བྱང་ཀོ་རི་ཡའི་བདེ་སྲུང་བློན་ཆེན་དམར་གསོད།

བྱང་ཀོ་རི་ཡའི་མགོ་ཁྲིད་ཀེམ་ཇོན་ཨང་གིས་བྱང་ཀོ་རི་ཡའི་བདེ་སྲུང་བློན་ཆེན་དང་དམག་སྤྱི་གཅིག་ལྕོགས་ཡཱང་ཅོལ་ཟེར་བ་ཁོང་དམར་གསོད་བཏང་ཡོད་འདུག

དེ་རིང་བྱང་ཀོ་རི་ཡའི་ཡོན་ཧེབ་(Yonhap) གསར་ཁང་གིས་གནས་ཚུལ་སྤེལ་བ་ལྟར་ན། ཟླ་སྔོན་མའི་ཚེས་ ༣༠ ཉིན་བྱང་ཀོ་རི་ཡ་གཞུང་གིས་བྱང་ཀོ་རི་ཡའི་བདེ་སྲུང་བློན་ཆེན་དང་དམག་སྤྱི་གཅིག་ལྕོགས་ཡཱང་ཅོལ་ (Hyon Yong Chol) གྱིས། ཟླ་སྔོན་མའི་ནང་ཨུ་རུ་སུར་ཚོགས་པའི་རྒྱལ་སྤྱིའི་བདེ་སྲུང་ལྷན་ཚོགས་ཐོག་གཏམ་བཤད་སྤེལ་སྐབས་ཀེམ་ཇོན་ཨང་ (Kim Jong Un) ལ་བརྩི་བཀུར་མ་བྱས་པར་གང་བྱུང་སྐད་ཆ་བཤད་ཡོད་པ་མ་ཟད། དེ་སྔོན་བྱང་ཀོ་རི་ཡའི་དམག་སྦྱོང་འགྲེམས་སྟོན་ཞིག་གི་སྐབས་ལ། ཀེམ་ཇོན་ཨང་གི་བཀའ་ལ་མ་བརྩིས་པར་གཉིད་ཅོག་བརྒྱབ་ནས་དམག་དོན་འཐུས་ཤོར་བཏང་བ་སོགས་རྒྱལ་ཁབ་ལ་རྒྱབ་གཏོད་བྱས་པའི་ཉེས་མིང་ཁག་གཅིག་བགྲངས་ཏེ་མང་ཚོགས་ཀྱི་མཐོང་སར་དམར་གསོད་བཏང་ཡོད་སྐོར་བཀོད་འདུག

བྱང་ཀོ་རི་ཡའི་གནད་དོན་ཆེད་མཁས་པ་མེ་ཤལ་ (Michael Madden) གྱིས་བྷི་བྷི་སི་དང་རྒྱ་གར་དུས་བབ་ཐོག “ད་ལྟ་བྱང་ཀོ་རི་ཡའི་མགོ་ཁྲིད་མཐོ་དམན་བར་གསུམ་གྱིས་ཀེམ་ཇོན་ཨང་ལ་གུས་བཀུར་མི་བྱེད་མཁན་མེད་སྟབས། ཀེམ་ཇོན་ཨང་གི་དབང་ཆར་འགྲན་རྩོད་བྱེད་མཁན་དང་བྱང་ཀོ་རི་ཡའི་བརྟན་བརླིང་སྲུང་སྐྱོབ་ལ་ཉེན་ཁ་བཟོ་མཁན་མེད་ཀྱང་། ད་དུང་ཀེམ་ཇོན་ཨང་གིས་མུ་མཐུད་རྒྱལ་ཞེན་ཆེ་བའི་བྱང་ཀོ་རི་ཡའི་མཐོ་རིམ་དཔོན་རིགས་ཁག་དམར་གསོད་གཏང་ཚེ། མ་འོངས་པར་བྱང་ཀོ་རི་ཡར་དཀའ་ངལ་ཤུགས་ཆེན་འཕྲད་རྒྱུ་ཡིན་པ་མ་ཟད། རྒྱལ་སྤྱིའི་ཐོག་ཁོ་རང་མགོ་ཁྲིད་ཅོལ་ཆུང་ཞིག་ཡིན་པ་ར་འཕྲོད་བྱས་པ་རེད།”ཅེས་བརྗོད་འདུག ཀོ་རི་ཡ་སྤྱི་མཐུན་རྒྱལ་ཁབ་དམངས་གཙོ་འཕེལ་རྒྱས་ཁང་གི་འགན་འཛིན་གཞོན་པ་པག་ཡོན་ཆོལ་ (Park Yong Chol) གྱིས་ཨ་རིའི་སི་ཨན་ཨན་ཐོག “རྒྱལ་སྤྱིའི་ཐོག་རྒྱལ་ཁབ་ལ་རྒྱབ་གཏོད་བྱེད་མཁན་དག་དམར་གསོད་གཏོང་གི་ཡོད་པ་ནི་རྒྱུན་ལྡན་ཞིག་ཡིན་ཡང་། ད་ལྟ་བྱང་ཀོ་རི་ཡའི་མགོ་ཁྲིད་ཀྱིས་སོ་སོ་དང་ལྟ་ཕྱོགས་མི་མཐུན་པ་དག་རྩ་མེད་བཟོ་བཞིན་ཡོད་པ་ནི་ར་བསད་ནས་ལུག་བརྡར་བཅུག་པ་རང་རེད།”ཅེས་བརྗོད་འདུག

