མེར་འཚིཊ་མེར་གཏུག་བྱས་ན་མ་གཏོགས་རྒྱལ་ཁབ་གཞན་གྱིས་བོད་དོན་ཆེད་དམག་མི་རྒྱག

༧གོང་ས་མཆོག་གིས་ཨོ་སི་ཊོ་ལི་ཡའི་ནང་ཆིབས་བསྒྱུར་དང་བསྟུན་ཏེ་དེ་ཁུལ་གྱི་བོད་རིགས་མི་མང་གིས་བརྟན་བཞུགས་བསྟར་འབུལ་དང་འབྲེལ་བོད་པའི་སྐད་ཡིག་རིག་གཞུང་སྲུང་སྐྱོབ་དང་བོད་མིའི་སྒྲིག་འཛུགས་ཀྱི་རྩ་བའི་སྲིད་བྱུས་ཐོག་ཤར་སྐྱོད་བྱ་རྒྱུ། དེ་བཞིན་དོན་རྒྱལ་རྗེས་འབྲང་པར་ཆོས་དང་ཟང་ཟིང་གི་འབྲེལ་བ་མི་བྱེད་རྒྱུ་བཅས་དོན་ཚན་ཁག་ཅིག་གི་ཐོག་ཁས་ལེན་དམ་བཅའ་བྱས་ཡོད་འདུག

ཟླ་འདིའི་ཕྱི་ཚེས་ ༤ ཉིན་ནས་བཟུང་༧གོང་ས་མཆོག་ཉིན་གྲངས་ ༡༠ རིང་ཨོ་སི་ཊོ་ལི་ཡར་མཛད་འཕྲིན་སྐྱོང་གི་ཡོད་པ་དང་། ཟླ་འདིའི་ཕྱི་ཚེས་ ༥ ཉིན་ཨོ་སི་ཊོ་ལི་ཡའི་གནས་རི་གྲགས་ཅན་རི་སྔོན་པོ་(Blue Mountains)ཞེས་པར་ཆིབས་བསྒྱུར་བསྐྱངས་ཏེ། དད་ལྡན་ཆོས་ཞུ་བ་དང་ནང་ཆོས་དོན་གཉེར་བ་ཚོར་བཀའ་དབང་བསྩལ་ཡོད་པ་དང་། ཕྱི་ཚེས་ ༧ ཉིན་ཀ་ཊོམ་བྷ་(Katoomba )ཞེས་པའི་ས་གནས་སུ་ཆིབས་བསྒྱུར་གནང་སྟེ། ནེའུ་ཛི་ལན་ཌི་སོགས་ནས་ཡོང་བའི་བོད་རིགས་ ༡༠༠༠ ལྷག་དང་། ཝི་ཊི་ནམ་ ༢༠༠། འབྲུག་པ་དང་སོག་པོ་ ༧༠ ཙམ་བཅས་ཁྱོན་མི་གྲངས་ ༡༤༠༠ ལྷག་འདུ་འཛོམས་ཐོག ༧གོང་ས་མཆོག་ལ་སྒྲོལ་དཀར་ཡིད་བཞིན་འཁོར་ལོའི་བརྟན་བཞུགས་ཕུལ་ཡོད་པ་དང་། ས་གནས་བོད་རིགས་ཚོས་བོད་ཀྱི་རྩ་དོན་དང་འབྲེལ་བའི་དམ་བཅའ་ཁག་ཅིག་བཞག་ཡོད་པ་དང་འབྲེལ་ནས་༧གོང་ས་མཆོག་གིས་བཀའ་སློབ་གནང་དོན། གཤམ་འདིར་དོན་ཚན་འགའ་ཤས་ཤིག་དམ་བཅའ་བཞག་པ་ཞིག་བཀོད་འདུག