ངས་རྩོམ་ཡིག་དེ་མཐོང་དུས་བློ་སེང་སྔོན་མ་སྲིད་སྐྱོང་གི་ཞབས་སྟེགས་ལས་མར་འཁོར་སྐབས་ཀྱི་རྩ་དོན་གསུམ་དང་རྩ་བའི་དམ་བཅའ་སོགས་ཡིད་ལ་ཤར་ནས་ ༢༠༡༦ ལོའི་སྲིད་སྐྱོང་གི་ཞབས་སྟེགས་དེ་བློ་སེང་ལ་མི་འཐོབ་པའི་རྒྱུ་མཚན་འགའ་བགྲང་རྒྱུ་ཡིན།
༢༠༡༦ ལོའི་སྲིད་སྐྱོང་གི་འོས་མིའི་ཁོངས་སུ་ད་སྔ་སྲིད་སྐྱོང་བློ་བཟང་སེང་གེ་མཆོག་དང་། ཚོགས་གཙོ་སྤེན་པ་ཚེ་རིང་མཆོག དེ་མིན་བཀྲ་ཤིས་དབང་འདུས། ཨ་ཚོགས་ཀླུ་མཁར་བྱམས་བཅས་ཐོན་ཡོད་ཀྱང་། ཨ་ཚོགས་ཀླུ་མཁར་བྱམས་དང་བཀྲ་ཤིས་དབང་འདུས་གཉིས་ནི་གནས་སྐབས་ཀྱི་དགོས་མཁོའམ་ཡང་ན་དམིགས་ཡུལ་གཞན་ཞིག་གི་ཆེད་དུ་སྲིད་སྐྱིང་གི་འོས་མིའི་ཁོངས་སུ་ལངས་པ་ལས་ཁོ་གཉིས་ལ་སྲིད་སྐྱོང་གི་ཞབས་སྟེགས་དེ་མི་འཐོབ་པ་ཁོ་གཉི་ཀས་ཀྱང་ཤེས་ཡོད་ལ་དངོས་གཞིའི་སྐབས་སུ་ཕལ་ཆེར་འོས་ཤོག་ཁ་འཐོར་དུ་མི་འགྲོ་བའི་ཆེད་ཁོ་གཉི་ཀས་ཕྱིར་འཐེན་བྱེད་ངེས་ཡིན།
༢༠༡༦ ལོའི་སྲིད་སྐྱིང་གི་ཞབས་སྟེགས་མཐའ་མའི་འཕྲོག་རྩོད་ནི་བློ་སེང་དང་སྤེན་ཚེ་གཉིས་ནས་བྱེད་དགོས་ལ་མཐར་དེད་ན་མདོ་སྟོད་སྨད་གཉིས་ནས་བྱེད་དགོས། མདོ་སྟོད་སྨད་གཉིས་ལས་སུ་ཞིག་ལ་རྒྱལ་ཁ་ཐོབ་མིན་ནི་དབུས་གཙང་མི་མང་གི་རྒྱབ་སྐྱོར་ལ་བརྟེན་དགོས་ལ། དེ་ཡང་སྤེན་ཚེ་ལ་རྒྱབ་སྐྱོར་འཐོབ་པར་ཉེ་སྔོན་དབུས་གཙང་ཆོལ་ཁའི་འགན་འཛིན་ལྷན་ཚོགས་ཀྱི་ཐོག་ནས་ཕལ་ཆེར་ཐག་གིས་བཅད་ཡོད།
འོ་ན་བློ་སེང་ལ་རྒྱབ་སྐྱོར་མ་བྱས་པའི་རྒྱུ་མཚན་ནི་གང་རེད་ཟེར་ན། བློ་སེང་སྐབས་བཅོ་ལྔ་བའི་སྲིད་སྐྱིང་གི་འོས་མིའི་ཁོངས་སུ་ལངས་སྐབས་ཁོའི་ཁ་ནང་ལ་འཕྲེད་ཀྱིས་བཟུང་ནས་ཤེད་ཀྱིས་བསྒྲགས་གཏམ་སྤེལ་བ་ནི་ཆིག་སྒྲིལ་དང་རང་ཁ་རང་གསོ། གསར་གཏོད་བཅས་རེད། ད་དུང་ཁོས་སྲིད་སྐྱོང་དམ་འབུལ་གྱི་ཉིན་མོར་སྤེལ་བའི་དམ་བཅའི་ནང་༧གོང་ས་མཆོག་བོད་ལ་གདན་འདྲེན་ཞུ་རྒྱུ་དང་བོད་ནང་ཁེ་ལས་པ་འབུམ་གཅིག་དང་བཙན་བྱོལ་ནང་ཁེ་ལས་པ་ཁྲི་གཅིག་སྐྱེད་སྲིང་བྱེད་རྒྱུའི་དམ་བཅའ་དང་བཅས་སྲིད་སྐྱོང་གི་ཞབས་སྟེགས་དེའི་སྟེང་ནས་སྟོང་བཤད་ནམ་མཁར་མི་ཤོང་བ་ཞིག་བྱས།
བོད་རྒྱ་འབྲེལ་མོལ་དང་ཤེས་ཡོན་སྲིད་བྱུས་གཉིས་ནི་བོད་མིའི་དཀའ་རྙོག་སེལ་བྱེད་ཀྱི་ཐབས་ལམ་ཡག་ཤོས་དང་མི་རིགས་ཀྱི་རིན་ཐང་དང་ཚེ་སྲོག་ལྟ་བུར་གྱུར་ཡོད་པས། ཁོས་ཀྱང་དེ་གཙོ་བོར་དམིགས་ནས་ཤེས་རིག་བཀའ་བློན་གྱི་འགན་ཡང་གཅིག་ལྕོགས་སུ་བཞེས་ནས་མི་ལོ་གསུམ་འདས།
༢༠༡༤ ལོའི་གྲོས་ཚོགས་ཚོགས་དུས་བརྒྱད་པའི་སྟེང་སྐབས་སྔོན་མའི་བཀའ་ཤག་གིས་སྲ་བརྟན་དུ་བཏང་ཡོད་པའི་སློབ་གྲྭ་ཁག་གི་ནང་གཏན་འབེབས་བྱས་པའི་ཤེས་ཡོན་སྲིད་བྱུས་ལ་དགེ་རྒན་གྱིས་མ་འདང་བ་དང་། ཡོད་པ་རྣམས་སྤུས་ཀ་ཞན་པ་ལ་སོགས་པའི་དབང་གིས་ཤེས་ཡོན་སྲིད་བྱུས་ཀྱི་མ་ལག་དང་བཅས་པ་ཁ་འཐོར་དགུ་འཐོར་དུ་སོང་བ་དེ་ལ་ཞིབ་འཇུག་ཚོགས་ཆུང་ཞིག་འཛུགས་དགོས་པའི་གྲོས་འཆར་ཞིག་སྤྱི་འཐུས་རྒྱུན་ལས་ནས་འཁྱེར་ཡོང་དུས་བློ་སེང་གིས་དེ་ལ་དགག་པ་བརྒྱབ་ཡོད་ཀྱང་མཐར་སྤྱི་འཐུས་མང་མོས་ནས་རྒྱབ་སྐྱོར་མ་ཐོབ་པས་ཞིབ་འཇུག་ཚོགས་ཆུང་འཛུགས་ཐུབ་པ་བྱུང་། འོན་ཀྱང་དུའི་སྐབས་བློ་སེང་གིས་ཤེས་རིག་བཀའ་བློན་ལོགས་སུ་བསྐོས་ནས་རང་ཉིད་ཤེས་ཡོན་སྲིད་ཇུས་དང་གཡོལ་ཐབས་བྱས།
བོད་རྒྱ་འབྲེལ་མོལ་ནི་ལོ་འདི་དག་གི་རིང་ལ་གཅིག་ཀྱང་བྱེད་མ་ཐུབ་པ་མ་ཟད་སྐབས་སྔོན་མའི་དམིགས་བསལ་སྐུ་ཚབ་ཀྱིས་དགོངས་པ་ཞུས་རྗེས་དེའི་ཚབ་ལ་སྐུ་ཚབ་ཅིག་གི་གྲིབ་མ་ཙམ་ཡང་མཐོང་རྒྱུ་མི་འདུག དེའི་ཕྱིར་༧གོང་ས་མཆོག་བོད་ལ་གདན་འདྲེན་ཞུ་རྒྱུ་ཡིན་ཟེར་བ་དེ་ཡང་ཁ་སྟོང་ནང་གི་ཚིག་སྟོང་དུ་གྱུར་པ་མ་ཟད། ད་དུང་༧གོང་ས་མཆོག་གི་སྐུ་སྲུང་གི་ནུས་པ་ཇེ་ཞན་དུ་སོང་ནས་དོལ་རྒྱལ་རྗེས་འབྲང་བ་ཚོ་༧གོང་ས་མཆོག་གི་སྐུ་མདུན་ལ་ཐོན་ནས་སྐད་འབོད་བྱས་པ་ལ་སོགས་རྒྱལ་སྤྱིའི་དྲ་ལམ་ཁག་ལ་ཐོན་ཡོད་པ་བཅས་སོ།།
