རྒྱ་གར་གྱི་རྒྱལ་ས་ལྡི་ལིར བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་གསུམ་གྱིས་དུས་ཚོད་ངེས་མེད་ཀྱིས་ཟས་བཅད་ཞུ་འབུལ་གནང་སྟེ་ཉིན་གྲངས་ ༡༤ འགྲོ་བཞིན་འདུག
འདི་ཟླའི་ཚེས་ ༡༠ ཉིན་ནས་བཟུང་རྒྱ་གར་གྱི་རྒྱལ་ས་ལྡི་ལི་གསར་བའི་ཇན་ཋར་མན་ཋར་དུ། བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་གསུམ་གྱིས་དམིགས་ཡུལ་ ༣ དང་དགོས་འདུན་དོན་ཚན་ ༥ ཡི་འོག དུས་ཚོད་ངེས་མེད་ཀྱི་ཟས་བཅད་ཞུ་འབུལ་གནང་སྟེ་ཉིན་གྲངས་ ༡༣ འགྲོ་བཞིན་ཡོད་པ་དང་། ད་ལྟའི་བར་ལྡི་ལིར་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་དང་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཡན་ལག་ལས་ཁུངས་ཀྱི་གཙོས་རྒྱལ་ཁབ་ཁག་གི་གཞུང་ཚབ་ཁང་ ༣༠ མ་ཟིན་ཙམ་ལ་བོད་དོན་ཞུ་གཏུག་གནང་ཡོད་འདུག
ཟླ་འདིའི་ཕྱི་ཚེས་ ༢༠ ཉིན་ལྡི་ལིའི་མཐོ་སློབ་ཁག་ཏུ་འགྲོ་བཞིན་པའི་རོ་ཧི་ཎི་བོད་ཁྱིམ་སློབ་གྲྭའི་སློབ་མ་ ༧༠ ལྷག་གིས་ལས་འགུལ་བ་རྣམ་པའི་སྙིང་སྟོབས་དང་དགོས་འདུན་དོན་ཚན་ཁག་ལ་རྒྱབ་སྐྱོར་དང་གདུང་སེམས་མཉམ་སྐྱེད་མཚོན་ཕྱིར། ཇན་ཋར་མན་ཋར་དུ་ཉིན་གཅིག་རིང་ཟས་བཅད་ངོ་རྒོལ་ནང་མཉམ་ཞུགས་གནང་ཡོད་པ་དང་། དེ་བཞིན་བོད་ཀྱི་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འཐུས་མི་དང་མི་སྒེར་སོགས་ནས་ལས་འགུལ་བ་རྣམ་པར་འཚམས་འདྲི་དང་ལས་འགུལ་ལ་ཆ་ཤས་ལེན་པ་སོགས་བྱས་ནས་རྒྱབ་སྐྱོར་བྱེད་བཞིན་ཡོད་འདུག
ཁ་སང་ཕྱི་དྲོའི་ཆུ་ཚོད་ ༥ སྟེང་འདི་གའི་གསར་འགོད་པས་ཁ་པར་བརྒྱུད་ཟས་བཅད་ཞི་རྒོལ་བ་རྣམ་པའི་སྐུ་གཟུགས་གནས་སྟངས་ག་འདྲ་ཡོད་དྲིས་པར་སྤྱི་ཁྱབ་ཚོགས་གཙོ་བསྟན་འཛིན་འཇིགས་མེད་ལགས་ཀྱིས། ཁོང་རྣམ་པས་དེ་རིང་བར་ཉིན་ ༡༣ ལ་བཏུང་ཆུ་ཉུང་ཙམ་མ་གཏོགས་ཞལ་ལག་གང་ཡང་མཆོད་ཀྱི་མེད་སྟབས། གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཏེ་ལྗིད་ཚད་སྤྱི་རྒྱ་བཅུ་གཅིག་བཅུ་གཉིས་ལྷག་མར་ཆགས་ཡོད་སྟབས། ཧ་ཅང་སེམས་ཁུར་ཡོང་བ་ཞིག་རེད། ཡིན་ན་ཡང་སྨན་ཞབས་ཚོས་ཉིན་ལྟར་ཁོང་ཚོའི་སྐུ་གཟུགས་གནས་སྟངས་ལ་བརྟག་དཔྱད་དང་ཐབས་ཤེས་གང་ཡོད་འདོན་གྱི་ཡོད་པས། ད་ལྟའི་ཆར་ཛ་དྲག་གི་གནས་སྟངས་འདྲ་ཆགས་མི་འདུག ཅེས་བརྗོད་བྱུང་།