བོད་ཀྱི་ཆོས་དང་རིག་གཞུང་མི་རིགས་སྤྱིའི་དོན་དམ་པའི་མཚོན་དོན་དུ་གྱུར་བ་མ་རྩ་ཡང་མི་རིགས་ཀྱི་མཚན་ཤས་སུ་མི་འགྲོ་བའི་བླང་དོར་འཇུག་སྒོའི་ལམ་སྟོན་ཁག་ལ་བསམ་སྦྱོར་གཉིས་ནས་དུས་ནམ་ཡང་མི་འགལ་བའི་ཡང་དག་པའི་སྤང་བླངས་ཀྱི་དམ་བཅའ་ཞུ་རྒྱུ། དམ་བཅའ་དང་པོ་དེ་རེད། གཞི་རྐང་ང་རང་ཚོ་བོད་པ་སུད་སི་དང་། ཨ་རི། ཁེ་ན་ཌ་སོགས་འཛམ་གླིང་ཡུལ་གྲུ་ཁག་མང་པོའི་ནང་ཡོད། སྤྱི་ཡོངས་ཀྱི་ཆ་ནས་ཧ་ཅང་ཡག་པོ་འདུག དངོས་གནས་སོ་སོའི་མི་རིགས་ཀྱི་མཚན་དོན་ལ་རྒྱར་སྨན་པའི་སྒོ་གསུམ་གྱི་སྤྱོད་པ་ཧ་ཅང་ཡག་པོ་འདུག ས་གནས་ཡུལ་མི་ཚོས་ཀྱང་ས་གནས་བོད་རིགས་རྣམས་ལ་བསྔགས་བརྗོད་ཞུ་རྒྱུ་དེ་འདྲ་ཡོང་གི་ཡོད། འོན་ཀྱང་ཕྱིའི་སྤྱི་ཚོགས་ནང་དེ་ཙམ་ཡ་རབས་སྤྱོད་བཟང་མེད་པའི་ས་ཁུལ་དུ་ཤུགས་རྐྱེན་ཐེབས་ནས་ང་རང་ཚོ་བོད་མི་མི་རབས་གཞོན་པའི་ཁྲོད་སྐབས་རེ་མཚན་ཤས་བཟོ་མཁན་དེ་འདྲ་ཡོང་གི་ཡོད། གཞན་སྤྱི་ཡོངས་ཀྱི་ཆ་ནས་ཧ་ཅང་ཡག་པོ་རེད། དེ་རིང་ཁྱེད་རང་ཚོས་འདིར་དམ་བཅའ་བཞག་པ་འདི་ཧ་ཅང་ཡག་པོ་བྱུང་འདུག

གཉིས་པ་དེ་བོད་མིའི་སྒྲིག་འཛུགས་ཀྱི་རྩ་བའི་སྲིད་བྱུས་དང་འབྲེལ་ཡོད་ལམ་སྟོན་ཐོག་ཤར་སྐྱོད་བྱེད་རྒྱུའི་དམ་ཚིག་ལ་རྒྱ་གཅིག་ཏུ་གནས་རྒྱུའི་དམ་བཅའ་ཞུ་རྒྱུ། འདི་ཡང་འགྲིག་པ་ཞིག་བྱུང་འདུག ཕྱི་ལོ་ ༢༠༡༠ ཙམ་བར་ངོས་ཀྱིས་འགན་འཁྱེར་ནས་ཕྱིན་པ་རེད། གཙོ་བོ་རྒྱ་ཆེའི་མི་མང་ཚང་མས་ཧུར་ཐག་བྱས་བྱུང་། དེ་འདྲའི་ཐོག་ནས་ང་ཚོ་བཙན་བྱོལ་དུ་བསླེབས་ནས་གཞི་མེད་ས་གཅིག་ལ་གཞི་གསར་པ་ཞིག་ཚུགས། དེ་ནས་རིམ་བཞིན་ང་རང་ཚོ་བོད་རང་ཉིད་ཀྱི་མི་རིགས་ཀྱི་རྣམ་པ་མཚོན་རྒྱུའི་སྐད་ཡིག་ཡོད་པ་དེ་ཡང་སོ་སོ་རང་ཉིད་ཀྱི་གནའ་རབས་གཅིག་པུ་མིན་པར