གླིང་གཅེར་བུ
དངོས་ནས་དྲང་ནས་བཤད་ན་ཨ་ཚོགས་ཀླུ་མཁར་བྱམས་སྲིད་སྐྱོང་ལ་བླངས་བའི་སྐོར་དང་ཁོང་གི་གཏམ་བཤད་སོགས་འཁྱོག་བཤད་དང་འུད་གཏམ་རྫུན་བསྒྲགས་སོགས་ཅི་ཡང་མེད་པར་༧གོང་ས་མཆོག་གི་རྣ་ལམ་ལ་དྲང་ཚིག་དང་བདེན་ཐུབ་ཀྱིས་འཇོག་ཐུབ་རྒྱུ་ན། ༧གོང་ས་མཆོག་སེམས་ཕམ་པ་ཕར་ཞོག་ཁོང་གིས་བོད་འབངས་ལ་དཀའ་སྡུག་ཁྲི་ཕྲག་གིས་གནང་བའི་དམངས་གཙོའི་ལམ་ལུགས་རླབས་པོ་ཆེ། ད་ནི་དངོས་ནས་བོད་མི་ཚོས་ལོངས་སུ་སྤྱོད་ཐུབ་ཀྱིན་འདུག་བསམ་ནས་ཐུགས་སེམས་ཤིན་ཏུ་ནས་དགའ་བར་འགྱུར་བ་གདོན་མི་ཟ། དེ་ནི་ང་ཚོས་ཁོང་ཉིད་ཀྱི་བཀའ་དང་གསུང་གི་དགོངས་པར་དངོས་ཤུགས་རྒྱུད་གསུམ་ནས་དཔྱད་ན་གསལ་བོར་ངེས་ཡོང་བ་ཞིག་རེད།
ཁོང་ཉིད་ཀྱིས་བོད་འབངས་དག་བྱེའུ་ཕྲུག་གསོ་གསོ་བྱས་ནས་ཡོང་བའི་མི་ལོ་རིང་མོ་དག་ལ་ཕྱིར་བལྟས་ཤིག་བྱས་ན། གསལ་ལེར་ངེས་པ་ནི་ཁོང་གིས་ཕྱོགས་ཡོང་ནས་བོད་མི་དག་གིས་ནམ་ཉི་མ་ཞིག་ལ་རང་ཉིན་ཚོའི་རྐང་འགོར་བླངས་ནས་རང་མགོ་ཞིག་འཁྱོང་བར་དཀའ་བ་མང་པོ་སྤྱད་པ་རེད། དཔེར་ན་ཁོང་ཉིད་ཀྱི་བཀའ་སློབ་རབ་དང་རིམ་པའི་ནང་དུ་ད་ཁྱེད་ཚོས་རྒྱལ་བ་རིན་པོ་ཆེ་མེད་པ་ལྟར་དུ་བསམ་བློ་བཏང་ནས་ཕྱོགས་ཡོང་ནས་རང་ཉིད་ཚོས་རང་མགོ་འཁྱོང་བ་བྱ་དགོས་པ་རེད།
ད་ལྟ་ང་ཡོད་པས་ག་རེ་ཡིན་ན་འགྲིག་འགྲོ་བ་ཞིག་ཡོད་པ་རེད་དེ། དེ་ལྟར་མ་ཡིན་པར་ནམ་ཉི་མ་ཞིག་ལ་རྒྱལ་བ་རིན་པོ་ཆེ་ཡང་འགྲོ་དགོས་པའི་ཉི་མ་ཞིག་ཡོད་པ་རེད་ལྟ་བུའི་བཀའ་སློབ་གསེར་ནག་འདྲ་བ་ཏག་ཏག་གནང་ཡོད་པ་རེད་ལ། དེ་ལྟར་དུ་ཁོང་ཉིད་ཀྱིས་སྲིད་ཀྱི་སྟེགས་བུ་དངོས་སུ་མི་དམངས་ལ་གནང་ནས་ད་ཁྱེད་རང་ཚོས་རང་མགོ་ཐོན་དགོས་པའི་བཀའ་སློབ་ཕ་ཡིས་བུ་ལ་གནང་བ་ལྟར་གནང་ཡོད་པ་རེད་མོད། དྲང་མོར་བཤད་ན་བོད་པ་ཚོས་དེ་དག་ཅི་ཡང་ཤེས་མེད་ཚོར་མེད་དུ་བཞག་ཡོད་པ་རེད་ལ། ཁོང་ཉིད་ཀྱིས་འཛམ་གླིང་མི་དམངས་ཡོངས་ལ་སྤོབས་པས་ངང་ནས་ད་ནི་ངས་སྲིད་དབང་མི་དམངས་ལ་རྩིས་སྤྲད་ཚར་ཡིན། ད་ང་ལ་སྲིད་ཀྱི་ཕྱོགས་ནས་འགན་ལན་ཅི་ཡང་མེད་པའི་གསུང་བཤད་ཆེ་ཆེར་གནང་ཡོད་ན་ཡང་། བོད་པ་ཚོས་ད་དུང་སྲིད་ཀྱི་རྙོག་ཟིང་ནང་དུ་ཁོང་ཉིད་བཙན་གྱིས་དྲུད་ནས་ཡོང་གིན་ཡོད་པ་རེད། ལྷག་པར་དུ་ད་ཐེངས་ཀྱི་བཀའ་སྤྱིའི་འོས་བསྡུའི་སྐབས་སུ་ཡང་རྣམ་པ་འདྲ་མིན་ནས་ཁོང་ཉིད་དྲུད་ཡོང་གིན་ཡོད་པ་རེད་ལ། དྲུད་ཡོང་སྟངས་དེ་ཡང་ཕྱོགས་གཅིག་ནས་༧རྒྱལ་བ་རིན་པོ་ཆེའི་བཀའ་བསྒྲུབ་རྒྱུ་ཟེར་ནས་རང་དོན་གཉེར་ཐབས་ལ་དྲུད་ནས་ཡོང་གིན་ཡོད་པ་རེད་ལ། ངོས་གཅིག་ནས་རྒྱལ་བ་རིན་པོ་ཆེ་ལ་དད་པ་མེད་ཚུལ་དང་དད་པ་ལོག་ཚུལ་བཤད་ནས་ཕ་རོལ་བོར་ནག་པོར་བཟོ་ཐབས་ལ་དྲུད་ཡོང་གི་ཡོད་པ་རེད། ང་ཚོའི་བཀའ་སྤྱིའི་འོས་མི་ནི་བོད་རྒྱལ་ཁབ་དང་དེ་ཡི་མ་འོངས་བའི་མདུན་ལམ་དང་ད་ལྟའི་དཀའ་སྡུག་གི་ཆེད་དུ་འདེམ་བཞིན་པ་མ་ཡིན་པར་རྒྱལ་བ་རིན་པོ་ཆེ་མི་སྒེར་གཅིག་གི་ཆེད་དུ་ཡིན་པ་ལྟ་བུའི་སྣང་བ་ཞིག་ཚོད་ཚོད་དུ་ཡོད་པ་རེད། ད་ནི་དངོས་ནས་ཁོང་ཉིད་ཀྱིས་གསུངས་པ་ལྟར་སྲིད་ཕྱོགས་ཀྱི་ལས་དོན་གང་ལ་ཡང་རྒྱལ་བ་རིན་པོ་ཆེ་མེད་པ་ལྟར་རང་ཁེ་གཞན་ཕམ་ག་རེ་ཡི་ཕྱོགས་ནས་ཁོང་ཉིད་དྲུད་མི་ཡོང་ཐབས་ཤིག་ཡོད་ན་ཇི་འདྲའི་ཡག་ག་ལའང་།
