ངེད་གཉིས་ལ་གཉན་ནད་རེག་དུག་ཕོག་ཡོད་པ་རྒྱལ་པོར་ཞུས་ཡིན།

འདས་པའི་ལོ་ཤས་ནས་བཟུང་དབང་འདུས་རྡོ་རྗེ་དང་ཚེ་རིང་ཆོས་སྒྲོན་ནི། འབྲུག་ཡུལ་མང་ཚོགས་ཁྲོད་གཉན་ནད་རེག་དུག་གི་ངོ་གདོང་ལྟ་བུ་དེ་ཆགས་ཡོད། ཁོ་གཉིས་ཀྱི་ཕྱོགས་ཁག་ནང་མི་ ༥ ཡོད་པ་མ་ཟད། འབྲུག་ཡུལ་རྒྱལ་པོའི་མདུན་དང་། དེའི་རྗེས་རྒྱལ་ཡོངས་ཀྱི་བརྙན་འཕྲིན་ཁང་བརྒྱུད་གཉན་ནད་རེག་དུག་ཕོག་ཡོད་པ་རྒྱལ་ཡོངས་ལ་ཕྱི་བསྒྲགས་བྱེད་མཁན་ཐོག་མ་དེ་ཆགས་ཡོད། དབང་འདུས་རྡོ་རྗེ་དང་ཚེ་རིང་ཆོས་སྒྲོན་བཟའ་མི་གཉིས་ལ་ཕྲུ་གུ་ ༤ ཡོད།

འབྲུག་ཡུལ་གྱི་དབྱར་དུས་ལ་རྒྱལ་ས་ཐིམ་ཕུག་ཏུ་ཁང་པ་གསར་རྒྱག་གི་སྐད་སྒྲས་ཁེངས་ཤིང་། དབང་འདུས་རྡོ་རྗེ་ཚང་གི་ཁང་མིག་གཉིས་ཅན་གྱི་སྒེའུ་ཁུང་ནས་ཀྱང་ཁྲོག་ཁྲོག་ཟེར་བའི་སྐད་སྒྲ་ཞིག་ཐོས་ཡོང་གི་འདུག ང་ཡར་ཕྱིན་ནས་ལྟ་སྐབས། ལོ་ན་ ༡༢ སོན་པའི་ཁོ་གཉིས་ཀྱི་བུ་མོས་ཐབ་ཚང་ནང་འཁྲུས་ལས་བྱེད་ཀྱིན་འདུག་ལ། སྡོད་ཁང་ཆུང་ཆུང་ཞིག་ཡོད་པ་དེའི་ནང་ཕྲུ་གུ་ཆུང་བ་ཚོས་འཇུ་རེས་འདེད་རེས་ཀྱི་རྩེད་མོ་རྩེ་བཞིན་འདུག ཁང་པའི་ནང་བརྙན་འཕྲིན་བསྟན་འདུག་ལ། གྱང་ལྡེབས་སུ་དྲི་ནོག་རིགས་གཅིག་ཀྱང་མེད་པར་གཙང་ཐང་ངེར་འདུག ཧོབ་དེ་བལྟས་ན་ཁོ་ཚོ་ནི་གཞན་གྱི་མིག་དཔེར་ལྟ་འོས་པའི་ཁྱིམ་ཚང་ཞིག་ཡིན་པར་འདོད་མོད་ཀྱང་། ཁོ་ཚོའི་འཚོ་བ་ང་ཚོའི་བསམ་ཚོད་ལས་ཧ་ཅང་རྒྱང་ཐག་རིང་ཞིང་དཀའ་ཚེགས་ཆེ་བ་ཡོད།

༢༠༠༦ ལོར་ཚེ་རིང་ཆོས་སྒྲོན་ལ་ཕྲུ་གུ་གཉིས་པ་ཆགས་ཏེ་ཟླ་གསུམ་ཕྱིན་སྐབས། བཟའ་ཟླ་དབང་འདུས་རྡོ་རྗེ་ཡིས་ཁོ་མོར་རོགས་པ་བྱས་ཏེ་སྨན་ཁང་ལ་བརྟག་དཔྱད་དུ་བསྐྱོད་དེ་ཕྱིར་ལོག་སྐབས། སྨན་ཁང་ནས་རྡོ་རྗེ་ལ་ཁ་པར་ཡོང་སྟེ། ཁོ་གཉིས་གང་མགྱོགས་ཕྱིར་སྨན་ཁང་དུ་ཡོང་དགོས་པའི་བརྡ་འབྱོར། ཁོ་གཉིས་ལམ་སང་ཕྱིར་སྨན་ཁང་དུ་ཕྱིན་སྐབས། འབྲེལ་ཡོད་འཕྲོད་བསྟེན་ལས་བྱེད་ཀྱིས་ཁོ་གཉིས་ཅོག་ཙེ་གཅིག་དང་རྐུབ་སྟེགས་བཞི་ཡོད་པའི་ཁང་པ་ཞིག་ཏུ་ཟུར་བཀག་བྱས་ཏེ་བཞག་ཅིང་། སྨན་ཁང་གི་སློབ་སྟོན་པ་སྐྱེས་པ་ཞིག་དང་བུད་མེད་ཅིག་ཡོད་པ་དེ་གཉིས་ཀྱིས་རྡོ་རྗེ་དང་ཆོས་སྒྲོན་གཉིས་ལ་སྐད་ཆ་ཚིག་གཅིག་ཀྱང་མི་བཤད་པར་ཅེར་ནས་བསྡད་འདུག

རྡོ་རྗེ་ཡིས་ང་ལ་སྐབས་དེའི་གནས་ཚུལ་བརྗོད་དོན། “ སྐབས་རེར་འཕྲོད་བསྟེན་ལས་བྱེད་དེ་གཉིས་ཀྱིས་ཧ་ཅང་ཡིད་གདུང་གི་རྣམ་པའི་ཐོག་ནས་ཕན་ཚུན་ལ་ལྟ་རེས་རེ་བྱས་ཏེ། གལ་ཏེ་ཁོ་གཉིས་ཀྱིས་ངེད་གཉིས་ལ་དངོས་ཡོད་གནས་ཚུལ་བཤད་ན་གང་འདྲ་ཆགས་ཡོང་ངམ་བསམ་ནས་ཡུད་ཙམ་རིང་བསམ་བློ་བཏང་ནས་བསྡད་རྗེས། གློ་བུར་དུ་སྐྱེས་པ་དེས་ངའི་བཟའ་ཟླ་ཕྱི་ལ་འགྲོ་རོགས་ལབ་སོང་བས། སྐབས་དེར་ང་ལ་བློ་ཚབ་ཆེན་པོ་ཞིག་སྐྱེས་སོང་བ་མ་ཟད། སྙིང་ཁམས་ཀྱི་འཕར་ལྡིང་ཡང་ཤུགས་ཆེ་རུ་ཕྱིན་སོང་། འཕྲོད་ལས་པའི་བཀའ་མངགས་ལྟར་ཆོས་སྒྲོན་ཕྱི་ལོགས་སུ་ཕྱིན་རྗེས། ང་དང་སྐྱེས་དམན་གཉིས་ཀར་གཉན་ནད་རེག་དུག་གི་ནད་འབུ་ཡོད་པ་བཤད་བྱུང་བས། ང་སྐབས་ཤིག་རིང་ཧང་སང་ནས་སྐད་ཆ་ཤོད་དཀའ་བར་འགྱུར་བ་མ་ཟད། ཡུན་ཙམ་རིང་དྲན་པ་བརླགས་ནས་ག་བྱེད་འདི་བྱེད་མེད་པ་ཆགས་ཤིང་། ངའི་སེམས་ནང་ཁྱོ་ཤུག་ཕན་ཚུན་བརྩེ་དུང་མེད་པ་ཆགས་ཏེ་མི་གཞན་དང་ལུས་འབྲེལ་བྱས་ཏེ་བྱུང་བ་ཞིག་རེད་བསམ་པ་མ་ཟད། གནད་དོན་དེ་ངའི་སྐྱེས་དམན་གྱིས་བྱས་པ་རེད་བསམ་ནས་ཁོང་ཁྲོའང་སྐྱེས་བྱུང་།” ཞེས་བརྗོད་བྱུང་།

