ལོ་བཞིའི་ནང་ལས་བྱེད་རྩ་དགོངས་ཞུ་མཁན་༨༨ བྱུང་།

སྲིད་སྐྱོང་བློ་བཟང་སེང་གེ་མཆོག་གིས་ཕྱི་ལོ་ ༢༠༡༡ ནས་ ༢༠༡༥ ལོའི་བར་ལས་བྱེད་གྲངས་ ༡༥༢ གསར་འཇུག་གནང་ཡོད་པ་དང་། སྒེར་གྱི་དཀའ་ངལ་གྱིས་རྩ་དགོངས་ཞུ་མཁན་ལས་བྱེད་ ༨༨ བྱུང་ཡོད་སྐོར་གསུངས་སོང་།

དེ་རིང་བོད་མི་མང་སྤྱི་འཐུས་སྐབས་བཅོ་ལྔ་པའི་གྲོས་ཚོགས་ཚོགས་དུས་བཅུ་པའི་ལས་ཉིན་གསུམ་པའི་སྔ་དྲོར། སྤྱི་འཐུས་ཨཅཱརྱ་ཡེ་ཤེས་ཕུན་ཚོགས་ལགས་ཀྱིས་ ༢༠༡༡ ལོ་ནས་ ༢༠༡༥ ལོ་བར་ལས་བྱེད་འདེམས་ལྷན་ནས་ལས་བྱེད་གསར་འདེམས་ཇི་གནང་དང་། བཀའ་ཤག་ནས་ཐད་ཀར་ལས་བྱེད་ཅི་ཙམ་བསྐོས་ཡོད་མེད། ལས་བྱེད་རྩ་དགོངས་ཞུ་མཁན་ག་ཚོད་བྱུང་བ་དང་ཞུ་དོན་ཅི་ཡིན། དེ་བཞིན་འཛིན་སྐྱོང་ནས་སྲི་ཞུའི་ལས་བྱེད་པར་བཀའ་སློབ་ལམ་སྟོན་ཇི་ལྟར་གནང་གི་ཡོད་མེད་བཅས་ཀྱི་སྐར་རྟགས་ཅན་གྱི་དྲི་བ་ཕུལ་སྐབས་སྲིད་སྐྱོང་མཆོག་གིས། ཕྱི་ལོ་ ༢༠༡༡ ནས་ ༢༠༡༥ ལོའི་བར་ལས་བྱེད་འདེམས་ལྷན་ཁོངས་ལས་བྱེད་གསར་འདེམས་གྲངས་ ༡༥༢ གནང་ཡོད་པ་མ་ཟད། ད་བར་ལས་བྱེད་གྲངས་ ༨༨ ཀྱིས་སྒེར་གྱི་དཀའ་ངལ་ཆེད་རྩ་དགོངས་ཞུས་པ་བྱུང་ཡོད། བཀའ་ཤག་ནས་ལས་དོན་གྱི་དམིགས་བསལ་དགོས་གལ་ལ་གཟིགས་ཏེ་གྲོས་འདྲི་བྱ་ཡུལ་དང་གྲོས་སྟོན་པ་གྲངས་ ༡༢ བསྐོས་ཡོད་པ་མ་ཟད། ལས་བྱེད་གསར་བསྡུའི་སྐབས་ལས་བྱེད་འདེམས་ལྷན་ནས་ཟབ་སྦྱོང་གོ་སྒྲིག་གནང་སྐབས་སུ་སྲིད་སྐྱོང་དང་དྲུང་ཆེ་རྣམ་པ་སོགས་ཕེབས་ནས་༧གོང་ས་མཆོག་གི་བཀའ་སློབ་སྔ་རྗེས་ཀྱི་དགོངས་དོན་དང་། ལས་བྱེད་བླང་དོར་སྒྲིག་གཞི་གཞིར་བཟུང་སྲི་ཞུའི་ལས་དོན་སྒྲུབ་ཕྱོགས་ཀྱི་བཀའ་སློབ་གནང་གི་ཡོད་ལ། སྲི་ཞུའི་ལས་བྱེད་དངོས་སུ་ཆགས་པ་ནས་བཟུང་འབྲེལ་ཡོད་ལས་ཁུངས་སོ་སོའི་དྲུང་ཆེ་དང་བཀའ་བློན་རྣམ་པས་དུས་ནས་དུས་སུ་སློབ་གསོ་གོ་སྐོན་གནང་མུས་ཡིན། ཞེས་སོགས་གསུངས་སོང་།

སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་འཕྲོས་དོན་དྲི་བར། འདས་པའི་ལོ་བཞི་ནང་ལས་བྱེད་གསར་འདེམས་གྲངས་ ༡༥༢ ཡོད་ཁོངས་ནས་ད་ལྟ་ལས་ཀ་བྱེད་མཁན་ག་ཚོད་ཡོད་པ་དང་། ལས་བྱེད་རྩ་དགོངས་ཞུ་མཁན་གྲངས་ ༨༨ ཡོད་ཁོངས་ལས་བྱེད་གསར་རྙིང་ག་ཚོད་བྱུང་ཡོད་མེད། གྲོས་འདྲི་བྱ་ཡུལ་ལས་བྱེད་ ༡༢ ཡོད་གསུངས་པ་དེ་ཚོར་ལས་བྱེད་གཞན་ལས་ལྷག་པའི་ཤེས་འཇོན་དང་གདེང་ཚོད་འཕར་མ་ག་རེ་ཡོད་མེད། དེ་བཞིན་ལས་བྱེད་རྩ་དགོངས་ཞུས་པ་དག་སྒེར་དོན་ཁོ་ན་མིན་པར་འཛིན་སྐྱོང་གི་ཕྱག་ལས་གནང་ཕྱོགས་ཐད་འདོད་པ་མ་ཁེངས་པ་བྱུང་ནས་རྩ་དགོངས་ཞུ་མཁན་ག་ཚོད་བྱུང་ཡོད་མེད། རྩ་དགོངས་ཞུ་མཁན་ཚོར་འཛིན་སྐྱོང་ནས་རྩ་དགོངས་མི་ཞུ་བའི་ལམ་སྟོན་གང་གནང་གི་ཡོད་མེད་བཅས་དྲིས་པར་སྲིད་སྐྱོང་མཆོག་གིས། ད་བར་ལས་བྱེད་ ༡༥༢ བདམས་པའི་ཁྲོད་ནས་བརྒྱ་ཆ་ ༩༠ ལྷག་མུ་མཐུད་ཕྱག་ལས་གནང་གི་ཡོད་པར་བརྩི་ཡི་ཡོད། ལས་བྱེད་ལ་བསྐོས་རྗེས་དགོངས་པ་ཞུ་མཁན་རེ་འགའ་བྱུང་ཡོད་པ་དང་། འགའ་ཤས་སློབ་སྦྱོང་གི་ཆེད་དུ་འགྲོ་གི་ཡིན་ཟེར་ནས་དགོངས་པ་ཞུ་མཁན་བྱུང་སོང་མ་གཏོགས་མང་ཆེ་བ་སྒེར་གྱི་དཀའ་ངལ་ཡོད་ཟེར་ནས་དགོངས་པ་ཞུས་པ་ཆགས་ཡོད། བཀུར་འོས་སྤྱི་འཐུས་ནས་བོད་མིའི་སྒྲིག་འཛུགས་ལ་འདོད་པ་ཁེངས་མིན་གྱི་དབང་གིས་རྩ་དགོངས་ཞུས་པ་རེད་དམ་གསུངས་ཡོད་སྟབས། ང་ཚོར་ཡིག་ཐོག་ཏུ་སྙན་ཞུ་ཕུལ་བཞག་པ་དག་ལ་གཞི་བཞག་པའི་ཐོག་ནས་འགྲོ་དགོས་རེད་མ་གཏོགས། དེ་འཕྲོས་དགོས་པ་རྒྱུ་མཚན་གང་ཡོད་ཀྱང་ཡིག་ཐོག་ཏུ་མ་རག་པ་ཡིན་ན། ང་ཚོའི་འགྲོ་སྟངས་འགྲོ་ལུགས་ཐོག་ནས་ངོས་འཛིན་རྒྱུ་ཁག་པོ་ཆགས་ཡོད། དེ་བཞིན་གྲོས་འདྲི་པ་ ༡༢ དེའི་སྐོར་ལ་དེ་སྔོན་གྲོས་ཚོགས་ནང་ལ་བཀའ་འདྲི་གནང་སྐབས་མིང་དང་བཅས་པ་ཕུལ་ཡོད་པ་རེད། ད་ལྟའི་ཆར་ཨུ་རུ་སུར་གྲོས་འདྲི་པ་ཡོད་བཞག་པ་དེ་དམིགས་བསལ་གནས་སྟངས་རང་ཆགས་ཡོད་པ་རེད། ཨུ་རུ་སུའི་ཁྲིམས་དང་འགྲོ་ལུགས་ཀྱི་ཆ་ནས་མི་སེར་གྱི་ལག་ཁྱེར་དགོས་ཀྱི་ཡོད་པ་དང་། འདི་ནས་ལས་བྱེད་བསྐོ་སྐབས་ཆ་རྐྱེན་ཚང་མིན་དབང་གིས་བསྐོ་བཞག་བྱེད་དགོས་པ་ཆགས་ཡོད་པ་རེད། དེ་བཞིན་དཔལ་འབྱོར་ལས་ཁུངས་ཀྱི་ཚོང་ལས་རམ་འདེགས་ལས་འཆར་ཚན་པའི་ནང་ཚོང་ལས་རིག་པའི་ཐོག་ཆེད་ལས་ཐོན་པ་དེ་འདྲ་བསྐོ་དགོས་པ་ཆགས་ཀྱི་ཡོད་པ་མ་ཟད། ཤེས་རིག་ལས་ཁུངས་ཀྱི་ཐ་སྙད་ཚན་པའི་ནང་ཉམས་མྱོང་ཅན་གྱི་མི་སྣ་ཞིག་དང་། དེ་མིན་བོད་ཀྱི་སྲིད་བྱུས་ཉམས་ཞིབ་ཁང་ལ་བོད་ཡིག་ཐོག་བོད་ནང་གི་གནས་སྟངས་ཐོག་ཉམས་ཞིབ་བྱེད་མཁན་ཞིག་བཅས་དགོས་པ་རྒྱུ་མཚན་མང་པོ་ཞིག་ལ་བལྟས་ཏེ་བསྐོ་བཞག་གནང་ཡོད་པ་རེད། ལས་བྱེད་རྩ་དགོངས་ཞུ་མཁན་ཁྲོད་གསར་རྙིང་ག་ཚོད་བྱུང་ཡོད་མེད་གྲོས་ཚོགས་ཀྱི་མདུན་ལྕོག་སྟེང་མིང་ཐོ་དང་བཅས་པ་འབུལ་རྒྱུ་ཡིན་སྟབས་གཟིགས་ན་གསལ་པོ་མཁྱེན་གྱི་རེད་བསམ་གྱི་འདུག ཅེས་གསུངས་སོང་།

ཡང་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས། འཛིན་སྐྱོང་ངོས་ནས་ལས་བྱེད་རྩ་དགོངས་ཞུ་མཁན་དེ་དག་སྒེར་གྱི་དཀའ་ངལ་ཆེད་ཞུས་པ་རེད་གསུངས་སོང་ཡང་། ལོ་ ༣༣ ལ་སྲི་ཞུའི་ཞབས་ཞུ་སྒྲུབ་མཁན་ལས་བྱེད་ཞིག་གིས་འཛིན་སྐྱོང་གི་བྱེད་ཕྱོགས་ལ་འདོད་པ་མ་ཁེངས་པར་རྩ་དགོངས་ཞུ་རྒྱུ་ཡིན་ཟེར་ནས་མིག་ཆུ་བཏང་ནས་ལས་ཁུངས་ནང་དངོས་སུ་ཐུག་པ་དེ་འདྲ་བྱུང་ཡོད་སྟབས། ཤོག་བུའི་ངོ་གདོང་གཅིག་པུར་བལྟས་ནས་ལས་བྱེད་རྩ་དགོངས་ཞུ་མཁན་དག་སྒེར་གྱི་དཀའ་ངལ་རེད་ཞུས་པ་ཡིན་ན། ང་ཚོས་ལས་བྱེད་བདག་སྤྲོད་བྱེད་ཐུབ་ཀྱི་ཡོད་དང་མེད། གྲོས་འདྲི་པ་དེ་འདྲ་མུ་མཐུད་བསྐོ་བཞག་བྱས་པ་ཡིན་ན། མ་འོངས་པར་སྲི་ཞུ་ལས་བྱེད་ཀྱི་ངོ་བོ་གང་འདྲ་གནས་ཀྱི་རེད་ཅེས་དྲིས་པའི་ལན་དུ། ད་བར་ལས་བྱེད་རྩ་དགོངས་ཞུ་མཁན་ ༨༨ ཡོད་ཁོངས་ནས་ལོ་ ༣༣ ལ་སྲི་ཞུའི་ཞབས་ཞུ་སྒྲུབ་མཁན་ལས་བྱེད་གཅིག་ཡོད་པ་རེད། ཁོ་རང་གི་གནས་སྟངས་དེ་སྒྲིག་གཞིའི་དགོངས་དོན་ལྟར་གནང་ཐུབ་ཀྱི་མེད་པའི་དབང་གིས་བྱུང་བཞག་པ་ཞིག་རེད་མ་གཏོགས། སྒྲིག་གཞི་ནས་གནང་རྒྱུ་ཡོད་པ་ཞིག་མ་གནང་བ་མིན་པར་ངོས་འཛིན་བྱེད་བཞིན་ཡོད། ད་ལྟའི་ཆར་ལས་བྱེད་གྲངས་ ༦༥༨ བརྩི་གི་ཡོད་པ་དང་། དེའི་ནང་གྲོས་འདྲི་པ་ ༡༢ ཟེར་སྐབས་བརྒྱ་ཆ་ ༡༢ ཟིན་གྱི་ཡོད་པ་མ་ཟད། དེ་དག་ཀྱང་ད་ལྟ་ལས་བྱེད་གནང་བཞིན་པ་དང་ལག་ཁྱེར་ཆ་ཚང་ཡོད་བསྡད་པ་ཤ་སྟག་བསྐོ་བཞག་བྱས་ཡོད་སྟབས་དོ་ཕོག་འགྲོ་གི་ཡོད་པར་ངོས་འཛིན་ཞུ་ཡི་མེད། ད་ལྟའི་བཀའ་ཤག་ངོས་ནས་ལས་བྱེད་པ་ཚོར་མཐུན་རྐྱེན་གང་ཐུབ་སྦྱོར་བཞིན་ཡོད་པ་མ་ཟད། ཕན་ཚུན་གྱི་འབྲེལ་ལམ་ཡང་ཧ་ལས་པའི་ཡག་པོ་ཞེ་དྲགས་ཡོད། ཅེས་གསུངས་སོང་།

སྤྱི་འཐུས་ཟླ་བ་ཕུན་སྐྱིད་ལགས་ཀྱིས། བཀའ་དྲུང་གཞུང་ཞབས་ཀྱི་ལས་ཡུན་ཆ་ཚང་བསྒྲུབས་ནས་བགྲེས་ཡོལ་ལ་ཕེབས་ཀྱི་ཡིན་གསུང་སྐབས། ཁྱེད་རང་དགོངས་པ་ཞུས་པ་ཡིན་ན་བཀའ་ཤག་ལ་མིང་ཆད་ཡོང་གི་རེད་ཅེས་གསུངས་ཡོད་པའི་གནས་ཚུལ་ཞིག་སྤྱི་ཚོགས་ནང་ཁྱབ་