༢༠༡༦ ལོའི་སྲིད་སྐྱོང་གི་ཞབས་སྟེགས་སུ་ལ་འཐོབ་སྲིད་དམ།

སྐལ་བཟང་སྤེན་པ།

དེ་སྔོན་དང་མི་འདྲ་བར་དེང་གི་དུས་འདིར་དྲ་བའི་མཐུན་རྐྱེན་མི་ཉུང་བ་ཞིག་ཡོད་སྟབས།  མཐུན་རྐྱེན་དེ་རིགས་སྤྱད་དེ་རང་རིགས་སྤུན་ཟླ་མི་ཉུང་བ་ཞིག་གིས་ ༢༠༡༦ ལོའི་སྲིད་སྐྱོང་གི་འགྲན་རྩོད་དང་། སྲིད་སྐྱོང་གི་འོས་མི་ཚོའི་སྐོར་ལ་གནས་ལུགས་ཡོད་མིན་སྣ་ཚོགས་ཀྱི་སྒོ་ནས་བསམ་ཚུལ་མང་པོ་སྤེལ་བཞིན་ཡོད།  དེའི་དབང་གིས་སྲིད་སྐྱོང་འོས་འདེམས་དེ་ཡང་རང་བཞིན་གྱིས་འཁྲུག་ཆ་དོད་པོ་ཞིག་ཆགས་ངེས་ཡིན། ལྷག་པར་དུ། སྐད་འཕྲིན་དང་ངོ་དེབ་གཉིས་ནི་ང་ཚོས་སྤྱོད་གོ་ཆོད་ཤོས་སུ་བརྩིས་ཏེ་དྲ་ལམ་དེ་གཉིས་ཐོག་རང་ཉིད་ཀྱི་དགའ་ཕྱོགས་འོས་མིར་བསྟོད་ར་དང་།  དེ་མིན་འོས་མི་བྱིངས་ལ་གཞི་མེད་སྙོན་འཛུགས་ཀྱང་བྱེད་བཞིན་འདུག  དེ་དག་ནི་འོས་མི་རྣམས་བཟང་ངན་ཅི་རིགས་ནས་དྲིལ་བསྒྲགས་བྱེད་སྟངས་ཙམ་ཞིག་རེད།

དེ་བས་གལ་ཆེ་ཤོས་ནི་ང་ཚོས་སྐབས་གོང་མའི་སྲིད་སྐྱོང་འོས་བསྡུའི་ཉམས་མྱོང་གཞི་རྩར་བཞག་སྟེ། འདི་ལོའི་སྲིད་སྐྱོང་གི་འོས་སྒམ་སུ་ལ་འཐོབ་མིན་གྱི་གནད་དོན་ལ་བལྟ་རྒྱུ་དེ་རེད། དེ་ཡང་སྐབས་གོང་མའི་སྲིད་སྐྱོང་འོས་མིའི་ཁོངས་སུ།  ཉམས་མྱོངས་སོགས་ཕྱོགས་མི་ཉུང་བ་ཞིག་ནས་བཀྲས་མཐོང་དེ་བློ་བཟང་སེང་གེ་མཆོག་ལས་ཕུན་སུམ་ཚོགས་པ་ཡོད་ཀྱང་།  རྒྱུ་མཚན་མི་ཉུང་བ་ཞིག་གི་ཐོག་ནས་སྲིད་སྐྱོང་གི་རྐུབ་སྟེགས་ཚ་པོ་དེ་བློ་བཟང་སེང་གེ་ལ་ཐོབ་པ་རེད། དེ་ཡང་རྒྱུ་མཚན་དང་པོ་ནི། སྲིད་སྐྱོང་འོས་མའི་ལོ་ནའི་ཁྱད་པར་རེད། ལོ་ནའི་བབ་ནས་བཤད་ན། སྲིད་སྐྱོང་བློ་སེང་མི་རབས་གསར་པའི་ཁོངས་སུ་གཏོགས་པར་བརྟེན།  