རྡོ་རྗེ་ཡིས་ང་ལ་དེའི་རྗེས་ཁོས་སྨན་པ་ཚོར་ན་ཚ་དེ་ཁོང་གཉིས་ལས་སུ་ཞིག་ལ་སྔོན་ལ་འགོས་ཡོད་མེད་དྲིས་པ་ཡིན། སྐབས་དེར་ངའི་སྐྱེས་དམན་ལོ་ ༡༨ ལ་སོན་ཙམ་རེད་ཅེས་བརྗོད་བྱུང་། སྨན་པ་སྐྱེས་པ་དེས། རྡོ་རྗེ་ལ་ “ཁྱེད་གཉིས་ཀྱི་ལུས་ཀྱི་ཟུངས་ཁྲག་གི་སྔོན་འགོག་ནུས་པར་བལྟས་ན། ཁྱེད་རང་ལ་སྔོན་ལ་ནད་དེ་འགོས་འདུག” ཅེས་བརྗོད་བྱུང་ཞེས། མགོ་བོ་གཡུག་གཡུག་བྱེད་བཞིན་ “ང་ནི་ནག་ཉེས་ཅན་གྱི་མི་ཞིག་ཡིན་བསམ་པའི་བློ་ཕམ་ཆེན་པོ་སྐྱེས་བྱུང་།” ཞེས་བརྗོད་བྱུང་།

རྡོ་རྗེ་ཡིས་སྨན་པས་ང་ལ་གཉན་ནད་རེག་དུག་ཕོག་ཡོད་པ་བཤད་རྗེས། “སྐྱེས་དམན་ང་ཡོད་སའི་ཁང་པར་སྐད་བཏང་སོང་། ང་ཁོ་མོའི་གདོང་པར་ལྟ་རྒྱུའི་བློ་ཁོག་མི་འདུག གང་ཡིན་ཟེར་ན། སྐབས་དེར་ཁོ་མོ་ལོ་ཆུང་ཆུང་རེད།” ཆོས་སྒྲོན་གྱིས། “སྨན་པས་ང་ལ་གཉན་ནད་རེག་དུག་ཕོག་ཡོད་པ་བརྗོད་སྟབས། ལུས་པོ་ཡོངས་རྫོགས་འདར་སིག་བརྒྱབ་སྟེ། ཁ་ནས་སྐད་ཆ་འཐོན་གྱི་མི་འདུག་ལ་མིག་ནང་དུའང་མཆི་ཞག་འཁོར་བྱུང་། གང་ཡིན་ཟེར་ན། དེ་དུས་ང་ལོ་ཆུང་ཆུང་ཡིན་སྟབས། ང་མགྱོགས་པོར་འཆི་རྒྱུ་རེད་བསམ་བྱུང་།” ཞེས་བརྗོད་བྱུང་།

སྔོན་ཆད་རྡོ་རྗེ་དང་ཁོའི་དགའ་རོགས་བར་གྱི་འབྲེལ་བ་ལམ་ལྷོངས་བྱུང་མེད་སྟབས། ཁོས་ལང་ཚོ་དར་ལ་བབ་པའི་སྐབས་ལ་གང་བྱུང་བཟི་སྨན་བེད་སྤྱོད་བཏང་ཡོད་པ་མ་ཟད། མི་གཞན་དང་སྨན་ཁབ་བརྗེ་ལེན་བྱས་ཡོད་སྟབས་ནད་གཞི་དེ་འགོས་ཡོད་འདུག ཁོ་ལ་སྨན་པས་ནད་གཞི་དེ་ཕོག་ཡོད་པ་འགྲེལ་བཤད་མ་བྱས་སྔོན་ལ་ཁོས་གནས་ཚུལ་དེའི་སྐོར་གང་ཡང་ཤེས་ཀྱི་མེད་སྟབས། སྨན་པས་ཁོ་གཉིས་ལ་གཉན་ནད་རེག་དུག་མི་གཞན་ལ་མ་འགོས་པ་བྱེད་ཐབས་དང་། མངལ་ནང་ཡོད་པའི་ཕྲུ་གུར་ནད་གཞི་དེ་མ་འགོས་པ་བྱ་རྒྱུའི་ཐབས་ལམ་སོགས་སློབ་སྟོན་བྱས་འདུག

ཆོས་སྒྲོན་གྱིས། “ངེད་གཉིས་སྨན་ཁང་ནས་ཐོན་རྗེས་ང་རང་འཇིགས་སྐྲག་སྐྱེས་ནས་དྲན་པ་ཐོར་སོང་བ་མ་ཟད། ངེད་གཉིས་ལམ་བར་ནས་སུ་ལ་ཐུག་འཕྲད་མིན་ཡང་དྲན་གྱི་མི་འདུག ང་ཉིན་གང་བོར་ངུས་པ་ཡིན། ངེད་གཉིས་ཀས་གང་མགྱོགས་ཤི་རྒྱུར་ཞེད་སྣང་བྱས་པ་མ་ཟད། དེ་ལས་ལྷག་པར་ངེད་གཉིས་ལ་སྤྱི་ཚོགས་ཀྱིས་ལྟ་སྟངས་ངན་པ་བཟུང་སྟེ་མཐར་སྐྲོད་གཏོང་རྒྱུར་སེམས་ཁྲལ་ཆེན་པོ་སྐྱེས་སོང་།” ཞེས་བརྗོད་བྱུང་།

དེའི་རྗེས་རྡོ་རྗེ་ཡིས་ང་ལ་ཁོ་གཉིས་ཀྱིས་གྲོས་མཐུན་ཞིག་བཞག་པའི་ནང་། “དགོང་མོ་ང་གཉིས་ནང་ལ་ལོག་རྗེས་མ་འོངས་པར་ག་རེ་བྱེད་དགོས་མིན་སྐོར་ལ་གྲོས་བྱས་ཏེ་གནས་ཚུལ་དེ་གསང་བ་བྱ་རྒྱུ་དང་། མ་འོངས་པར་བུ་ཕྲུག་ཚོ་ཆང་ས་མ་བརྒྱབ་བར་སོ་སོའི་ཕ་མ་བུ་ཕྲུག་ལའང་གསང་བ་བྱ་རྒྱུའི་ཁ་ཆད་བྱས་པ་ཡིན།” ཞེས་བཤད་བྱུང་།

༢༠༠༦ ལོར་ཁོ་གཉིས་ལ་ཐོག་མར་ནད་གཞི་དེ་ཕོག་ཡོད་པ་ཧ་གོ་སྐབས། འབྲུག་ཡུལ་ནང་ནད་གཞི་དེའི་གོ་ཐོས་དཀོན་པོ་ཡིན། དེ་ནི་འབྲུག་ཡུལ་ས་བབ་ཀྱི་ཆ་ནས་ལུང་ཁུག་ནང་ཆགས་ཡོད་པ་དང་། འཕྲོད་བསྟེན་གོ་རྟོགས་ཞན་པོ་ཡིན་པ་སོགས་ལ་བརྟེན་ཏེ། ནད་གཞི་དེ་འབྲུག་ཡུལ་ནང་ག་ཚོད་ཁྱབ་རྡལ་ཕྱིན་ཡོད་མེད་རྟོགས་དཀའ། དེ་སྔོན་གྱི་འབྲུག་ཡུལ་རྒྱལ་པོའི་བཙུན་མོ་བཞིའི་གྲས་ཀྱི་བཙུན་མོ་སངས་རྒྱས་ཆོས་སྒྲོན་དབང་ཕྱུག་ནི། མཉམ་འབྲེལ་རྒྱལ་ཚོགས་མི་འབོར་ཐེབས་རྩ་ཁང་གི་མཐུན་སྒྲིལ་གྱི་ཕོ་ཉ་ཡིན་པ་མ་ཟད། ཚོགས་པ་དེས་བུ་ཕྲུག་སྐྱེ་འཕེལ་དང་འཁྲིག་སྤྱོད་སྐོར་ལ་གོ་རྟོགས་སྤེལ་གྱིན་ཡོད། ༢༠༠༨ ལོར་འབྲུག་རྒྱལ་ཡོངས་སུ་མི་འབོར་འབུམ་བདུན་ཡོད་ཁོངས་ནས་གཉན་ནད་རེག་དུག་ཕོག་མཁན་ ༡༤༤ ཡོད་པའི་ཐོ་འགོད་བྱས་ཡོད་ཀྱང་། ད་ལྟ་འབྲུག་དང་རྒྱ་དཀར་ནག་གཉིས་བར་ས་མཚམས་འཁེལ་ཡོད་སྟབས། གཉན་ནད་རེག་དུག་ཕོག་མཁན་གྱི་གྲངས་འབོར་ཇེ་མང་དུ་ཕྱིན་ཡོད།

མཉམ་འབྲེལ་རྒྱལ་ཚོགས་གཉན་ནད་རེག་དུག་ཚན་པས་འབྲུག་ནང་གཉན་ནད་རེག་དུག་གི་ནད་པ་ ༥༠༠ ལྷག་ཡོད་སྐོར་བརྗོད་ཡོད་པ་དང་། དེས་འབྲུག་གི་མི་འབོར་གྱི་བརྒྱ་ཆ་ ༠།༠༡ ཙམ་ཟིན་གྱི་ཡོད་སྟབས། འཕྲོད་བསྟེན་ལ་དོ་སྣང་ཡོད་མཁན་པའི་ཚེ་རིང་དངོས་གྲུབ་ལགས་རྒྱལ་ས་ཐིམ་ཕུག་ཏུ་བསྐྱོད་དེ། མང་ཚོགས་ལ་འགྱིག་ཤུབས་མཁོ་སྤྲོད་བྱེད་ཀྱིན་ཡོད་པ་དང་། ཁོས་རླངས་འཁོར་དཀར་པོ་ཞིག་གི་ཐོག་བརྗོད་ཚིག་ ༼སང་ཉིན་གྱི་བདེ་སྐྱིད་ཆེད་དུ་དེ་རིང་འགྱིག་ཤུབས་རག་པ་བགྱིས༽ཞེས་བྲིས་ནས་རྒྱལ་ས་ཐིམ་ཕུག་ནང་སྐོར་སྐྱོད་བྱེད་ཀྱིན་ཡོད། ཁོས་ནམ་རྒྱུན་འགྱིག་གི་ཕོ་མཚན་ཞིག་འཁྱེར་ཏེ། ཁང་པ་གསར་རྒྱག་བྱེད་ས་དང་། དོས་སྐྱེལ་རླངས་འཁོར་དང་གླ་གཏོང་རླངས་འཁོར་ས་ཚིགས་སོགས་སུ་ཕྱིན་ཏེ། འགྱིག་ཤུབས་ཇི་ལྟར་བེད་སྤྱོད་གཏོང་དགོས་མིན་སྐོར་ལ་མང་ཚོགས་ལ་ལམ་སྟོན་བྱེད་ཀྱི་ཡོད་སྟབས། དུས་རྒྱུན་ཁོ་ལ་འཕྱ་སྨོད་དང་དཀའ་ངལ་རིགས་ཀྱང་སྣ་ཚོགས་ཤིག་འཕྲད་བཞིན་ཡོད།

༡༩༨༠ ལོར་འབྲུག་གཞུང་གིས་གཉེན་སྒྲིག་བཅའ་ཡིག་མ་བཟོས་བར། འབྲུག་ཡུལ་ནི་གུ་ཡངས་སྤྱི་ཚོགས་ཤིག་ཡིན་པ་མ་ཟད། གྲོང་གསེབ་ཀྱི་བུད་མེད་ཚོས་ཁྱོ་ག་གཅིག་ལས་མང་བ་ལེན་གྱི་ཡོད། འོན་ཀྱང་མང་ཚོགས་ཀྱིས་ངོ་ཚར་རྩིས་ཏེ་འཁྲིག་སྦྱོད་སྐོར་ཁ་སང་པོས་ཤོད་ཀྱི་མེད་སྟབས། ནད་གཞི་དེའི་སྐོར་མང་ཚོགས་ལ་གོ་རྟོགས་སྤེལ་རྒྱུར་དཀའ་ལས་ཁག་པོ་ཡོད། དངོས་གྲུབ་ལགས་ཀྱིས། “ང་ཚོས་ཁོ་ཚོ་དང་མཉམ་དུ་གཤིབ་པ་དང་ཀྱལ་ཀ་རྩེད་བ་སོགས་བྱས་ཏེ། ཁོ་ཚོའི་གནས་བབ་ལ་ལྟ་ཐུབ་པ་བྱེད་དགོས།” ཞེས་བརྗོད།

