སྐལ་བཟང་རྣམ་རྒྱལ།
བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་ནས་འདི་ལོའི་ཕྱི་ཟླ་ ༧ ནང་༸གོང་ས་མཆོག་ཨ་རིར་ཆིབས་བསྒྱུར་སྐབས་ལོ་སེ་ཨེན་ཇེ་ལེ་སེ་ཡ་ལ་ལྷག་པའི་དོན་གནས་དེའི་སྐོར་གྲོས་ཚོགས་ཚོགས་དུས་བཅུ་པའི་ནང་སྐར་རྟགས་ཅན་གྱི་དྲི་བ་ཞིག་བཀའ་ཤག་ལ་ཕུལ། འོས་བསྡུའི་ལས་རིམ་འགྲོ་བཞིན་པའི་དུས་ཚོད་འདི་འདྲ་ཞིག་ལ་འོས་མི་ཚང་མས་སོ་སོ་སྐྱོན་ཀུན་ཟད་དང་ཡོན་ཏན་ཀུན་ལྡན་ཞིག་ཡིན་མདོག་བྱེད་པའི་སྐབས་སུ་སོང་། ད་ལྟའི་དུས་སུ་བྱང་ཨ་རིའི་དོན་ལས་དང་འབྲེལ་བའི་འགལ་འཛོལ་ཐེངས་གཉིས་པ་ཞིག་གླེང་ཡོང་དུས་ངོས་ལེན་བྱེད་ཐབས་རྩ་བ་ནས་མེད་པ་རེད། བྱང་ཨ་རིའི་དོན་གཅོད་ལས་ཁུངས་ནི་ཕྱི་དྲིལ་ལས་ཁུངས་དང་ཕྱིའི་རྣམ་པ་ལས་འབྲེལ་བ་དེ་ཙམ་མེད་པར་ཐད་ཀར་དཔལ་ལྡན་སྲིད་སྐྱོང་མཆོག་གི་བཏང་འཛིན་འོག་ཡོད་པའི་ལས་ཁུངས་དམིགས་བསལ་ཅན་ཞིག་རེད། དོན་གཅོད་ཁང་དེ་གནས་སྟངས་དེ་འདྲ་ཞིག་གི་ངོ་བོར་འཕོས་མ་ཐག་ལབ་གླེང་མང་དག་ཅིག་རིམ་པས་སྤྱི་ཚོགས་ནང་ཁྱབ་ཡོད་པ་དཔེར་ན། དོན་ཁང་གི་མི་སྣ་མཇལ་ཕྲད་ཁང་གི་རྩིག་ངོས་སུ་དེ་སྔ་༸གོང་ས་མཆོག་གི་སྐུ་པར་ཡོད་པ་དེ་མར་ཕབ་ནས་སྲིད་སྐྱོང་མཆོག་གི་སྐུ་པར་བསྐྱལ་བ་དང་། དེ་སྔོན་སན་ཕ་རན་སི་སེ་ཁོ་ལ་དོལ་ཚོགས་དང་འབྲེལ་བའི་གནད་དོན་ལྷག་པ་སོགས་དེ་དང་འདྲ་བའི་གནད་དོན་རིམ་པས་མངོན་ཆེ་ཆུང་གི་ངོ་བོར་ཐོན་ཡོད་པ་རེད།
དོན་གཅོད་འདི་པར་དོལ་རྒྱལ་རྗེས་འབྲངས་པའི་ཐོག་གཟིགས་སྟངས་དམིགས་བསལ་བ་ཞིག་ཡོད་པ་དེ་ཨ་རིའི་ཁུལ་བཞུགས་མི་སྣ་ཆེ་ཆུང་མང་པོར་ཐུགས་སྣང་བྱུང་ཡོད། ཁོང་གིས་ལས་ཀྱི་སྣེ་མོར་གཏོགས་པ་གང་ཙམ་འདུས་པའི་སྐབས་འགའ་ཤས་ལ་ནང་མའི་གསུང་བཤད་གནང་བའི་སྒྲ་འཇུག་ཀྱང་ཡོད་པ་རེད། གཟིགས་ཕྱོགས་དེའི་ཐོག་ནས་དུས་རྒྱུན་༸གོང་ས་མཆོག་ཆིབས་བསྒྱུར་སྐབས་བཞུགས་གནས་མགྲོན་ཁང་དང་། ཕེབས་ལམ་གཡས་གཡོན་དུ་བོད་རིགས་སྤྱི་མཐུན་ཚོགས་པ་དང་། ཚོགས་པ་གཞན་ཁག