ཁོའི་རྩ་དོན་གསུམ་སྟེ་ཆིག་སྒྲིལ་གྱི་ནུས་པ་ཉམས་ནས་དབུ་མ་དང་རང་བཙན་གཉིས་བར་འགལ་ཟླ་བྱུང་ནས་བོད་མི་འཐབ་རྩོད་པ་རྣམས་ཕྱོགས་གཉིས་སུ་གྱེས་པ་དང་། ཆོལ་ཁ་དང་ཆོས་ལུགས་བར་གྱི་རྙོག་དྲ་ཆེ་རུ་གྱུར་ནས་ཇོ་ནང་དང་ས་སྐྱ་གཉིས་ཀྱི་རྩོད་གཞི་ལས་བྱུང་བའི་ཇོ་ནང་ཆོས་བརྒྱུད་ཀྱི་ཐོབ་ཐང་དེ་གྲོས་ཚོགས་ར་བའི་ནང་ལ་ཐོན་དུས་ཆོལ་ཁའི་ཕྱོགས་ལྷུང་གི་དབང་དུ་སོང་ནས་མཐར་ཇོ་ནང་པ་གཞིས་བྱེས་ཡོངས་ཀྱིས་བཙན་བྱོལ་གཞུང་ལ་བཟུང་བའི་རེ་བ་ཆད་ནས་ཐབས་ཟད་འུ་ཐུག་སྒོས་བྱེས་སྡོད་ཇོ་ནང་བ་ཚོས་ཚོགས་ཁང་གི་སྒོ་འགྲམ་ནས་ཞི་རྒོལ་བྱེད་དུས་བློ་སེང་གི་ཁ་ནང་ནས་ཚིག་གཅིག་ཀྱང་མ་ཐོན་པ་མ་ཟད། ཁོའི་སྔོན་མའི་དམ་བཅའ་ཆིག་སྒྲིལ་ཟེར་བ་དེ་ཡང་གར་སོང་ཆ་མེད་དུ་གྱུར།
རང་ཁ་རང་གསོ་ནི་དེ་ལས་ཀྱང་སྟོང་གཏམ་དུ་གྱུར་ཡོད་པས་དྷ་སའི་རི་གྲོང་ན་ཡོད་པའི་བདག་མེད་ཀྱི་གསར་འབྱོར་བ་ཚོས་རང་ཁ་མ་སོས་པར་རང་ཡུལ་ལ་ལོག་མཁན་མང་དུ་སོང་བ་དང་ཁ་ཅིག་བུ་ལོན་ཕོན་ཆེན་བླངས་ནས་ཕྱི་རྒྱལ་ཁག་ལ་ཐར་ཐབས་བྱས་ནས་ད་སྐབས་དྷ་སའི་རི་གྲོང་བོད་མིས་སྟོང་ལ་ཉེ་བ་འདི་ཡང་རང་ཁ་མ་སོས་པའི་དན་རྟགས་ལས་གཞན་གང་ཡང་མ་ཡིན་ནོ།།
ད་དུང་གངས་སྐྱིད་ན་ཡོད་པའི་གཞུང་ཞབས་ཚོས་ཀྱང་ཟླ་ཕོགས་ཀྱིས་རང་ཁ་མ་སོས་པའི་དཀའ་ངལ་འོག་རྩ་དགོངས་ཞུ་མཁན་ཇེ་མང་ལ་འགྲོ་བཞིན་པ་འདི་ཡང་རང་ཁ་རང་གིས་མ་སོས་པས་རང་ཁ་རང་གསོ་ཟེར་བའི་རྩ་དོན་དེའི་རང་གཟུགས་ཕྱི་རུ་བསྟན།
