རིག་པ་དྭངས་གསལ་བྱོས།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༡ སྟེང་གི་རྩོམ་སྒྲིག་པའི་གཏམ།

དགོད་བྲོ་བ་ཞིག་ལ། ནམ་རྒྱུན་བཙན་བྱོལ་ནང་གི་ཚོགས་ས་འདུ་ས་ཁག་ཏུ་འགྲིག་ཡོད་པ་དང་འགྲུབ་ཡོད་པ། གྲུབ་འབྲས་ཐོན་ཡོད་པ་དང་ཡར་རྒྱས་ཕྱིན་ཡོད་པ་རྐྱང་རྐྱང་གླེང་གི་ཡོད། བཀའ་ཤག་སྐབས་བཅོ་ལྔ་པའི་སྲིད་སྐྱོང་དང་སྤྱི་འཐུས་སྐབས་བཅུ་དྲུག་པའི་འོས་བསྡུ་བསླེབ་ལ་ཉེ་བ་དང་བསྟུན་ཏེ། སྤྱི་དོན་བསྒྲུབ་རྒྱུ་ཡིན་ཟེར་མཁན་དང་བླངས་བ་ཚང་མས་འགྲིག་གི་མེད་པ་དང་འགྲུབ་ཀྱི་མེད་པའི་གནས་ཚུལ་མང་པོ་ཞིག་བརྒྱུད་ལམ་ཁག་ཏུ་བརྫང་ཡོང་གི་འདུག དེ་དང་མཉམ་དུ་བོད་མིའི་སྒྲིག་འཛུགས་ཀྱི་འཐུས་ཤོར་ཐལ་ཆ་དག་ཀྱང་སྔོག་ཡོང་གི་འདུག

    དོན་དངོས་སུ་འགྲིག་གི་མེད་པ་དང་འགྲུབ་ཀྱི་མེད་པ་མང་པོ་ཡོད་སྲིད་པ་རེད། འུ་ཅག་བཙན་བྱོལ་དུ་ཡོང་ནས་མི་ལ་སྐྱབས་བཅོལ་ཏེ་སྡོད་མཁན་སྤྲང་ཚོགས་ཁྱུ་གཅིག་རེད། མགོ་ཐོག་གི་ནམ་མཁའ་དང་རྐང་ཞབས་ཀྱི་ས་ཆ་འདི་ཡང་འུ་ཅག་ལ་བདག་གི་མ་རེད། ཡིན་ནའང་མང་པོ་ཞིག་འགྲིག་གི་མེད་པ་དང་འགྲུབ་ཀྱི་མེད་པ་དེ་དག་རང་ཉིད་ཀྱིས་ཀྱང་བསྒྲུབ་ཐུབ་ཀྱི་ཡོད་མེད་དྲང་མོར་བཤད་དགོས། རྒྱ་ཆེའི་མང་ཚོགས་ལ་མགོ་བསྐོར་གཏོང་མི་རུང་། བོད་གཞིས་བྱེས་མི་མང་གི་ལྟ་ས་དང་ཉན་ས་ཁྱེད་ཅག་ཡིན། མ་འོངས་པའི་ལོ་ལྔ་ནས་བཅུ་དེ་ཁྱེད་ཅག་ལ་བདག་གི་ཡོད།

      “སྐད་ཆ་ག་རེ་བཤད་པ་དེས་མི་དེར་འགྲེལ་བཤད་རྒྱག་མི་ཐུབ། ལས་ཀ་ག་རེ་བྱས་པ་དེ་མི་དེའི་འགྲེལ་བཤད་ཡིན།” ཞེས་པའི་ནུབ་ཕྱོགས་པའི་ཁ་རྒྱུན་ལྟར། མང་ཚོགས་ཀྱིས་རིག་པ་དྭངས་གསལ་བྱ་དགོས། ད་ལྟའི་སྲིད་སྐྱོང་བློ་བཟང་སེང་གེ་འདི་སྔོན་ཆད་བཀའ་ཁྲིར་བཞེངས་སྐབས། ཆིག་སྒྲིལ། གསར་གཏོད། རང་ཁ་རང་གསོ། ༧གོང་ས་མཆོག་བོད་ནང་གདན་ཞུ་རྒྱུ་ཡིན། ཞེས་འུར་ཆེན་པོ་བསླངས་པ་དེ་དག་ད་ལྟ་ག་འདྲ་ཆགས་འདུག ད་ལྟའི་སྲིད་སྐྱོང་འོས་མི་བཀྲ་ཤིས་དབང་འདུས་ཀྱིས་ཀྱང་། རྒྱུན་གནས། ཤེས་ཡོན། དཔལ་འབྱོར། གྲོས་མོལ། ཞེས་མི་མང་ལ་ཧེབ་སློང་གི་ཡོད་པ་འདི་དག་ཀྱང་ལོ་ལྔའི་རྗེས་ལ། དེ་རིང་བློ་བཟང་སེང་གེ་ཡི་གནས་སྟངས་ལྟར་བློ་ཕམ་དང་འཁངས་ར་བྱེད་ཡུལ་ཆགས་སྲིད།