༢༠༠༦ ལོའི་བར་འབྲུག་ཡུལ་ནང་གཉན་ནད་རེག་དུག་ཕོག་ཡོད་མཁན་ཚོ་སྐུང་ནས་སྡོད་ཀྱི་ཡོད། རྡོ་རྗེ་ཡིས་བརྗོད་དོན། “ང་ལ་འགོས་ནད་དེ་ཕོག་ཡོད་པ་བརྗོད་བྱུང་བ་མ་ཟད། ནད་གཞི་དེའི་སྐོར་ལ་གང་ཡང་ཤེས་ཀྱི་མེད། མི་མང་གིས་ཤེས་པ་ནི་གཉེན་ནད་རེག་དུག་ནི་ཁ་རོག་གེར་མིའི་ཚེ་སྲོག་འཕྲོག་མཁན་གྱི་གཤེད་མ་ཞིག་ཡིན་པ་མ་ཟད། མང་ཚོགས་ནང་དལ་བུར་སིམ་འཛུལ་གྱིས་གནོད་པ་སྐྱེལ་མཁན་ཞིག་ཡིན་པ་ལས་གཞན་གང་ཡང་ཤེས་ཀྱི་མེད། སྐབས་དེར་འབྲུག་ཡུལ་མང་ཚོགས་ཁྲོད་ནད་དེ་ཕོག་མཁན་ཚོ་གསོན་སྲེག་བྱེད་དགོས་པའམ། ཡང་ན་མང་ཚོགས་ཀྱིས་ཁོ་ཚོ་ངོ་རྟགས་ཆོད་ཆེད་ཁོ་ཚོའི་བརླ་ཤའི་ཐོག་རྟགས་འདེབས་དགོས་པའི་བསམ་ཚུལ་ཡང་བྱུང་ཡོད། འདི་ནི་མང་ཚོགས་ཚོས་ནད་གཞི་འདིར་འཛིན་པའི་ལྟ་སྟངས་ཡིན་སྟབས། ངའི་སེམས་ནང་གལ་སྲིད་ཕ་མ་དང་གཅེན་གཅོང་རྒན་གཞོན་ཚོས་ང་ལ་གཉན་ནད་རེག་དུག་ཕོག་ཡོད་པ་ཤེས་པའམ། ཡང་ན་སྤྱི་ཚོགས་ཀྱིས་གནས་ཚུལ་དེ་གོ་ཐོས་བྱུང་ཚེ། ཁོ་ཚོས་ང་ལ་གང་འདྲ་བསམ་ཡོང་ངམ། དེ་ནི་ངའི་ཞེད་སྣང་སྐྱེས་ཡུལ་ཆེ་ཤོས་དེ་རེད།” ཅེས་བརྗོད་འདུག

ཟླ་ཤས་རྗེས་ཆོས་སྒྲོན་ལ་ཕྲུ་གུ་བུ་མོ་ཞིག་བཙས་པ་མ་ཟད། བུ་མོར་གཉན་ནད་རེག་དུག་འགོས་མེད་སྟབས་དགའ་ཚོར་ཆེན་པོ་བྱུང་ཡོད། འོན་ཀྱང་། ཁོ་གཉིས་ཀྱི་དགའ་སྤྲོའི་ཚོར་བ་དེ་མི་གཞན་སུ་གང་ལའང་བཤད་ཐབས་མེད། རྡོ་རྗེས་སྨན་ཁང་དང་ཚོགས་སྡེ་གཞན་བརྒྱུད་དེ་གཉན་ནད་རེག་དུག་ཕོག་མཁན་ཚོར་ཐུག་འཕྲད་བྱེད་མགོ་བཙུགས། ཁོས་གཉན་ནད་རེག་དུག་ཕོག་མཁན་དེ་ཚོ་སྤྱི་ཚོགས་དང་ནང་མི། བུ་ཕྲུག་དང་སློབ་གྲྭ་སོགས་ལས་རྒྱང་འཕུད་གཏོང་གི་ཡོད་པ་དངོས་སུ་མཐོང་སྐབས། ཁོ་ཁོང་ཁྲོ་ཆེན་པོ་ལངས་ཡོད་ཀྱང་ཁོ་ཚོར་རོགས་རམ་བྱེད་ཐབས་བྲལ། གང་ཡིན་ཟེར་ན། ཁོ་རང་གིས་ཀྱང་གསང་བའི་གནས་ཚུལ་ཆེན་པོ་ཞིག་གི་འོག་ཏུ་འཚོ་བ་སྐྱེལ་བཞིན་ཡོད་སྟབས། གཞན་ལ་རོགས་བྱེད་པའི་ནུས་པ་གང་ཡང་མེད།

༢༠༠༩ ལོར་བརྙན་འཕྲིན་ཁྱབ་བསྒྲགས་ཤིག་གི་ནང་། སྟོད་ཐུང་དང་དོར་མ་ནག་པོ་གྱོན་ཞིང་། ལྷམ་ཡུ་རིང་ནག་པོ་གྱོན་པའི་མི་ཞིག་སྲང་ལམ་སྟོང་པ་ཞིག་ཏུ་ཁེར་རྐྱང་གིས་འགྲོ་བཞིན་ཡོད་པ་དང་། མཐའ་མར་ཁོས་གདོང་པ་བཀབ་སྟེ་ཁང་སྟོང་ཞིག་ཏུ་ཕྱིན་ཏེ་རྐུབ་སྟེགས་སྟེང་བསྡད་དེ། “ཕོ་གསར་ཚོ། གཟབ་གཟབ་བྱོས། གལ་སྲིད་ཁྱེད་ལ་གཉན་ནད་རེག་དུག་ཕོག་ན། ཁྱེད་རང་ང་ལྟར་མཐོང་ས་མེད་པར་འགྱུར་རྒྱུ་རེད།” ཅེས་ལབ་རྗེས། མི་དེ་བརྙན་འཕྲིན་ནང་ནས་མཐོང་རྒྱུ་མེད་པ་ཆགས་སྟབས། ཕ་རོལ་བོར་དྲི་རྟགས་མང་པོ་ཞིག་བཞག་པ་རེད། ཆོས་སྒྲོན་གྱིས་ཁྱབ་བསྒྲགས་དེ་མཐོང་རྗེས། ཁོ་མོ་ངུ་བཞིན་དུ་ཁྱོ་གར། “ང་མགྱོགས་པོར་འཆི་གི་རེད། ང་ལོ་ཆུང་ཆུང་ཡིན། ང་འཆི་རྒྱུ་རེད།” ཅེས་བརྗོད་སྟབས། རྡོ་རྗེ་ཡིས་ཁོ་མོའི་སྡུག་བསྔལ་དེ་བཟོད་ཐབས་བྲལ་ནས། “ངས་སྡུག་བསྔལ་འདི་ལས་གྲོལ་རྒྱུའི་ཐག་གཅོད་བྱས་པ་མ་ཟད། ད་ལྟ་ཟ་བཞིན་པའི་སྨན་དེ་སྦས་ནས་མི་མང་ལ་མགོ་སྐོར་གཏོང་རྒྱུ་མིན་པར། ཡོངས་ཁྱབ་ཏུ་གསལ་བསྒྲགས་བྱ་རྒྱུའི་ཐག་གཅོད་བྱས་པ་ཡིན།” ཞེས་བརྗོད་བྱུང་།
 