གསར་གཏོད་ནི་ད་སྐབས་སྲིད་སྐྱིང་མཆོག་ཕྱིའི་རྒྱལ་ཁབ་ཁག་ལ་ཕྱོགས་སྐྱོད་རྐྱང་རྐྱང་ལ་ཕེབས་པ་དེ་ཡིན་ན་མ་གཏོགས་བཙན་བྱོལ་སྤྱི་ཚོགས་ཆུང་ཆུང་འདིའི་ནང་དུ་བསྐོར་བ་གསུམ་བརྒྱབ་ཀྱང་བཙལ་ནས་མི་རྙེད་པས་དོན་ངོ་མས་བློ་སེང་གི་གསར་གཏོད་ནི་ཉེས་ཅན་པ་བཞིན་གང་ཞིག་ན་སྦས་ཡོད་དམ།
གོང་གི་འཐུས་ཤོར་ལ་སོང་བ་དང་བོད་མི་རྣམས་ལ་མགོ་སྐོར་བསླུ་བྲིད་ཀྱི་སྐད་ཆ་འདི་དག་གི་རྒྱུ་མཚན་ལས་བཙན་བྱོལ་བ་ཚོ་བློ་སེང་ལ་ཨ་ཐང་ཆད་ཡོད་པས་ ༢༠༡༦ ལོའི་སྲིད་སྐྱོང་གི་ཞབས་སྟེགས་དེ་བློ་སེང་ལ་མི་འཐོབ་པའི་རྒྱུ་མཚན་ཡིན་ནོ།།
ལུང་རྟོགས་ལགས་ཀྱི་མཆན་ལ་བརྒྱ་ཆ་བརྒྱ་མོས་མཐུན་རྒྱབ་སྐྱོར་ཡོད། ལུང་ཚན་ཕྱོགས་རིས་འབྱེད་རིགས་ལ་ཀུན་སློང་ལ་སྐྱོན་ཡོད་སྟབས་སྥྱི་དོན་ལ་གནོད་འགལ་ལས་ཕན་པ་བསྒྲུབ་རྒྱུ་ཕལ་ཆེར་མི་སྲིད། དེར་བརྟེན་ཆོལ་ཁའི་ཚོགས་པར་གུས་བརྩི་ནམ་ཡང་བྱེད་ཀྱི་མེད་ལ་ང་ཚོ་བོད་མི་ནང་ཁུལ་རྩོད་རྙོག་བཟོ་གཞི་ལས་དགོས་དོན་ཏིལ་འབྲུ་ཙམ་ཡང་མེད་དོ།
རྩོམ་ཡིག་འདི་འབྲི་མཁན་གྱི་མི་དེ་ཆོལ་ཞེན་གྱི་སྐྲན་ནད་ཕོག་ཟིན་པའི་ཁྱི་སྐྱག་གཅིག་ཡིན་པ་སྐད་ཆའི་འགོ་ནས་སྟན་འདུག བོད་མི་ཕལ་མོ་ཆེས་བོད་ཀྱི་སྲིད་སྐྱོང་དེ་མི་འཇོན་ཐང་ཅན་དང་སྤྱི་སེམས་ཅན་ཞིག་གདམ་འདོད་པ་ལས་ཆོལ་ཁའི་དབྱེ་འབྱེད་བྱེད་འདོད་མེད་པ་དྲ་རྒྱའི་ནང་གི་བསམ་ཚུལ་ཁག་ལ་ལྟས་ན་གསལ་པོ་རེད། དེས་ན་མདོ་སྟོད་ཀྱིས་བློ་སེང་དང་མདོ་སྨད་ཀྱིས་སྤེན་པ་ཚེ་རིང་ལ་འོས་བླུག་པར་བཤད་པ་ནི་སྐྱག་དྲི་བྲོ་བའི་སྐད་ཆ་ཞིག་རེད་ལ་ཁོ་རང་མི་གང་འདྲ་ཞིག་ཡིན་པ་ཡང་གསལ་སྟོན་བྱས་པ་རེད།