༧ རྒྱལ་བ་རིན་པོ་ཆེ་ནི་དུས་ནམ་ཡང་དམངས་གཙོ་གཙུག་ཏུ་བཀུར་བའི་མི་ཞིག་དང་དམངས་གཙོའི་སྲིད་གཞུང་ལ་བསམ་ཚུལ་དང་ལྟ་ཚུལ་གང་ཡང་ཡོང་བ་དང་ཡོང་དགོས་པར་སྒོ་ཀུན་ནས་བཀུར་མཁན་ཞིག་རེད། དཔེར་ན་ཁོང་ཉིད་ཐོག་དང་པོ་རྒྱ་གར་ལ་ཕེབས་པའི་སྐབས་སུ་རྒྱ་གར་གྲོས་ཚོགས་སུ་ཕེབས་པར་བསམ་ཚུལ་དང་ལྟ་ཚུལ་མི་མཐུན་པ་ཡོང་ནས་གྲོས་ཚོགས་ཚ་ཚ་འུར་འུར་ཡོད་པས་ཁོང་ལ་དམངས་གཙོ་ཡི་རིན་ཐང་དང་དེ་ཡི་ཕན་ཁེ་ཡིས་བློ་རྒྱ་ཆེ་ཆེར་སྟེར་བར་གསུངས་ཡོད་ལ། དེ་ལྟ་བུའི་དམངས་གཙོའི་ལམ་བུ་ཞིག་ལ་སྐྱོད་དགོས་པས་དགོངས་པ་ཡང་ཡང་གསུངས་ནས་ཡོད་པ་རེད། ལྷག་ཏུ་ད་ལྟའི་ཁ་ཚ་དགོས་གཏུག་གི་དུས་འདི་ལྟ་བུར་ང་ཚོས་ཁོང་ཉིད་ཀྱི་བཀའ་དགོངས་ལ་ངེས་ཤེས་རྙེད་དགོས་རྒྱུ་ཧ་ཅང་གལ་ཆེན་རེད། དད་པ་ཙམ་ཞིག་གཙོ་བོར་བཟུང་ནས་གནད་དོན་ལ་མ་དཔྱད་མ་རྟོག་པར་སོང་ན། ཁོང་ཉིད་ཀྱིས་སྔོན་ཆད་ཞིག་ལ་ཤེས་དགོས་མཁན་གྱི་བོད་པ་ཚོས་ངའི་དགོངས་པ་ཅི་ཡིན་ཤེས་ཀྱི་ཡོད་པ་མ་རེད། ཤེས་མི་དགོས་པའི་ཕྱི་གླིང་བ་ཚོས་གསལ་བོར་ཤེས་ཀྱི་ཡོད་པ་རེད་ཅེས་ཡིད་སེམས་སྐྱོ་སྐྱོ་ངང་ནས་གསུངས་པ་ལྟར། ད་དུང་འུ་ཚོས་ཁོང་ཉིད་ལོ་རྒན་བརྒྱད་ཅུའི་ལ་ཁ་ནས་ཡིད་སེམས་བདེ་རུ་འཇུག་རྒྱུ་མ་རེད།
དེ་བས་ཀླུ་མཁར་བྱམས་ནི་དོན་དམ་པར་བཤད་ན་རྒྱལ་བ་རིན་པོ་ཆེའི་རྣམ་དག་དྭངས་གཙང་གིས་གནང་བའི་དམངས་གཙོའི་རྒྱན་ཞིག་ཏུ་མ་གྱུར་ན་ཁོང་ཉིད་ཁ་ལ་འཁྱེར་ནས་དམངས་གཙོའི་འཇིག་རྟེན་ལ་རྨས་སྐྱོན་བཟོ་མཁན་ཞིག་མིན་པ་ཐག་ཆོད་རེད། བསམ་བློ་གུ་ཡངས་པོས་ལྟ་ཐུབ་ན་དོན་དངོས་སུ་ད་ལྟ་བར་དུ་ཀླུ་མཁར་བྱམས་ཀྱིས་༧རྒྱལ་བ་རིན་པོ་ཆེ་ལ་གནས་ལུགས་དང་འགལ་བའི་སྐད་ཆ་གཅིག་ཀྱང་བཤད་མི་འདུག་ཟེར་ན་འགྲིག་གི