་གྲུབ།
་་་་་་་་་་་ ད་ལྟ་ང་ཚོས་ཐབས་ཤེས་བྱེད་བཞིན་པ་ཞིག་ལ་ཉིན་གཅིག་༧གོང་ས་མཆོག་དང་ཌེ་སི་མོན་ཀྲའུ་ཀྲའུ་མཆོག་རྣམ་གཉིས་དྷ་སྟེང་བོད་ཁྱིམ་ལ་བཅར་ནས་སློབ་ཕྲུག་ཚོར་ནམ་རྒྱུན་བཀའ་མོལ་གནང་བ་ལྟར་མིན་པར།
གུ་ཡངས་པོའི་ཐོག་ནས་ཕྲུ་གུ་ཚོ་དང་མཉམ་དུ་རྩེད་མོ་རྩེད་རྒྱུའི་གོ་སྐབས་ཤིག་བསྐྲུན་རྒྱུར་འབད་བརྩོན་བྱེད་བཞིན་ཡོད། ་་་་་་་་་་་་་་