རྒྱ་གར་རྒྱལ་ས་ལྡི་ལིར་དབུས་གཞོན་ནུ་ལྷན་ཚོགས་ཀྱི་རྒྱུན་ལས་གསུམ་གྱིས་དུས་ཚོད་ངེས་མེད་ཀྱི་ཟས་བཅད་ངོ་རྒོལ་གནང་བཞིན་ཡོད་འདུག
དེ་རིང་ཕྱི་དྲོའི་ཆུ་ཚོད་ ༡།༠༠ ཐོག་རྒྱ་གར་གྱི་རྒྱལ་ས་ལྡི་ལིའི་ཇན་ཋར་མན་ཋར་རུ། དབུས་གཞོན་ནུ་ལྷན་ཚོགས་ཀྱི་གོ་སྒྲིག་འོག དབུས་རྒྱུན་ཚོགས་གཞོན་རྟ་མགྲིན་སྲིད་གཅོད་ལགས་ཀྱི་གཙོས་དཔལ་འབྱོར་འགན་འཛིན་བསྟན་འཛིན་དབང་ཕྱུག་ལགས་དང་ཕྱི་དྲིལ་འགན་འཛིན་ཚེ་དབང་སྒྲོལ་མ་ལགས་བཅས་ཀྱིས། ད་ལྟའི་བོད་ཀྱི་ཛ་དྲག་གནས་སྟངས་དྲིལ་བསྒྲགས་དང་། རང་ལུས་མེར་སྲེག་གནང་མཁན་གྱི་རྒྱལ་གཅེས་དཔའ་བོ་དཔའ་མོ་ཚོའི་མངོན་འདོད་ལ་རྒྱབ་སྐྱོར། གཞིས་ལུས་བོད་མིར་གདུང་སེམས་མཉམ་སྐྱེད་བཅས་ཀྱི་ཆེད་དུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་ཞིག་མགོ་འཛུགས་གནང་ཡོད་པ་དང་འབྲེལ། མཉམ་འབྲེལ་རྒྱལ་ཚོགས་ལ་དགོས་འདུན་དོན་ཚན་ལྔ་བཏོན་འདུག
ཡིག་ཐོག་གི་གསར་འགོད་གསལ་བསྒྲགས་ནང་། སྤྱི་ལོ་ ༢༠༡༥ ཟླ་ ༨ ཚེས་ ༢༥ ཉིན་རྒྱལ་གཅེས་དཔའ་མོ་བཀྲིས་སྐྱིད་ལགས་ཀྱིས་རང་ལུས་མེར་སྲེག་བཏང་ནས་རྒྱ་གཞུང་གི་དབང་བསྒྱུར་དང་བཙན་གནོན་ལ་ངོ་རྒོལ་བྱས་ཡོད་པ་དང་ཉིན་དེ་རང་དུ་ཁོ་མོ་འདས་གྲོངས་སུ་སོང་ཡོད། རྒྱལ་གཅེས་དཔའ་མོ་བཀྲིས་སྐྱིད་ལགས་ནི་འདི་ལོར་རང་ལུས་མེར་སྲེག་གནང་མཁན་བདུན་པ་དེ་དང་། སྤྱི་ལོ་ ༢༠༠༩ ལོ་ནས་བརྩིས་ན་བོད་ཕྱི་ནང་གཉིས་སུ་རང་ལུས་བསྲེགས་ཀྱི་འཚེ་བ་མེད་པའི་ལས་འགུལ་སྤེལ་ནས་རྒྱ་གཞུང་ལ་ངོ་རྒོལ་གནང་མཁན་བོད་མི་ ༡༤༩ པ་དེ་ཆགས་ཡོད་པ་རེད། སྙིང་སྟོབས་ཅན་གྱི་རྒྱལ་གཅེས་བོད་རིགས་སྤུན་ཟླ་ཚོས་འདི་ལྟར་གཅིག་རྗེས་གཉིས་མཐུད་ཀྱིས་གཅེས་པའི་ལུས་སྲོག་མེ་རུ་བསྒྲོན་ནས་ “སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བོད་ལ་ཕེབས་དགོས།” “བོད་ལ་རང་དབང་དགོས།” “བོད་རང་བཙན་ཡིན།” སོགས་ཀྱི་འབོད་ཚིག་ཐོག་ནས་བོད་མིའི་མངོན་འདོད་གསལ་སྟོན་བྱས་ཡོད་ཀྱང་། རྒྱ་ནག་སྲིད་གཞུང་གིས་དེ་དག་ལ་འགན་འཁུར་གྱིས་ཡ་ལན་སྤྲོད་རྒྱུ་ལས་ཟློག་སྟེ། བོད་ནང་གི་བོད་མིའི་ཐོག་དམ་དྲག་ཇེ་ཆེར་བཏང་བ་མ་ཟད། བོད་མི་མགོ་ནག་ཡོངས་ཀྱི་འདི་ཕྱི་གཉིས་ཀྱི་སྐྱབས་གནས་མཚུངས་ཟླ་མ་མཆིས་པ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་གཞི་མེད་ཀྱི་སྐྱོན་འཛུགས་དང་བསྐུར་འདེབས་ཚད་མེད་ཞུ་བཞིན་པ་ནི་བོད་མིའི་སེམས་ལ་བཟོད་ཐབས་མེད་པའི་རྨ་ཁ་ཞིག་ཏུ་གྱུར་ཡོད། གཞན་ཡང་རྒྱ་གཞུང་གིས་རྒྱལ་སྤྱིའི་གསར་འགྱུར་བརྒྱུད་ལམ་སོགས་ལ་ཨ་སྒོར་ས་ཡ་མང་པོའི་འགྲོ་སོང་བཏང་ནས་བོད་ཀྱི་གནད་དོན་ཐོག་ཁྱོག་བཤད་ཀྱི་རྫུན་གཏམ་དྲིལ་བསྒྲགས་ཤུགས་ཆེར་བྱེད་བཞིན་ཡོད་པ་དང་། མཉམ་འབྲེལ་རྒྱལ་ཚོགས་ཀྱི་གཙོས་པའི་རྒྱལ་སྤྱིའི་སྲིད་གཞུང་ཁག་ནས་ཀྱང་བོད་ཀྱི་ཛ་དྲག་གནས་སྟངས་དང་། བོད་མི་ཚོས་རང་གི་ལུས་སྲོག་མེ་རུ་བསྒྲོན་ནས་ཞུ་འབོད་བྱས་པའི་དགོས་འདུན་ཁག་ལ་དོན་ཕན་ལྡན་པའི་འགན་ཁུར་གནང་མེད་པས། ང་ཚོས་དེ་རིང་མཉམ་འབྲེལ་རྒྱལ་ཚོགས་ཀྱི་གཙོས་པའི་རྒྱལ་སྤྱིའི་སྲིད་གཞུང་ཁག་ནས་འགྲོ་བ་མིའི་ཐོབ་ཐང་དང་རང་དབང་ལ་གདེང་འཇོག་གིས་བོད་ཀྱི་གནད་དོན་ཐོག་ཆིག་སྒྲིལ་གྱིས་རྒྱ་ནག་གི་དྲག་སྤྱོད་སྲིད་གཞུང་ལ་གནོན་ཤུགས་སྤྲོད་རྒྱུ་ཕྱིས་དྲགས་པ་ལས་སྔ་དྲགས་མེད་པ་གསལ་བརྗོད་བྱ་རྒྱུ་ཡིན། ཞེས་དང་།
ཡང་བསྒྲགས་གཏམ་ནང་། སྤྱི་ལོ་ ༡༩༤༩ ལོར་རྒྱ་དམར་སྲིད་གཞུང་གིས་བོད་ལ་བཙན་འཛུལ་གྱིས་དབང་བསྒྱུར་བྱ་རྒྱུའི་འགོ་འཛུགས་བྱས་པ་ནས་བཟུང་ད་བར་བོད་མིའི་ཐུན་མོང་མིན་པའི་ཆོས་དང་རིག་གཞུང། དེ་བཞིན་བོད་མིའི་ངོ་བོ་རྩ་མེད་གཏོང་ཆེད་ཞེ་སྣག་ལ་གདུག་རྩུབ་ཆེ་བའི་སྲིད་ཇུས་འདྲ་མིན་ཞིག་ལག་བསྟར་བྱས་དང་བྱེད་བཞིན་ཡོད་པ་དང་། ད་ལྟ་བོད་ནང་གི་གྲོང་ཁྱེར་དང་གྲོང་རྡལ་ཁག་ལ་རྒྱ་རིགས