གྲོས་ཚོགས་ཚོགས་དུས་ ༡༠ པ་དབུ་འཛུཊ་དང་བསྟུན་ཇོ་ནང་པས་ཆོས་བརྒྱུད་སྤྱི་མཚུངས་ཀྱི་ཐོབ་ཐང་དགོས་པའི་ཞུ་འབོད་ལས་འགུལ་སྤེལ་གྱི་འདུག
དེ་རིང་སྔ་དྲོའི་ཆུ་ཚོད་ ༩།༠༠ སྟེང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པ་དབུ་འཛུགས་དང་བསྟུན། ཚོགས་དྲུང་ལས་ཁུངས་ཀྱི་མདུན་ཐང་དུ་འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་གོ་སྒྲིག་འོག ཇོ་ནང་སེར་སྐྱ་མི་མང་ ༡༥༠ ཙམ་གྱིས་ལག་ཏུ་འཕྲེད་དར་བཟུང་སྟེ། ཇོ་ནང་ལ་ཆོས་བརྒྱུད་སྤྱི་མཚུངས་ཀྱི་ཐོབ་ཐང་སྤྲོད་དགོས་པའི་ཞུ་འབོད་ལས་འགུལ་སྤེལ་གྱི་ཡོད་པ་དང་སྦྲགས་དགོས་འདུན་དོན་ཚན་ལྔ་བཏོན་འདུག
ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་སུ་ལས་འགུལ་སྤེལ་དགོས་དོན་དང་མི་གྲངས་ག་ཚོད་མཉམ་ཞུགས་བྱས་ཡོད་མེད་དྲིས་པར་ཁོང་གིས། དེ་རིང་འདིར་རྒྱལ་ཁབ་བརྒྱད་ཀྱི་ནང་ནས་ཡོང་བའི་མི་གྲངས་བརྒྱ་དང་ལྔ་བཅུ་ཙམ་ཡོད། བོད་ནང་གི་སྐུ་ཚབ་གསུམ་ཙམ་ཡོད། དེ་རིང་གི་ལས་འགུལ་འདི་ལག་ཏུ་ཁ་བཏག་བཟུང་ནས། གྲོས་ཚོགས་འཐུས་མི་ཚོར་སྐྱབས་འཇུག་ཞུ་ཡི་ཡོད། དགོས་འདུན་དེའི་ཐོག་གྲུབ་འབྲས་མ་བྱུང་བར་ལས་འགུལ་སྤེལ་རྒྱུ་ཡིན། ཞེས་བརྗོད་བྱུང་།
ཐེངས་འདིའི་ཞུ་འབོད་ཀྱི་དགོས་འདུན་དོན་ཚན་ཁག་ནི།
༡༽ ༧གོང་ས་མཆོག་གི་བཀའ་སློབ་དང་ཆོས་བརྒྱུད་ཁག་གི་བླ་ཆེན་རྣམ་པའི་རྒྱབ་གཉེར་བཀའ་ཡིག ཆོས་བརྒྱུད་ཚོགས་ཆེན་ཐེངས་བཅུ་གཅིག་པའི་གྲོས་ཆོད་བཅས་རྩིས་མེད་བཏང་དོན་གསལ་བཤད་གནང་དགོས།
༢༽ སྐབས་བཅོ་ལྔ་པའི་གྲོས་ཚོགས་ཚོགས་དུས་དགུ་བའི་སྐབས་སུ་ག་ཟིའི་གྲོས་ཚོགས་ནང་གི་གཏམ་བཤད་གཉིས་རྒྱབ་འགལ་ཡིན་མིན་གྲོས་ཚོགས་ནས་གསལ་བཤད་གནང་དགོས།
༣༽ སྐྱབས་མགོན་ཁལ་ཁ་རྗེ་བཙུན་དམ་པ་མཆོག་གིས་བོད་གཞིས་བྱེས་ཇོ་ནང་པའི་མི་མང་འབུམ་ཕྲག་མང་པོས་གཞུང་ལ་ད་བར་དུ་སྙན་ཞུ་བརྒྱ་ཕྲག་མང་པོ་ཕུལ་བ་རྩིས་མེད་བཏང་དོན་གསལ་བཤད་གནང་དགོས།
༤༽ དཔལ་རྒྱལ་བ་ཇོ་ནང་བར་བོད་ཀྱི་ཆོས་བརྒྱུད་སྤྱི་མཚུངས་ཀྱི་ཐོབ་ཐང་དང་ཇོ་ནང་བ་རྣམས་བོད་ཀྱི་སྤྱི་འབངས་ཤིག་ལ་ངོས་འཛིན་བྱས་ཏེ་བཙན་བྱོལ་བོད་མིའི་ཆོས་དོན་ལྷན་ཚོགས་ཀྱི་ཁྲིམས་ཡིག་གི་ཁྱབ་ཚད་ཀྱིས་ཇོ་ནང་པ་ལ་ངེས་པར་དུ་ཁྱབ་པའི་མཚོན་བཅའ་ཁྲིམས་བསྐྱར་བཅོས་ཀྱིས་ཐག་གཅོད་ཡང་དག་པ་གནང་དགོས།
༥༽ གོང་འཁོད་དགོས་འདུན་དོན་ཚན་མ་བྱུང་བར་དུ་ཐེངས་འདིའི་ཇོ་ནང་པའི་ཞི་འབོད་ལས་འགུལ་མཚམས་འཇོག་མི་བྱེད་པའི་དམ་བཅའ་ཡིན། ཞེས་དང་།