ཆབ་སྲིད་རིག་པའི་རིག་ལམ་གྱི་ངོས་ནས་བཤད་ན་རྒྱལ་བ་རིན་པོ་ཆེ་ཡང་མི་ཞིག་ཡིན་པས་འགལ་བ་དང་ནོར་བ་ཡོང་ཆོག་པ་ཞིག་རེད་ལ་ཡོང་བ་དེ་ལ་དེ་ལྟ་བའི་སྐད་ཆ་བཤད་པ་ཡང་དམངས་གཙོའི་ཁེ་དབང་ལོངས་སུ་སྤྱད་པ་ལས། གཞན་སྲིད་ཀྱི་མིག་ཟུང་གིས་ལྟ་ས་ན་ཆོས་ལུགས་རིག་པའི་ལྟ་ཚུལ་སྦད་དེ་མི་འགྲོ་བ་ཤེས་ན། ད་གཟོད་ང་ཚོས་ཀླུ་མཁར་བྱམས་ལ་ངེས་ཤེས་ཤིག་རྙེད་རྒྱུ་ཡོད་པ་རེད།
སྲིད་སྟེགས་ཀྱི་ཁེ་ཕན་རང་ལུགས་པ་ཚོས་༧རྒྱལ་བ་རིན་པོ་ཁ་ལ་ཁུར་ནས་ཁོང་ཉིད་ཁ་རུབ་གུ་དོག་པོ་ཞིག་ཏུ་བཟོ་བཞིན་པ་ལས། རྒྱལ་བ་རིན་པོ་ཆེ་ནི་དེ་ལྟ་བུའི་རང་ལྟ་མཆོག་འཛིན་གྱི་སྐྱེས་བུ་ཞིག་མིན་པ་ཀུན་གྱིས་ཤེས་གསལ་རེད། མཐའ་ན་ཁོང་གིས་ང་ཕྱེད་ཀ་ནང་བ་ཡིན་ལ་ཕྱེད་ཀ་གུང་ཁྲན་ཏང་ཡིན་ཟེར་བའི་ལྟ་བ་མི་འདྲ་བ་དང་འདོད་ཚུལ་མི་འདྲ་ཡོངས་ལ་གུས་གཙི་འཇོག་གིན་ཡོད་པ་རེད་ལ། ལྷག་ཏུ་ཀླུ་མཁར་བྱམས་ཀྱིས་སྲིད་སྐྱོངས་འོས་མིར་ལངས་བའི་སྔོན་འགྲོའི་བསྒྲགས་གཏམ་དག་དང་ཁོང་གིས་ཡང་དག་པའི་དམངས་གཙོ་ལ་བཟུང་བའི་ལྟ་ཚུལ་དག་ནི་༧རྒྱལ་བའི་དགོངས་བ་དང་ངོ་བོ་གཅིག་ཏུ་གྱུར་ནས་ཡོད་པར་བཤད་ན་འུད་དུ་གཏན་ནས་མི་འགྲོ དེ་བས་ཁེ་ཕན་རང་ལུགས་པ་ཚོ་དང་དད་ཞེན་རང་ལུགས་པ་དག་གིས་ཁོང་ཉིད་ཁ་ལ་ཁུར་ནས་རྒྱལ་བའི་ཕུགས་བསམ་གྱི་དམངས་གཙོའི་རྨི་ལམ་ལ་བར་ཆད་མ་བཟོས་ན་རེད།
སྤྱིར་བཏང་གི་མི་སུ་ཞིག་ཡིན་ནའང་། ཁ་སྒོ་ཕྱེས་པ་ཙམ་གྱི་ཡག་སྡུག་གང་རུང་ལས་གཞན་ཅི་ཞིག་འཆད་དམ།
མང་པོ་ཞིག་གིས་ང་ནི་༧གོང་ས་མཆོག་ལ་དད་པ་ཡང་དག་ཡོད། ངས་དུས་དང་རྣམ་པ་ཀུན་ཏུ་༧གོང་ས་མཆོག་གི་བཀའ་ལས་འགོངས་པའི་ལས་རྩ་བ་ནས་བྱེད་ཀྱིན་མེད་ཅེས་བརྗོད་མཁན་ཧ་ཅང་མང་། ཡིན་ན་ཡང་དོན་དངོས་ཐོག་རང་དོན་ལ་ཐུག་དུས་མང་པོ་མང་པོ་ཞིག་གིས་༧གོང་ས་མཆོག་དྲན་པ་བརྗེད་དེ། ལས་ངན་བསགས་མཁན་ག་ཙམ་ཡོད་མེད་བཤད་མ་དགོས་པ་ཞིག་རེད། གཞུང་ཞབས་མི་སྣ་ཞིག་ལ་ཁྱེད་ཀྱིས་ཕྱག་ལས་གནང་སྟངས་དེ་འདྲ་མ་མེད་ཅེས་ལབ་པ་ཡིན་ན།