མི་རབས་གསར་པའི་ཁྲོད་ནས་ཁོང་ལ་འོས་ཤོག་འཕེན་མཁན་མང་བ་བྱུང་ཡོད། རྒྱུ་མཚན་གཉིས་པ་ནི་སློབ་སྦྱོང་གི་རྒྱབ་ལྗོངས་དེ་རེད། སྤྱིར་བཀྲས་མཐོང་ལ་མཚོན་ན། ཤེས་མྱོང་གཉིས་ཐད་ནས་ཕུན་སུམ་ཚོགས་པོ་ཡོད་ཀྱང་། བློ་བཟང་སེང་གེ་ལགས་ཨ་རིའི་ནང་སྙན་གྲགས་ཡོད་པའི་སློབ་གྲྭ་ཞིག་ནས་ཐོན་པ་མ་ཟད་དེར་ཕྱག་ལས་ཀྱང་གནང་གི་ཡོད་པ་རེད།    ཁོང་གི་སློབ་སྦྱོང་གི་རྒྱབ་ལྗོངས་དེ་ཡང་ཁྲིམས་ལུགས་ཡིན་པ་སོགས་ཀྱིས་ཁོང་གི་འོས་གྲངས་ལ་བཟང་ཕྱོགས་ཀྱི་ཤུགས་རྐྱེན་ཆེན་པོ་ཐེབས་པ་ནི་སྨྲོས་མ་དགོས་པ་ཞིག་རེད། གང་ཡིན་ཟེར་ན། ཁོང་གི་ཁྲིམས་ལུགས་ཤེས་ཡོན་དེས་བོད་དོན་དེ་རྒྱལ་སྤྱིའི་སྡིངས་ཆའི་སྟེང་སྔར་བས་ཚད་མཐོ་རུ་བསྐྱལ་རྒྱུའི་རེ་བ་འཆང་ཡོད།

རྒྱུ་མཚན་གསུམ་པ་ནི། བློ་སེང་སྲིད་སྐྱོང་དུ་བཞེངས་སྐབས་ཆབ་སྲིད་བསྒྲགས་གཏམ་གསུམ་སྤེལ་ཡོད། དེ་དག་ནི་གསར་གཏོད་དང་། གཅིག་སྒྲིལ། རང་ཁ་རང་གསོ་གསུམ་ཡིན། དེའི་དབང་གིས་ཀྱང་ཁོང་གི་འོས་གྲངས་འཕར་རྒྱུར་ནུས་པ་གང་འཚམ་ཐོན་ཡོད། གང་ལགས་ཤེ་ན། ཁོང་གིས་རང་ཉིད་སྲིད་སྐྱོང་གི་རྐུབ་སྟེགས་སྟེང་བཞུགས་སྐབས། ལས་དོན་ཅི་འདྲ་ཞིག་གནང་འཆར་ཡོད་མེད་ཀྱི་ས་ཁྲ་ཞིག་བྲིས་པ་རེད། འོན་ཀྱང་། བཀྲས་མཐོང་གིས་རང་ཉིད་ཀྱི་དེ་སྔོན་བྱས་པའི་ལས་མྱོང་ཙམ་ལས་མ་འོངས་པའི་ལས་འཆར་གང་ཡང་བཏོན་མེད། དེ་ཙམ་དུ་མ་ཟད། བཀྲས་མཐོང་མཆོག་དེ་སྔོན་བཀའ་བློན་གནང་ཟིན་སྟབས་མི་མང་གི་བསམ་བློའི་ནང་ཁོང་ལ་ནུས་པ་འདོན་རྒྱུ་ཡོད་ན་དེ་དུས་བཏོན་ཚར་ཡིན་སྟབས། དེ་བས་གཞོན་སྐྱེས་ཤིག་ལ་གོ་སྐབས་སྤྲད་ན་དགེ་མཚན་ཆེ་བ་ཡོད་པའི་ངོས་འཛིན་བྱས་ཡོད། རྒྱུ་མཚན་གཞན་ཞིག་ནི་བཀྲ་ཤིས་དབང་འདུས་ལགས་མཐར་སྲིད་སྐྱོང་གི་འོས་མིར་བཞེངས་པ་དེས་བཀྲས་མཐོང་གི་འོས་ཤོག་མི་ཉུང་བ་ཞིག་ཁོང་ལ་ཤོར་བ་རེད།  