དང་བླང་མི་མང་རྣམས་འདུ་འཛོམས་མི་དགོས་པ་གཙོ་འདོན་གནང་གི་ཡོད་པ་དེ་ཡང་གནད་དོན་དེའི་གྲས་ཤིག་རེད། དོན་གཅོད་ཁང་དེ་དཔལ་ལྡན་སྲིད་སྐྱོང་མཆོག་གིས་ཐད་ཀར་གཟིགས་སྐྱོང་གནང་གི་ཡོད་ན་གཟིགས་ཚུལ་དེ་དཔལ་ལྡན་སྲིད་སྐྱོང་མཆོག་གི་དགོངས་ཚུལ་ཡིན་མི་སྲིད་པ་མིན་པས་གོང་གསལ་གཟིགས་ཚུལ་དེ་སྐྱེ་བོ་སྒེར་གྱི་དགོངས་པ་ཡིན་པར་ཚོད་དཔག་བྱས་ཆོག ཉེ་ཆར་ལོ་སེ་ཨེན་ཇེ་ལེ་སེ་ཡར་ལྷག་པའི་༸རྒྱལ་བའི་སྐུ་ཕྱཱ་དང་འབྲེལ་བའི་དོན་གནད་དེའི་ཐད་དཔལ་ལྡན་སྲིད་སྐྱོང་མཆོག་ནས་ཨ་རིའི་ས་ཁང་སྒྲིག་གཞི་དང་འབྲེལ་བའི་ཐོག་ནས་འགྲེལ་བཤད་ཅིག་གནང་བ་དེས་ཁུངས་འཁྱོལ་བ་བྱས་སོང་། སྤྱི་འཐུས་འགའ་ཤས་ཤིག་ནས་གནད་དོན་དེ་གལ་ཆེན་པོར་གཟིགས་ནས་འཕྲོས་དོན་དྲི་བ་ཕུལ་སོང་ཡང་གནད་དོན་དེ་དབུ་ཡག་པོ་ཞིག་ཚོད་མཁན་ཕལ་ཆེར་མེད་པ་རེད་འདུག
གལ་ཆེའི་རང་བཞིན་ལྡན་པའི་གནད་དོན་གང་ཞིག་ཡིན་ནའང་འོས་བསྡུའི་ལས་རིམ་ཞིག་དང་འབྲེལ་བ་ཆགས་ཡོད་དུས་གྲོས་ཚོགས་ནང་དཔུང་ཞིག་བསྒྲིལ་རྒྱུ་ལས་གནད་དོན་དེའི་གལ་གནད་རང་བཞིན་ལ་དགོངས་པ་བཞེས་མཁན་གྱི་འཐུས་མི་ཧ་ཅང་དཀོན་པོ་ཡིན་པ་བཞིན། ཁ་སང་ཡང་དེ་རང་གི་ངོ་བོར་ལྷག་ནས་སྤྱི་འཐུས་མང་པོས་གནད་དོན་འདི་གླེང་མི་དགོས་པ་དང་ཞི་འཇམ་ཡོང་རྒྱུ་རྩ་དོན་དུ་བཟུང་ཡོད་པ་རེད། དཔལ་ལྡན་སྲིད་སྐྱོང་མཆོག་གི་ངོས་ནས་ཀྱང་གནད་དོན་འདི་༸རྒྱལ་བའི་སྐུ་ཕྱཱ་དང་འབྲེལ་བའི་འགལ་འཛོལ་གྱི་གནད་དོན་གལ་ཆེན་ཞིག་མིན་པ་ལྟ་བུར་མཐའ་གཅིག་ཏུ་ཁུངས་སྐྱེལ་གནང་རྒྱུར་འབད་བརྩོན་གནང་སྟེ་མཐར་ཨ་རིའི་ས་ཁང་