་ཤུགས་ཆེ་གནས་སྤོ་བྱས་ནས་བོད་མི་རྣམས་རང་ཡུལ་དུ་གྲངས་ཉུང་མི་རིགས་ཆགས་ཟིན་པ། བོད་ཀྱི་ས་ཁུལ་གང་ས་ནས་གཏེར་ཁ་བསྔོག་འདོན་དང་། ཤིང་ནགས་གཅོད་བྲེག་སོགས་འཛམ་གླིང་སྤྱི་དང་ཡང་སྒོས་ཨེ་ཤེ་ཡ་གླིང་ཕྲན་གྱི་ཁོར་ཡུག་ལ་ཤུགས་རྐྱེན་ཆེན་པོ་ཡོད་པའི་རང་བྱུང་ཁོར་ཡུག་ལ་ཚད་ལས་འདས་པའི་གཏོར་བཤིག་གཏོང་བཞིན་ཡོད་པ་འདི་ནི། བོད་ཀྱི་ལོ་ངོ་སྟོང་ཕྲག་མང་པོའི་ལོ་རྒྱུས་ནང་བྱུང་མ་མྱོང་བའི་གོད་ཆག་དང་གཏོར་བཤིག་ཆེན་པོ་ཞིག་ཆགས་ཡོད་པ་མ་ཟད། མཉམ་འབྲེལ་རྒྱལ་ཚོགས་ནི་ད་ལྟའི་བོད་ནང་གི་ཛ་དྲག་གནས་སྟངས་ལ་འགན་ཁུར་ལེན་རྒྱུར་ཐད་ཀར་འབྲེལ་བ་ཡོད་པའི་རྒྱལ་སྤྱིའི་ལྷན་ཚོགས་ཤིག་ཡིན་སྟབས། ད་ལན་ང་ཚོས་མཉམ་འབྲེལ་རྒྱལ་ཚོགས་ཚོགས་གྲབས་ཡོད་པ་དང་བསྟུན་ཏེ། རྒྱལ་ཚོགས་ལ་གཤམ་འཁོད་དོན་ཚན་ལྔ་ཅན་གྱི་དགོས་འདུན་འདོན་རྒྱུ་ཡིན། ༡༽མཉམ་འབྲེལ་རྒྱལ་ཚོགས་ཀྱི་ཚོགས་མི་ནས་རྒྱལ་ཚོགས་ཀྱི་ཚོགས་ཆེན་དང་འགྲོ་བ་མིའི་ཐོབ་ཐང་ལྷན་ཚོགས་ཐོག་བོད་དོན་གླེང་སློང་དགོས། ༢༽རྒྱ་ནག་སྲིད་གཞུང་ལ་རང་ལུས་མེར་བསྲེགས་ཀྱིས་ཞི་རྒོལ་གནང་མཁན་བོད་མིའི་དགོས་འདུན་ཁག་ལ་འགན་འཁུར་ཡ་ལན་དགོས་པ་ནན་བསྐུལ་མཐའ་འཁྱོལ་བྱ་དགོས། ༣༽རྒྱ་ནག་སྲིད་གཞུང་ལ་༧ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡོད་མེད་ཀྱི་བདེན་དཔང་གསལ་སྟོན་དགོས་པ་ནན་བསྐུལ་བྱ་དགོས། ༤༽བོད་ཀྱི་དངོས་ཡོད་གནས་ཚུལ་རྟོགས་ཞིབ་ཆེད་རྒྱལ་ཚོགས་ཀྱི་སྐུ་ཚབ་ཚོགས་ཆུང་ཞིག་བོད་ནང་ངེས་པར་དུ་གཏོང་དགོས། ༥༽ རྒྱ་ནག་སྲིད་གཞུང་ལ་བོད་ཀྱི་ཉེས་མེད་ཆབ་སྲིད་བཙོན་པ་རྣམས་མྱུར་དུ་གློད་གྲོལ་དགོས་པ་ནན་བསྐུལ་བྱ་དགོས།། ཞེས་སོགས་བཀོད་འདུག
གསར་འགོད་པ། དོན་གྲུབ།
རྗེས་སུ་ཡི་རངས་ཡོད། བོད་མི་སྤྱི་བོ་གནམ་བསྟེན་པ་ཡོངས་ཀྱིས་ཁོང་རྣམ་པ་གསུམ་གྱི་ཆོད་སེམས་ལ་དཔེ་བལྟས་ནས་སློབ་སྦྱོང་བྱ་དགོས་པ་སྣང་།