དེ་ཡང་བཀྲས་མཐོང་དང་བཀྲ་ཤིས་དབང་འདུས་གཉིས་ཀྱི་ཉམས་མྱོང་དང་ལོ་ནའི་བབ་སོགས་ཕྱོགས་མང་པོ་ཞིག་ནས་ཁོང་གཉིས་ཀྱི་རྒྱབ་ལྗོངས་འདྲ་པོ་ཡོད་སྟབས། མི་རབས་རྙིང་པའི་ཁྲོད་ཁོང་གཉིས་ལ་རྒྱབ་སྐྱོར་ཞུ་མཁན་གང་འཚམ་བྱུང་ཡོད་པ་རེད། དེར་བརྟེན། བློ་སེང་ལ་རྒྱབ་སྐྱོར་མེད་མཁན་ཚོའི་འོས་ཤོག་དེ་ཁོང་གཉིས་གང་རུང་ལ་སྤྲད་པ་རེད། དེས་ཀྱང་བློ་སེང་ལགས་ལ་རྒྱལ་ཁ་འཐོབ་རྒྱུའི་ལམ་བུ་བཏོད་པ་རེད།  གནད་དོན་དེ་དག་ནི་སྐབས་གོང་མའི་སྲིད་སྐྱོང་འོས་བསྡུའི་གྲུབ་འབྲས་ཇི་ལྟར་བྱུང་མིན་དེ་རེད།  
 
ད་ལྟའི་ཆར་ཡོངས་གྲགས་སུ་གྱུར་བའི་སྲིད་སྐྱོང་འོས་མི་གཅིག་ནི། ལས་ཐོག་སྲིད་སྐྱོང་བློ་བཟང་སེང་གེ་དང་བཀྲ་ཤིས་དབང་འདུས་ལགས་གཉིས་རེད། དེ་མིན་སྤྱི་འཐུས་ཚོགས་གཙོ་མཆོག་ཀྱང་སྲིད་སྐྱོང་ལ་བཞེངས་རྒྱུའི་ཁྱབ་བསྒྲགས་ཤིག་གང་མགྱོགས་གནང་འཆར་ཡོད་པ་མི་མང་གིས་གླེང་སློང་དང་ཚོད་དཔག་བྱེད་བཞིན་འདུག་ཀྱང་ད་སྔ་གསལ་བསྒྲགས་གནང་མེད་པ་འདྲ། བདེན་མིན་ཇི་ལྟར་ཡང་སྤྱི་ཚོགས་དྲ་ལམ་ཁག་ཏུ་ཨ་ཚོགས་ཀླུ་མཁར་བྱམས་ཀྱང་སྲིད་སྐྱོང་གི་འོས་ཁོངས་སུ་འཛུལ་ཞུགས་བྱ་རྒྱུ་ཡིན་ཚུལ་ཞིག་གླེང་མཁན་འདུག་མོད་ད་སྔ་ཡིད་རྟོན་འཕེར་བའི་ཁྱབ་སྒྲགས་ཤིག་མཐོང་མ་སོང་།

དེས་ན་ངས་གོང་ཞུས་མི་སྣ་བཞི་སྲིད་སྐྱོང་གི་འོས་མིར་བརྩིས་ཏེ།   ཡང་སྙིང་སྲིད་སྐྱོང་གི་ཞབས་སྟེགས་ཚ་པོ་དེ་སུ་ལ་འཐོབ་མིན་ཚོད་དཔག་ཅིག་བྱ་བར་འདོད།   དེ་ཡང་ཨ་ཚོགས་ཀླུ་མཁར་བྱམས་ལགས་འཕུད་དེ་མིན་འོས་མི་གསུམ་ཀ་རང་རེའི་སྤྱི་ཚོགས་ཐོག་ཕྱོགས་ཡོངས་ནས་ཤེས་འཇོན་ཡོད་མཁན་ཞིག་དང་ལོ་ནའང་འདྲ་མཉམ།  ལས་ཀའི་ཉམས་མྱོང་ཡོད་པ་གཅིག་མཚུངས་ལྟ་བུ་རེད། འོན་ཀྱང་། རྒྱུ་མཚན་མི་ཉུང་བ་ཞིག་གི་ཐོག་ནས་ད་ལྟའི་ལས་ཐོག་སྲིད་སྐྱོང་བློ་སེང་ལགས་ལ་སྲིད་སྐྱོང་གི་རྐུབ་སྟེགས་དེ་མཐར་རེག་སྲིད་ཀྱང་ཁོང་ལ་དཀའ་ངལ་མི་ཉུང་བ་ཞིག་འཕྲད་སྲིད་པ་ནི། དང་པོ། དེ་སྔོན་སྲིད་སྐྱོང་འོས་མིར་ལངས་སྐབས་ཁོང་གི་དམ་བཅའ་གསུམ་པོ་དེ་ལག་ལེན་ལ་འཁྱོལ་ཡོད་མེད་ཐད་མི་མང་གིས་ཚ་འདྲི་གཏོང་གི་རེད་ལ། ཁ་གཏད་འོས་མི་ཚོས་ཀྱང་འཐེར་འདོན་གནང་གི་རེད། དེ་བཞིན། སྲིད་སྐྱོང་གིས་ཀྱང་རང་ཉིད་ཀྱི་གྲུབ་འབྲས་རྣམས་འབུར་འདོན་གནང་གི་རེད། དེ་ནི་སྤྱི་ཡོངས་ཀྱི་འོས་བསྡུའི་འགྲོ་སྟངས་ཤིག་རེད། གཉིས་པ་ནི། ལས་ཐོག་སྤྱི་འཐུས་ཚོགས་གཙོ་མཆོག་སྐབས་གོང་མའི་སྲིད་སྐྱོང་འོས་མི་བྱིངས་དང་མི་འདྲ་བར་མི་རབས་གསར་པའི་ཁོངས་སུ་གཏོགས་པ་དང་།  ཁོང་ལ་བཙན་བྱོལ་སྤྱི་ཚོགས་ཀྱི་ཆབ་སྲིད་འགྲོ་ལུགས་ཐད་ཧ་ཅང་གི་ཉམས་མྱོང་ཕུན་སུམ་ཚོགས་པོ་ཡོད་པ་དང་། རང་རེའི་སྤྱི་ཚོགས་ཁྲོད་མི་མང་གིས་འདེང་འཇོག་ཆེན་པོ་གནང་གི་ཡོད། དེའི་དབང་གིས་བློ་བཟང་སེང་གེ་ལགས་ཀྱིས་སྲིད་སྐྱོང་འོས་མི་བྱིངས་གསུམ་ལས་འཇིགས་སྣང་ཆེ་ཤོས་བྱེད་དགོས་ས་དེ་ལས་ཐོག་སྤྱི་འཐུས་ཚོགས་གཙོ་ཆགས་ངེས་རེད།

གསུམ་པ་ནི།  སྲིད་སྐྱོང་འོས་མི་བཀྲ་ཤིས་དབང་འདུས་ལགས་སྲིད་སྐྱོང་དུ་བཞེངས་སྐབས་ཀྱི་འབོད་སྒྲ་རྩ་དོན་བཞི་བཏོན་ཡོད། དེ་ནི་ཁོང་གིས་འགྲེལ་བརྗོད་གནང་པ་ལྟར། ང་ཚོས་མཐོང་དགོས་པའི་གནད་དོན་བཞི་སྟེ། རྒྱུན་གནས། ཤེས་ཡོན། དཔལ་འབྱོར། ཞི་མོལ་བཅས་རེད། ཁོང་གི་འབོད་སྒྲ་བཞི་པོ་དེས་སྤྱི་ཚོགས་ཁྲོད་འགུལ་ཤུགས་གང་འཚམ་ཞིག་ཐེབས་རྒྱུ་ཡིན་པ་རང་བཞིན་ཆོས་ཉིད་ལྟ་བུ་ཞིག་རེད། ཁོང་གིས་བཏོན་པའི་འབོད་སྒྲ་དེ་དག་གིས་དེ་སྔའི་སྲིད་སྐྱོང་གི་འབོད་སྒྲ་དག་ལའང་དྲི་བ་མི་ཉུང་བ་ཞིག་བསླེབས་སྲིད་པ་རེད།