དབྱིན་ཡུལ་གྱི་ཆ་འཕྲིན་དང་རོའུ་ཌར་གསར་ལམ་ཐོག་གནས་ཚུལ་སྤེལ་དོན་ལྟར་ན། ༢༠༡༠ ལོར་དམག་སྤྱི་ཡང་ཅོལ་བྱང་ཀོ་རི་ཡའི་སྤྱི་ཁྱབ་དམག་སྤྱི་གཞོན་པར་བསྐོ་བཞག་བྱས་པ་མ་ཟད། ༢༠༡༡ ལོར་ཁོང་ད་ལྟའི་བྱང་ཀོ་རི་ཡའི་མགོ་ཁྲིད་ཀེམ་ཇོན་ཨང་གིས་ཕ་འདས་པོ་ཀེམ་ཇོན་ཨང་གཉིས་པའི་དུར་མཆོད་གོ་སྒྲིག་ཚོགས་ཆུང་གི་ཚོགས་མིར་བདམས་ནས་ལས་དོན་ཁག་བསྒྲུབ་བཅུག་ཡོད་པ་དང་། དེའི་རྗེས་བདེ་སྲུང་བློན་ཆེན་ལ་བསྐོ་བཞག་བྱས་ནས་ལོ་གཉིས་མན་ཙམ་ལས་ཀ་བྱེད་བཅུག་ཡོད། ༢༠༡༣ ལོར་ཀེམ་ཇོན་ཨང་གིས་སོ་སོའི་དབང་ཆ་བརྟན་སྲུང་བྱ་ཆེད་ཨ་ཁུ་ཅང་སུན་ཋག་ (Chang Song-thaek ) གིས་རྒྱལ་ཁབ་ལ་རྒྱབ་གཏོད་བྱས་པའི་ཉེས་མིང་བཀལ་ཏེ་དམར་གསོད་བཏང་ཡོད་པ་མ་ཟད། འདི་ལོ་མཐོ་རིམ་དཔོན་རིགས་ ༡༥ ཙམ་དམར་གསོད་གཏོང་དགོས་པའི་བཀའ་བཏང་ཡོད་སྟབས། དེའི་ཁྲོད་ཀྱི་གཅིག་ནི་དམག་སྤྱི་དང་བདེ་སྲུང་བློན་ཆེན་གཅིག་ལྕོགས་ཡང་ཅོལ་ཆགས་ཡོད་ཅེས་སོགས་བཀོད་འདུག

མིང་སྨོས་མེད་པའི་བྱང་ཀོ་རི་ཡའི་གནད་དོན་ཆེད་མཁས་པ་ཞིག་གིས་བྷི་བྷི་སི་གསར་ལམ་ཐོག ད་ལྟ་བྱང་ཀོ་རི་ཡའི་མགོ་ཁྲིད་ཀྱིས་ཀེམ་གྱི་ཁྱིམ་རྒྱུད་དང་ཉེ་འབྲེལ་ཟབ་མོ་ཡོད་པའི་མཐོ་རིམ་དཔོན་རིགས་ཁག་རྩ་མེད་བཟོ་བཞིན་ཡོད་པ་དེ་ནི། མཐོ་རིམ་དཔོན་རིགས་ཁྲོད་ཀེམ་ཇོན་ཨང་ལ་མ་དགའ་བ་བྱེད་མཁན་ཤུགས་ཆེན་ཡོད་པའི་མཚོན་རྟགས་ཤིག་ཡིན་ཡང་། མ་འོངས་པར་དེས་བྱང་ཀོ་རི་ཡའི་བརྟན་བརླིང་མེད་པ་བཟོ་སྲིད་པ་རེད་ཅེས་བརྗོད་འདུག

གསར་འགོད་པ། དོན་གྲུབ།