་དེང་དུས་ཀྱི་ཤེས་ཡོན་ཡོང་ཆེད་བོད་པའི་སློབ་གྲྭ་ཟུར་དུ་བཙུགས་ནས། གཙོ་ཆེ་རྒྱ་གར་གཞུང་གི་རོགས་རམ་ཡག་ཐག་ཆོད་གནང་ཡོད། སྲིད་བློན་ནེ་ཧེ་རུ་མཆོག་ཡོད་སྐབས་སྲིད་བྱུས་དེ་དག་ཐག་གཅོད་བྱས་ནས་ཡག་ཐག་ཆོད་བྱུང་བ་རེད། དེ་བཞིན་ཆོས་སྒར་ཁག་དེ་དག་ཚུགས་ནས་གཞི་མེད་ས་ཞིག་ལ་གཞི་གསར་པ་ཞིག་ཚུགས་པའི་ཐོག་ནས་ཆོས་དང་རིག་གཞུང་མི་རིགས་ཀྱི་རྣམ་པ་མཚོན་པའི་བྱེད་ཐབས་མང་པོ་ཞིག་བསྒྲུབ་ནས་བྱུང་བ་རེད། རྩ་བའི་བོད་དོན་དཀའ་ངལ་སེལ་རྒྱུའི་སྐོར་ལ་མཚོན་ནའང་སྒོ་གང་ས་ནས་ཐབས་ཤེས་ཡོད་རྒུ་རྩལ་སྤྲུགས་བྱས་ཏེ་འཛམ་གླིང་མཉམ་འབྲེལ་རྒྱལ་ཚོགས་ལ་ཞུ་གཏུགས་བྱ་རྒྱུས་མཚོན་པའི་མང་པོ་ཞིག་བྱས་ཡོད། འོན་ཀྱང་དངོས་ཡོད་གནས་ཚུལ་ལ། པཎྜི་ཏ་ནེ་ཧེ་རུས་བཀའ་སློབ་ལྟར་མེས་འཚིགས་མེར་གཏུགས་བྱས་ནས་ཐབས་ཤེས་བྱས་ན་མ་གཏོགས་སྟོབས་ཆེན་རྒྱལ་ཁབ་ཚོས་བོད་དོན་ཆེད་འཁྲུག་པ་རྒྱག་གི་མ་རེད། དེ་བཞིན་རྒྱལ་ཚོགས་ལ་ཞུས་ཀྱང་ནུས་པ་ཐོན་གྱི་མ་རེད་ཅེས་ནེ་ཧེ་རུས་གསུངས་ བྱུང་། གང་ལྟར་ཐབས་ཤེས་སྒོ་གང་ས་ནས་བྱས་པའི་ཉམས་མྱོང་ཕྱོགས་བསྡུས་བྱེད་སྐབས་རྒྱ་ནག་གཞུང་ལ་འབྲེལ་བ་བྱས་ནས་གཏུགས་དགོས་པའི་གནས་ཚུལ་དེར་བབ་པ་རེད།

དེ་ཡང་རྒྱ་ནག་གཞུང་གིས་ད་བར་གྱི་སྲིད་བྱུས་གདུག་རྩུབ་དང་། མཐའ་གཅིག་ཏུ་བོད་མིར་མཐོང་ཆུང་ཁྱད་གསོད། རིམ་བཞིན་བོད་མི་རིགས་རིག་གཞུང་དང་བཅས་པ་ཧ་ལམ་ཉམས་བརླག་འགྲོ་རྒྱུའི་སྲིད་བྱུས་དེར་ང་ཚོས་མཐའ་གཅིག་ཏུ་ངོ་རྒོལ་བྱ་རྒྱུ་དང་། འོན་ཀྱང་རྩ་བའི་ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཟེར་བ་དེའི་ནང་དུ་བསྡད་ནས་གཉིས་མོས་ཀྱི་ཐབས་ལམ་ཞིག་གི་ཐོག་ནས་ང་ཚོའི་དཀའ་ངལ་སེལ་ཐུབ་རྒྱུ་ཞིག་གང་ལྟར་བོད་མི་རིགས་འདི་འཚོ་ཐུབ་པ་དང་། འཛམ་གླིང་འདིའི་ཐོག་ངོམས་ཆོག་པའི་བོད་མི་རིགས་ཀྱི་ཆོས་དང་རིག་གཞུང་གཏིང་ཟབ་ཅིག་ཡོད་པ་འདི་དག་ཉམས་པ་སོར་ཆུད། མི་ཉམས་གོང་འཕེལ་ཞིག་རང་དོན་རང་གཅེས་ཀྱི་ཐོག་ནས་ཡག་པོ་ཞིག་ཡོང་ཆེད་དམིགས་ཡུལ་འདི་འདྲ་ཞིག་བཞག་ནས་ཐབས་ཤེས་བྱས་པ་རེད། ད་ལྟ་སྲིད་གཞུང་གི་རིམ་པའི་ཐོག་ནས་ཐག་ཆོད་པའི་སྲིད་བྱུས་གསར་པ་གང་ཡང་བྱུང་མེད།

འོན་ཀྱང་རྒྱ་རིགས་ཤེས་ཡོན་ཅན་དང་ནང་པ། དམངས་ཁྲོད་ནས་ང་ཚོའི་དབུ་མའི་ལམ་གྱི་སྲིད་བྱུས་འདིར་རྗེས་སུ་ཡི་རངས་གི་ཐོག་ནས་རྒྱབ་སྐྱོར་ལོ་རེ་ནས་ལོ་རེར་ཇེ་མང་དུ་འགྲོ་བཞིན་ཡོད། མི་མང་གི་རྒྱབ་སྐྱོར་དང་འབྲེལ་བ་དེ་ཧ་ཅང་གལ་ཆེན་པོ་རེད། མི་མང་གི་འོས་བསྡུའི་ལམ་ནས་ཆབ་སྲིད་ཀྱི་མགོ་ཁྲིད་ང་ཚོའི་སྲིད་སྐྱོང་ཕེབས་ནས་ད་ལྟ་བོད་པའི་དཀའ་ངལ་སེལ་རྒྱུའི་ཐབས་ལམ་འདི་དུས་རྒྱུན་དབུ་མའི་ལམ་ཟེར་བ་དེའི་ཐོག་ཤར་བསྐྱོད་བྱས་ནས་འགྲོ་བཞིན་ཡོད། བྱེད་ཐབས་འདིའི་ཐོག་ལ་གཙོ་ཆེན་རྒྱ་གར་གཞུང་གིས་མཚོན་པའི་ཨ་རིའི་སྲིད་གཞུང་དང་། ཡུ་རོབ་གྲོས་ཚོགས་སོགས་མང་པོ་ཞིག་གིས་རྒྱབ་སྐྱོར་གནང་བཞིན་ཡོད།
བཞི་པ་འདིར་བསྟན་པ་ལ་ལོག་པར་བཀུར་བ་དོལ་རྒྱལ་རྗེས་འབྲང་པར་ཆོས་དང་ཟང་ཟིང་གི་འབྲེལ་ཐག་གཙང་བཅད་ཀྱིས་སྔར་ཡོད་ཀྱི་དམ་ཚིག་རྨ་མེད་པ་དག་འདི་ཕྱི་ཀུན་གྱི་ལེགས་ཚོགས་ཀྱི་དམ་ཚིག་གཅིག་ཉིད་དུ་སྲུང་རྒྱུའི་དམ་བཅའ་ཞུ་རྒྱུ། རྩ་བའི་དོལ་རྒྱལ་དེ་ལོ་ངོ་ ༤༠༠ སྔོན་གྱི་ལོ་རྒྱུས་ཡོད་པ་ཞིག་རེད། ལོ་བཞི་བརྒྱ་དེའི་རིང་གང་ལྟར་རྩོད་པ་ཅན་གླེང་གཞི་ཅན་དེ་འདྲའི་སྒང་ལ་བསྡད་པ་རེད་མ་གཏོགས། དགེ་ལུགས་དང་ས་སྐྱའི་ནང་ལ་ཡིན་ནའང་གང་ལྟར་ཚང་མས་དུས་ལ་བབ་པའི་དྲེགས་པ་ཞིག་རེད་བཅས་ཚང་མས་དོལ་རྒྱལ་ལ་མོས་མཐུན་བྱས་མེད། བྱབ་ངོས་རང་གིས་བསྐྱལ་བ་རེད། གྲོ་མོ་ནས་བཟུང་ངོས་དང་དོལ་རྒྱལ་འབྲེལ་བ་ཆགས་ནས་དོལ་རྒྱལ་བསྟེན་རྒྱུ་ཆགས་པ་རེད། དེ་ནས་རིམ་བཞིན་རྒྱ་གར་དུ་བསླེབས་རྗེས་ཕྱི་ལོ་ ༡༩༧༠ དོན་གྲངས་ནང་དེར་བརྟག་དཔྱད་བྱེད་དགོས་པ་ཞིག་འདུག་བསམས་ནས་ངོས་ཀྱིས་གཙོ་བོ་ ༸རྒྱལ་དབང་གོང་མ་ཚོའི་མཛད་པ་གཞིར་བཞག་བྱས་ནས་བོད་གངས་ཅན་ལྗོངས་ཀྱི་རིས་སུ་མ་ཆད་པའི་༸རྒྱལ་བའི་བསྟན་པ་དེ་དག་ཕྱོགས་རིས་ཕྱོགས་ལྷུང་མེད་པ་བྱས་ཏེ་བསྟན་པ་འཛིན་སྐྱོང་སྤེལ་གསུམ་བྱེད་ཐུབ་པ་བྱུང་ན་བསམ་པའི་དམིགས་ཡུལ་དེ་འདྲ་ཞིག་འཛིན་བཞིན་ཡོད། དེའི་ཐོག་ལ་ཏོག་ཙམ་མི་བདེ་བ་ཆགས་ཡོང་གི་འདུག བར་སྐབས་དོལ་རྒྱལ་བསྟེན་གསོལ་གནང་མཁན་རིམ་པ་ཁག་གི་ནང་ལ་བལྟས་ན་ཆོས་ལུགས་འཐེན་འཁྱེར་ཤུགས་ཆེན་པོ་བྱུང་འདུག དེར་བརྟེན་བརྟག་དཔྱད་ནན་ཏན་བྱས་པ་ཡིན། ལོ་རྒྱུས་དེ་དག་ཞིབ་ཕྲ་བརྗོད་དགོས་པ་མི་འདུག ཡིག་ཐོག་ཏུ་འཁོད་ཡོད་པ་དེ་ཁྱེད་ཚོས་ཤེས་ཀྱི་རེད། ངོས་ཀྱིས་དོལ་རྒྱལ་གསོལ་ཡག་མཚམས་འཇོག་གཙང་མ་བྱས་པ་ཡིན། ཅེས་སོགས་བཀའ་སློབ་བསྩལ་འདུག

ཡང་ཉིན་དེར་ས་གནས་ཀྱི་རྒྱ་རིགས་མཁས་དབང་དང་རྩོམ་པ་པོ། དམངས་གཙོ་དོན་གཉེར་བ་སོགས་མི་གྲངས་ ༡༠༠ ཙམ་ལ་ཀེ་རི་ཊོན་མགྲོན་ཁང་ (Carrington Hotel) ནང་གསུང་བཤད་དང་དྲི་བ་དྲིས་ལན་གནང་སྐབས། བོད་ཀྱི་ཆོས་དང་རིག་གཞུང་། ཁོར་ཡུག་བཅས་བདག་གཅེས་གནང་རྒྱུ་ཧ་ཅང་གལ་ཆེན་པོ་ཡིན་སྐོར་གསུངས་བ་དང་འབྲེལ། འདས་པའི་ལོ་ངོ་ ༣༠ དང་ ༤༠ རིང་ངས་བོད་རིགས་དང་རྒྱ་རིགས་བར་མཐུན་ལམ་གོང་སྤེལ་གཏོང་ཐབས་བྱས་པ་ཡིན། སྤྱིར་བཏང་ང་ཚོའི་བར་འདས་པའི་མི་ལོ་ ༦༠ རིང་དཀའ་ངལ་བྱུང་ཡོད་ཀྱང་། དཀའ་ངལ་དེས་མི་རིགས་གཉིས་བར་ལོ་ངོ་ ༢༠༠༠ རིང་གི་མཐུན་སྒྲིལ་ཡོད་པ་དེ་དག་ཉམས་རྒུད་གཏོང་མི་རུང་བས། དེ་རིང་ཁྱེད་ཚོས་ལྷན་ཚོགས་འདི་ལྟ་བུ་གོ་སྒྲིག་གནང་བར་ངས་གོ་སྒྲིག་གནང་མཁན་ཚོར་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས་འདུག

ཕྱི་ཚེས་ ༨ ཉིན་གྲོང་ཁྱེར་ཀ་ཊུམ་བྷའི་སྤྱི་མང་སློབ་གྲྭ་ (Katoomba Public School )ནང་ཆིབས་བསྒྱུར་བསྐྱངས་ཏེ་མི་གྲངས་ ༣༦༠༠ ལྷག་ལ། བཟོད་སྒོམ་ཉམས་ལེན་གྱི་རྣམ་དཔྱོད་ཅེས་པའི་བརྗོད་གཞིའི་ཐོག་བཀའ་སློབ་གནང་ཡོད་འདུག སྐུ་སྒེར་དྲ་བའི་ཐོག་གནས་ཚུལ་སྤེལ་བ་ལྟར་ན། ཕྱི་ཚེས་ ༡༡ ཉིན་གྱི་སྔ་དྲོར་༧གོང་ས་མཆོག་ཨོ་སི་ཁྲི་ལི་ཡའི་གྲོང་ཁྱེར་བྷིར་སུ་བྷན་ (Brisbane) ནང་འཚོགས་འཆར་ཡོད་པའི་ཆོས་ལུགས་འདྲ་མིན་གྱི་ལྷན་ཚོགས་སུ་ཆིབས་བསྒྱུར་བསྐྱང་རྒྱུ་དང་། ཚེས་ ༡༡ དང་ ༡༢ ཉིན་གྲོང་ཁྱེར་དེའི་ཚོགས་ཁང་ཆེན་མོའི་ནང་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་བཀའ་ཆོས་བསྩལ་རྒྱུ། དེ་བཞིན། ཕྱི་ཚེས་ ༡༢ ཉིན་སྙིང་རྗེ་ཉམས་ལེན་གྱི་རྣམ་དཔྱོད་ (Wisdom of Compassion)ཅེས་པ་དང་། ཕྱི་ཚེས་ ༡༤ ཉིན་གྱི་ཕྱི་དྲོར་ཕིར་ཊི་(Perth) གྲོང་ཁྱེར་ནང་གཏོང་ལེན་ཉམས་ལེན་གྱི་རྣམ་དཔྱོད་ཅེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་འདུག