སྤྱི་འཐུས་ཚོགས་གཙོ་དང་ཀླུ་མཁར་བྱམས་གཉིས་ཀྱིས་ད་བར་རང་ཉིད་ཀྱི་བསྒྲུབ་བྱའི་རྩ་དོན་རྣམས་ཕྱིར་བསྒྲགས་བྱས་མེད་སྟབས། ད་ལྟ་གཞི་ནས་བལྟ་རྒྱུ་བསྡད་ཡོད། ཕྱོགས་ཡོངས་ཀྱི་གནས་བབ་ལ་གཞིགས་ནས་བལྟ་སྐབས། ངའི་བསམ་པར་མཐའ་མའི་རྒྱལ་ཁ་དེ་སྲིད་སྐྱོང་ལ་འཐོབ་ངེས་པ་ལྟ་བུ་རེད། དེའི་རྒྱུ་མཚན་ནི་བཀྲ་ཤིས་དབང་འདུས་ལགས་དང་ཀླུ་མཁར་བྱམས་ལགས་སྲིད་སྐྱོང་ལ་བཞེངས་ཚེ། སྤྱི་འཐུས་སྤེན་པ་ཚེ་རིང་ལགས་ཀྱི་འོས་ཤོག་མི་ཉུང་བ་ཞིག་ཁོང་གཉིས་ལ་ཤོར་ངེས་པ་ལྟ་བུ་རེད། དེ་ཡང་མདོ་སྟོད་ཕལ་མོ་ཆེས་ཧ་ལམ་སྲིད་སྐྱོང་ལ་འོས་ཤོག་འཕེན་ངེས་པ་དང་། མདོ་སྨད་པའི་ཁྲོད་ནས་འོས་ཤོག་དེ་ཧ་ལམ་དུམ་གཉིས་སུ་འགྲོ་ངེས་རེད། གང་ཡིན་ཟེར་ན། མང་ཉུང་ལ་མ་ལྟོས་པར་ཀླུ་མཁར་བྱམས་ལ་རྒྱབ་སྐྱོར་བྱེད་མཁན་མདོ་སྨད་པ་གང་འཚམ་ཡོད་ལ། དེ་བཞིན་དུ་སྤྱི་འཐུས་ཚོགས་གཙོ་ལ་འཐོབ་སྲིད་པའི་དབུས་གཙང་མི་མང་གི་འོས་ཤོག་མི་ཉུང་བ་ཞིག་བཀྲ་ཤིས་དབང་འདུས་ལགས་ལ་འཐོབ་ངེས་ཡིན། དེའི་དཔང་རྟགས་གསལ་ཤོས་ཤིག་ནི། ཉེ་ཆར་མངའ་རིའི་སྐྱིད་སྡུག་གིས་བཀྲ་ཤིས་དབང་འདུས་ལགས་སྲིད་སྐྱོང་གི་འོས་མིར་བཏོན་པ་དེ་ཡིན། བཀྲ་ཤིས་དབང་འདུས་ལགས་ལ་མཚོན་ན། གཞིས་ཆགས་ཁག་ནས་ཁོང་ལ་འོས་ཤོག་གང་འཚམ་རག་སྲིད་པ་མ་ཟད། གཞོན་སྐྱེས་ཁྲོད་ནས་ཀྱང་གང་འཚམ་རག་སྲིད། འོན་ཀྱང་། ཁོང་གི་ཕ་རྒྱུད་ཁམས་རིགས་ཡིན་ཡང་། མདོ་སྟོད་མི་མང་ཁྲོད་ནས་ཁོང་ལ་འོས་ཤོག་རག་པའི་རེ་བ་དེ་ཙམ་མ་མཐོང་། དེའི་རྒྱུ་མཚན་ནི། མདོ་སྡོད་པ་མི་མང་པོ་ཞིག་གི་མིག་ནང་དུ་ལས་ཐོག་སྲིད་སྐྱོང་ནི་སྐབས་རྗེས་མའི་སྲིད་སྐྱོང་གི་འོས་མི་མཚམས་ཤོས་སུ་མཐོང་གི་ཡོད་ངེས་ཡིན།