གདོང་མདོག་དམར་པོ་ཆགས་ཏེ་ལམ་སང་ཁྱེད་རང་རྒྱ་མིའི་སོ་བ་དང་། ༧གོང་ས་མཆོག་གི་བཀའ་ལ་རྒྱབ་འགལ་བྱེད་བཞིན་འདུག་ཅེས། ཉེས་མེད་སྐྱོན་འཛུགས་ཀྱིས་ཐལ་བར་བརྫིས་འོང་། བྱེད་སྟངས་འདི་དག་ལ་གཅིག་གཟིགས་དང་། ལྐོག་གྱུར་ཀྱི་དོན་དག་མང་པོ་ཞིག་ཤེས་པར་བྱེད་པ་ལ། གཞུང་ཞབས་མི་དེའི་ཀུན་སྤྱོད་ལ་རྒྱུས་མངའ་འཚོལ་བཤེར་བྱེད་ནུས་དགོས། རྒྱུས་མངའ་སྤུ་ཙམ་ཡང་མེད་པར། རི་བོང་ཅལ་འདྲོགས་བྱས་ཏེ་འདུར་རྒྱུགས་བྱས་བསྡད་པ་ཡིན་ན། ནམ་ཞིག་གི་ཉི་མ་རང་མགོ་དེ་ཡང་བརླག་ཉེན་ཆེ། དད་པ་ཡོད་མེད་ཟེར་བ་དེ། མངོན་གསལ་དོད་པོས་ཤོད་རྒྱུ་ཞིག་གཏན་ནས་མིན། དད་པ་ནི་རང་གི་ཤ་གསིང་ལ་འཐིམ་ཡོད་པའི་མེ་བོའི་ཤུལ་བཞག་ཡིན། གང་ལྟར་སྤྱི་ཚོགས་འཆམས་མཐུན་གྱི་ཕྱོགས་ལ་འབབ་པ་བྱེད་རྒྱུ་ལས། ནང་དཀྲུགས་དང་། འགལ་ཟླའི་རལ་གྲི་སྔོན་མོ་གནམ་ལ་འཕྱར་བ་ཡིན་ན། མི་ལུས་འཐོབ་པའི་དགོས་དོན་འགྲུབ་ཡོད་མེད་བཤད་ཁག་པོ་རེད་སྙམ། ཡག་ན་སྡུག་ན། ཤ་དང་ཁྲག་རྒྱུན་གཅིག་པའི་རི་བོ་གངས་ཅན་བའི་ལ་རྒྱ་དངོས་དེ་ཡོད་ན། མཐུན་སྒྲིལ་ལ་འབབ་པ་བྱོས། ༧གོང་ས་མཆོག་གི་བཀའ་ཡང་དག་པ་ཞིག་བརྩི་བཞིན་ཡོད་ན། གཞན་ལ་ཕན་མ་ཐོག་ཀྱང་གནོད་པ་མ་བགྱིད་ཅེས་སློབ་གསོ་རིན་ཆེན་རིལ་བུ་དེ་ཟོས་དང་། སེམས་ཁམས་ཀྱིས་ནད་རྙིང་སེལ་ངེས།
དེ་འདྲ་ཞིག་གཏན་ནས་མ་རེད
ཚིག་འཆལ་ཟིག
སྲིད་ཀྱི་ཐོག་ནས་གསུང་པ་འགྲིགས་འདུག་ ཡིན་ནཡང་ཆོས་ལ་བསྐུར་བ་བཏབ་པ་ཧ་ཅང་ནོར་འདུག་
ཡག་པོ་བྲིས་འདུག།
ཡག་པོ་བྲིས་གནང་འདུག་བཀའ་དྲིན་ཆེ།