སྲིད་སྐྱོང་གིས་གོང་ས་མཆོག་བོད་ལ་གདེན་འདྲེན་ཞུ་ཐུབ་པའི་འབད་རྩོན་བྱེད་རྒྱུ་དང་། བོད་ནང་ཁེ་ལས་པ་འབུམ་གཅིག་དང་བཙན་བྱོལ་ནང་ཁྲི་གཅིག་སྐྱེད་སྲིང་བྱེད་ཐུབ་པའི་དམིགས་ཚད་བཟུང་དགོས་པར་གསུང་པ་ལས། ཁོང་གི་ལས་དུས་རིང་ལ་དེ་འདྲ་ཞིག་བཟོ་ཐུབ་པ་བྱེད་ཀྱི་ཡིན་ཞེས་ནམ་ཡང་གསུངས་མེད། གོང་ས་མཆོག་བོད་ལ་གདན་འདྲེན་ཞུ་རྒྱུ་དེ་འདྲའི་ལས་སླ་པོ་ཞིག་མིན་པ་མི་སུ་འདྲ་ཞིག་ཡིན་ཡང་ཤེས་གསལ་རེད་ལ། ཁེ་ལས་པ་དེ་འདྲ་མང་པོ་ཞིག་སྐྱེད་སྲིང་བྱེད་པར་ཉུང་མཐར་ལོ་ཉི་ཤུ་སུམ་བཅུ་འགོར་བ་ལས། ལོ་ལྔ་དང་བཅུ་ནང་ལ་ཡོང་ཡ་མེད་པ་རྩ་ཚང་ཡོད་པའི་མི་སུ་ཡིན་ཡང་ཤེས་གསལ་རེད། དེས་ན་སྐད་ཆ་འདི་འདྲ་ལ་གཞི་མེད་སྙོན་འཛུག་ཟེར་བ་རེད།
ཤེས་ཡོན་སྲིད་ཇུས་ལ་མཚོན་ན་བློ་སེང་གིས་ཡར་རྒྱས་བཏང་བ་ཅང་མེད་ན་ཡང་ཟམ་གདོང་རིན་པོ་ཆེས་གང་གཏན་འབེབ་གནང་བ་དེ་དྲ་མ་ཉམ་གྲུ་མ་ཞིག་པར་གནས་ཡོད་པ་རེད་ལ། བོད་རྒྱ་འབྲེལ་མོལ་ཟེར་བ་དེ་གཞན་དབང་སྟབས་བཏུན་ལས་རང་དབང་གི་སྒོ་ནས་བྱེད་རྒྱུ་ཞིག་མ་ཡིན་པ་ཀུན་གསལ་རེད། ཡང་ན་འབྲེལ་མོལ་མ་བྱས་རང་བྱས་ཀྱི་གནོན་ཤུགས་ཤིག་སྤྲད་ཐུབ་དགོས་ཀྱང་བཙན་བྱོལ་བོད་པ་ཚོ་ལ་དེའི་ནུས་པ་མེད་པས་འདི་ནི་བཙན་བྱོལ་བོད་མི་ཚང་མས་མ་འཇོན་པ་ལས་འདིས་ལན་ཁག་སྲིད་སྐྱོང་གཅིག་པུའི་མགོ་ལ་གཡོག་ན་དྲང་བདེན་གྱི་སྐད་ཆ་ཞིག་ནམ་ཡང་མིན།
དོལ་རྒྱལ་བས་གོང་ས་མཆོག་ལ་རྒོལ་བ་འདི་ཡང་བཀའ་ཁྲི་ཟམ་གདོང་གི་སྐབས་ནས་ཡོད་པ་ཞིག་ལས་བློ་སེང་གི་དུས་སུ་གསར་དུ་བྱུང་བ་ཞིག་གཏན་ནས་མིན་པས་སྐུ་སྲུང་གི་ནུས་པ་ཞན་དུ་སོང་བ་ཟེར་བ་འདི་ཡང་རྫུན་གཏམ་ཁོ་ན་ཡིན། ལར་ནས་ངོ་རྒོལ་སྐད་འབོད་བྱེད་མཁན་བྱུང་བ་ཙམ་གྱིས་སྐུ་སྲུང་གི་ནུས་པ་ཞན་དུ་སོང་བ་རེད་ཟེར་ན་དེ་ནི་གནས་ལུགས་གང་ཡང་མེད་པའི་སྐད་ཆ་ཞིག་རེད།