ཕྱོགས་ཡོངས་ལ་གཞིགས་ན། སྲིད་སྐྱོང་བློ་སེང་ལ་མདོ་སྟོད་ཆོལ་ཁ་ནས་འོས་གྲངས་མང་ཤོས་དང་། དེ་ནས་གཞོན་སྐྱེས་ཁྲོད་ནས་ཀྱང་འོས་ཤོག་མི་ཉུང་བ་ཞིག་འཐོབ་སྲིད་པ་རེད། འོན་ཀྱང་། དེ་སྔོན་གྱི་འོས་བསྡུ་དང་མི་འདྲ་བར་ད་རེས་ཁོང་ལ་གཞོན་སྐྱེས་ཁྲོད་ནས་སྔོན་ལྟར་གྱི་འོས་ཤོག་མང་པོ་ཞིག་འཐོབ་མི་སྲིད། འོ་ན། དབུས་གཙང་ཆོལ་ཁའི་འོས་ཤོག་རྣམས་སུ་ལ་འཐོབ་ངེས་རེད་ཅེ་ན། མང་ཤོས་དེ་ཚོགས་གཙོ་སྤེན་པ་ཚེ་རིང་ལགས་སུ་འཐོབ་ངེས་རེད་ལ། དེའི་འཕྲོས་སྲིད་སྐྱོང་དང་བཀྲ་ཤིས་དབང་འདུས་ལགས་སུ་ཆ་སྙོམས་ལྟ་བུ་ཐོབ་ངེས་རེད། དེས་ན། སྐུ་ཞབས་ཀླུ་མཁར་བྱམས་ལགས་སུ་རང་བཙན་འཐབ་བརྩོད་པ་རེ་ཟུང་དང་། དེ་མིན་མདོ་སྨད་ཁྲོད་ནས་གང་འཚམ་འཐོབ་སྲིད་ཀྱང་། དེ་མིན་ཁོང་ལ་འོས་ཤོག་ཐོབ་རེ་བྲལ་བ་རེད། མདོར་ན། ད་རེས་བཀྲ་ཤིས་དབང་འདུས་ལགས་དང་ཀླུ་མཁར་བྱམས་( སྲིད་སྐྱོང་ལ་ལངས་མིན་གསལ་པོ་མི་ཤེས།)གཉིས་སྲིད་སྐྱོང་གི་འོས་མིར་ལངས་པ་དེས་སྤྱི་འཐུས་ཚོགས་གཙོ་སྤེན་པ་ཚེ་རིང་ལ་ཕམ་ཉེས་ཀྱི་སྔོན་བརྡ་དང་སྲིད་སྐྱོང་གི་རྒྱལ་ཁའི་སྐྱ་རེངས་ལྟ་བུ་ཆགས་མེད་འགྲོ་སེམས་སོ།།

གོང་དུ་གུས་པས་ཕྱོགས་ལྷུང་སྤངས་ནས་རང་ཉིད་ཀྱི་སྔོན་དཔག་ཅི་ཡིན་གསལ་བརྗོད་བྱས་པ་ཙམ་ལས། རང་ཉིད་ཀྱི་འདོད་ཕྱོགས་དང་མཐུན་པའི་གནད་དོན་གང་ཡང་འབུར་བཏོན་བྱས་མེད་པ་མ་ཟད། ཞིབ་འཇུག་རང་བཞིན་གྱི་སྒོ་ནས་ཀྱང་བྲིས་མེད་སྟབས། ནོར་འཁྲུལ་མི་ཉུང་བ་ཞིག་མཆིས་པས་དགོངས་འགལ་མེད་པ་ཞུ།