མཉམ་འབྲེལ་རྒྱལ་ཀྱིས་གཙོས་རྒྱལ་ཁབ་ཁག་གི་གཞུང་ཚབ་ཁང་དང་འགྲོ་བ་མིའི་ཐོབ་ཐང་ལྷན་ཚོགས་ཁག་ནས་ཞུ་འབུལ་ལས་འགུལ་ལ་རྣམ་འགྱུར་དང་བརྡ་ལན་ག་རེ་གནང་ཡོད་དྲིས་པར་ཁོང་གིས། ཉིན་དང་པོ་དེར་ང་ཚོས་མཉམ་འབྲེལ་རྒྱལ་ཚོགས་དང་རྒྱལ་ཚོགས་ཀྱི་ཚོགས་མི་ཚོར་ཞུ་སྙན་ཁག་ཅིག་ཕུལ་བ་མ་ཟད། རིམ་པས་གཞུང་ཚབ་ཁང་ ༣༠ མ་ཟིན་ཙམ་ལ་སྙན་ཞུ་ཕུལ་བ་ཡིན། ང་ཚོ་མཉམ་འབྲེལ་རྒྱལ་ཚོགས་ཀྱི་ལས་ཁུངས་ནང་བཅར་བའི་གོ་སྐབས་བྱུང་སོང་། ཁ་སང་ང་ཚོ་ཨ་རིའི་གཞུང་ཚབ་ཁང་ལ་བཅར་དུས། ཁོང་ཚོས་དོ་སྣང་དང་སེམས་ཁྲལ་ཆེན་པོ་གནང་གི་ཡོད་པ་ལྟར། ང་ཚོས་ཁོང་རྣམ་པར་མཉམ་འབྲེལ་རྒྱལ་ཚོགས་ནང་བོད་དོན་གླེང་སློང་ཡོང་བའི་རེ་སྐུལ་ཤུགས་ཆེན་ཞུས་པ་ཡིན། དེ་བཞིན་ཡུ་རོབ་མཐུན་ཚོགས་ལ་དུས་ཚོད་བཟོས་ཏེ་ཁོང་ཚོའི་སར་བཅར་ནས་ང་ཚོའི་ལས་འགུལ་དང་བོད་ནང་གི་དངོས་ཡོད་གནས་སྟངས་ངོ་སྤྲོད་བྱ་བའི་གོ་སྐབས་བྱུང་སོང་ལ། ཁོང་ཚོས་བོད་དོན་ཐོག་དོ་སྣང་བྱེད་ཀྱི་ཡོད་པ་མ་ཟད། ད་དུང་ང་ཚོར་གདུང་སེམས་མཉམ་སྐྱེད་བྱེད་ཀྱི་ཡོད་ཅེས་དང་། ཟས་བཅད་ངོ་རྒོལ་གནང་མཁན་ཚོའི་གནས་སྟངས་ག་འདྲ་ཡོད་མེད་བཀའ་འདྲི་གནང་གི་འདུག ང་ཚོས་ཞུ་དགོས་པ་ཚང་མ་ཞུས་ཏེ། མཉམ་འབྲེལ་རྒྱལ་ཚོགས་ཀྱི་ཚོགས་འདུའི་སྟེང་བོད་དོན་དང་འབྲེལ་བའི་བཀའ་མོལ་གནང་རོགས་ཞུས་པ་ཡིན། འོན་ཀྱང་ད་ལྟའི་ཆར་ཁོང་ཚོས་གཞུང་འབྲེལ་གྱི་ཐོག་ནས་དམིགས་བསལ་བརྡ་ལན་གང་ཡང་གནང་མ་བྱུང་། ཡིན་ན་ཡང་ཨ་རིའི་གཙོས་ཡུ་རོབ་མཐུན་ཚོགས་ཀྱི་ངོས་ནས་མཉམ་འབྲེལ་རྒྱལ་ཚོགས་ནང་བོད་དོན་གླེང་སློང་གནང་རྒྱུ་ཡིན་སྐོར་ཞལ་བཞེས་གནང་ཡོད་སྟབས། ང་ཚོས་ལས་འགུལ་འདི་ལ་ནུས་པ་འཐོན་གྱི་ཡོད་པར་ངོས་འཛིན་བྱེད་ཀྱི་ཡོད། ཅེས་དང་།
ཡང་གསར་འགོད་པས་ལས་འགལ་འདི་དང་འབྲེལ་བའི་ཐོག་ནས་ཞུ་འབུལ་ལས་འགུལ་གཞན་ག་རེ་གནང་འཆར་ཡོད་མེད་དྲིས་པར། ང་ཚོས་མཉམ་འབྲེལ་རྒྱལ་ཚོགས་ལ་སྙན་ཞུ་ཕུལ་བ་དང་། དེ་བཞིན་གཞུང་ཚབ་ཁང་གཞན་ལའང་སྙན་ཞུ་འབུལ་བའི་ལས་འགུལ་དེ་འདྲ་སྤེལ་དགོས་ཆགས་ཡོད་པ་རེད། དཔེར་ན། སང་ཉིན་གནངས་ཉིན་རྒྱ་ནག་གི་སྲིད་འཛིན་ཞི་ཅིན་ཕིན་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་མཇལ་འཕྲད་གནང་འཆར་ཡོད་པ་ལྟར། ས་གནས་གཞོན་ནུའི་ངོས་ནས་སྙན་ཞུ་འབུལ་བ་ལ་སོགས་པའི་ལས་འགུལ་དེ་འདྲ་སྤེལ་འཆར་ཡོད་པ་རེད་ལ། ཡུ་རོབ་རྒྱལ་ཁབ་ནང་ཡོད་པའི་ས་གནས་གཞོན་ནུ་ཇི་ནི་ཝར་བཅར་ནས་མཉམ་འབྲེལ་རྒྱལ་ཚོགས་ལ་དུས་ཚོད་བཟོས་ཏེ་སྐུ་ཚབ་རྣམ་པར་ཞུ་སྙན་འབུལ་རྒྱུ། དེ་བཞིན་ང་ཚོའི་ངོས་ནས་དྲ་ཐོག་མཚན་རྟགས་བསྡུ་རུབ་ལ་སོགས་པའི་ལས་འགུལ་ཞིག་འགྲོ་བཞིན་ཡོད་ལ། རིམ་པས་རྒྱ་བལ་འབྲུག་གསུམ་ནང་ཡོད་པའི་ས་གནས་གཞོན་ནུ་ཚོགས་པའི་ངོས་ནས་ཀྱང་། གདུང་སེམས་མཉམ་སྐྱེད་ཀྱི་ལས་འགུལ་སྤེལ་དགོས་པའི་གནས་སྟངས་ཤིག་ཆགས་བསྡད་ཡོད་པ་རེད། ཅེས་བརྗོད་སོང་།
གསར་འགོད་པ། པདྨ་རྒྱལ།