རྡོ་རྗེ་ཡིས་གཉན་ནད་རེག་དུག་གིས་མནར་ནས་འཚོ་བ་སྐྱེལ་བཞིན་པའི་མི་གཞན་གསུམ་ལ་སྐུལ་སློང་བྱས་ཏེ། ཁོ་དང་མཉམ་དུ་མང་ཚོགས་ཀྱི་མདུན་ལ་འཐོན་ནས་ཁོ་ཚོའི་གནས་སྟངས་གང་ཡིན་འགྲེལ་བཤད་རྒྱག་དགོས་པའི་དུས་ལ་བསླེབས་ཡོད་པར་བརྗོད་པ་མ་ཟད། ཁོས་བཟའ་ཟླ་ཆོས་སྒྲོན་ལའང་ཁོ་རང་གི་ཐག་གཅོད་དེ་བཤད་སྐབས། ཁོ་མོར་ཕོག་ཐུག་ཆེན་པོ་ཕྱིན་ཏེ་བརྗོད་དོན། “ང་ཁོའི་སྟེང་ལ་ཁྲོང་ཁྲོ་ཆེན་པོ་ལངས་བ་མ་ཟད་ཞེད་སྣང་ཡང་སྐྱེས་བྱུང་བས། ངས་ཁོ་ལ་གལ་སྲིད་ཁྱོད་ཀྱིས་དེ་འདྲ་བྱས་པ་ཡིན་ན། ངས་ཁྱོད་རང་གཡུག་ནས་འགྲོ་རྒྱུ་ཡིན། ངས་ཕྲུ་གུ་ཚོ་ཁྲིད་དེ་ཕ་ཡུལ་ལ་ལོག་རྒྱུ་ཡིན། གང་ཡིན་ཟེར་ན། འབྲུག་ཡུལ་ནི་སྤྱི་ཚོགས་ཆུང་ཆུང་ཞིག་ཡིན་པ་དང་། མི་ཚང་མས་གཅིག་གིས་གཅིག་ངོ་ཤེས་ཀྱི་ཡོད་པ་མ་ཟད། ང་རྡོ་རྗེའི་སྐྱེས་དམན་ཡིན་པ་ཤེས་ཀྱི་ཡོད་སྟབས། རྡོ་རྗེ་མང་ཚོགས་དཀྱིལ་དུ་ལངས་རྒྱུར་ང་ལ་འདོད་པ་མེད། ” ཅེས་བརྗོད་བྱུང་། ཁོ་མོས་རྡོ་རྗེ་ལ་ཟླ་བ་གཅིག་མ་ཟིན་ཙམ་རིང་ཁ་ཡང་མ་གྲགས་པ་མ་ཟད། ཁོ་གཉིས་བར་གྱི་དམ་བཅའ་རྩིས་མེད་བཏང་སྟེ། མགོ་སྐོར་བསླུ་བྲིད་བྱས་པའི་ཚོར་བ་ཞིག་ངང་གིས་སྐྱེས་པ་རེད།

རྡོ་རྗེ་ཡིས་ ༢༠༡༡ ལོའི་ཟླ་ ༡༢ ཚེས་ ༡ ཉིན་འཛམ་གླིང་གི་གཉན་ནད་རེག་དུག་ཉིན་མོ་དང་བསྟུན་ཏེ། མང་ཚོགས་ཁོ་རང་ལ་གཉན་ནད་རེག་དུག་ཕོག་ཡོད་པ་ཁྱབ་བསྒྲགས་བྱ་རྒྱུ་ཡིན་པའི་ཐག་གཅོད་བྱས་ཡོད་སྟབས། ཉི་མ་དེ་ཉིན་རེ་བཞིན་ཐག་ཉེ་རུ་འོང་གིན་པ་དང་མཉམ་དུ་ཆོས་སྒྲོན་གྱི་སེམས་པར་འགྱུར་བ་ཐེབས་མགོ་བཙུགས། རྡོ་རྗེ་ཡིས་ང་ལ་མཚན་བཟང་ཞིག་ལ་སྐྱེས་དམན་གྱིས་ཁོ་མོ་ཡང་མང་ཚོགས་མདུན་དུ་འཐོན་འདོད་ཡོད་བརྗོད་བྱུང་བས། ཁོས་ཁོ་མོར་བྲེལ་ཚུབ་བྱས་ནས་ཐག་གཅོད་མ་བྱེད། གནད་དོན་འདིར་བསམ་བློ་ཡག་པོ་བཏང་སྟེ་ཐག་གཅོད་བྱེད་དགོས། ཁྱོད་ཀྱིས་ལམ་ཁ་འདི་བདམས་རྗེས་མི་ཚོས་ཁྱོད་རང་དབྱེ་འབྱེད་བྱེད་ཡུལ་ཞིག་ཆགས་རྒྱུ་ཡིན་པ་མ་ཟད། གཞན་གྱིས་མིག་ཅེར་ནས་ལྟ་ས་ཉག་ཅིག་ཆགས་རྒྱུ་རེད། གལ་སྲིད་ཁྱོད་ཀྱིས་དེ་ཚོར་བཟོད་སྒོམ་བྱེད་ཐུབ་ན་ཧ་ཅང་ཡག་པོ་རེད་ཅེས་བརྗོད་པ་ཡིན་ལབ་བྱུང་། རྡོ་རྗེ་ཡིས་ཉིན་མོ་དེ་དྲན་གསོ་བྱས་ནས་ང་ལ་སྐད་ཆ་དེ་ཚོ་ཤོད་སྐབས་གདོང་པར་འོད་མདངས་འཕྲོ་བཞིན་འདུག ཆོས་སྒྲོན་གྱིས་ང་ལ་ཁོ་མོས་མང་ཚོགས་ལ་ཁྱབ་བསྒྲགས་བྱེད་དགོས་དོན་ནི། ཁོ་མོ་ཡིག་རྨོངས་བ་ཞིག་ཡིན་སྟབས་ཁོ་མོས་ཁོ་མོའི་སྤྱི་ཚོགས་ལ་ལེགས་སྐྱེས་ཤིག་འབུལ་ཐུབ་པ་ཡིན་ན། བློས་གཏོང་བྱེད་དགོས་ཀྱང་བྱེད་རིན་ཡོད་པ་ཞིག་རེད་ཅེས་བརྗོད་བྱུང་།