ཡང་བསྒྲགས་གཏམ་ནང་༧གོང་ས་མཆོག་གིས་ཇོ་ནང་པར་བསྩལ་བའི་གསུང་འཕྲིན་ལུང་འདྲེན་བྱས་པའི་ནང་། འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱི་གོ་སྒྲིག་འོག་ཇོ་ནང་རྒྱལ་ཚབ་རིན་པོ་ཆེ་དབུ་བཞུགས་ཀྱིས་རྒྱ་བལ་འབྲུག་གསུམ་དང་། བོད་ཡུལ། ཨ་རི། ཡོ་རོབ། ར་ཤི་ཡ། སོག་པོ། མ་ལ་ཤི་ཡ་བཅས་སུ་ཡོད་པའི་ཇོ་ནང་ཆོས་བརྒྱུད་འཛིན་པའི་དགོན་ཁག་དང་། ཆོས་ཚོགས་བཅས་པའི་འཐུས་མིའི་ཚོགས་ཆེན་སྐོང་འཚོགས་ཀྱི་སྒོ་དབྱེ་མཛད་སྒོར་ཡོད་པའི་ཚོགས་ཞུགས་རྣམས་ལ་འཚམས་འདྲི་བཀྲ་ཤིས་བདེ་ལེགས་ཡོད།
བོད་ཀྱི་བསྟན་སྲིད་གོད་ཆག་གི་རྐྱེན་པས་༧རྒྱལ་བསྟན་སྤྱི་ཡོངས་ལ་སྔར་བྱུང་མྱོང་མེད་པའི་ཉམས་ཆག་བྱུང་བའི་ཁྲོད་རྒྱལ་བ་ཇོ་ནང་པའི་བསྟན་པ་ཡང་ཉག་ཕྲར་གྱུར་པ་ཀུན་ཤེས་ཡིན། རྒྱུད་རྒྱལ་དུས་ཀྱི་འཁོར་ལོའི་ཉམས་བཞེས་སྤྱི་དང་། ལྷག་པར་སྦྱོར་དྲུག་རྩལ་དུ་བཏོན་པའི་ཉམས་བཞེས་ཀྱི་བསྟན་རྒྱུན་བཟང་པོ་མི་ཉམས་རྒྱུན་འཛིན་ཡོང་ཐབས་སུ་ཆོས་བརྒྱུད་གང་གི་དབུ་ཁྲིད་ཁལ་ཁ་རྗེ་བཙུན་རིན་པོ་ཆེའི་མཚན་གནས་བསྐྱར་གསོ་དང་། འཕགས་ཡུལ་ཇོ་ནང་མ་དགོན་གྱི་གནས་གཞི་མཐུན་རྐྱེན་བཅས་ཆེད་དུ་སྦྱར་བས་མཚོན་ཆོས་བརྒྱུད་ཆེན་པོ་འདིའི་ལུང་རྟོགས་ཀྱི་བསྟན་པ་ཡུན་གནས་ཆེད་མཐུན་རྐྱེན་གང་ཐུབ་སྒྲུབ་པ་ཚང་མའི་ཐུགས་ངེས་ཡིན་ལ། སླད་ནས་ཀྱང་སྔར་བཞིན་ཞུ་རྒྱུར་སྡེ་དགོན་རང་རང་སོ་སོས་ཀྱང་སྤྱི་སྒོས་བསྟན་པའི་ཞབས་འདེགས་སྔར་བཞིན་ལྷོད་མེད་ཡོང་བ་ཞུ། ཞེས་བཀོད་འདུག
གསར་འགོད་པ། དོན་གྲུབ།
ཡོད་ན་ཡོད་མཉམ་དང་མེད་ན་མེད་མཉམ་ཡིན་དགོས
དཔལ་རྒྱལ་བ་ཇོ་ནང་པ་ཚང་ལ་རྒྱབ་བསྐྱོར་གཙང་མ་ཡོད།
འོ་དེ་རེད་ཡ། ཇོ་ནང་བར་དངོས་ནས་ཁག་མེད། དམངས་གཙོའི་ལམ་ལུགས་ལ། དམངས་མི་ལ་དབང་ཚད་ཡོད་རེད་ལ། དཔོན་གྱིས་དམངས་ལ་ལས་དོན་སྒྲུབ་དགོས་རེད།
ཇོ་ནང་པས་ཞུ་འབོད་བྱེད་བཞིན་པ་དེ་སྤྱིར་བཏང་སྤྱི་མཚུངས་ཀྱི་ཐོབ་ཐང་ཞིག་གནང་རོགས་ཞུ་ཡི་ཡོད་སྟབས། རྒྱབ་སྐྱོར་ཡོད། ཡིན་ནའང་། ཞུ་འབོད་གནང་སྐབས་ངེས་པར་དུ་གུས་ཞབས་ལྡན་པ་ཞིག་གནང་རྒྱུ་ཧ་ཅང་གལ་ཆེན་པོ་རེད། ཁྱེད་རྣམ་ལངས་བསྡད་ཡོད་ས་དེ་བོད་མི་མང་ཁྲིམས་བཟོ་ལྷན་ཁང་གི་སྒོ་འགྲམ་ཡིན་ལ། མགོ་ཚོགས་གཙོ་མཆོག་དང་སྲིད་སྐྱོང་མཆོག་གི་དབུས་པའི་སྤྱི་འཐུས་དང་བཀའ་བློན་རྣམ་པ་ཡར་ཕེབས་མར་ཕེབས་གནང་གིན་ཡོད་སྟབས། ཁོང་རྣམ་པ་ཡར་ཕེབས་མར་ཕེབས་སྐབས་གུས་ལུགས་ལྡན་ཞིང་ཞུ་འབོད་ཀྱི་རྣམ་འགྱུར་གསལ་སྟོན་དགོས་རྒྱུ་གལ་ཆེན་པོ་རེད་བསམ་གྱི་འདུག