ཁ་སང་པ་ཀི་སི་ཐན་གཞུང་གིས་རྒྱལ་ས་ཨི་སི་ལ་མ་བྷ་ཋ་ནང་རྟེན་གཞི་བྱས་པའི་རྒྱལ་སྤྱིའི་བྱིས་ཚོགས་ཀྱི་ལས་ཁུངས་ལ་སྒོ་ཐེལ་བརྒྱབ་ཡོད་འདུག
ཁ་སང་པ་ཀི་སི་ཐན་གཞུང་གིས་རྒྱལ་ས་ཨི་སི་ལ་མ་བྷ་ཋ་ནང་རྟེན་གཞི་བྱས་པའི་རྒྱལ་སྤྱིའི་བྱིས་ཚོགས་ཀྱིས་འདས་པའི་ལོ་ཤས་གོང་ནས་བཟུང་རྒྱལ་ཁབ་ཀྱི་གསང་བ་རྐུ་འཁྱེར་དང་། ཡུལ་ཁྲིམས་ལ་རྡོག་རོལ་བཏང་ནས་གཞུང་ལ་གནོད་པའི་བྱ་བ་མང་པོ་བརྩམས་ཡོད་པའི་ཉེས་མིང་བཀལ་ཏེ་ལས་ཁུངས་དེ་སྒོ་བརྒྱབ་ཡོད་འདུག
པ་ཀི་སི་ཐན་གྱི་འབྲེལ་ཡོད་ལས་བྱེད་ཀམ་རན་ཆི་མཱ་ (Kamran Cheema) ཡིས་དབྱིན་ཡུལ་གྱི་གྷར་ཌིན་གསར་ལམ་སྟེང་། “ང་ཚོར་ནང་སྲིད་ལྷན་ཁང་གིས་ཡིག་ཕྲེང་གསུམ་ཅན་གྱི་བརྡ་ཁྱབ་ཡི་གེ་ཞིག་འབྱོར་ཏེ་རྒྱལ་སྤྱིའི་བྱིས་ཚོགས་ཀྱི་ལས་ཁུངས་ལ་སྒོ་ཐེལ་རྒྱག་དགོས་པ་མ་ཟད། ཉིན་ ༡༥ ནང་ཚུད་དུ་ལས་བྱེད་རྣམས་སོ་སོའི་རྒྱལ་ཁབ་ལ་ཕྱིར་ལོག་བྱ་དགོས་སྐོར་བརྗོད་བྱུང་།” ཞེས་དང་། བྱིས་ཚོགས་ལས་ཁུངས་འཁྲིས་ཀྱི་སྤྱི་ཁྱབ་ཉེན་རྟོག་པ་ཧ་ཀེམ་ཁང་ (Hakim Khan) གིས། “ངས་གཞུང་གིས་ལས་ཁུངས་འདི་སྒོ་རྒྱག་དགོས་དོན་གང་ཡིན་ཤེས་མ་སོང་། ང་ཚོའི་ལས་འགན་ནི་གཞུང་གི་བཀའ་ལ་བརྩི་རྒྱུ་ཡིན་སྟབས། གཞུང་གི་བཀོད་ཁྱབ་ལྟར་ལས་ཁུངས་འདིར་སྒོ་ཐེལ་བརྒྱབ་པ་ཡིན།”ཞེས་བརྗོད་འདུག
རྒྱལ་སྤྱིའི་བྱིས་ཚོགས་ཀྱིས་མགྲིན་ཚབ་པས་པ་ཀི་སི་ཐན་གྱི་སྐྱ་རེངས་གསར་འཕྲིན་ཐོག་བརྗོད་དོན། “པ་ཀི་སི་ཐན་གཞུང་གིས་སྔོན་བརྡ་བརྡ་སོགས་གང་ཡང་མ་བཏང་བར་ལས་ཁུངས་ལ་སྒོ་ཐེལ་བརྒྱབ་པར་བློ་ཕམ་ཆེན་པོ་བྱུང་། ང་ཚོས་བཙན་པོ་དབང་ཡོད་ཀྱི་བྱ་སྤྱོད་འདིར་འགག་པ་རྒྱག་རྒྱུ་མ་ཟད། གོང་རིམ་ལ་གཏུག་ནས་གླེང་སློང་བྱ་རྒྱུ་ཡིན། ད་བར་ང་ཚོས་ལས་དོན་གང་སྤེལ་ཡང་པ་ཀི་སི་ཐན་གཞུང་གི་ལྷན་ཁང་ཁག་དང་མཉམ་ལས་བྱས་ནས་རྒྱལ་ཡོངས་སུ་ལག་བསྟར་བྱེད་ཀྱི་ཡོད་པ་མ་ཟད། ད་བར་ང་ཚོས་པ་ཀི་སི་ཐན་གྱི་མང་ཚོགས་ཀྱི་འཕྲོད་བསྟེན་དང་ཟས་བཅུད། ཤེས་ཡོན་དང་བྱིས་སྐྱོང་བཅས་ཀྱི་ནུས་པ་གོང་འཕེལ་བྱ་རྒྱུའི་དམིགས་ཡུལ་བཟུང་སྟེ། ལས་དོན་གཉེར་ཡོད་པ་ལས་པ་ཀི་སི་ཐན་གཞུང་གིས་བརྗོད་པ་ལྟར་རྒྱལ་ཁབ་དང་མི་རིགས་ལ་གནོད་པའི་ལས་འགུལ་གང་ཡང་སྤེལ་མེད།”ཅེས་བརྗོད་འདུག