རྡོ་རྗེ་དང་ཆོས་སྒྲོན་ཐེ་པའི་ནད་གྲོགས་འགར་འབྲུག་ཡུལ་རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག་གིས་སྒེར་གྱི་མཇལ་ཁ་གནང་ཡོད་སྟབས། ཆོས་སྒྲོན་གྱིས་ང་ལ་སྐབས་དེར་ཁོ་མོས་རྒྱལ་པོ་མཆོག་ལ་ཁོ་མོའི་ནད་གཞི་གང་ཡིན་སྙན་སེང་ཞུ་མ་ཕོད་ཀྱང་། ང་བསོད་བདེ་ཆེན་པོ་ཞིག་ཡིན་བསམ་པ་ཞིག་དྲན་བྱུང་། གང་ཡིན་ཟེར་ན། མི་ཁ་ཤས་ལ་མ་གཏོགས་རྒྱལ་པོ་མཆོག་ལ་མཇལ་རྒྱུའི་གོ་སྐབས་རེག་གི་ཡོད་པ་མ་རེད། ཅེས་བརྗོད་བྱུང་། དེ་བཞིན། རྡོ་རྗེ་ཡིས་ང་ལ་སྤོབས་སེམས་ཆེན་པོས་ཁོ་བོའི་འདས་པའི་གནས་ཚུལ་བསྐྱར་དྲན་བྱས་དོན། རྒྱལ་པོ་མཆོག་གིས་ང་ཚོ་ཕྱིར་འཕུད་མ་བཏང་བ་མ་ཟད། ནད་རིགས་འདི་ཡོད་པར་ངོ་ཚ་མི་དགོས་པའི་ཚོར་བ་ཞིག་སྤྲད་བྱུང་།  ཁོང་གིས་ང་ཚོའི་མི་ཚེ་སྐྱེལ་སྟངས་སྐོར་ལ་སྤྱིར་བཏང་གི་གསུང་མོལ་གནང་ཞིང་། ནད་གཞི་འདི་ལས་ལྷག་པའི་ཉེན་ཚབས་ཅན་གྱི་ནད་རིགས་མང་པོ་ཡོད་པའི་སྐོར་གསུངས་བྱུང་། སྐབས་དེར་ཁང་པའི་ནང་མི་ ༡༠༠༠ ལྷག་ཡོད་པ་མ་ཟད། རྒྱལ་མོ་མཆོག་གིས་ཁོ་ལ་འཐམ་འཁྱུད་ཅིག་གནང་བྱུང་བས།  དེས་ག་རེ་འགྲེལ་བཤད་བྱས་པ་རེད་ཟེར་ན། གཉན་ནད་རེག་དུག་འདི་འཐམ་འཁྱུད་དང་ཐུག་རེག་སོགས་བྱས་ན་འགོས་ཀྱི་མེད་པའི་བརྡ་ལན་སྤྲད་པ་རེད། ཅེས་བརྗོད་བྱུང་།

རྒྱལ་པོ་མཆོག་ལ་མཇལ་རྗེས་རྒྱལ་ཡོངས་ཀྱི་བརྙན་འཕྲིན་ཐོག་ང་ཚོ་གཉན་ནད་རེག་དུག་ཕོག་མཁན་གྱི་མི་ལྔའི་སྐོར་བསྟན་སོང་། ཆོས་སྒྲོན་ལ་མཚོན་ན། འདི་ནི་དཀའ་ཚེགས་ཅན་གྱི་དུས་ཚོད་ཅིག་མགོ་བཙུགས་པ་རེད། ཁོ་མོས། “ང་ཚོར་སེམས་ཁྲལ་ཞེ་དྲགས་བྱུང་བ་མ་ཟད། ངའི་སྙིང་གི་རྡིག་སྒྲ་ཆེ་རུ་ཕྱིན་ནས་ཁ་ནས་ཕྱིར་འཐོན་གྲབས་བྱེད་ཀྱི་ཡོད་པ་ཞིག་ཚོར་སོང་། གལ་སྲིད་ང་ལ་གོ་སྐབས་གཉིས་པ་ཞིག་ཡོད་ན་ང་བྲོས་འགྲོ་ས་རེད།” ཅེས་བརྗོད་བྱུང་།

འབྲུག་ཡུལ་གྱི་མང་ཚོགས་རྒན་དར་གཞོན་གསུམ་གྱིས་ཁོ་ཚོའི་སྐོར་གྱི་བརྙན་འཕྲིན་ལ་བལྟས་ཡོད་པ་མ་ཟད། ད་བར་མི་སུ་གང་གིས་ཀྱང་གཉན་ནད་རེག་དུག་གི་ནད་ཕོག་སྟེ་འཚོ་བ་བསྐྱལ་ནས་སྡོད་མཁན་གཅིག་ཀྱང་མཐོང་མྱོང་མེད། རྡོ་རྗེ་ཡིས་མི་ཚོགས་མང་བའི་ཆང་ཁང་ཞིག་ནས་ཁོ་བོའི་གྲོགས་པོ་ཞིག་གིས། “ཁོ་ཚོ་བརྙན་འཕྲིན་ནང་སྟོན་སྐབས་ཆང་ཁང་ནང་སྐད་སྒྲ་གཅིག་ཀྱང་མ་གྲགས་པར་ཁུ་སིམ་སིམ་ཆགས་སོང་བ་མ་ཟད། མི་མང་ཚོས་དོ་སྣང་ཆེན་པོས་ལྟ་ཉན་བྱས་ཏེ། གཉན་ནད་རེག་དུག་ཕོག་མཁན་ཚོའི་གཟུགས་དབྱིབས་དང་སྐད་ཆ་ཤོད་སྟངས་སོགས་ལ་དོ་སྣང་ཆེན་པོ་བྱས་སོང་།” ཞེས་བརྗོད་བྱུང་། ཅེས་ང་ལ་བཤད་བྱུང་། སང་ཉིན་དེར་ཆོས་སྒྲོན་དང་རྡོ་རྗེ་གཉིས་ཁྲོམ་ལ་འགྲོ་སྐབས། མི་མང་པོ་ཞིག་གིས་ཁོ་གཉིས་ངོ་ཤེས་ཏེ་མིག་ཅེར་རེར་བལྟས་ནས་སྡོད་པ་དང་། ཕྲུ་གུ་ཚོས་ཀྱང་ཁོ་གཉིས་མཐའ་སྐོར་ནས་ཡག་པོར་བལྟས་རྗེས་བྲོས་འགྲོ་བཞིན་འདུག

ཆོས་སྒྲོན་གྱིས་ཞོགས་པ་དེར་ཁོ་མོར་སེམས་ཁྲལ་ཆེན་པོ་བྱུང་བ་མ་ཟད། ངོ་ཚ་ཡང་སྐྱེས་ནས་སྐད་ཆ་བཤད་མ་ཐུབ་པ་ཆགས་ཏེ། ལུས་པོ་ཡོངས་རྫོགས་འདར་སིག་བརྒྱབ་སྟེ་སྐད་ཆ་ཚིག་གཅིག་ཀྱང་ཁ་ནས་འཐོན་མ་སོང་། དེའི་རྗེས་རྡོ་རྗེའི་པ་ལགས་ཀྱིས་ཁ་པར་འབྱོར་ཏེ། “ བུ། ང་ལ་ང་ཚོའི་ཕ་ཡུལ་གཅིག་པ་ཚོས་ཁྱེད་ཀྱི་སྡུག་རབས་མང་པོ་ཞིག་ཤོད་ཀྱི་འདུག ཡུལ་མི་ཚོས་ཁྱེད་ལ་གཉན་ནད་རེག་དུག་ཕོག་ཡོད་པ་རེད་ཟེར་གྱི་འདུག” ཅེས་བརྗོད་སོང་བས། རྡོ་རྗེ་ཡིས་པ་ལགས་སུ། “པ་ལགས་ཁྱེད་ཀྱིས་གོ་བ་ཚང་མ་བདེན་པ་རེད།” ཅེས་ལན་བརྒྱབ་སོང་བས་པ་ལགས་ཀྱིས་སྐད་ཆ་ཚིག་གཅིག་ཀྱང་ཁ་ནས་མ་འཐོན་པར་ཡུན་རིང་བསྡད་རྗེས། ཁོང་གིས་ “བུ། ངས་ཁྱེད་རང་འབྲུག་ཡུལ་གྱི་ཆུ་ཚན་དུ་འཁྲིད་རྒྱུ་ཡིན།” ཞེས་བརྗོད་སོང་། རྡོར་རྗེ་ཡིས། “ པ་ལགས། ནད་གཞི་འདི་ཆུ་ཚན་གྱིས་དྲག་སྐྱེད་ཐུབ་པ་ཞིག་མ་རེད།” ཅེས་བརྗོད་སོང་། ཁོ་ལ་ཨ་མ་དང་སྲིང་མོས་སྐད་ཆ་ཤོད་རྒྱུ་མིན་པའི་ཁས་ལེན་བྱས་སོང་ཞེས་བརྗོད་བྱུང་།

ཟླ་ཤས་རྗེས་རྡོ་རྗེ་དང་ཆོས་སྒྲོན་གྱི་ཁང་བདག་གིས་ཁོ་གཉིས་ཕྱིར་འཕུད་བཏང་ཡོད་སྟབས། ཕྲུ་གུ་བཞི་དང་མཉམ་དུ་སྲང་ལམ་ཐོག་འཁྱམས་དགོས་བྱུང་འདུག སྐབས་དེར་ཆོས་སྒྲོན་གྱིས་ང་ལ།  “ངའི་ཁང་བདག་ལ་ཤེས་ཡོན་མེད་པ་མ་ཟད། རྒན་འཁོགས་རེད། ངས་ཁོ་ལ་ངེད་གཉིས་འཕྱིར་འཕུད་གཏོང་དགོས་དོན་གང་ཡིན་དྲིས་པར། ཁོ་ཚོས་ཁྱེད་ཚོའི་ས་ནས་གཉན་ནད་རེག་དུག་འགོ་སྲིད་པར་སེམས་ཁྲལ་བྱེད་ཀྱི་འདུག་སྟབས། གལ་སྲིད་ཁྱེད་གཉིས་ཁང་པ་འདིའི་ནང་མུ་མཐུད་བསྡད་ན་ཁང་པ་གླ་མཁན་གཞན་པ་ཚོ་སྤོ་དགོས་པ་ཆགས་རྒྱུ་རེད།  ” ཅེས་བརྗོད་འདུག ཁོ་ཚོས་རྡོ་རྗེའི་གཅེན་པོར་ངེད་གཉིས་ལ་ཁང་པ་འཚོལ་རོགས་ལབ་འདུག

ངའི་བུ་མོ་རྒན་ཤོས་དེ་སློབ་གྲྭར་འཕྱ་སྨོད་བྱ་ཡུལ་ཞིག་ཏུ་འགྱུར་ཡོད་འདུག ང་ལ་ཆོས་སྒྲོན་གྱིས། “ཁོ་མོར་སློབ་གྲྭའི་ནང་གི་གྲོགས་པོ་གྲོགས་མོ་ཚོས་ཕ་མར་གཉན་ནད་རེག་དུག་ཡོད་སྟབས། ཁྱེད་རང་ལའང་ཡོད་སྲིད་པ་རེད། དེར་བརྟེན། ང་ཚོ་ཁྱེད་རང་དང་གྲོགས་པོ་བསྒྲིག་གི་མིན་ཞེས་བརྗོད་སྟབས། བུ་མོ་ནང་ལ་བསླེབས་རྗེས་ངུས་ནས་སྡོད་ཀྱི་ཡོད་པ་མ་ཟད། སློབ་གྲྭར་འགྲོ་གི་མིན།” ཞེས་རྗོད་ཀྱི་འདུག་སྟབས། ངས་བུ་མོར། “ གནས་ཚུལ་འདིར་གདོང་ལེན་བྱ་རྒྱ་ལས་སློབ་གྲྭ་བརྗེ་པོ་བརྒྱབ་ན་ཡག་པོ་ཡོད་པ་མ་རེད། དུས་ཚོད་ཀྱི་འགྱུར་འགྲོས་ཀྱི་དབང་གིས་ནམ་ཞིག་ཁོ་ཚོས་ཧ་གོ་ཡོང་གི་རེད་ཅེས་སོགས་ལབ་པས་ཁོ་མོས་ངའི་ཁ་ལ་ཡག་པོ་ཉན་བྱུང་། ཞེས་བརྗོད་བྱུང་།

སྐབས་དེར་ཆོས་སྒྲོན་གྱི་བུ་མོ་ཐབ་ཚང་བརྒྱུད་ནས་སྡོད་ཁྱིམ་ནང་ཕྱིན་སོང་། ད་ལྟ་ཁོ་མོ་ལོ་ ༡༢ སོན་ཙམ་ཡིན་པ་མ་ཟད། སློབ་གྲྭའི་སྦྱངས་འབྲས་ཀྱང་ཡག་པོ་ཡོད། བུ་མོ་དེས་ངོ་ཚ་བྱེད་ཀྱིན་ངའི་གམ་དུ་བཅར་ཏེ། ང་ལ་ཁོ་མོའི་ཕ་མ་གཉིས་ཀྱི་རྒྱལ་ཡོངས་བརྙན་འཕྲིན་བརྒྱུད་ནས་གཉན་ནད་རེད་དུག་ཕོག་ཡོད་པ་ཕྱི་བསྒྲགས་བྱས་རྗེས། “ངས་གྲོགས་པོ་གྲོགས་མོ་ཚོར། ཐུགས་རྗེ་གཟིགས། ཁྱེད་ཚོས་ང་ལ་གཉན་ནད་རེག་དུག་ཡོད་པ་རེད་མ་ལབ་རོགས་ཞེས་བརྗོད་པ་ཡིན། ང་ལ་ཕ་མ་གཉིས་ཀྱི་ས་ནས་ནད་གཞི་དེ་འགོས་མེད། གང་ཡིན་ཟེར་ན། ངས་ནད་གཞི་དེའི་སྐོར་ལ་ཏོག་ཙམ་ཤེས་ཀྱི་ཡོད། གལ་སྲིད་ཁྱེད་ཀྱིས་འགྱིག་ཤུབས་བེད་སྤྱོད་མ་བཏང་ཚེ། གཉན་ནད་རེག་དུག་འགོས་རྒྱུ་རེད། ཁྱེད་ཚོ་སེམས་ཁྲལ་བྱེད་དགོས་པ་མ་རེད། གལ་སྲིད་ང་ཚོར་ན་ཚ་དེ་འགོས་པའི་དབང་དུ་བཏང་ཡང་། ང་ཚོ་འཆི་གི་མ་རེད།” ཅེས་བརྗོད་པ་ཡིན་ཟེར།