        དེ་བཞིན། ཨ་ཚོགས་ཀླུ་མཁར་བྱམས་ཀྱིས་ཀྱང་། སྲིད་དོན་བསྐྱར་ཞིབ་ཀྱི་འཆར་སྒོ་དང་གཞུང་སྲིད་བར་གནས་ཀྱི་འཆར་སྒོ། བྲན་གཡོག་གཤིས་ཀ་ལ་ངོ་རྒོལ་དང་དད་པ་ལོག་སྤྱོད་ལ་ངོ་རྒོལ། ཞེས་ན་གཞོན་གསར་པ་ཚོར་ཨ་གསར་སློང་བྱེད་དུ་རིག་གསར་གྱི་བརྡ་ཆད་མང་པོ་ཞིག་སྤུངས་ཡོང་གི་འདུག་པ་འདི་དག་ད་ལྟ་ནས་ནང་དོན་སྟོང་པ་རེད། གསལ་བསྒྲགས་ཧྲིལ་བོར་གཞོན་གསར་ཞིག་གི་ལྷུག་རྩོམ་ལས་སྲིད་སྐྱོང་ཞིག་གི་རྒྱལ་སྐྱོང་གི་རྣམ་པ་དང་ནང་དོན་མི་འདུག དེ་བཞིན། སྤྱི་འཐུས་ཚོགས་གཙོ་སྤེན་པ་ཚེ་རིང་གིས་དམངས་གཙོའི་ཀ་བ་གསུམ་གྱི་ནུས་པ་མཉམ་སྤུང་ཟེར་བ་ཞིག་གཙོར་འདོན་བྱེད་ཀྱི་ཡོད་པ་དེའང་བཀའ་ཤག་སྐབས་བཅུ་གཉིས་ནས་ཁ་འདོན་བྱས་པའི་ཁ་གཡང་ཙམ་ཞིག་རེད།
        འོན་ཀྱང་ཐབས་རྡུགས་པའི་ནང་གི་རེ་བ་ཙམ་ཞེས་པ་ལྟར། ཚོགས་གཙོའི་བཀའ་མོལ་དེ་དག་ནི་ལས་དོན་དངོས་ལ་བར་ཐག་ཉེ་ཤོས་ཆགས་འདུག རྒྱལ་ཁབ་རང་བཙན་པ་ཞིག་གི་སྲིད་འཛིན་སྲིད་བློན་འོས་མི་ཚོས་འུར་རྒྱག་སྟངས་དེ་མ་ཡིན་པར། ང་ཚོ་བཙན་བྱོལ་སྒྲིག་འཛུགས་ཤིག་ཡིན་པ་དང་། ང་ཚོའི་སྲིད་སྐྱོང་གི་རྐུབ་སྟེགས་དེའང་གཞུང་གི་འགན་འཛིན་ཙམ་ Head of government ཞིག་ཡིན་པའི་ངོས་ཐད་ནས། བཙན་བྱོལ་སྤྱི་ཚོགས་དང་གངས་ཅན་སྐྱིད་གཤོངས་ཀྱི་ཉིན་རེའི་ལས་དོན་བྱེད་ཕྱོགས་ངོ་མ་དེ་རེད།

     མ་འོངས་པར་ཡང་སྲིད་སྐྱོང་འོས་མི་སུ་ཞིག་བཞེངས་ཀྱང་། བར་སྣང་ལ་ལྷ་ཁང་མི་བཞེངས་བར་ཁ་ལ་རན་པའི་ཐུར་མ་དང་། རང་གིས་འཇོན་པའི་ལས་འཆར་ཞིག་བསྒྲག་རྒྱུ་ལས། རྒྱ་ཆེའི་མང་ཚོགས་ལ་མགོ་སྐོར་མ་གཏོང་རོགས་ཞུ་བཞིན་ཡོད་ལ། ལྷག་པར་དུ་ད་ལྟའི་བརྡ་འཕྲིན་དུས་རབས་ནང་གི་སྔོན་ཐོན་པ་བྱས་ཏེ། བོད་ནང་ལ་བརྒྱུད་སྐུལ་བྱེད་པའི་ཐབས་རྡུགས་ཀྱི་བྱེད་སྒོ་རིགས་ཀྱང་མཚམས་འཇོག་རོགས་ཞེས་ཞུ་བ་འཐེན་བཞིན་ཡོད།