ཀྱི་འདུག་སྟབས། དེ་བདེན་པ་ཡིན་མིན་དྲིས་པར་སྲིད་སྐྱོང་མཆོག་གིས། བཀའ་དྲུང་ལས་ཐོག་རྩ་བ་ཉིད་ནས་མ་རེད། ད་ལྟ་ཁོང་གི་ཕྱག་ལས་གནང་སྟངས་སོགས་གང་ཅིའི་ཐོག་ལ་ཡག་ཐག་ཆོད་ཡོད་པ་མ་ཟད་རྩ་དགོངས་ཞུ་མྱོང་ཡོད་པ་མ་རེད། གཞི་རྩའི་ལས་བྱེད་རྒན་པ་མང་པོས་དགོངས་པ་ཞུས་ནས་ལས་མཚམས་འཇོག་དགོས་མིན་འགྲོ་ཟེར་མཁན་ཡོང་བསྡད་ཀྱི་འདུག་ཀྱང་། ཏོག་ཙམ་བཞུགས་ལབ་ན་བཞུགས་མཁན་མང་ཐག་ཆོད་ཡོད་ཞུ་རྒྱུ་ཡིན། མཚམས་རེར་སྙན་ཞུ་ཕུལ་ཚར་ཡང་ཁྱེད་རང་ཕར་འགྱངས་ཙམ་བྱས་ན་ཟེར་སྐབས་དགའ་པོའི་ངང་ནས་བཞུགས་ཀྱི་ཡིན་གསུང་མཁན་མང་པོ་ཡོད་པ་མ་ཟད། བཀའ་དྲུང་ལ་དོགས་པ་རྩ་བ་ནས་ཟ་དགོས་པ་མེད། ཅེས་གསུངས་སོང་།

སྤྱི་འཐུས་པདྨ་འབྱུང་གནས་ལགས་ཀྱིས། དཔལ་འབྱོར་སྒེར་བདག་ཅན་ལ་བསྒྱུར་སྐབས་ཀྱི་ལས་བྱེད་ཅིག་ནང་སྲིད་ནང་ཡོད་པ་དང་། ཁོ་རང་ཐུག་སྐབས་བློ་ཕམ་ཞེ་དྲགས་བྱེད་ཀྱི་འདུག འཛིན་སྐྱོང་བཀའ་ཤག་གིས་དངུལ་མང་པོ་ཞིག་ཡོད་ལབ་ཀྱི་འདུག་ཀྱང་། ང་ཚོ་དཔལ་འབྱོར་སྒེར་བདག་ཅན་ལ་བསྒྱུར་ནས་མུ་མཐུད་ཞབས་ཕྱི་སྒྲུབ་མཁན་ཡིན་ལབ་མཁན་མི་ལྔ་དྲུག་ཅིག་ཡོད་པ་དང་། ད་ལྟ་ང་ཚོར་གཟིགས་གསོལ་དང་བགྲེས་ཕོགས་སྤྲོད་རྒྱུ་མེད་ཟེར་བ་ལས་སྒྲིག་གཞིའི་ཐོག་ལ་དེ་འདྲ་གང་ཡང་གསུངས་ཀྱི་མི་འདུག་ཅེས་བརྗོད་བྱུང་བས། དེ་དངུལ་མེད་ནས་རེད་དམ་སྒྲིག་གཞིའི་ཐོག་ནས་རེད། སྒྲིག་གཞིའི་ཐོག་ནས་ཡིན་ན་སྒྲིག་གཞི་གང་གི་ནང་ལ་གང་འདྲ་བྱས་ནས་གསལ་ཡོད་པ་རེད་ཅེས་དྲིས་པའི་ལན་དུ་སྲིད་སྐྱོང་མཆོག་གིས། དཔལ་འབྱོར་སྒེར་བདག་ཅན་གྱི་ལས་བྱེད་དང་དེ་འབྲེལ་དབུས་རང་ཁུངས་ལས་བྱེད་གཉིས་བསྡོམས་པ་ཡིན་ན་ཕལ་ཆེར་ལས་བྱེད་ ༤༠ ཞེ་གྲངས་ཡོད་པ་དང་། ཁོ་ཚོའི་ཐོབ་ཐང་ཆ་ཚང་བསྡོམས་པ་ཡིན་ན་དངུལ་རྩིས་ནང་འབུམ་ ༡༠༠ ལྷག་འགྲོ་སོང་འགྲོ་གི་ཡོད་སྟབས། ཁོ་ཚོའི་གནས་སྟངས་ཐག་གཅོད་བྱེད་དགོས་ཀྱི་ཡོད་ན། མ་འོངས་པར་ང་ཚོས་དངུལ་འབུམ་ ༡༠༠ ལྷག་ཐབས་འཚོལ་བྱེད་དགོས་ཀྱི་ཡོད་པ་མ་ཟད་མུ་མཐུད་གནང་དགོས་ཀྱི་ཡོད་སྟབས། དེ་ཚོའི་གནས་སྟངས་ཐོག་ནས་འགག་འགྲོ་གི་ཡོད་སྟབས། ངས་དེ་སྔོན་གྲོས་ཚོགས་ནང་ལ་ལས་བྱེད་དེ་ཚོའི་ཐོག་སྤྱི་ཡོངས་འགྲོ་སྟངས་འགྲོ་ལུགས་ཤིག་བཟོས་པ་ཡིན་ན་ཡག་པོ་ཡོད་ཚུལ་བརྗོད་ཡོད་པ་མ་ཟད། ད་ལྟ་དེ་ཚོའི་ཐོག་དགོངས་པ་བཞེས་དང་བཞེས་མུས་ཡིན། ཞེས་གསུངས་སོང་།

སྤྱི་འཐུས་ཀརྨ་ཡེ་ཤེས་ལགས་ཀྱིས། དཔལ་འབྱོར་སྒེར་བདག་ཅན་དུ་བསྒྱུར་ནས་ལྷག་པའི་ལས་བྱེད་བདུན་བརྒྱད་དེ་ཚོ་དང་དབུས་རང་ཁུངས་ལས་བྱེད་གཉིས་ཀྱི་གནས་བབ་གཅིག་མཚུངས་ཡིན་མིན་དྲིས་པར་སྲིད་སྐྱོང་མཆོག་གིས། དཔལ་འབྱོར་སྒེར་བདག་ཅན་གྱི་ལས་བྱེད་ཚོར་ཐོབ་ཐང་ཁ་ཤས་ཤིག་མ་གཏོགས། གཞི་རྩའི་སྲི་ཞུ་ལས་བྱེད་ཚོའི་ཐོབ་ཐང་མང་ཆེ་བ་གནང་ཡོད་ཀྱང་། གཞན་ཐོབ་ཐང་དེ་ཚོ་བསྐྲུན་པར་དབུས་རང་ཁུངས་ལས་བྱེད་ཀྱི་གནས་བབ་འདྲ་པོ་ཆགས་ཀྱི་འདུག དཔལ་འབྱོར་སྒེར་བདག་ཅན་གྱི་ལས་བྱེད་ཚོ་དམིགས་བསལ་ཆགས་ཡོད་པ་མ་ཟད། བཀའ་ཤག་སྐབས་སྔོན་མ་དང་ད་ལྟའི་བཀའ་ཤག་ངོས་ནས་དགོངས་པ་བཞེས་དང་བཞེས་མུས་ཡིན་ཀྱང་། ཁོ་ཚོར་ལག་ལེན་བསྟར་བ་ཡིན་ན་དབུས་རང་ཁུངས་ལས་བྱེད་ཚོ་དང་དཔལ་འབྱོར་གནས་སྟངས་སོགས་གཅིག་མཚུངས་ཆགས་ཀྱི་ཡོད་སྟབས། འཛིན་སྐྱོང་ངོས་ནས་ཁོ་ཚོར་ཐོབ་ཐང་གཅིག་མཚུངས་སྤྲོད་ཐུབ་རྒྱུར་དགོངས་པ་བཞེས་དང་བཞེས་མུས་ཡིན། ཞེས་གསུངས་སོང་།

གསར་འགོད་པ། དོན་གྲུབ།