རྡོ་རྗེ་དང་ཆོས་སྒྲོན་གྱིས་སྤྱིར་བཏིང་གི་མི་ཚེ་ཞིག་བསྐྱལ་ཏེ་མི་འབོར་འཕེལ་རྒྱས་སུ་གཏོང་རྒྱུའི་ཐག་གཅོད་བྱས་ཡོད་པ་རེད། ཁོ་གཉིས་ཀྱིས་ཕྲུ་གུ་ཞིག་སྐྱེས་པ་ཡིན་ན་ནད་འབུ་དེ་ཕྲུ་གུ་དེར་འགོས་རྒྱུ་ཉག་ཅིག་རེད་བསམ་པའི་སེམས་ཁྲལ་བྱུང་ཡོད་ཀྱང་། ཆོས་སྒྲོན་ལ་ཁོ་གཉིས་ཀྱི་ཕྲུ་གུ་གཉིས་པ་བཙའ་སྐབས། ཕྲུ་གུ་དེར་ནད་གཞི་དེ་མེད་སྟབས། ཁོ་གཉིས་ཀྱིས་སྨན་པའི་སར་ཕྱིན་ཏེ་ཕྲུ་གུ་གཞན་ཞིག་སྐྱེ་རྒྱུ་ཡིན་ཞེས་བརྗོད་འདུག ང་ལ་ཆོས་སྒྲོན་གྱིས། “ཨེམ་ཆིས་མང་ཚོགས་མདུན་ལ་ང་གཉིས་ལ་གཤེ་གཤེ་ཚ་ཐག་ཆོད་ཅིག་བཏང་བྱུང་བ་མ་ཟད། ཕྲུ་གུ་དགོས་ཟེར་བ་དེ་རྐང་བཙུགས་ནས་མངལ་ཆགས་བཅུག་པ་ཡིན་ནམ་ནོར་འཁྲུལ་ཤོར་ནས་ཕྲུ་གུ་ཆགས་པ་རེད་ཅེས་དྲིས་བྱུང་བས། ངས་ཨེམ་ཆིའི་མདུན་དུ་ཡོང་སྟེ་རྐང་བཙུགས་ནས་ཆགས་བཅུག་པ་ཡིན་ཞེས་བརྗོད་པ་ཡིན།” ཞེས་དང་། དེའི་རྗེས་ཨེམ་ཆི་ལགས་ཀྱིས་ཁོ་མོར། “ཕྲུ་གུ་འདི་སྐྱེས་རྗེས་ངས་ཁྱེད་རང་ལ་གཤག་བཅོས་བྱ་རྒྱུ་ཡིན། དེ་འདྲ་བྱུང་ཚེ་ཁྱེད་རང་ལ་ཕྲུ་གུ་མང་པོ་ཡོང་གི་མ་རེད།” ཅེས་བརྗོད་པ་ལྟར། ངས་ཁོང་ལ་ཁས་ལེན་བྱས་པ་ཡིན་པས་ཁོང་གིས་ངས་ཕྲུ་གུ་བཞི་པ་བཙས་རྗེས། ངའི་སྐྱེ་མགོ་བཀག་སོང་།” ཞེས་བརྗོད་བྱུང་། ད་ལྟ་ཁོ་གཉིས་ལ་གཉན་ནད་རེག་དུག་གི་ན་ཚ་མེད་པའི་མཁུར་མཚོས་དམར་ཅན་གྱི་བུ་ཕྲུག་སྙིང་རྗེ་པོ་ ༤ ཡོད་པ་མ་ཟད། ཁོ་ཚོ་ནང་མི་གཞན་དང་གཅིག་མཚུངས་ཀྱིས་མཉམ་དུ་ཟས་ཟ་བ་དང་མཉམ་དུ་ཉལ་བ་སོགས་བྱས་ཏེ་མི་ཚེ་སྐྱེལ་བཞིན་ཡོད་འདུག ཆོས་སྒྲོན་གྱིས། “ད་ལྟ་ང་ཚོས་གང་བྱས་ཀྱང་ཕལ་ཆེ་བ་མཉམ་དུ་བྱེད་ཀྱི་ཡོད་ཀྱང་། ངས་ཁོ་ཚོ་དང་ངའི་ཁྲག་རིགས་ནམ་ཡང་མ་འདྲེས་པ་བྱེད་ཀྱི་ཡོད། འདི་ནི་ངས་དོ་སྣང་བྱེད་དགོས་པའི་གནད་དོན་གཅིག་པུ་དེ་ཡིན།” ཞེས་བརྗོད་བྱུང་།

ལྟ་ན་སྡུག་པའི་ཆོས་སྒྲོན་དང་རྡོ་རྗེ་བཟའ་ཚོ་གཉིས་ལག་སྦྲེལ་ནས་འབོལ་སྟེགས་ཐོག་བསྡད་ཡོད་པ་མ་ཟད་ལྟ་སོ་ཡང་དོད་པོ་ཡོད་སྟབས། ཁོ་གཉིས་ནི་འབྲུག་ཡུལ་ནང་གཉན་ནད་རེག་དུག་ཕོག་མཁན་ཁྲོད་ཀྱི་ཕན་ནུས་ལྡན་པའི་ངོ་ཚབ་ལྟ་བུ་ཆགས་ཡོད། ནད་གཞི་འདིས་ཁོ་ཚོའི་མི་ཚེའི་ཁ་ཕྱོགས་འདྲ་མིན་སྣ་ཚོགས་ཤིག་གི་ཐོག་ཁྲིད་ཡོད་སྟབས། ད་ལྟ་རྡོ་རྗེ་ནི་འབྲུག་ཡུལ་གྱི་གཉན་ནད་རེག་དུག་གི་ནད་པ་མཉམ་རུབ་བྱེད་མཁན་གྱི་བདེ་རྩའི་འགན་འཛིན་ཡིན་པ་དང་། བདེ་རྩ་ཁང་འདིས་ཁོ་ཚོ་ཕན་ཚུན་སེམས་ཚོར་དྲག་པོའི་ཐོག་ནས་མཉམ་རུབ་ཡོང་ཐབས་བྱས་ཏེ་ཐག་ཇེ་ཉེ་རུ་གཏོང་གི་ཡོད།

མཇུག་ཏུ་ཆོས་སྒྲོན་གྱིས་ང་ལ། “ངེད་གཉིས་ལ་ནད་གཞི་འདི་མ་ཕོག་སྔོན་ལ་ཁ་རྩོད་ཡང་ཡང་ཤོར་ཀྱི་ཡོད་པ་མ་ཟད། འཁྲུག་པའང་ཡང་ཡང་ཤོར་གྱི་ཡོད། ད་ལྟ་ངེད་གཉིས་ལ་ནད་གཞི་འདི་ཕོག་རྗེས་འབྲེལ་བ་ཧ་ཅང་ཡག་ཏུ་ཕྱིན་སོང་། ད་ལྟ་ངེད་གཉིས་ནི་ཕན་ཚུན་གྱི་རྟེན་ས་ཁོ་ན་དེ་ཡིན་སྟབས། གཅིག་གི་གཅིག་ལ་གང་ཐུབ་ཀྱིས་བརྩི་འཇོག་བྱེད་རེས་བྱེད་ཀྱིན་ཡོད། ངས་ང་གཉིས་ལ་ནད་གཞི་འདི་ཕོག་པ་ནས་བཟུང་ད་བར་ཁ་རྩོད་ཤོར་བ་དྲན་གྱི་མི་འདུག་པ་མ་ཟད། དེ་ལས་ལྡོག་སྟེ་བརྩེ་དུང་ཆེ་རུ་ཕྱིན་སོང་།” ཞེས་བརྗོད་བྱུང་།

མ་རྩོམ་གྱི་འབྲེལ་ཐག http://www.bbc.com/news/magazine-33697521?ocid=socialflow_facebook