༢༠༡༢ ལོར་པ་ཀི་སི་ཐན་གསང་བའི་ལས་ཁུངས་ཀྱིས། རྒྱལ་སྤྱིའི་བྱིས་ཚོགས་བརྒྱུད་ཨ་རིའི་གསང་བའི་ལས་ཁུངས་ཀྱིས་པ་ཀི་སི་ཐན་གྱི་སྨན་པ་ཤཱ་ཁེལ་ (Shakeel Afridi) མངགས་ཏེ། རྒྱལ་ཡོངས་ནང་སྔོན་འགོག་སྨན་བཅོས་ཀྱི་ལས་འཆར་རྫུན་མ་བཀོལ་ནས་ཨལ་ཁེད་ཌ་འཇིགས་སྐུལ་ཚོགས་པའི་མགོ་གཙོ་ཨུ་སཱ་མཱ་བྷེན་ལཱ་ཌན་ (Osama bin Laden) རྩད་ཞིབ་བྱས་ཚུལ་གྱི་སྙན་ཐོ་བཏོན་ཏེ། བྱིས་ཚོགས་ཀྱི་ཕྱི་རྒྱལ་ལས་བྱེད་བ་རྣམས་ཕྱིར་འཕུད་བཏང་བ་མ་ཟད། ཕྱི་རྒྱལ་ཡུལ་གྲུ་ཁག་ནས་པ་ཀི་སི་ཐན་གྱི་བྱིས་ཚོགས་ནང་ལས་ཀ་བྱེད་བར་ཡོང་མཁན་ཚོར་ཐོངས་མཆན་ལག་ཁྱེར་མ་སྤྲད་པ་དང་། ཕྱི་ཕྱོགས་ཀྱི་རོགས་དངུལ་དང་སྐྱོབ་གསོ་སོགས་བཀག་འགོག་བྱས་ཡོད། དེ་བཞིན་འདས་ལོ་ནས་བཟུང་པ་ཀི་སི་ཐན་གཞུང་གིས་པ་ཀི་སི་ཐན་ནང་གི་ཕྱི་རྒྱལ་རོགས་ཚོགས་ཁག་གི་ལས་བྱེད་ཚོས་རྒྱལ་ཁབ་ཀྱི་གསང་བ་རྐུ་འཁྱེར་བྱེད་ཀྱི་ཡོད་པའི་ཉེས་མིང་བཀལ་ཏེ། ༢༠༡༤ ལོའི་ཟླ་ ༡༢ བར་རོགས་ཚོགས་ ༣༠༠༠ ཙམ་ཕྱིར་བསྡུ་བྱས་ཡོད། འདི་ལོ་ཕྱི་རྒྱལ་གྱི་ཞལ་འདེབས་འབུལ་ཕྱོགས་ཀྱི་རྩ་འཛིན་བཅའ་ཡིག་ ༢༠༡༥ ཞེས་པ་ཞིག་ཕྱི་བསྒྲགས་བྱས་ཏེ། ཕྱི་རྒྱལ་རོགས་ཚོགས་ཁག་གིས་ལས་དོན་གང་འདྲ་བྱེད་ཀྱི་ཡོད་མེད་ཐོག་རྟོག་ཞིབ་བྱེད་མགོ་བཙུགས་ཏེ། ད་བར་རོགས་ཚོགས་ ༢༠ ལྷག་ལ་ཉེན་བརྡ་བཏང་ཡོད་པ་དང་། ཟླ་འདིའི་ཚེས་ ༡༡ ཉིན་པ་ཀི་སི་ཐན་གཞུང་གིས་རྒྱལ་སྤྱིའི་བྱིས་ཚོགས་ཀྱི་ལས་བྱེད་ཚོས་རྒྱལ་ཁབ་ལ་གནོད་པའི་ལས་གཞི་སྤེལ་ཀྱིན་ཡོད་པ་མ་ཟད། སོ་ཉུལ་བྱས་ནས་རྒྱལ་དོན་གསང་བ་རྐུ་འཁྱེར་བྱས་ཡོད་ཚུལ་བརྗོད་ནས་ལས་ཁུངས་ལ་སྒོ་ཐེལ་བརྒྱབ་ཡོད་འདུག
གསར་འགོད་པ། དོན་གྲུབ།