ཆོལ་གསུམ་ཆིག་སྒྲིལ་གྱི་ནུས་པ་ཉམ་ཟེར་བ་འདི་ཡང་རྫུན་གཏམ་འབབ་ཞིག་རེད། ཆོལ་གསུམ་ཆིག་སྒྲིལ་གྱི་ནུས་པ་ནི་ད་ལྟ་ལས་ལྷག་པ་ཞིག་བོད་ཀྱི་ལོ་རྒྱུས་ནང་བྱུང་མ་མྱོང་ཟེར་ཡང་ཆོག་པ་ཞིག་རེད་ལ། ཆོལ་གསུམ་ཆིག་སྒྲིལ་གྱི་ནུས་པ་ཉམ་གྱི་ཡོད་པའི་སྒྲུབ་བྱེད་ལ་དབུ་རང་བར་གྱི་འགལ་ཟླ་བཀོད་པ་ནི་སྒྲུབ་བྱེད་ཡང་དག་བཀོད་རྒྱུ་མ་རྙེད་པར་གང་དྲན་དྲན་བཤད་བཞག་པ་ཞིག་རེད། དབུ་རང་གཉིས་ནི་བོད་མའི་འཐབ་རྩོད་ཀྱི་ལང་ཕྱོགས་མི་འདྲ་བ་གཉིས་ཡིན་པ་ལས། འདི་གཉིས་ཀྱིས་ཆོལ་ཁའི་བར་ལ་རྩོད་རྙོག་ཡོང་དགོས་པའི་རྒྱུ་མཚན་རྡུལ་ཙམ་ཡང་མེད། ཇོ་ནང་ཆོས་རྒྱུད་ཀྱི་ཐོབ་ཐང་དེ་གྲོས་ཚོགས་ར་བའི་ནང་ལ་ཐོན་དུས་ཆོལ་ཁའི་ཕྱོགས་ལྷུང་གྱི་དབང་དུ་སོང་ཡོད་ན་དེ་ནི་སྤྱི་འཐུས་ཚོས་མ་འཇོན་པ་ཞིག་ལས་སྲིད་སྐྱོང་ལ་ལན་ཁག་དཀྲི་ཡ་གང་ཡང་མེད་པ་རེད། ལར་ནས་ཆིག་སྒྲིལ་ཟེར་བ་དེ་ཡང་མི་ཚང་མས་མཉམ་རུབ་ཀྱིས་འབད་དགོས་པ་ཞིག་ལས་མི་གཅིག་གི་ལག་ལ་མེད་པ་ཅིས་མི་ཤེས།
རྡ་སའི་གསར་འབྱོར་ཚོ་རང་ཡུལ་ལ་ལོག་སོང་བ་ནི་རང་ཁ་མ་སོས་ནས་མ་ཡིན་པར་རྒྱ་གཞུང་གི་དཔལ་འབྱོར་ཡར་རྒྱས་ཀྱི་སྲིད་ཇུས་ཀྱིས་བཀུག་སོང་བ་རེད་ལ་བུ་ལོན་བླང་ནས་ཕྱི་རྒྱལ་ལ་འགྲོ་དོན་ཡང་འདོད་རྔམ་གྱི་དབང་གིས་རེད། ལར་ནས་སྲིད་སྐྱོང་གིས་རང་ཁ་རང་གསོའི་སྲིད་ཇུས་སྟོན་པ་ཙམ་གྱིས་སོ་སོས་འབད་རྩོན་ཅི་ཡང་མི་དགོས་པར་ཉལ་ནས་ཁ་གདང་སྡད་ན་དེའི་ནང་ལ་ཁ་ལག་གང་འདོད་སྲིད་སྐྱོང་གིས་བླུག་ཡོང་བ་ལྟ་བུ་ཞིག་ལ་གོ་ཡི་ཡོད་ན་དེ་ནི་ལྐུགས་རྟགས་སྟན་པ་ལས་གཞན་ཅི་ཡང་མིན། གཞུང་ཞབས་ཁག་གཅིག་ཕྱི་རྒྱལ་ལ་འགྲོ་བའི་ཐབས་ལམ་མ་འགྲིག་བར་དུ་གཞུང་ཞབས་བྱས་ནས་འགྲིག་པ་དང་ནུབ་ཕྱོགས་ལ་འཕུར་འགྲོ་ཡི་ཡོད་པ་རེད་ལ། དེ་དག་ཀྱང་མཐར་བཏུག་ན་དངུལ་གྱི་འདོད་རྔམ་དབང་དུ་སོང་ནས་སྲི་ཞུའི་བསམ་པ་བོར་བརླག་སོང་བ་ཞིག་ལས་ཁ་མ་སོས་པ་ཟེར་བ་དེ་ནི་རྫུན་གཏམ་འབབ་ཞིག་གོ།།