སྒྲིག་གཞིའི་འགྲོ་སྟངས་དང་། དོལ་ཚོགས་ཕེབས་འཁོར་འགྲམ་དུ་བསླེབས་མེད་པ། དོན་གཅོད་ཕེབས་བསུ་གོ་སྒྲིག་དང་འབྲེལ་བ་མེད་པ། གཤམ་འོག་ལས་བྱེད་གཅིག་གཟིགས་སྐོར་ལ་བཏང་བ་དེ་ཡང་གང་མིན་ཚད་ཡིན་སྐོར་སོགས་བཤད་ནས་༸སྐུ་ཕྱཱ་དང་འབྲེལ་བའི་གནད་དོན་དེ་ངོས་བཞེས་མ་གནང་བ་རེད། ཕོ་རྒོད་ཀྱང་རྒྱབ་ལ་དཔུང་ཞིག་དགོས་ཟེར་བའི་དཔེ་ལྟར་བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ནས་རང་ཁུར་ཕྲག་ཏུ་བླངས་ཏེ་ཕུལ་བའི་སྐར་རྟགས་ཅན་གྱི་དྲི་བ་དེ་ཡང་རྒྱབ་དཔུང་མེད་པའི་ཐོག་ནས་གྲོས་ཚོགས་རྭ་བའི་ནང་ནུས་མེད་ཉམ་ཆུང་ལྟ་བུར་གྱུར་བ་རེད། ཉེ་ཆར་ཕྱི་ཟླ་ ༧ ནང་ཨ་རིར་ཆིབས་བསྒྱུར་སྐབས་ནེའུ་ཡོག་ཏུ་ཨ་རིའི་ཁུལ་གྱི་བོད་རིགས་སྤྱིའི་གྱ་སྟོན་བརྟན་བཞུགས་ཀྱི་མཛད་སྒོ་དེ་ཙམ་མ་གཏོགས་དེ་མིན་མཛད་རིམ་ཁག་གོ་སྒྲིག་ཐད་དགོངས་བབས་ལེགས་པོ་ཞིག་བྱུང་མེད་པ་འབྲེལ་ཡོད་མང་པོས་གསལ་པོ་མཁྱེན་གྱི་ཡོད་ཀྱང་དགོས་པའི་དབང་གིས་མི་མཁྱེན་པའི་ཚུལ་མཛད་པ་ཞིག་ཡིན་གྱི་རེད། ལོ་སེ་ཨེན་ཇེ་ལེ་སེ་ཡར་ཆིབས་བསྒྱུར་མཛད་སྒོ་གོ་སྒྲིག་ཞུ་མཁན་གྱི་འབྲེལ་ཡོད་ཚོགས་པའི་སྣེ་ཁྲིད་མི་སྣ་གཅིག་གི་རྣམ་འགྱུར་དེས་ད་རེས་བོད་རིགས་མང་པོ་བློ་ཕམ་སྐྱེ་གཞིར་གྱུར་ཡོད་པ་རེད། ལྷག་པར་༸གོང་ས་མཆོག་ལའང་དགོངས་བབས་བྱུང་མེད་པ་གསལ་པོ་རེད།
གཅིག་བྱས་ན་འབྲེལ་ཡོད་མི་སྣ་དེ་དུས་རྒྱུན་ནས་རང་ཤེས་ཆེ་ཙམ་ཡོད་མཁན་ཞིག་ཡིན་ཙང་ད་རེས་དོན་གཅོད་དང་བོད་རིགས་སྤྱི་མཐུན་ཚོགས་པར་བརྩི་འཇོག་མ་བྱས་པ་ཡིན་སྲིད། ཡིན་ནའང་དཔལ་ལྡན་སྲིད་སྐྱོང་མཆོག་ནས་དེ་འདྲའི་འགྲེལ་བཤད་གང་ཡང་གནང་མ་སོང་། སྐུ་ངོ་དོན་གཅོད་དང་འབྲེལ་བ་གང་འདྲ་ཡོད་མི་ཤེས་ཀྱང་དཔལ་ལྡན་སྲིད་སྐྱོང་མཆོག་ལ་ཐུགས་