ལམ་འབྲས་ཚོགས་བཤད་ཆེན་མོའི་བཀའ་དབང་གནང་།

ས་སྐྱའི་འཁོན་གདུང་སྐུ་བགྲེས་རཏྣ་བཛྲ་རིན་པོ་ཆེ་མཆོག་གིས་ཀ་སྤུངས་ས་དགོན་བརྩེ་ཆེན་འཕྲིན་ལས་དར་རྒྱས་གླིང་དུ་ཟླ་ ༢ ལྷག་རིང་དད་ལྡན་སེར་སྐྱ་ ༡༠༠༠ བརྒལ་བར་ལམ་འབྲས་ཚོགས་བཤད་ཆེན་མོའི་བཀའ་དབང་གནང་བཞིན་ཡོད་འདུག

 འདི་གར་ཐུབ་བསྟན་རྒྱལ་མཚན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཁ་སང་ཕྱི་ཚེས་ ༧ ཉིན་ནས་བཟུང་ཀ་སྤུངས་ས་དགོན་བརྩེ་ཆེན་འཕྲིན་ལས་དར་རྒྱས་གླིང་དུ། ས་སྐྱའི་འཁོན་གདུང་སྐུ་བགྲེས་རཏྣ་བཛྲ་རིན་པོ་ཆེ་མཆོག་གིས་ཟླ་ ༢ ལྷག་རིང་སྐུའི་གདུང་སྲས་རྣམ་པའི་དབུས། རིས་མེད་ཆོས་བརྒྱུད་ཁག་གི་བླ་སྤྲུལ་རྣམ་པ་གཙོ་བོར་གྱུར་བའི་རྒྱལ་ཁབ་ཕྱི་ནང་ནས་ཕེབས་པའི་དད་ལྡན་ཆོས་ཞུ་བ་བཅས་མི་གྲངས་ ༡༠༠༠ ལྷག་ལ་དཔལ་ས་སྐྱ་པའི་ཡབ་ཆོས་གསུང་ངག་རིན་པོ་ཆེ་ལམ་འབྲས་ཚོགས་བཤད་ཆེན་མོའི་བཀའ་དབང་གནང་བཞིན་འདུག

དེ་ཡང་སྔོན་བྱོན་ས་སྐྱ་༧གོང་མ་རིན་པོ་ཆེ་ཕྱག་སྲོལ་ལྟར་ལམ་འབྲས་ཀྱི་བཀའ་ཁྲིད་མ་གནང་སྔོན་སྟེ། ཕྱི་ཚེས་ ༥ ཉིན་གྱི་སྔ་དྲོར་ས་སྐྱ་༧གོང་མ་རིན་པོ་ཆེ་མཆོག་གིས་ཆོས་ཞུ་བ་ཡོངས་ལ་རྣམ་རྒྱལ་མའི་རྗེས་གནང་དང་། རི་ཁྲོད་ལོ་མ་གྱོན་མའི་རྗེས་གནང་། འབྱུང་འདུལ་རྗེས་གནང་བཅས་བསྩལ་གནང་མཛད་ཡོད་པ་མ་ཟད། ཉིན་དེའི་ཕྱི་དྲོར་ལམ་འབྲས་ཚོགས་བཤད་ཆེན་མོའི་བཀའ་ཁྲིད་དངོས་སུ་དབུ་འཛུགས་གནང་ཡོད་པ་རེད།

འཁོན་གདུང་སྐུ་བགྲེས་རཏྣ་བཛྲ་རིན་པོ་ཆེ་མཆོག་གིས་ཕྱག་བཏབས་མཛད་པའི་ཀ་སྤུངས་ས་དགོན་བརྩེ་ཆེན་འཕྲིན་ལས་དར་རྒྱས་གླིང་ནི། ས་གནས་མི་མང་གི་རེ་འདུན་ལྟར་ཕྱི་ལོ་ ༢༠༠༦ ལོ་ནས་སླར་གསོ་དབུ་འཛུགས་གནང་སྟེ། འདི་ལོ་ས་སྐྱ་༧གོང་མ་རིན་པོ་ཆེ་མཆོག་དགུང་གྲངས་ ༧༠ ཕེབས་པའི་སྐུའི་འཁྲུངས་སྐར་དང་བསྟུན། ཕྱི་ཟླ་ ༩ ཚེས་ ༡༤ ཉིན་༧གོང་མ་རིན་པོ་ཆེ་མཆོག་གི་དབུས་དགའ་ལྡན་ཕོ་བྲང་དང་ཆོས་རིག་ལས་ཁུངས། བོད་མི་མང་སྤྱི་འཐུས་ལྷན་ཚོགས་བཅས་ཀྱི་སྐུ་ཚབ་རྣམས་ལྷན་བཞུགས་ཐོག དགོན་དེའི་ཕྱི་ནང་གི་རྟེན་དང་བརྟེན་པ་བཅས་སླར་གསོ་ལེགས་འགྲུབ་ཟིན་པའི་རྟེན་འབྲེལ་མཛད་སྒོ་ཚོགས་ཡོད་འདུག

གསར་འགོད་པ། པདྨ་རྒྱལ།