འདྲིས་ཡོད་པ་ཞིག་ཡིན་དུས་སྤྱི་སྤམ་དུ་བཞག་པའང་ཡིན་སྲིད། སྤྱིར་ད་བར་གྱི་དོན་གཅོད་ཁང་སོ་སོའི་ལས་དོན་གལ་ཆེ་ཤོས་ཤིག་ནི་༸གོང་ས་མཆོག་ཕྱོགས་ཕེབས་ཆིབས་བསྒྱུར་སྐབས་མཛད་རིམ་ཕེབས་བསྒྲིགས་ཞུ་རྒྱུ་དེ་ཡིན་ནའང་། ལོ་ཤས་ནས་ཨ་རིའི་དོན་ཁང་གིས་དེའི་ཐད་ལྷོད་གཡེང་གནང་གི་ཡོད་པའི་མཐོང་ཚུལ་ཞིག་ཡོང་གི་ཡོད་པ་རེད། དཔལ་ལྡན་སྲིད་སྐྱོང་མཆོག་གི་ཐད་ཀའི་བཏང་འཛིན་འོག་ཡོད་པའི་བྱང་ཨ་རིའི་དོན་གཅོད་ཁང་དེར་༸གོང་ས་མཆོག་གི་ཆིབས་བསྒྱུར་མཛད་འཆར་གོ་སྒྲིག་ཞུ་རྒྱུ་དེ་ལས་ལྷག་པའི་གཞུང་འབྲེལ་མཛད་བྲེལ་ཆེ་ཐག་ཆོད་ནས་༸གོང་ས་མཆོག་གི་ཆིབས་བསྒྱུར་གོ་སྒྲིག་ཞུ་ཐུབ་ཐབས་མེད་ཚེ་དེ་འབྲེལ་གནས་ཚུལ་དགའ་ལྡན་ཕོ་བྲང་ཡིག་ཚང་ལ་སྙན་སེང་ཞུ་དགོས་པ་དང་། དགའ་ལྡན་ཕོ་བྲང་ཡིག་ཚང་ནས་ཀྱང་དེ་ལུགས་དགོངས་པ་བཞེས་ཏེ་བྱང་ཨ་རིའི་ཁུལ་དུ་༸གོང་ས་མཆོག་གི་ཆིབས་བསྒྱུར་སྐབས་མཛད་རིམ་གོ་སྒྲིག་ཞུ་མཁན་གྱི་དམིགས་བསལ་ལས་ཁུངས་ཤིག་ཟུར་དུ་བཙུགས་དགོས་མིན་དགོངས་བཞེས་གནང་གི་རེད་སྙམ། དེ་མིན་མི་གཉིས་བར་ལ་རྫ་ཆག་ཟེར་བའི་དཔེ་ལྟར་༸གོང་ས་མཆོག་དགུང་ན་མཐོ་པོ་ཕེབས་ཡོད་པར་བརྟེན་ཉིན་ཞིག་ནོང་འགྱོད་སྐྱེ་གཞིའི་ཐབས་སྡུག་གི་གནས་ཚུལ་ཞིག་ལྷག་མི་སྲིད་པ་མིན་པས་དེའི་ཐད་འབྲེལ་ཡོད་ཚང་མས་དགོངས་པ་བཞེས་དགོས་རེད་སྙམ།།
བོད་མི་ཚང་མའི་༧གོང་ས་མཆོག་གི་སྐུའི་སྲུང་ཕྱཱའི་སྐོར་ལ་གཟབས་གཟབས་བྱེད་རན་འདུག་པས། བོད་པ་བླ་མ་ལ་དད་པ་དང་ཡུད་ཆེ། གུས་ཞབས་ཡོད་མཁན་ཚོའི་ངེས་པར་དུ་འགན་ལེན་དགོས།
རྩོམ་ཡིག་འདིར་བསྔགས་བརྗོད་ཡོད།
༸གོང་ས་མཆོག་གི་སྐུ་ཕྱཱ་ལས་དོན་གཅོད་ཀྱི་མིང་སྲུང་སྐྱོབ་བྱེད་ཡས་དེ་གལ་ཆེ་བ་བརྩི་གི་འདུག དེ་འདྲ་བྱས་ན་ལས་འབྲས་ལ་འགྲོ་གི་མ་རེད་ད།